KWADIÑA kumatachikilu achaaka cha 1970. Nakamini mukadidi kamuchipatela chaValley Forge General Hospital, Phoenixville, Pennsylvania, muUnited States. Chimwahita jiminiti 30, nasi weyala wadiña nakumpima BP (blood pressure). Nadiña mushidika wayaaka 20 yakusemuka nawa nakatili musoñu wafwana wasambukilaña. Nasi wadiña mukulumpi chanti hadi ami nawa wakameneni. Chelili BP yami yitwalekuhu nakuholoka mwishina, namwihwili nami, “Wamonahu dehi hafwilayi muntu?” Wahayamini nikutiya woma nawa wakwili nindi, “Inehi, kanda.”

Haniyi mpinji namweni nami nikuhanda wanyi. Hanu dinu chumanyi chaletesheli antenteki muchipatela? Tiyi niyileji nsañu yikwawu yachihandilu chami.

Nakatili hampinji yinazatileña mukapeka kakuladikila hampinji yanjita muVietnam. Natiyileña kuwaha kukwasha akata niadikatishileña nawa nadiña nachikonkwanyi chakwikala mukwakuladika. Nashikili muVietnam muJuly 1969. Kufwana antu amaha ejima enjileña, anyinkeli mulungu wumu kulonda niluki yuma nikwinjilila mpinji yambukaku yamunidi ituña ninkanza yasweja yekalamu.

Chinatachikili hohu kuzata mudimu kuchipatela chaladikaña muMekong Delta, muDong Tam, mashidika akatishiluwu ayileteli najindeki jajivulu jatupokupoku. Dichi nakeñeleña kutachika kuzata yoyina mpinji, muloña nakeñeli nankashi ituña detu nawa nashili muchima hamudimu. Antu akatishiluwu ayiwahishileña nakuyitemwishila mutupeka twanyanya twakuladikila mwadiñi mpepela yituuta. Munitu tupeka mwadiña mukwakuladika, mukakwasa jindoñu jawujinji, nasi wakosaña yilonda ninasi wazatilaña kwejima, nawa wejima wawu enzelumu nakuzata hakumina ñovu jawu kulonda apulwishi antu. Namweni yiteli yamaneni munyifuku yiyila yabuliluwu kuñolola mutupokupoku. Anlejeli nawu munyifuku yeniyi mwadiña yidi yanyijimba yawamashidika afwili kunjita. Diyi yuma yinamweni hampinji yinayili kunjita.

Hinadiña kampululu, nadiziluku chalala chatañishañawu aYinsahu jaYehova. Mama wadizileña Bayibolu nawaYinsahu, ilaña hapapatisheweluku.  Nadiluñishileña chikupu kushakama hamu namama hampinji yamudizishileñawu Bayibolu. Hayoyina mpinji, nahitili kwakwihi neTala daWanta natata yami wasumbwili mama. Namwihwili nami, “Hiitala damuchidinyi dina?” Wañakwili nindi, “Bayi wakaswila kwakwihi nanana antuku.” Chineli namukeñeli nikumukuhwelela tata, natiyilili mwanlejeliyi. Dichi, nalekeli kuhanjeka nawaYinsahu jaYehova.

Chinafumini muVietnam, nakeñeleña Nzambi muwumi wami. Yuma yatama yinanukileña yanzeyesheli chikupu. Chamwekeni neyi kwosi muntu welukili chikupu yuma yamwekeneña muVietnam. Inakwanuka antu ayili munyikwakwa nakubidika nawu amashidika awa United States hiyakwakujaha anyikeki muloña wayileji yakwila nawu anyana akadi muloña ayijahili munjita.

Hakwila nimwiluki Nzambi, natachikili kuya nakupompa kumachechi ashiyashana. Nadiña namukeña Nzambi ilaña yuma yinamweni mumachechi yanzañalesheleña wanyi. Nkumininaku, nayili Kwitala daWanta dawaYinsahu jaYehova muDelray Beach, kuFlorida. Hadiña haMulungu muFebruary 1971.

