1. Chumanyi chinateli kutukwasha kwimbujola yililu yaNzambi?

 YEHOVA watuleñeli nawuswa wakwiluka chatiyañawu antu amakwawu. Hela chakwila kanda tutiyeñahu dehi neyi chatiyañawu wena. (Tañenu Aefwesesa 5:1, 2.) Tunateli kuzatisha ñahi ichi chawana chatwinkayi Nzambi munjila yayiwahi? Yumanyi yitunateli kwila kulonda ichi chawana chibuli kutukatisha?

2. Indi Yehova watiyaña ñahi namakabi itwamonaña?

² Chakadi nikujina, twazañalalaña muloña Nzambi wakana kuyinka awayishewa ashinshika wumi wabulaña kufwa mwiwulu, “anyikoku acheñi” niwena ayikana kuyinka wumi wahaya nyaka hanu hamaseki. (Yow. 10:16; 17:3; 1 Kor. 15:53) Hela mukweti kuchiñeja kwakwikala nawumi wabulaña kufwa mwiwulu hela wumi wahaya nyaka hanu hamaseki, mwamonaña kukala kwayandishaña antu makonu. Yehova weluka kukala kutwamonaña, neyi chelukiliyi chayandileñawu aIsarela muEjipitu neyi anduñu. Eñañi, “mwejima mwakabiluwu wena, dimu mwakabiliyi yena nawa.” (Isa. 63:9) Chimwahitili yaaka yayivulu, aYudeya atiyili woma muloña wawayilumbu ayikañesheleña kutuñulula tembeli, ilaña Nzambi wahosheli nindi: ‘Muntu wukukunkeyi, nakunki  hakantu kadisu dami.’ (Zek. 2:8) Kufwana mama yawantu wakeña mwanindi wankemba, Yehova niyena wayikeña antu jindi. (Isa. 49:15) Munjila yikwawu, Yehova nateli kutiya chatiyañawu antu amakwawu, anetu nawa watwinka wuswa weniwu.—Mas. 103:13, 14.

3. Chumanyi chamwekeshaña nawu Yesu wadiña nawushona?

³ Yesu welukili chayandileñawu antu amakwawu, hela chakwila yena hayandileñaku. Chakutalilahu, atuzweñi achinineña akulumpi jayipompelu adiña nakuyidimba nikuyikabisha nanshimbi jajivulu jatuñiluwu antu. (Mat. 23:4; Maku 7:1-5; Yow. 7:13) Yesu hiyamudimbili hela kumuchinishaku, ilaña welukili kukala kwamweneñawu antu. Dichi, “chanamoniyi mazaza awantu, hakuyitiyila wushona, muloña akabakeni, apalañeni neyi nyikoku yakadi kabiña.” (Mat. 9:36) Kwafwana Tata yindi, Yesu wadiña nawushona nikukeña.—Mas. 103:8.

4. Yesu watiyileña ñahi chamweniyi antu anakukabakana?

⁴ Yesu chamweniyi antu anakuyanda, wayikwashili muloña wayikeñeli. Dichi wamwekesheli kukeña neyi kwaTata yindi. Hanyima yakushimwina chikupu, Yesu niapostolu indi akeñeleña kuya kwakankawawu kulonda anookuhu. Muloña watiyilili wushona izaza dadiña nakumuhembelela, Yesu watachikili ‘kuyitañisha yuma yayivulu.’—Maku 6:30, 31, 34.

5, 6. Hakwila twimbujoli kukeña kwaNzambi, twatela kuyililadi antuñi netu? Shimunenu chakutalilahu. (Talenu mwevulu wakutachikilahu.)

