1. Lumbululenu muntu wakuspiritu chekaliliyi Satana.

 HAMPINJI yimu wadiña nawubwambu wawuwahi naYehova. Hela chochu, iwu muntu wakuspiritu watachikili kukeña nindi antu adifukuleña kudi yena. Chatela yaleki kutoñojoka yina yitoñojoka yatama, watwalekeluhu kutoñojoka nawa yakukulili nakuvwala nshidi. (Yak. 1:14, 15) Tweluka netu iwu muntu wakuspiritu hiSatana, wabulili ‘kwimana munsañu yalala.’ Wadikañili naYehova nakwikala ‘tata yantwambi.’—Yow. 8:44.

2, 3. Indi mazu akwila nawu “Satana,” “Diyabolu,” “kapela,” ‘nichanzañombi’ amwekeshañadi kutalisha hadi chilumbu muneni waYehova?

² Kufuma tuhu hampinji yadikañiliyi, Satana wamwekesha nindi wekala chilumbu muneni waYehova nawa hakweti wubwambu nawantuku. Nkumbu jamwinkawu Satana jamwekeshaña nawu watama chikupu. Ijina daSatana daya mukwila nawu “Mukwakudimbulula,” dikwila nawu iwu muntu wakuspiritu wahakwilañaku wanyi chiyuulu chaNzambi; ilaña wachihela nawa wachizuñishaña. Kubadika hadi yuma yejima, Satana wakeñaña nindi chiyuulu chaYehova chileki kuyuula.

³ Neyi chashimunawu mumukanda waChimwekeshu 12:9, Satana amutena nawu Diyabolu, dikwila nawu ‘Mukwakutwamba.’ Chumichi chatwanukishaña nawu Satana wamusawulaña  Yehova kuhitila mukumutena nindi himukwakutwamba. Mazu akwila nawu “kapela mukulu” atwanukishaña Satana chamudimbiliyi Evu muEdeni kuhitila mukuzatisha kapela. Nhoshelu yakwila nawu ‘chanzañombi muneni’ yamwekeshaña yililu yaSatana yakutiyisha woma nimakudi akwetiyi, chakwila wakeñaña kukañesha nkeñelu yaYehova nikukisañana antu Jindi.

4. Yumanyi yitukuhanjekahu muchinu chibaaba?

⁴ Chakadi nikujina, Satana wakeñaña chikupu kukisañana kashinshi ketu. Dihu hafuma Bayibolu kutusoñamisha nawu: ‘Tonenuña; mukwankunyi nenu Diyabolu wudi nakuya nakutambatamba nakukeñekeña akudyayi, neyi mutupa wabulumaña.’ (1 Pet. 5:8) Kwesekeja naniku kusoñamisha, muchinu chibaaba tukushinshika hayililu yisatu yaSatana yamwekeshaña muloña wutwatela kudikiña kudi chilumbu watama waYehova niantu Jindi.

5, 6. (a) Hanenu chakutalilahu chinakumwekesha nawu iwu chileñaleña wakuspiritu ‘wukweti ñovu chikupu.’ (b) Munjilanyi Satana mwekalilayi ‘nañovu yakuleta kufwa’?

⁵ Yileñaleña yakuspiritu yatenañawu nawu añelu ekala “asweja ñovu.” (Mas. 103:20) Abadika antu nawa akweti ñovu nimaana asweja. Kafwampi, añelu ashinshika azatishaña ñovu jawu munjila yayiwahi. Chakutalilahu, hampinji yimu kañelu kaYehova wajahili amashidika awaAshuri ayilumbu akushika ku 185,000, muntu wumu hadi kutwesha kwila chumichuku hela tuhu amashidika ejima hiyadi kutweshaku. (2 Anya. 19:35) Hampinji yikwawu kañelu mukwawu wazatishili maana niñovu jindi jabadika antu kulonda yafumishi apostolu aYesu mukaleya. Ona kañelu amumweni wanyi kudi atulama hampinji yakiyilwileñayi yenzelu nakuyidisha apostolu nikukiya cheñi yenzelu, nawa atulama adiña mwomu hampinji yelileñayi yuma yejimiyi.—Yil. 5:18-23.

⁶ Yileñaleña yashinshika yakuspiritu yazatishaña ñovu jawu munjila yayiwahi, ilaña Satana wazatishaña ñovu jindi munjila yatama. Wekala nañovu! Bayibolu yamutenaña nawu ‘mwanta wayuulaña mpata yamunu mwishina’ nawa nawu “nzambi yampata yamakonu.” (Yow. 12:31; 2 Kor. 4:4) Satana Diyabolu wukweti ‘ñovu yakuleta kufwa.’ (Heb. 2:14) Chumichi hichaya mukwila nawu wajahaña antu yomwenuku. Hela chochu, yililu yindi yakujahana yenzala mukaayi. Kubombelahu, muloña wakwila Evu wetejeli chamudimbiluwu kudi Satana nawa Adama wadikañili naNzambi, nshidi nikufwa yeñilili mudi antu ejima. (Rom. 5:12) Muniyi njila, Diyabolu wukweti ‘ñovu yakuleta kufwa.’ Dichi chamuteneneniyi Yesu nindi “mbanji.” (Yow. 8:44) Satana hichilumbu wukweti ñovu chikupu.

