1. Indi wuswa wutukweti wakufwikija yuma yitwabula kumona wunateli kutukwasha ñahi? (Talenu mwevulu wakutachikilahu.)

 NZAMBI watwinka chawana chakwikala nawuswa wakufwikija nyevulu yayuma yitwabula kumona. Wuswa weniwu watukwashaña kufuukula chiwahi nikutalila yuma yayiwahi kumbidi. Yehova weluka yuma yikamwekana kumbidi nawa watulejelaña chadimu yuma yayivulu yikamwekana kumbidi kuhitila muBayibolu. Tunateli kufwikija nyevulu yayuma yikamwekana. Kafwampi wuswa wutukweti wakumona yuma yitwabula komana watukwashaña kwikala nachikuhwelelu.—2 Kor. 4:18.

2, 3. (a) Indi yuma yitwafwikijaña yatukwashaña ñahi? (b) Malwihwinyi itukuhanjekahu muchinu chibaaba?

² Bayi neyi mpinji yejima twafwikijaña nyevulu yayuma yitwamonañaku. Chakutalilahu, neyi kansi wamumbanda yafwikija nakandami hepupula (kazwazwa), chumichi hichilota hohu. Hampinji yadiña nakutoñojokayi Hana hayuma yikamwekana neyi namutwali dehi mwanindi Samweli nakuzatila hatabanaka, kwadiña chuma chaletesheli yafwikiji mwenimu. Chashindameneni hachuma chafuukwiliyi, nawa chumichi chamukwashili kwila mwafukwiliyi. (1 Sam. 1:22) Neyi tufwikijaña hayuma yatukanayi Nzambi, dikwila nawu tunakutoñojoka hayuma yikamwekana.—2 Pet. 1:19-21.

 ³ Chakadi nikujina, antu ashinshika akushankulu afwikijileña yuma yayikaniniyi Nzambi. Indi awa antu ahetelelumu ñahi kuhitila mukufwikija hankisu yakumbidi? Nawa tunateli kuhetelañamu ñahi neyi tutoñojokaña hayuma yayiwahi yakanayi Nzambi nindi wakayinka antu ovwahila?

4. Chumanyi chamuleñeleli Abeli afwikijeña yuma yikamwekana kumbidi?

⁴ Komana Abeli, muntu watachi washinshika ‘wamweni’ chuma chidi chejima chakaniniyi Yehova? Tunateli kuhosha wanyi netu Abeli welukili chadimu yuma yikamwekana yashimunawu muchikaninu chezu daNzambi chamulejeluwu kapela nawu: “Nukusha nkunyi mukachi keyeyi namumbanda, nimukachi kawanyaneyi nawanyanindi; akakuchika kumutu, nineyi wakamuchika kukatutu.” (Kutach. 3:14, 15) Hela chochu, Abeli watela watoñojokeli chikupu hanichi chikaninu nawa welukili nindi kwakekala muntu ‘akachikawu kukatutu’ kulonda antu akekali awanina neyi chadiña aAdama naEvu henohu kanda avulumuni. Hichikweti muloña nachuma chafwikijileñayi Abeli kutalisha hayuma yakumbiduku, wakuhweleleli muchikaninu chaNzambi nawa Yehova wetejeli mulambu windi.—Tañenu Kutachika 4:3-5; Aheberu 11:4.

5. Muloñadi kufwikija yuma yikamwekana kumbidi chiyamukolesheli Enoki?

⁵ Enoki washinshika wadiña nachikuhwelelu, hela chakwila washakamineña nawantu atama ahosheleña yuma yatama hadi Nzambi. Enoki amoneneni kulonda yaprofweti nindi Yehova wukenza “namakumi amakombakaji awantu indi ajila, nakwila mudimu wakusompesha nakukonkolola ejima asekeshaña Nzambi, nanyidimu yawu yakusekesha Nzambi yakoñeluwu chakusekesha Nzambi, nayuma yakala yejima yamuhosheluwu akwanshidi asekeshaña Nzambi.” (Yuda 14, 15) Chineli Enoki wadiña nachikuhwelelu, watela wafwikijileña yuma chiyikekala mukaayi mwabula antu atama.—Tañenu Aheberu 11:5, 6.

