1. (a) Muloñadi chichalemena kudikaña naSatana makonu? (b) Tuneluki ñahi netu tunateli kushinda ndombu yitwalwaña naSatana?

 SATANA wudi nadombu nawawayishewa ashalahu ‘nianyikoku acheñi.’ (Yow. 10:16) Diyabolu nakufwila kudya ambuña Yehova amavulu chikupu mukapinji kantesha kanashaliyi naku. (Tañenu Chimwekeshu 12:9, 12.) Komana tunateli kushinda ndombu yitwalwaña naSatana? Eña. Bayibolu yahosha nawu: ‘Dikañenu naDiyabolu, niyena wukuyitemuka.’—Yak. 4:7.

2, 3. (a) Indi yitoñojoka yakwila nawu Satana wekalaku wanyi yatandishaña ñahi makudi aDiyabolu? (b) Mweluka ñahi nenu Satana wekala kwoku?

² Antu amavulu ajinookaña nawu Satana wekala kwoku. Antu wenawa atoñojokaña nawu Satana niandemoni adi neyi antu akulumbisha hohu amunyikanda, mujifilimu jatama niyisela yahavidiyo. Antu amuchidiwu atoñojokaña nawu muntu wukweti maana hatela kukuhwelela nindi aspiritu atama ekala kwokuku. Komana munakutoñojoka nenu Satana watiyaña kutama muloña antu akuhwelela wanyi nawu yena niandemoni jindi ekala kwoku? Piñi mwani. Kafwampi Satana chamukalilaña wanyi kuputisha mesu ayitoñojoka yawantu ajinokaña nawu wekala kwoku. (2 Kor. 4:4) Satana watandishaña yitoñojoka yakwila nawu aspiritu ekalaku wanyi kulonda aluwañeshi antu.

³ Chineli twekala ambuña Yehova, hitwekala hakachi kanawa adimbañawuku. Tweluka netu Diyabolu wekala kwoku, muloña Satana  diyi wahosheli naEvu kuhitila mudi kapela. (Kutach. 3:1-5) Satana wamusawili Yehova hansañu yaYoba. (Yoba 1:9-12) Satana diyi wafwilileña kumweseka Yesu. (Mat. 4:1-10) Hanyima yakuvwalika kwaWanta waNzambi mu 1914, Satana diyi watachikili ‘kwasa njita’ nawashalahu awayishewa. (Chim. 12:17) Iyi njita yatwalekeluhu muloña Satana wafwilaña kukisa chikuhwelelu chawakwaKristu ashalahu a 144,000 nianyikoku acheñi. Hakwila tushindi ndombu, twatela kudikaña naSatana nikutwalekahu kwikala nachikuhwelelu chakola. Achinu chibaaba chikushimuna njila jisatu jikutukwasha.

4. Indi Satana wadimwekesha ñahi nindi wadinka wanta chikupu?

⁴ Satana wadinka wanta chikupu. Kafwampi kudinka wanta diku kwaletesheli chileñaleña wumu wakuspiritu kwikala wahamuka hakwila yadikañi nachiyuulu chaYehova kulonda niyena yekali nzambi halwindi. Hakwila tudikañi naSatana twatela kuleka kudinka wanta nakwikala adizoza.—Tañenu 1 Petulu 5:5.

5, 6. (a) Komana chatama kudikuhwelela nikudilemesha etu aweni? Lumbululenu. (b) Yakutalilahwinyi yamuBayibolu yamwekeshaña nawu kudinka wanta kwatama?

⁵ Chatama wanyi kudikuhwelela nikudilemesha etu aweni hela kutiya kuwaha muloña etu hela antu itwadikunda nawu aneli chuma chachiwahi indi kwiji akweti chuma chachiwahi. Kapostolu Pawulu walejeli Atesalonika nindi: “Twadisambaña hansañu yenwenu muyipompelu yaNzambi, nakutatakena kwenu, nikukuhwelela kwenu kumwakuhwelelaña mumakabishenu ejima, nimulukadi lumwamonaña.” (2 Tesa. 1:4.) Dichi chatama wanyi neyi tutiyaña kuwaha nanyidimu yazatañawu akwetu nikudisamba chashikilamu nanyidimu yawu. Hitwatela kutiya nsonyi nachisaka chetu, chisemwa chetu hela iluña ditwakulilaku.—Yil. 21:39.