7. Indi andemoni amwekeshaña ñahi nawu akweti ñovu?

⁷ Neyi tudikaña naSatana, dikwila nawu tunakudikaña cheñi nawantu ejima atiyañanaña nindi nawa abulaña kwovwahila chiyuulu chaNzambi. Hakachi kanawa antu hekala cheñi mukanka wanyanya wayileñaleña yakuspiritu yadikañili hela netu andemoni. (Chim. 12:3, 4) Mumpinji mumpinji awa andemoni anamwekeshi ñovu jawu jabadika jawantu kuhitila mukukabisha antu ayandishañawu. (Mat. 8:28-32; Maku 5:1-5) Bayi mudiwula ñovu jikwetuwu awa añelu atama hela ‘jamwanta wawandemonuku.’ (Mat. 9:34) Chakubula wukwashu waYehova, hitukutwesha kudikaña naSatanaku.

8. (a) Satana wafwilaña kwiladi? (Talenu mwevulu wakutachikilahu.) (b) Kwesekeja nachimwamonaña yuma, indi kaayi kanakumwekesha ñahi kuzuwa kwaSatana?

⁸ Kapostolu Petulu wamwesekejeli Satana ‘namutupa wabulumaña.’ Kwesekeja namukanda  wumu, izu dachiGriki dabalumunawu nawu ‘kubuluma’ damwekeshaña “kubuluma kwakanyama neyi natiyi nzala.” Awa mazu anakulumbulula chiwahi chazuwayi Satana. Hela chakwila kaayi kejima kashakama mumakasindi, Satana wudi nanzala yayeni yakukeña kudya antu amavulu. (1 Yow. 5:19) Satana nashi maana chikupu hadi awayishewa ashalahu azatilaña hamu nawakwawu, “anyikoku acheñi.” (Yow. 10:16; Chim. 12:17) Satana wafwilaña kudya antu jaYehova. Chakabishañayi atumbanji twaYesu kufuma tuhu muyaaka nkulakaji yakusambila nakushika nimakonu, chamwekeshaña nawu wazuwa.

9, 10. (a) Indi Satana wafwilileña ñahi kukañesha nkeñelu yaNzambi kutalisha hamunza waIsarela? (Shimunenu yakutalilahu.) (b) Chumanyi chacheni chakeñeleleñayi Satana kulukuka aIsarela akushankulu? (c) Munakutoñojoka nenu Diyabolu watiyaña ñahi neyi ambuña Yehova akoña nshidi yahamesu bwi?

⁹ Hamuloña wakufwila kukañesha nkeñelu yaNzambi Satana wadimwekesha nindi wazuwa munjila yikwawu. Mutupa wudi nanzala hatiyilaña luwi kanyama wadyañayuku. Henohu kanda yamujahi hamutiyilaña wushonaku nawa haneñaña neyi namujahi dehuku. Munjila yoyimu, Satana hatiyilaña luwi antu akeñañayi kudyaku. Chakutalilahu, toñojokenu Satana Diyabolu chabatamineñayi mukuswamujoka kakavulu neyi aIsarela aholokela munshidi yidi neyi wuvumbi nilwisu. Neyi mutaña nsañu yahosha hayihuñu yamweniyi chivumbi Zimiri niGehazi walwisu, komana munateli ‘kumona’ mutupa wabulumaña chatiyañayi kuwaha neyi nashindi?—Kuch. 25:6-8, 14, 15; 2 Anya. 5:20-27.

¹⁰ Kudi chuma chacheni chakeñeleleñayi Satana kulukuka aIsarela akushankulu. Kafwampi muniwu munza dimu mwadi kuvwalikila Mesiya, wakamuchika Satana nikulemesha wanta waYehova. (Kutach. 3:15) Satana hakeñeli nindi aIsarela ekali naniku kukoolekaku, dichi wazatili nañovu kulonda eleña nshidi. Bayi mutoñojoka nenu Satana wamutiyilili Davidi luwi cheliliyi wuvumbuku, nawa hamutiyilili Mosi wushonaku chelili iwu kaprofwetu yashaluhu kukooleka kwakwiñila Mwituña daChikaninu. Ilaña Satana watiyaña kuwaha neyi  ambuña Nzambi akoña nshidi yahamesu bwi-i. Kafwampi Diyabolu wazatishaña yumiyi hakumusawula Yehova.—Yish. 27:11.