⁵ Tunateli kwimbujola kukeña kwaNzambi kuhitila mukwilila antuñi netu kakawahi. Chakutalilahu: Twili netu mukwaKristu wakansi, wutukutena netu Alan, nakutoñojoka hadi mana kwetu wakashinakaji wunakukañanya kutaña chiwahi muloña wakubula kumona chiwahi. Nakumona cheñi kukala kwakwenda mumudimu wakushimwina kwitala nikwitala. Alan hakwanuka mazu aYesu akwila nawu: ‘Mwomumukukeña antu kuyilenu ninenu nawa yililenu wena chochimu.’ (Luka 6:31) Dichi Alan hakudihula yomweni nindi, ‘Yumanyi yinakeñaña antu amakwawu kuñilila?’ Hakwakula nindi, ‘Nakeñaña nami ahemeña ngunja nanami.’ Ilaña iwu mana kwetu wakashinakaji hakutwesha kuhema ngunjaku, indi nenu mwacheñi? Mazu aYesu aya mukwila nawu twatela kudihula etu aweni netu, ‘Chumanyi chinadi kukeña mukwetu kuñilila neyi nikweti kukala kukwetiyi?’

⁶ Alan hikashinakaji wanyi, ilana wukweti wuswa wakutiya yuma yabulahu dehi kutiyayi. Wahanjekaña namana kwetu wakashinakaji nikutiyilila nakanañachima chinakuhoshayi. Nkumininaku, Alan hakwiluka kukala kwamonañayi muntu wakula dehi wunakukañanya kutaña Bayibolu hela kuya nakushimwina kwitala nikwitala. Alan chanelukiyi kukala kwamonañayi mana kwetu wakashinakaji, hakwiluka chatela kumukwashayi nawa nakukeña kumukwasha. Anetu nawa tunateli kwila mwomumu. Hakwila twimbujoli kukena kwaNzambi, twatela kwiluka kukala kudi namana kwetu.—1 Kor. 12:26.

7. Tunateli kuyiluka ñahi akwetu chiwahi kulonda tuyikwashi?

⁷ Kakavulu chapela wanyi kwiluka kukala kunakumonawu akwetu. Antu amavulu amonaña kukala kutwabulahu dehi kumona. Amakwawu amonaña kukala hamuloña wakudikatisha, yikatu hela wushinakaji. Amakwawu niwena amonaña kukala hamuloña wachineñi, kusweja kwakamena hela yuma yafumaña mukuyikabisha.  Amakwawu niwena akweti yisaka yayaña mukwitiya kwashiyashana hela hiyanvwali ajiki. Muntu wudi wejima wamonaña kukala, nawa kakavulu iku kukala kwambukaku nakwetu. Neyi akwetu adi nakukala kwamuchidiwu, tunateli kwimbujola ñahi kukeña kwaNzambi? Kuhitila mukutiyilila nakanañachima kulonda twiluka chinakutiyayi mukwetu. Chitwela mwenimu, tukwimbujolaña kukeña kwaNzambi kuhitila mukuyilila akwetu yuma yinakukeñawu. Hela chakwila yuma yakeñañawu antu yashiyashana, ilaña tunateli kuyikolesha kuspiritu nikuyikwasha muyuma yikwawu yakeñekaña.—Tañenu Aroma 12:15; 1 Petulu 3:8.

8. Chumanyi chamukwashili Yesu kwikala naluwi?

⁸ Mwana kaNzambi wahosheli nindi: “Mukwakubadika . . . watiyilaña luwi niantu abulaña kusakilila, niatama.” (Luka 6:35) Kafwampi, Yesu wembujoleli luwi lwaNzambi. Chumanyi chamukwashili Yesu kwila mwenimu? Wayitiyilileña antu luwi kuhitila mukwiluka mazu atela kuzatishayi nichiyanateli kuneñesha antu amakwawu. Chakutalilahu, mumbanda mukwanshidi wenjili nakumuwana Yesu iku nakudila nikuzowesha kunyendu yaYesu namadilu indi. Yesu welukili nindi nabalumuki mumuchima nawa welukili chatiyileñayi hayina mpinji neyi chakwila wamuhañili. Dichi, wamuhamekeli nikumwanakena. Kafwarisi chatiyiliyi kutama nayuma yamwekeni, Yesu wamukwashili mumesu awunda.—Luka 7:36-48.