Chineñilili, mpanji yawantu amavulu yadiña kwakwihi nakumana, dichi nashakamini nakudiza Kaposhi Kakutalila kalondeleluhu. Hinanukaña mutu wampanji wutwadiziluku, ilaña nichidi kwanuka atwansi anyanya adiña kubakula jiBayibolu jawu nakuwana jinsona. Chumichi chanzañalesheli. Namweneni nzo-o nakutiyilila nikutalatala. Hampinji yinafumineña Hetala daWanta, mana kwetu wumu wadiña kwakwihi nayaaka 80 yakusemuka wenjili nakunwana. Ijina dindi wadiña Jim Gardner. Wedishili mukanda wadiña namutu wakwila nawu, The Truth That Leads to Eternal Life (Chalala Chalombolaña Kuwumi Wahaya Nyaka) nawa wañihwili nindi, “Wukutambula iwu mukanda?” Twatiyañeni kulonda twakatachiki kudiza Bayibolu nantetemena haChiwana.

Hadina ifuku daMulungu nateleleli kuya nakuzata nawufuku. Añiñijili mudimu hachipatela chabulili kwikala chanfulumendi muBoca Raton, muFlorida, hinazatilileña mukapeka mwaleteleñawu antu adikatishileña. Nazatileña kufuma 23:00 nakushika 7:00. Chineli kwadiña wanyi ayeji, natwesheli kutaña mukanda waTruth (Chalala). Nasi wadiña nachifulu chambadika wenjili kunadiña, wantambwili mukanda nakuwutala hakava nawa wabidikili nindi, “Wakekala Chinsahu wanyi, netu?” Natambwili mukanda wami nakumuleja nami, “Natañi hohu nakushika hakachi, ilaña chinamwekani neyi nikwikala Chinsahu!” Mumbanda yeniwu wanshili nkawami nawa namanishili kutaña iwu mukanda hawuna wufuku.

Natachikili kudiza Bayibolu katachi naMana Kwetu Gardner kuhitila mukumwihula nami, “Hanu dinu, tukudizadi?” Wakwili nindi, “Mukanda wunakwinkeli.” Nelili nami, “Nawutaña dehi.” Mana Kwetu Gardner wakwili mumesu awunda nindi, “Twaya tudizi kapetulu katachi.” Nahayamini hakumona yuma yinabulili kutiyisha. Wanlejeli kutaña nsona jajivulu muBayibolu yami yaKing James Version. Ichi dinu nadizileña hadi Nzambi walala Yehova. Mana Kwetu Gardner, inateneneña nami Jim, wandizishili  tupetulu tusatu mumukanda waChalala hayina ntetemena. Twadizileña tupetulu tusatu haChiwana haChiwana nantetemena. Nadiluñishileña chikupu chitwadizileña. Nadiña nakukooleka chikupu kwakundizisha kudi mana kwetu wawayishewa wadilukili naCharles T. Russell.

Chimwahitili hohu nyilungu yantesha, atondeli kwikala mukwakushimwina. Jim wankwashili muyuma yayivulu yinadiña nakwakamena, kushilahu nikukala kunadiña naku kwakushimwina kwitala nikwitala. (Yil. 20:20) Natachikili kudiluñisha mudimu wakushimwina hampinji yinazatileña naJim. Nichidi nalemesha chikupu mudimu wakushimwina. Nikweti muzañalu chikupu hakwikala mukwakukalakala hamu naNzambi.—1 Kor. 3:9.

Ichi dinu tiyi niyileji nsañu yankundama yinakuhosha hakukeña kwami kwatachi kunamukeñeli Yehova. (Chim. 2:4) Iku kukeña kunamukeñeli Yehova kwankwashili kumanisha kukala kunadiña naku kwakwanuka yuma yatama yinamweni mumpinji yanjita nikukala kukwawu kwakuvulu.—Isa. 65:17.

Nanukaña ifuku dimu dalema muchaaka cha 1971. Mwahitili tuhu mafuku antesha kufuma hanhañiluwu mwitala muyañitejeluwu anvwali jami kushakama. Tata wamusumbwili mama hakeñeli Chinsahu chaYehova kushakama hetala dinduku. Hayina mpinji hinadiña namali amavuluku. Kuchipatela kunazatileña anfweteleña chimwahita nyilungu yiyedi nawa mali amavulu namanishilili hakulanda yakuvwala kulonda nivwaleña mumudimu wakushimwina nikumwimwenaku Yehova chiwahi. Nadiña namali amakwawu inahembeli, ilaña adiña kunyambawulu yakuMichigan, mwituña munakulilili. Dichi hamafuku antesha, nakamineña mumotoka yami. Nayileña nakutewila wevu nikuwelela hachitesheni halandishilañawu manji amunyotoka.

