Hayaaka yayivulu yinahituhu, nyikanda yetu yalumbulwileña nawu Gogi waMagogi hiijina damwinkeluwu Satana Diyabolu kufuma hampinji yamuhañiluwu mwiwulu. Iku kulumbulula kwashindameneni hawunsahu washimunawu mumukanda waChimwekeshu nawu Satana Diyabolu diyi nlomboli wakaayi kejima walukukaña antu jaNzambi. (Chim. 12:1-17) Dichi twamweneña netu Gogi hiijina dikwawu daSatana dashimunawu muwuprofwetu.

Ilaña iku kulumbulula kwaleñeleli kwihula malwihu alema amakwawu. Muloñadi? Shinshikenu chumichi: Kufuma hampinji yamushindiluwu Gogi, Yehova wahosheli hadi Gogi nindi: “Nakakuhana kudi atujila atuhuka anyitundu yejima, nikudi anyama amumpata akakuvwoti.” (Ezek. 39:4) Yehova hakubombelahu nindi: “Dena ifuku odu nakamwinka Gogi chipela chamuIsarela chakujiika . . . Kwenoku diku kwakajiikawu Gogi naluntu lwindi lwejima.” (Ezek. 39:11) Indi chileñaleña wakuspiritu anateli kumudya ñahi kudi “atujila atuhuka nikudi anyama amumpata”? Indi Satana anateli kumwinka ñahi ‘chipela chakumujiikila’ hanu hamaseki? Bayibolu yalumbulula hatooka to-o nawu Satana akamusha mwikela hadi yaaka 1,000, bayi neyi akamudya hela kumujiikaku.—Chim. 20:1, 2.

Atuleja nawu kumakumishilu ayaaka ikombakaji Satana akamufumisha mwikela ‘kulonda akayi nakudimba nyunza yekala kunsa jeseki jiwana, wowu aGogi naMagogi, hakuyipompesha akaasi njita.’ (Chim. 20:8) Satana nateli kudimba ñahi Gogi neyi yena diyi Gogi? Dichi, “Gogi” atenawu muwuprofwetu waEzekeli hela mumukanda waChimwekeshu hidiyi Satanaku.

Hanu dinu Gogi waMagogi hinyi? Hakwila twakuli ilu lwihu, twatela kusandujola muNyikanda Yajila kulonda tuwani muntu wakalukuka antu jaNzambi. Bayibolu hiyahosha hohu hakulukuka ‘kwaGogi waMagoguku,’ ilaña yahosha cheñi hakulukuka ‘kwamwanta wakukabeta kakuchimunswa’ nihakulukuka ‘kwawanyanta ankanu ahanu hamaseki.’ (Ezek. 38:2, 10-13; Dan. 11:40, 44, 45; Chim. 17:14; 19:19) Komana yumiyi yemenañaku kulukuka kwashiyashana? Inehi. Chakadi nikujina, Bayibolu yashimuna kulukuka kwokumu kuzatisha majina ashiyashana. Muloñadi chitunahosheli mwenimu? Muloña Bayibolu yatuleja nawu nyunza yejima yahamaseki yakadibomba hamu haniku kulukuka kwamakumishilu kwakaleta njita yaAmagedoni.—Chim. 16:14, 16.

 Neyi twesekeja iyi nsañu yejima yamuBayibolu yahosha hakulukuka kwamakumishilu kwakayilukukawu antu jaNzambi, chinamwekani hatooka nawu ijina daGogi waMagogi hidatalisha kudi Satanaku, ilaña kudi nyunza yayivulu. Komana “mwanta wakuchimunswa” wachifwikija diyi wakalombola iyi nyunza yayivulu? Hitunateli kushimuna jiikaku. Ilaña iyi nsañu yesakana nansañu yahosheliyi Yehova hadi Gogi nindi: ‘Wakafuma muchipela cheyi oku kukabeta kakuchimunswa kwakweni, nineyi ninyunza yawantu yayivulu hamu naneyi, wejima wawu adi nakwendela hatuwalu hohu, chendu cheneni nanjita yasweja kuvula.’—Ezek. 38:6, 15.

Munjila yoyimu, kaprofwetu Danyeli washakamineña mumpinji yoyimu naEzekeli wahosheli hadi mwanta wakukabeta kakuchimunswa nindi: “Nsañu jakumusela nijakukabeta kakuchimunswa jakamwakamisha; wakaya nakulendumuka nindi akakisañani, akajilumuni chikupu antu amavulu. Wakalema matenti indi amaneni awanta kuneli kaluñalwiji iku, mpidi yalubanji yajila iku, yena hakachi; ilaña jakamukuma, kwosi niniwu wakamukwashaku.” (Dan. 11:44, 45) Yumiyi yadifwana nansañu yashimunawu mumukanda waEzekeli kutalisha hanyidimu yaGogi.—Ezek. 38:8-12, 16.

Yumanyi yikwawu yikamwekana haniku kulukuka kwakukumishaku? Danyeli watuleja nindi: ‘Hampinji oyu Mikeli [Yesu Kristu] wakemana [hampinji yaAmagedoni], yowu kalamba muneni wemenaña [kufuma tuhu mu 1914] akwamunza wenu. Muloña hakekala mpinji yayihuñu [yakadi kumonañahu dehi], kufumisha hadiñi munza kushika nikumpinji oyu. Hampinji oyu munza wenu wakapuluka, onsu akawanawu anayisoneki mumukanda.’ (Dan. 12:1) Iyi nsañu yesakana nayuma yakelayi Yesu yashimunawu mumukanda waChimwekeshu 19:11-21.

Hanu dinu hinyi “Gogi waMagogi” washimunawu haChimwekeshu 20:8? Hampinji yakweseka kwakukumishaku kukamwekana kumakumishilu ayaaka ikombakaji, antu akadikaña naYehova akekala nayililu yawubanji neyi ‘yaGogi waMagogi,’ dikwila nawu nyunza yikalukuka antu jaNzambi kumakumishilu alukadi lweneni. Nawa mazanvu ejima akayijilumuna haya nyaka. (Chim. 19:20, 21; 20:9) Dichi tunateli kuhosha netu, antu ejima akadikaña kumakumishilu Ikombakaji Dayaaka, ayitenaña nawu: “Gogi waMagogi.”

Chineli tudi atudizi aBayibolu adikita, tunakutalila chikupu kulonda twakeluki muntu wakekala “mwanta wakukabeta kakuchimunswa” kumafuku akumbidi. Hichikweti muloña namuntu wukalombola iyi nyunza yayivuluku, twakuhwelela yuma yiyedi: (1) Gogi waMagogi nimashidika indi akayishinda nikuyijilumuna; nawa (2) Mwanta wetu Yesu Kristu wunakuyuula, wakapulwisha antu jaNzambi nakuyiñija mwituña dadiha mwakekala kuwunda kwakweni.—Chim. 7:14-17.