6. Indi Nowa watela watwalekeluhu kutoñojoka hachumanyi hanyima yadibaji?

⁶ Nowa wapulukili haDibaji muloña wadiña nachikuhwelelu. (Heb. 11:7) Chamanini Dibaji, chikuhwelelu chamuleñeleleli kulambula nyilambu yawanyama. (Kutach. 8:20) Kufwana Abeli, chakadi nikujina Nowa wakuhweleleli nindi antu akafuma muwuduñu wanshidi nikufwa. Chamanini Dibaji watachikili cheñi kushakama mukaayi katamini mwadiña Nimirodi wadikañili naYehova, ilaña Nowa watwelekeluhu nachikuhwelelu. (Kutach. 10:8-12) Chakadi nikujina, watiyileña kuwaha kutoñojoka chakalubukawu antu kudi anyuuli ayikabishaña, nshidi yaswaninuwu nikufwa. Anetu nawa tunateli ‘kumona’ yuma yayiwahi yamuchidiwu nawa yidi kwakwihi.—Rom. 6:23.

7. Yumanyi yakumbidi ‘yamwenuwu’ aAbarahama, Isaka niYakoba?

⁷ Abarahama, Isaka, niYakoba atela afwikijileña chihandilu chachiwahi chakumbidi muloña Nzambi wayikanini nindi nyunza yejima yaheseki akayikiswila kuhitila mudi anyanawu. (Kutach. 22:18; 26:4; 28:14) Anyana kanana ankakulula adi kuvula nakushakama Mwituña daChikaninu dayinkeliyi Nzambi. (Kutach. 15:5-7) Muloña wakwikala nachikuhwelelu, ana antu amwakamineña Nzambi ‘amweni’ anyanawu anakushakama mwituña dachikaninu. Kufuma tuhu mpinji yelili antu ekali abula kuwanina, Yehova wayikanini ambuñindi ashinshika nindi akatambwila nkisu yajimbesheliyi Adama.

8. Chumanyi chamukwashili Abarahama kwikala nachikuhwelelu chakola?

 ⁸ Muloña wakwila Abarahama wadiña nakufwikija yuma yakaniniyi Nzambi, chumichi chamukwashili kwikala nachikuhwelelu chakola. Bayibolu yahosha nawu hela chakwila Abarahama niambuña Nzambi amakwawu ashinshika afwili “chakadi kutambula yikaninu, akuminini dakuyimwena maaya.” (Tañenu Aheberu 11:8-13.) Abarahama wadiña nawunsahu wawuvulu wakumwekesha nindi yuma yachiñejeleñayi yalala chakwila wadiña neyi nakumona yuma yabulili kumonayi.

9. Indi kukuhwelela muyikaninu yaNzambi kwamukwashili ñahi Abarahama?

⁹ Muloña Abarahama wakuhweleleli yikaninu yaNzambi, chumichi chamukolesheli kwila nkeñelu yaNzambi. Wafumini mumusumba waUri muloña wakwikala nachikuhwelelu nawa wakaanini kushakama munyisumba yejima yamuKenani. Kufwana antu amuUri, antu amuKenani hiyadiña nachikuhwelelu chakolaku muloña ayiyuulileña kudi antu abulileña kumwakama Nzambi. (Yosh. 24:2) Muchihandilu chindi chejima, Abarahama “wadiñi nakutalila ñanda yikweti yikuku, yakwila mukwakuyipima nikuyituña yowu Nzambi.” (Heb. 11:10) Abarahama ‘wadimweni’ nakushakama mwiluña dadiwahi dinakuyuulawu kudi Yehova. Abeli, Enoki, Nowa, Abarahama niantu amakwawu adiña neyi wena akuhweleleli mukusañuka kwawafu nakutalila wumi hamaseki muchiyuulu chaWanta waNzambi, ‘ñanda yikweti yikuku yalala.’ Kufwikija hankisu jamuchidiwu kwakolesheli chikuhwelelu chawu mudi Yehova.—Tañenu Aheberu 11:15, 16.

10. Indi Sara chamweneñayi yuma yikamwekana kumbidi chamukwashili ñahi?

¹⁰ Shinshikenu iñoda Abarahama, Sara. Nihampinji yadiñayi nayaaka 90 yakusemuka nawa chakadi mwana wadiña nachikuhwelelu muloña watalilileña yuma yayiwahi yakumbidi. Munjila yikwawu, wamweneña mwanindi nakudiluñisha yuma yayiwahi yakaniniyi Yehova. (Heb. 11:11, 12) Chumanyi chaletesheli atalileña yumiyi? Yehova wamulejeli nfumwindi nindi: ‘Nukumukoolekesha, mwamweni nukukwinka mwana weyala nayena; mwalala nukumukoolekesha, wamba kekala nyunza yayeni; anyanta jawantu amba kafuma kudi yena.’ (Kutach. 17:16) Chelili Sara navwali dehi Isaka, wadiña namuloña washikila wakufwikija kushikijewa kwayikaninu yejima yamukaninuwu Abarahama kudi Nzambi. Anetu nawa tukweti chawana chachiwahi chakufwikija yuma yayiwahi yatukanayi Nzambi nawa yikashikijewa.