 Ifuku dimu hampinji yinashakamineña mumotoka yami, nashikili Hetala daWanta henohu kuchidi maora amavulu nakuhumañana kwakuya mwiha. Nafumini tuhu hakuzata nawufuku muchipatela. Chinashakamini kwikeki deTala daWanta chakwila kwosi muntu wunateli kunmona, natachikili kutoñojoka yuma yinamweni kuVietnam, ivumba dayizotu yawantu yocheleñawu, mashi inamweneña niyilonda yawantu, yumiyi yaneñesheli chikupu. Muyitoñojoka yami natiyileña nikumona anyikwenzi anakunlembelela nawu, “Nukuhanda? Nukuhada?” Nelukili nami akufwa, ilaña nesekeleña kuyikundeja hakuminini ñovu jami chakubula kumwekesha kumesu nami akufwa. Hampinji yinashakamini kwikeki naneñeli chikupu.

Hampinji yinalombeleña madilu ahitileña neyi mpola yamenji. (Mas. 56:8) Natachikili kutoñojoka chikupu hakuchiñeja kwakusañuka. Kufumahu nanukili nami: Yehova Nzambi wakafumishahu yuma yatama yejima yinamweni nichineñi chejima chinatiyaña ami niakwetu kuhitila mukuchiñeja kwakusañula afu. Nzambi wakayisañula ana anyikwenzi nawa akekala nakukooleka kwakudiza nsañu yalala yahosha hadi yena. (Yil. 24:15) Hayina mpinji, namukeñeli Yehova chikupu nawa kukeña kweniku kwanshikili hamuchima. Dina ifuku nadanukaña chikupu. Kufuma tuhu yina mpinji nazati nañovu, sweje-e neyi inakumona kukala kulonda nibuli kujimbesha kukeña kwami kwatachi kunamukeñeli Yehova.

Munjita antu elaña yuma yatama chikupu. Anami nawa nadiña hakachi kawu. Ilaña ankwasha kuhitila mukutoñojoka chikupu hansona jiyedi jinakeña hama. Nsona yatachi hiChimwekeshu 12:10, 11, yahosha nawu Diyabolu anamwimiki mushindu bayi neyi namazu itwashimwinaña hohuku, ilaña cheñi namashi aMwana kaMukoku. Yamuchiyedi hiAŋalija 2:20. Iyi vasi yankwasha kwiluka nami Kristu Yesu wanfwilili ‘ami.’ Yehova wantalaña kuhitila mumashi aYesu nawa Wañanakena yuma yejima yinelili. Kwiluka chumichi, chankwasha kwikala nachinleji chitooka nawa chansañumunaña kuzata nañovu kulonda nikwashuku antu amakwawu kwiluka nsañu yalala yahosha hadi Nzambi wukweti luwi, Yehova.—Heb. 9:14.

Chinanuka yuma yinamweni muchihandilu chami, nasakililaña chikupu nami Yehova wañakamenaña mpinji yejima. Chakutalilahu, hefuku delukiliyi Jim nindi nashakamineña mumotoka, wanlejeli muhela wumu wadiña netala deneni dakusonkela. Nakuhweleli nami Yehova diyi wamuzatishili Jim ninona muhela kulonda nikali netala dadiwahi dakushakama. Yehova waluwi! Wakamenaña akwakudifukula indi ashinshika.

Mukakweji kaMay mu 1971, nakeñeleña kuya kuMichigan kulonda nikazatuku nyidimu yikwawu. Henohu kanda nifumi kuChipompelu chaDelray Beach muFlorida, nenzesheli kunyima yamotoka nanyikanda, kufumahu nayili kukabeta kachimunswa mumukwakwa waInterstate 75. Nyikanda yejima yamanini henohu kanda nifumi muGeorgia. Nashimwinini nsañu yayiwahi yaWanta neyena kumaluña ejima. Nemeni nakushimwina mutuleya nawa nahanineña matilakiti kudi amayala adiña munyisalanyi hamaluña akunookela. Kushika nikulelu, neluka wanyi neyi yina mbutu yachalala yinatumbili yameneni.—1 Kor. 3:6, 7.

Hela chochu, natela kwiteja nami, chinadizili tuhu chalala nelukili wanyi kuhosha chakadi kuhilisha antu sweje-e neyi inakushimwina antaña jami. Muloña wakwila kukeña kwami kwatachi kunamukeñeli Yehova kwadiña nakubidima chikupu, nadiña nakuyishimwina chakadi woma ilaña chakubula kuhita mumbadi. Nayikeña nankashi amana kwami aJohn naRon, nawa nayikakejeleña hakuyishimwina nsañu yalala. Chimwahitili mpinji nadanakeneni hamuloña wakubula kuyitoñojokelaku. Hela chochu, hinaleka kuyilombelelaku nami ifuku dimu aketeja nsañu yalalaku. Kufuma tuhu hayina mpinji, Yehova nandizishi  nawa neluki chakutañisha nikushimwina antu chakadi kuyihilisha.—Kol. 4:6.