11. Chumanyi chakeñeleñayi Satana chikupu hakumusha Sara mukweseka?

¹¹ Satana wadiña nankunyi chikupu nachisaka mwadi kuvwalikilayi Mesiya. Chakutalilahu, shinshikenu chuma chamwekeni chelili Abarahama amuleji nawu wukwikala ‘munza weneni.’ (Kutach. 12:1-3) Hampinji yadiñawu aAbarahama naSara muEjipitu, Sara amutwalili kwitala daFwaro, hadaha wakeñeleña nindi yekali iñodindi. Hela chochu, Jehovah wamukiñili nikumupulwisha Sara muniku kukala. (Tañenu Kutachika 12:14-20.) Henohu kunashali mafuku antesha hakwila Isaka yasemuki, chuma chidi neyi ichi chamwekeni muGerari. (Kutach. 20:1-7) Komana Satana diyi waleteli iwu wufwinda? Komana watoñojokeli nindi Sara washili musumba waUri wamaheta nakuya nakushakama mumatenti nateli kukomoka chipañu chalubanji chaFwaro nichaAbimeleki? Komana Satana watoñojokeleña nindi Sara nateli kumufutalela Yehova ninfumwindi nakwiñila muwuluwi wawuvumbi? Bayibolu yahosha wanyi chumichi, ilaña tunakuhweleli chikupu netu Diyabolu wadi kutiya kuwaha kumuleñela Sara kwikala wabula kushikilamu kuvwala mwana wakaninuwu. Neyi mumbanda wukweti wuluwi wawuwahi, ijina dadiwahi niwubwambu wawuwahi naYehova wavulumwini, hichadi kumukata Satana kumuchimaku. Satana wazuwa chikupu.

12, 13. (a) Indi Satana wamwekesheli ñahi kuzuwa kwindi hanyima yakusemuka kwaYesu? (b) Munakutoñojoka nenu Satana watiyaña ñahi nawatwansi amukeña Yehova nawa afwilaña Kumukalakela makonu?

¹² Kufuma hafwiliyi Abarahama mwahitili yaaka yayivulu chikupu hakwila Yesu yavwaliki. Bayi mutoñojoka nenu Satana wamweneña nindi iwu mwana wadiña walubanji nawa walemaku. Inehi, Satana welukili nindi iwu mukeki wakakula nakwikala Mesiya akaninuwu. Chakadi nikujina, Yesu wadiña mwana walema hakachi kawanyana kaAbarahama, diyi ‘wakakisañana nyidimu yaDiyabolu.’ (1 Yow. 3:8) Komana Satana watoñojokeleña nindi kujaha nkemba chadiña chuma chatama nankashi? Satana hakamenaña nindi ichi chuma chachiwahi hela chatamaku. Nawa Satana wakeñeleña kumujaha Yesu hadiñayi mwana chakadi kulaba. Munjilanyi?

¹³ Mwanta Herodi wahilili chikupu chehwiluwu akwakuhoña natutumbwa kutalisha ‘hakuvwalika kwamwanta wawaYudeya’ nawa wafwilileña kumujaha. (Mat. 2:1-3, 13) Hakwila nawu iwu nkemba amujahi, wahanini nshimbi yakujaha ankemba ejima awamayala adiña nayaaka yakusemuka yiyedi nakufunta mwishina adiña muBetelemi nimunyikala yejima yamukamwihi. (Tañenu Matewu 2:13-18.) Yesu wapulukili haniyi mpinji yajahiluwu anyana amavulu, hanu dinu chumichi chatudizishaña chumanyi hadi chilumbu chetu Satana? Chinamwekani hatooka to-o nawu Diyabolu hakamenaña wumi wawantuku. Hakamenaña anyanaku. Eñañi, Satana diyi “mutupa wabulumaña.” Dichi bayi mulalamena nenu Satana wukweti wukatuku!

14, 15. Indi Satana “naputishi mesu ayitoñojoka yawantu abula kwitiya” munjilanyi?

¹⁴ Satana nateli kuyileñela antu kumufutalela Nzambi yetu Yehova wakukeña, kuhitila mukutwamba. (1 Yow. 4:8) Kuhitila mukutwamba, Satana nakutwalekahu nakuleñela antu kubula kwikala “atuzweñi muspiritu.” (Mat. 5:3) Dichi Satana, “naputishi mesu ayitoñojoka yawantu abula kwitiya; kuchina mwaana wansañu yayiwahi yalubanji lwakulema kwaKristu, chinfwana chaNzambi, kuyichiila.”—2 Kor. 4:4