11, 12. Indi Mosi watachikili ñahi kumukeña Yehova?

¹¹ Mosi himuntu mukwawu wamukuhweleleli Yehova nawa wamukeñeli chikupu. Hampinji yadiñayi Mosi kansi washakamineña kuchipañu chamuEjipitu, dichi wateleleli kukeña maheta nikufwila kutiyakana mpuhu. Kafwampi anvwali jindi amuvwalili amudizishili Mosi nsañu yaYehova ninkeñelu yaNzambi yakulubula aHeberu muwunduñu nakuyitwala Mwituña daChikaninu. (Kutach. 13:14, 15; Kwid. 2:5-10) Neyi Mosi wavulili kutoñojoka hankisu yakatambwilawu antu jaNzambi kumbidi, munakutoñojoka nenu chumanyi chadiña mumuchima windi, kufwila mpuhu tahindi kumukeña Yehova?

¹² Bayibolu yatulejaña nawu: “Nakukuhwelela Mosi, heliliyi nakuli dehi, hakuleka kumutena nawu mwana kamwana kaFwaro wamumbanda; hakutonda kumona ihuñu chimu nawantu aNzambi, hakuleka kuluña mpinji yantesha nachiseki chanshidi. Wafuukwili kusawuka kwaKristu nindi himaheta abadika yuma yalema yamuEjipitu  yejima, nanochu chatalililiyi masomu amba kamusomonawu.”—Heb. 11:24-26.

13. Indi Mosi wahetelelumu ñahi hakutoñojoka chikupu hayikaninu yaNzambi?

¹³ Mosi chatoñojokeliyi chikupu hayuma yakaniniyi Yehova aIsarela, chikuhwelelu chindi nikukeña kwamukeñeliyi Nzambi kwaswejeleluku. Kufwana antu amakwawu amwakamaña Nzambi, chakadi nikujina wafwikijileña mpinji yamba kalubulayi Yehova antu muwunduñu wakufwa. (Yoba 14:14, 15; Heb. 11:17-19) Dimuloña waweni wamuleñeleli Mosi yamukeñi Nzambi watiyilili wushona aHeberu niantu ejima. Chikuhwelelu nikukeña kwamuleñeleli Mosi kumukeña Nzambi muchihandilu chindi chejima. (Kuhit. 6:4, 5) Hela chakwila Fwaro wamuchinishili Mosi nindi wukumujaha, chikuhwelelu, kumukeña kwamukeñeliyi Nzambi nikufwikija chihandilu chachiwahi chakumbidi, yumiyi yamuleñeleli kwikala nawulobu wakudimona cheñi nindi.—Kwid. 10:28, 29.

14. Yumanyi yafwikijañawu antu amakwawu hachihandilu chakumbidi?

¹⁴ Antu amavulu makonu afwikijaña yuma yikabula kumwekana kumbidi. Chakutalilahu, hela akweti maheta antesha, atoñojokaña kwikala namaheta amavulu chikupu nikwikala nachihandilu chachiwahi, hela chakwila chihandilu chawantu makonu “chakukabakana hohu nakumona ihuñu.” (Mas. 90:10) Afwikijaña anakushakama chakubula kumona yihuñu munfulumendi yawantu, henohu Bayibolu yashimuna nawu Wanta waNzambi hohu diwu wakaleta chihandilu chachiwahi. (Dan. 2:44) Antu amavulu atoñojokaña nawu Nzambi hakakisañana kaayi katama kamakonuku, ilaña Bayibolu yashimunaña yuma yambukaku. (Zef. 1:18; 1 Yow. 2:15-17) Antu adiwulaña nkeñelu yaYehova nakukuhwelela yuma yamakonu, akatiya nsonyi.

15. (a) Indi akwaKristu ahetelañamu ñahi neyi afwikija yuma yachiñejañawu? (b) Shimunenu yuma yimwatalilaña hampinji yakashikijayi Nzambi yikaninu yindi.

