KUDYILA hamu kumesa yaYehova hichuma chimu chitwadiluñishaña mpinji yejima hakupompa kwamaneni. Neyi antu jaNzambi apompa nakudiluñisha progiramu yakuspiritu, kakavulu ekalaña namuzañalu wakudyila hamu yakudya yawu.

MuSeptember 1919, atudizi aBayibolu adiña nakupompa kwamafuku atanu nasatu haCedar Point, Ohio, U.S.A. Antu enjili nakupompa ateleleli kukama nikudyila kumahotelu, ilaña kwenjili antu amavulu chikupu kubadika akuhweleleluwu. Chineli luntu lwaswejeli, amayala niambanda azatileña mukafeteriya akañenyi kuzata nyidimu. Mukulumpi wakafeteriya chamukalilili, dichi wehwili anyikwenzi enjili nakupompa neyi kuduhu anateli kukwashana nawa amavulu etejeli. Sadie Green wadiña hakachi kawantu etejeli. Wahosheli nindi, “Dikadiña kapampa katachi kuzata neyi mukwakuhana yakudya, ilaña twazatili chiwahi.”

Hayaaka yayivulu yalondeleluhu, ntanjikilu yakafeteriya hakupompa yakwashili amana kwetu niahela azataña mukudikeñela kukwasha amana kwawu niahela amavulu namuzañalu. Kuzatila hamu nawakwawu akwakwitiya kwakwashili cheñi atwansi amavulu kwimika yikonkwanyi yakuspiritu. Gladys Bolton wazatiluku mukafeteriya hakupompa kwamu 1937. Washimwini nindi “nadilukili nawantu afumini kumaluña acheñi nawa anlejeli chamanishañawu kukala kwawu. Nawa diyi mpinji yinatachikili kwimika chikonkwanyi chakwikala payiniya.”

Muntu wenjili kukupompa kweneni wejina daBeulah Covey wahosheli nindi: “Mudimu wejima wendeli chiwahi muloña ankoñi adiña adihana.” Hela chochu, mudimu wadiña wakala. Chashikiliyi hohu haDodger Stadium muLos Angeles, California, mu 1969 Angelo Manera dihu helukili nindi anamutondi kwikala nkoñi wamukafeteriya. Wahosheli nindi, “Anyinkeli mudimu wunabulahu dehi kuzata muchihandilu chami!” Hakachi kayuma yakeñekeleña kuloñesha haniku kupompa hadiña nikupunda mufwolu wamamita 400 wanyipayipi yagasi yayili kuchisambu.

Muchaaka cha 1982 muSierra Leone, akwakuzata mudimu wakudikeñela adikita atachikili kutematema nyitondu, nkumininaku atachikili kutuña kafeteriya kuzatisha yuma yadiñawu nayu. Mu 1951 muFrankfurt, Germany, amana kwetu akweti maana asonkeleli sitima yadiña nakufumisha luya lutata lwakutelekelahu madehu 40. Akwakuhana yakudya ahanineña yakudya  yawantu 30,000 muora yimu. Hakwila ayipelesheluku mudimu awa ankoñi 576 azatilileña kudipatimenti yakukosa yeña, antu enjili kukupompa asendeleña jimpoku nijifooku jawu. MuYangon, Myanmar, akwakuteleka atoñojokeleleñaku antu kuhitila mukuzatisha nduñu yantesha hohu hakuteleka yakudya yawantu enjili kufuma kumatuña acheñi.

Hela chakwila emeni mumusululu wawulehi mumwaana hakutambula yakudya kukafeteriya hakupompa kwadiña muUnited States mu 1950, Annie Poggensee wahetelelumu. Wahosheli nindi: “Nazañaleli chikupu hampinji yinatiyilileña mpanji yahanjekeleña ahela ayedi afumini kuEurope nawatu.” Wejima wawu ashimwini Yehova chayikwashiliyi kulonda enzi nakupompa. Annie wahosheli nindi, “Kwosi muntu wazañaleli chikupu neyi ana ahela ayeduku. Hiyashili maana kunkanza hela kumpinji yahembeleleñawu mumusululuku.”

Hakupompa kwakuvulu kwamaneni, makafeteriya amaneni ayilemeneña namatenti nawa ashileñamu jimesa jakudyilaku wimeni kulonda adyeña swayi-swayi nakushila akwawu maluña. Indi antu amavulu nankashi anateli kuyidiisha ñahi hampinji yachayili? Muntu wumu wabulili kwikala Chinsahu wahosheli nindi: “Kanda nimoneñahu dehi kwitiya kwamuchidiwu. Adyaña wimeni.”

Akulumpi awamashidika nianfulumendi ahayamini chamwenuwu amana kwetu adiña adiloñesha. Hanyima yakutalatala kafeteriya yetu muYankee Stadium muNew York City, kuUnited States, Mushidika wamukonkomweneni Major Faulkner waBritish War Department nindi yayi nakudimwena yomweni. Dichi yena niñodindi enjili Kukupompa kwamu 1955 kwadiña namutu wunakwila nawu, “Triumphant Kingdom” (Wanta Wunashindi) kuTwickenham, muEngland. Wahosheli nindi wamweni antu azatileña kukafeteriya adiña nakukeña.

Hayaaka yayivulu, akwakuzata mukudikeñela ahanineña yakudya yayiwahi yawuseya wantesha nawa chumichi chakwashileña antu enjileña nakupompa. Ilaña iwu mudimu weneni wakeñekeleña antu amavulu akuzata mukudikeñela azateña maora amavulu nikubula kuwanika kumaprogiramu amakwawu hela ejima. Kumakumishilu ayaaka yamuma 1970, ntanjikilu yayakudya yahakupompa ayipelesheli mumaluña amakwawu. Kumatachikilu achaaka cha 1995, antu ayilejeli kusendaña yakudya yawu hakupompa. Chumichi chaleñeleli antu adiña nakuteleka nikuhana yakudya kudiluñisha progiramu yakuspiritu nikuhanjeka nawakwawu akwaKristu. *

Yehova watiyaña kuwaha nawantu azatileña nañovu hakukwasha akwawu akwakwitiya. Amakwawu anateli kutiya kutama chineli adiluñishileña kuzata mukafeteriya munana mafuku nawa hiyamba kazata cheñi iwu mudimuku. Ilaña twatela kwiluka chuma chimu: Kukeña dichi chuma chekala hakupompa kwetu kwejima.—Yow. 13:34, 35.