⁶ Ilaña kwekala kudisamba kukwawu kunateli kutamisha wubwambu wetu naYehova. Kudinka wanta kwamuchidiwu kunateli kuleñela kukaana munakutufumbawu chatela twikali adizoza nakwiteja. (Mas. 141:5) Kudinka wanta kwamuchidiwu akulumbulula nawu “hikusweja kudinyamuna” hela “yililu yakudivwimba yekala nawantu akuhwelela nawu abadika akwawu chakubula muloña watelela.” Yehova wahela antu adinkaña wanta. (Ezek. 33:28; Amosa 6:8) Ilaña Satana watiyaña kuwaha neyi yamona antu adinkaña wanta muloña niyena wekala wadivwimba. Satana watiyili kuwaha nayililu yakudivwimba yawamayala adi neyi Nimirodi, Fwaro niAbisalomi muloña wejima wawu afwili mumuhetu wakudinka wanta. (Kutach. 10:8, 9; Kwid. 5:1, 2; 2 Sam. 15:4-6) Kena niyena wajimbesheli wubwambu windi naNzambi muloña wakudinka wanta. Amufumbili kudi Nzambi yomweni, ilaña hamuloña wakudinka wanta wakaanini mwamufumbiluwu. Winyi windi wamuleñeleli kukaana mwamufumbiliyi Yehova nawa waholokeleli mukukala.—Kutach. 4:6-8.

7, 8. (a) Indi chaambu chekowa hichumanyi, nawa chinateli kuleñela ñahi muntu kudinka wanta? (b) Lumbululenu kudinka wanta chikunateli kuleta wufwinda muchipompelu.

⁷ Makonu antu amwekeshaña yililu yakudinka wanta munjila jajivulu jatama. Mpinji yikwawu antu adinkaña wanta muloña wachaambu chekowa. Dikishonali yimu yalumbulula chaambu chekowa nawu, “kuhela antu akweti ikowa dacheñi” hela “kukuhwelela nawu antu akunyichidi yacheñi akweti yililu niwuswa washiyashana nawa amakwawu alema kubadika akwawu.” Kudivwimba kwekala hachaambu chekowa kwaleñelaña antu kutachika kuzuña madombu, majita nikudijaha chikupu.

⁸ Dichi yuma yamuchidiwu bayi yikala mukachi kaChipompelu chawakwaKristuku. Hela chochu, ntadi yekalaña hakachi kawakwakwitiya mpinji yikwawu yatachikaña  muloña wakudinka wanta nawa yinateli kukala kuyimanisha. Chakadi nikujina, dichi chuma chamwekeni kudi akwaKristu amakwawu amuyaaka nkulakaji yakusambila asonekeleliyi Yakoba lwihu lwalema nindi: “Indi majita namadombu mukachi kenu afumaña hanka?” (Yak. 4:1) Eñañi, neyi twahela akwetu nikudimona netu twalema kuyibadika, tunateli kuhosha hela kwila chuma chinateli kuyihilisha. (Yish. 12:18) Mwamweni, kudinka wanta kwaletaña wufwinda muchipompelu.

9. Indi Bayibolu yatukwashaña ñahi kubula kwikala nachaambu chekowa nikudinka wanta? (Talenu mwevulu wakutachikilahu.)

⁹ Neyi twekala nachaaku chakudimona netu twabadika akwetu, twatela kwanuka netu ‘antu ejima adinkaña wanta munyichima yawu Yehova wayimonaña nindi hiyishimashima.’ (Yish. 16:5) Tunateli cheñi kudishinshika etu aweni kulonda twiluki chitwamonaña antu ekowa dacheñi, ituña hela chisemwa. Neyi twamonaña netu ikowa detu hela ituña detu dalema, dikwila nawu tunakudiwula mazu aNzambi akwila nawu ‘wafumishili kudi muntu wumu nyunza yawantu ejima.’ (Yil. 17:26) Munjila yikwawu, kwekala hohu muchidi wumu muloña antu ejima akweti nkakulula wumu, Adama. Dichi, chatama nankashi neyi muntu yakuhwelela nindi antu akumuchidi wukwawu alema kubadika akwawu. Neyi tutoñojoka muniyi njila, tunakumwiteja Satana kuluwañesha kukeña nikunuñañana kwetu kwawakwaKristu. (Yow. 13:35) Hakwila tudikañi naSatana nikumushinda, twatela kudikaña nayitoñojoka yejima yakudinka wanta.—Yish. 16:18.

10, 11. (a) Muloñadi chichinateli kwikala chaswayi kutachika kukeña yuma yamukaayi? (b) Indi Demasi wamwekesheli ñahi nindi wakeñeli kaayi?

¹⁰ Satana diyi ‘mwanta wayuulaña mpata yamunu mwishina,’ nawa yashakama muñovu jindi. (Yow. 12:31; 1 Yow. 5:19) Dichi, yuma yayivulu yamukanu kaayi yambuka nanshimbi yamuBayibolu. Kafwampi bayi neyi yuma yejima yamukaayi yatamaku. Hela chochu, twatela kwiluka netu Satana nateli kuzatisha yuma yamukaayi kulonda yeluki yuma yitwafwilaña nikutuhuñumuna munshidi hela kutuleñela kutachika kukeña kaayi nakudiwula kudifukula kwetu kudi Yehova.—Tañenu 1 Yowanu 2:15, 16.