¹⁵ Kwambukaku, etu akwaKristu atukolesha kufwikija hachihandilu chetu chakushakama mwiwulu hela hamaseki. Komana munateli kufwikija munakudiluñisha yuma yatukanayi Nzambi? Kutoñojoka chikupu hayuma yimwakela neyi Nzambi nashikiji dehi yuma yakanayi, chakadi nikujina chayizañaleshaña. Hadaha ‘mwadimonaña’ munakushakama hamaseki haya nyaka. Toñojokenu chimwakatiyañanaña nawakwenu hakubalumuna dinu iseki kulonda dikali paradisa. Antuñi nenu akamukeña Yehova neyi chimwamukeña enu. Mwakola kumujimba, mudi nañovu nawa kwosi chuma chimunakwakamena. Munakudiluñisha muloña antu anakulombola mudimu wakuwahisha iseki anakuyakamena chiwahi. Nawa munakutiya kuwaha kuzata mudimu wumweluka muloña yuma yejima yimunakuzata yinakukwasha antu amakwawu nikulemesha Nzambi. Chakutalilahu, munakukwasha amaha akasañulawu kulonda amwiluki Yehova. (Yow. 17:3; Yil. 24:15) Neyi munakufwikija yuma yamuchidiwu, himunakulotaku. Yumiyi yikashikijewa muloña Bayibolu yahosha hayuma yikamwekana kumbidi.—Isa. 11:9; 25:8; 33:24; 35:5-7; 65:22.

16, 17. Twahetelañamu ñahi neyi tuhoshaña hayuma yitwachiñejaña?

¹⁶ Neyi tuleja akwetu akwaKristu yuma yitwakela hampinji yakashikijayi Yehova yikaninu yindi, tukumona chiwahi yuma yakumbidi yitwafwikijaña. Hela chakwila tuneluki wanyi chakekala chihandilu chetu mwituña dadiha, neyi tuhoshaña hayuma yitwatalilaña, tukudikoleshaña wumu namukwawu nikumwekesha netu twakuhwelela  yuma yakanayi Nzambi. Kapostolu Pawulu chahempwiliyi amana kwindi muRoma, atiyili kuwaha muloña ‘adikolesheli wumu namukwawu,’ ninetu tunateli kudikolesha muniyi mpinji yakala.—Rom. 1:11, 12.

¹⁷ Kufwikija hayuma yakumbidi kunateli kutukwasha cheñi kubula kwikala nayitoñojoka yatama kutalisha hakukala kutwamonaña makonu. Kapostolu Petulu watela wakameneneña hampinji yamulejeliyi Yesu nindi: “Tala, etu tunashiyi yuma yejima, tunakulondeli; indi etu twakatambuladi?” Hakwila yamukwashi Petulu nialundanindi kulonda afwikijeña yuma yakumbidi, Yesu wakwili nindi: ‘Nukuyileja chalala nami, hakuleña kwakwiha chakashakamayi Mwana kamuntu hetanda dawanta dakulema kwindi, enu nawa munanlondami mwakashakama hamatanda awanta ikumi nayedi, nakusompesha nyunza yaIsarela ikumi nayiyedi. Ejima anashiyi hela matala, hela ana kwawu, hela ahelawu, hela atata jawu, hela amama jawu, hela anyana, hela maha, hansañu yejina dami, akatambwilamu nkulakaji, akaswana niwumi wahaya nyaka.’ (Mat. 19:27-29) Petulu niatumbanji amakwawu ateleleli kutoñojoka hamudimu wakazatañawu munfulumendi yikayuula iseki dejima nakuleta nkisu yayiwahi kudi antu ovwahila.

18. Indi kutoñojoka chikashikijewa yikaninu yaNzambi kwatukwashaña ñahi makonu?

¹⁸ Ambuña Yehova ahamaseki ahetelañamu mpinji yejima neyi atoñojoka chikashikijewa yikaninu yaNzambi. Abeli welukili yuma yayivulu kutalisha hankeñelu yaNzambi hakwila yafwikiji chihandilu chachiwahi chakumbidi, wadiña nachikuhwelelu nawa wachiñejeleña yuma yakanayi Nzambi. Abarahama wadiña nachikuhwelelu chakola muloña ‘wamweni’ kushikijewa kwawuprofwetu waNzambi wahosheleña hadi ‘mwana’ akaninuwu. (Kutach. 3:15) Mosi ‘watalilili chikupu hesomu damba kamusomwenawu,’ wadiña nachikuhwelelu nawa kukeña kwamukeñeliyi Yehova kwaswejeli. (Heb. 11:26) Chikuhwelelu chetu nikukeña kutwamukeña Nzambi kunateli kusweja neyi tuzatisha wuswa wutukweti wakufwikija chikashikijewa yikaninu yaYehova. Muchibaaba chinalondeluhu tukahanjeka chitunateli kuzatisha chiwahi ichi chawana chatwinkayi Nzambi.