Hela chakwila nanukaña kukeña kwami kunamukeñeli Yehova; ilaña hinavulamenaña antu amakwawu inakeñaku. Muntu wamuchiyedi inakeña, hiñodami Susan inalemesha. Nelukili nami nakeñeleña nkwashi watela kunkwasha kuzata mudimu waWanta. Susan himumbanda wakola kuspiritu. Nanukaña chikupu hampinji yinayili nakumuhempula hitwadilukileña. Susan wadiña washakama mwikeki detala dawanvwali jindi mwiluña daCranston, muRhode Island. Watañileña Kaposhi Kakutalila iku wudi naBayibolu yindi. Nazañaleli muloña hadiña nakutaña chibaaba chakudizamuku nawa watañileña nijinsona muBayibolu. Nelukili nami, ‘Iwu himumbanda waha kuspiritu.’ Twadisumbwili muDecember 1971, kufuma tuhu mpinji yitwadisumbwili natiyaña kuwaha muloña mwinikwami natwalekuhu kunkwasha. Chuma chacheni chinamutiyilaña kuwaha chakwila nawu wamukeña Yehova kubadika chankeñayi ami.

Ami naSusan tukweti kukooleka kwakwikala nawanyana ayedi awamayala, Jesse niPaul. Hampinji yakulileñawu, Yehova wadiña nawena. (1 Sam. 3:19) Chineli akeñeli nsañu yalala, chumichi chatuzañaleshaña ami namwini kwami Susan. Anatwalekuhu kumukalakela Yehova muloña anukaña kukeña kwawu kwatachi kwamukeñeluwu Nzambi. Wejima  wawu anazati dehi mumudimu wampinji yejima kubadika hadi yaaka 20. Kubombelahu, natiyaña kuwaha nawakuwami awambanda ayedi aStephanie niRacquel, inamonaña neyi anyanami akudivwalila. Anyanami ejima wawu asumbula ambanda aha kuspiritu amukeña Yehova Nzambi nawumi wawu wejima nawa namuchima wawu wejima.—Efwes. 6:6.

Chinapapatisheweli, nazatilili yaaka 16 muRhode Island nawa nakwatili wubwambu wawuwahi nawantu. Nanukaña yuma yayivulu yitwadiluñishili nawaeluda amawahi inakalakeleña nawu. Kubombelahu, nasakililaña cheñi ankoñi endaña amavulu ankwashili chikupu. Nikweti kukooleka kwakuzata nawantu atwalekahu nakukeña kwawu kwatachi kwamukeñeluwu Yehova! Mu 1987 twabuukilili kukabeta kaChimunswa kaCarolina nakuzatila kwadiña kukankila kweneni nawa twakwatili cheñi wubwambu wawuwahi nawantu. *

MuAugust 2002, ami niSusan twetejeli mutambi wakuya nakuzatila haBeteli yakuPatterson muUnited States. Ami nazatileña kuDipatimenti yaMudimu, ñodami Susan wazatileña kwakosañawu yakuvwala. Iwu mudimu ñodami wawukeñeli. Kuhiñahu, muAugust 2005 antondeli kwikala membala Wezanvu Dalombolaña. Iwu mudimu wantiyishili woma. Ñodami niyena wadakameneni chikupu chatoñojokeliyi haniwu mudimu chiwekala wakala nawa wakeñekaña nikwenda. Susan hakeñaña kwendela mundekuku, ilaña twendelaña mundeki nankashi. Susan wahosheli nindi mazu akukolesha amulejeleñawu kudi añodi jawamamembala amakwawu aMwinzavu Dalombolaña, amukwasha kufuukula kunkwasha kwesekeja nahakumina ñovu jindi. Nankwashi chikupu nawa dichi chinamukeñela.

Mukasanji kami nashamu nyevulu yayivulu yinalemesha hama. Yañanukishaña chihandilu chachiwahi chinadiluñishi. Chineli nazataña nañovu kulonda nanukeña kukeña kwami kwatachi kunamukeñeli Yehova, natambwila nkisu jajivulu jajiwahi.