¹¹ Chakadi nikujina, kukeña kaayi kwayiluwañesheli akwaKristu amuyaaka nkulakaji yakusambila. Chakutalilahu, Pawulu wasonekeli nindi: ‘Demasi nanshiyi dehi, muloña nakeñi yuma yamakonu.’ (2 Tim. 4:10) Bayibolu hiyashimuna jiika yuma yayeni yamukaayi yamuleñeleli Demasi yamushiyi Pawuluku. Hekwawu Demasi watachikili kufwila maheta kubadika mudimu wamukalakeleleñayi Yehova. Neyi diyi yuma yafwilileñayi, dikwila nawu Demasi washaliluhu kukooleka kwakuwahi mumudimu waNzambi, wahetelelumu mwodi? Komana kaayi kadi kumwinka Demasi yuma yadi kubadika nkisu yadi kumwinkayi Yehova yakwikala mulunda waPawulu?—Yish. 10:22.

12. Munjilanyi mutunateli kuholokela mumuhetu wakufwila ‘kwakudimbana kwamaheta’?

¹² Chumichi chinateli kutumwekena ninetu. Hakwikala akwaKristu, twafwilaña kukwasha chisaka chetu muyuma yakumujimba ninetu aweni. (1 Tim. 5:8) Yehova wakeñaña nindi tushakameña chachiwahi nawa chumichi chamwekana hatooka neyi tushinshika mukala wayinkeliyi aAdama naEvu. (Kutach. 2:9) Ilaña Satana nateli kuzatisha yuma yitwafwilaña ‘yakudimbana kwamaheta’ kulonda yatuhuñumuni. (Mat. 13:22) Antu amavulu atoñojokaña nawu maheta anateli kuyiletela muzañalu hela nawu anateli kwikala nachihandilu chachiwahi neyi ekala nayuma yayivulu. Yitoñojoka yamuchidiwu yakutwamba, nawa yinateli kutuleñela kujimbesha iheta detu dalema, wubwambu wetu naYehova. Yesu wasoñamishili atumbanji twindi nindi: “Kwosi muntu natweshi kukalakela  anyanta ayeduku; chiña yohelahu wumu, akeñahu mukwawu; hela yokakelahu wumu, mukwawu amudiwula. Himukutwesha kukalakela niNzambi nimahetaku.” (Mat. 6:24) Neyi tukalakelaña hohu Maheta, dikwila nawu tunaleki kumukalakela Yehova nawa chumichi dichi chakeñañayi Satana nindi twileña. Dichi bayi twiteja mali hela yuma yitwalandaña namali yikali yalema kubadika wubwambu wetu naYehovaku. Hakwila tudikañi naSatana, twatela kwikala nayitoñojoka yayiwahi kutalisha hamaheta.—Tañenu 1 Timotewu 6:6-10.

13. Indi kanu kaayi katandishaña ñahi yitoñojoka yatama kutalisha hawuluwi nikudikama?

¹³ Muhetu wukwawu wamukaayi kaSatana hiwuvumbi. Makonu, antu amavulu amonaña antu asumbula abulaña kwila wuvumbi hela antu aweni adisumbula nawu ekala mumpompa nawa achidi muyuma yayikulu. Chakutalilahu, mumbanda wumu waya mpuhu wahemaña yisela wahosheli nindi: “Iyala hatela kwikala namumbanda wumu hohuku hela mumbanda hatela kwikala neyala wumu hohuku. Nelukahu wanyi muntu washinshika hela wakeñaña kwikala washinshikaku.” Iyala wumu wahemaña yisela wahosheli nindi: “Neluka wanyi neyi atuleñeli nawu tushakameña namuntu wumu muchihandilu chetu chejima.” Satana watela watiyaña kuwaha neyi antu aya mpuhu ahosha nsañu yakutwamba hachawana chaNzambi chawuluwi. Diyabolu hatiyaña kuwaha ntanjikilu yawuluwuku nawa hakeñaña nindi antu ashakameña chiwahi muwuluwuku. Dichi hakwila tudikañi naSatana nikumushinda, twatela kulemesha ntanjikilu yaNzambi yawuluwi.

14, 15. Tunateli kushinda ñahi kwila wuvumbi?