¹⁵ Kwitiya kwakutwamba diyi njila yimu  yabadika yadimbilañayi Satana antu. Satana watiyaña muzañalu hama neyi yamona antu anakudifukula kudi ankakulula jawu, yileñaleña, anyama, muntu wudi wejima hela chuma chidi chejima kubadika kudifukula kudi Yehova, ‘wakeñaña kudifukula kudi yena hohu nkawindi.’ (Kwid. 20:5) Niantu amavulu atoñojokaña nawu adifukulaña kudi Nzambi munjila yayiwahi niwena ayiluwañeshaña nantañishilu yakutwamba niyidika yamukunkulwayi. Adi mukukala neyi kwamwenuwu antu ahosheliyi Yehova nindi: “Mwakisañenañadi mali hachuma chakadi kudya? Mwakabakenañadi chuma chabulaña kwikutisha? Ntiyililenu chachiwahi, mudyi yuma yayiwahi, mudiluñishi munyichima nayanuna.”—Isa. 55:2.

16, 17. (a) Muloñadi Yesu chamulejeliyi Petulu nindi: “Eyi Satana hitaku kunyima yami”? (b) Indi Satana nateli kutudimba ñahi kutalisha hansañu yakwikala atona?

¹⁶ Satana nateli nikudimba ambuña Yehova adikita. Chakutalilahu, shinshikenu chuma chamwekeni chelili Yesu yayileji atumbanji twindi nindi keña amujahi. Chakadi nikujina, Petulu hadiña nayitoñojoka yatamaku chelili yamusendi kumbadi nakumuleja nindi: ‘Bayi wakamaku, Mwanta. Hiwakamona yumiyuku!’ Yesu wamwakwili Petulu hatooka to-o nindi: “Eyi Satana hitaku kunyima yami”! (Mat. 16:22, 23) Muloñadi Yesu chamuteneneniyi Petulu nindi “Satana”? Muloña Yesu welukili yuma yadiña kwakwihi nakumwekana. Mpinji yashikili kulonda yafwi neyi mulambu wefutu danyiloña nawa hakwila yamwekeshi nindi Diyabolu himukwakutwamba. Haniyi mpinji yalema muchihandilu chawantu, hiyadiña mpinji yakubula Yesu ‘kudakamenaku.’ Satana wadi kutiya kuwaha neyi Yesu walekeli kwikala watona.

¹⁷ Hampinji yitunakuswila kwakwihi nakukuma kwanyaka yamakonu, anetu nawa tunakushakama mumpinji yakala. Satana nakukeña nindi tubuleña kwikala atona, ‘kubula kudakamenaña’ nikutuleñela kusha maana kuyuma yamukaayi. Bayi mwiteja yumiyi yiyimwekenuku! Dichi, ‘twalekenuhu kwikala atona.’ (Mat. 24:42) Bayi mwitejaña nsañu yakutwamba yashimunañayi Satana yakwila nawu kukuma kwanyaka yinu kuchidi kwakulehi, hela nawu hikwamba kenzaku.

18, 19. (a) Indi Satana nateli kufwilaña ñahi kutudimba kwesekeja nachitwadimonaña? (b) Yehova watukwashaña ñahi kulonda tutwalekahu kwikala atona?

¹⁸ Satana wafwilaña kutudimba cheñi munjila yikwawu. Wakeñaña nindi tukuhweleli netu Nzambi hatukeñaku nawa hanateli kutwanakena nshidi jetuku. Awa himakudi aSatana. Kuhosha hohu chalala, hinyi ahelawu chikupu kudi Yehova? Satana diyi. Hinyi akabula kwanakenawu chikupu? Satana diyi cheñi. Ilaña Bayibolu yatushiika nawu: “Nzambi waloña, hakavulamena mudimu wenu hela kukeña kumwakeñeli ijina dinduku.” (Heb. 6:10) Yehova watiyaña kuwaha chitwazataña nañovu kulonda tumuzañalesheña nawa mudimu wetu hiwamba kaya mumenjuku. (Tañenu 1 Akorinda 15:58.) Dichi bayi atudimba namakudi aSatanaku.

¹⁹ Neyi chitunadizi, Satana wukweti ñovu, wazuwa nawa himukwakutwamba. Tunateli kushinda ñahi ndombu yitwalwaña nachilumbu wamuchidiwu? Yehova watukwashaña. Izu Dindi datudizishaña njila jazatishañayi Satana nawa ‘hitwayamba maaninduku.’ (2 Kor. 2:11) Neyi twiluka tufuta twaSatana, tukwiluka chiwahi chakutwalekahu kwikala atona. Ilaña kwiluka hohu tufuta twaSatana chikutukwasha wanyi. Bayibolu yahosha nawu: ‘Diyabolu dikañenu nindi, niyena wukuyitemuka.’ (Yak. 4:7) Chibaaba chinalondeluhu chikahosha hanjila jisatu mutwatela kudikaña naSatana nikushinda.