¹⁴ Hela tudi muwuluwi hela tudi ajiki, twatela kudikaña chikupu nanyichidi yejima yawuvumbi. Komana chumichi chapela? Chapela wanyi! Chakutalilahu, neyi wuchidi kansi hadaha watiyaña akwenu akashikola adisamaña nawu elaña wuvumbi hela kuditemeshela nsañu yawuvumbi hanshiña. Kumaluña amakwawu iyi yililu ayimonaña nawu chochimu nakutandisha nyevulu yanzekesi yawatwansi. Bayibolu yahosha nawu: “Muntu welaña wuvumbi waditamishaña mujimba windi yomweni.” (1 Kor. 6:18) Antu akabakanaña nikufwa muloña wakutanda kwanyisoñu yasambukilaña hakudikama. Atwansi amavulu abula kusumbula hela kusumbuka adikamini aditoñeshaña hayuma yeliluwu. Yuma yafumaña mukwila wuvumbi yambuka chikupu nayisela yamwekeshañawu hayikunzulemba, yinatela kutuleñela kutachika kukuhwelela netu neyi tufumpa nshimbi jaNzambi himunateli kufuma yuma yomisha mbañaku. Yitoñojoka yamuchidiwu yaleñelaña antu kufwa mumuhetu ‘wakudimbana kwanshidi.’—Heb. 3:13.

¹⁵ Neyi muholokela mukweseka kwakwila wuvumbi, chumanyi chimunateli kwila? Mwatela kwiluka kuzeyazeya kumukweti. (Rom. 7:22, 23) Lombenu kudi Nzambi kulonda yayikwashi. (Fwi. 4:6, 7, 13) Lekenu kwila yuma nikuya kumaluña kunateli kuyileñela mwili wuvumbi. (Yish. 22:3) Nawa neyi mudi mukweseka, kaanenu chakubula nikulaba.—Kutach. 39:12.

16. Indi Yesu wakwili nindidi hampinji yamwesekeluwu kudi Satana, nawa yumanyi yitunateli kudizilaku kunichi chakutalilahu?

¹⁶ Yesu watushilili chakutalilahu chalema chinateli kutukwasha kushinda kweseka. Hiyamudimbili kudi Satana kuhitila mukumukana yumaku, nawa hashintajalili nakutoñojoka haniyi yumaku. Ilaña, Yesu wakaanini chakubula nikuumba mpinji namazu akwila nindi: “Anasoneki nawu.” (Tañenu Matewu 4:4-10.) Yesu welukili Izu daNzambi nawa chumichi chamukwashili kwakula swayi-swayi namazu amunsona iku wudi mukweseka. Hakwila tudikañi naSatana nikumushinda, twatela kukaana kwiñila mukweseka kwakwila wuvumbi.—1 Kor. 6:9, 10.

17, 18. (a) Yitwanyi yikwawu yazatishañayi Satana, nawa muloñadi yumiyi chiyikubulila kutuhayamisha? (b) Chumanyi chakamumwekena Satana, nawa chumichi chinateli kuyikolesha ñahi kulonda muumiki?

¹⁷ Kudinka wanta, kufwila maheta niwuvumbi hiyitwa yisatu yazatishañayi Satana. Kudi cheñi yitwa yayivulu yazatishañayi. Chakutalilahu, akwaKristu amakwawu ayidimbululaña kudi yisaka yawu, kuyiseha kudi akwawu akashikola hela kuyikañesha mudimu wawu wakushimwina kudi akulumpi janfulumendi. Ilaña kukala kwamuchidiwu hikwatuhayamishañaku muloña Yesu wasoñamishili atumbanji twindi nindi: “Akayihela kudi antu ejima kukoola ijina damami; ilaña muntu wakakakela nikunsa diyi wakahanda.”—Mat. 10:22.

¹⁸ Tunateli kudikaña ñahi naSatana nikumushinda? Yesu walejeli atumbanji twindi nindi: “Mukukakela kwenu, dimu mumukumwena wumi wenu.” (Luka 21:19) Kwosi chuma chikwilawu antu chinateli kukañesha wumi wetu wahaya nyakaku. Kwosi muntu wunateli kuhukula wubwambu wetu walema naNzambuku, chiña hohu neyi etu aweni twiteja chumichi kumwekana. (Rom. 8:38, 39) Hela neyi ambuña Yehova anafwi hichinayi mukwila nawu Satana nashinduku, muloña Yehova wakayisañula. (Yow. 5:28, 29) Munjila yikwawu, Satana hakweti kuchiñeja kwawumi wahaya nyakaku. Chakela kanu kaayi kindi katama anakijilumuni dehi, Satana akamuumbila mwikela hadi yaaka 1,000. (Chim. 20:1-3) Kumakumishilu aChiyuulu chaYesu chaYaaka Ikombakaji, Satana “akamusubula mwamupatililuwu” hakapinji kantesha kulonda yakayi nakudimba antu awanina kakukumishaku. Kufumahu dinu, Diyabolu akamujilumuna. (Chim. 20:7-10) Hela chakwila Satana akamujilumuna, ilaña enu mwakaheta wumi wahaya nyaka. Twalekenuhu kudikaña naSatana nikwikala nachikuhwelelu chakola. Munateli kudikaña naSatana nikumushinda.