9. Chumanyi chinateli kutukwasha kwimbujola luwi lwaNzambi? Shimunenu chakutalilahu.

⁹ Tunateli kwimbujola ñahi luwi lwaNzambi? Kapostolu Pawulu wasonekeli nindi: “Nduñu yaMwanta, chinjila kufwila ntadi, chiña ekali wamwovu nawantu ejima, wukweti kashinshi kakuleja akwawu, ekali mukwakutiyilila akwawu.” (2 Tim. 2:24) Antu amaana elukaña chakumanisha kukala kulonda abuli kuneñesha akwawu. Toñojokenu chitunateli kumwekesha luwi muniyi yakutalilahu: Hamudimu, mukulumpi wetu wamudimu nakuzata chiwahi wanyi mudimu windi. Tunateli kwila ñahi? Mana kwetu hakwinza nakupompa henohu munahiti tukweji twatuvulu. Tunateli kuhosha nindi netudi? Mumudimu wakushimwina, mwiniitala hakuhosha nindi, “Hinikweti mpinji yakuhanjeka nenu katatakaku.” Komana mukumutiyilila? Kwitala, mwinikwetu hakutwihula nindi, “Muloñadi chimwabulila kunleja yuma yimukwila haMposu?” Komana tukumwakula nakalemesha? Neyi twiluka chinakutoñojokawu akwetu nikufwila kwiluka chinateli kutiyawu nansañu yitukuhosha, chikutukwasha kwiluka chakuhosha nikwila yuma munjila yikumwekesha nawu tunakwimbujola luwi lwaYehova.—Tañenu Yishimu 15:28.

10, 11. Chumanyi chinateli kutukwasha kwimbujola maana aNzambi? Shimunenu chakutalilahu.

¹⁰ Chineli twekala nawuswa wakwiluka yuma yitwabula kumona, chumichi chinateli kutukwasha kwimbujola maana aYehova nikwilukila chadimu yuma yikumwekana hachuma chitunakwila. Maana hichililu chimu chaYehova chalema, nawa neyi nakukeña kuyizatisha, welukilaña chadimu yuma yejima yinateli kumwekena. Hitukweti wuswa wakwilukila chadimu yuma neyi Nzambuku, ilaña chikuwaha neyi tutoñojokela chadimu yuma yikamwekana hachuma chitunakukeña kwila. A Isarela akañenyi kwiluka yuma yatama yikafumamu neyi adikaña naNzambi. Hichikweti muloña nayuma yejima yayilililiyi Nzambuku, Mosi welukili nindi akela yuma yatama kumesu aYehova. A Isarela ejima atiyili chembeliyi kamina kadiña namazu akwila nawu: ‘Wena himunza wabula mpuña, hiyakweti nikashinshuku.  Neyi adiñi namaana, neyi adiñi antu akwiluka mwenimu, neyi adiñi antu akutoñojoka mwamba kakuminawu, mutenowu o kuwaha!’—Kuhit. 31:29, 30; 32:28, 29.

¹¹ Hakwila twimbujoli maana aNzambi, chikuwaha neyi tutoñojoka hela tufwikija yuma yatama yikafumamu muyuma yitukwila. Chakutalilahu, neyi tunakudiluka namuntu wakwiñila nindi muwuluwi, twatela kwiluka netu chakala kudihemba munsañu yawuvumbi. Bayi tutoñojokaña hela kwila chuma chidi chejima chinatela kutamisha wulunda wetu wawuwahi naYehovaku. Dichi, twatela kwila yuma yesekana nanawa mazu onenawu akwila nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala.”—Yish. 22:3.

12. Indi yuma yitwatoñojokaña yinateli kutwiñija ñahi mukukala?

¹² Muntu wadihoñeshaña mumuchima welukaña nindi yitoñojoka yidi neyi kesi. Kesi neyi akizatisha chiwahi, kunateli kukwashana chidi neyi kutelekelahu yakudya. Ilaña kesi katama neyi kandala dehi chakwila kanateli kwocha itala nikujaha antu adumu. Munjila yoyimu, yitoñojoka yayiwahi sweje-e neyi yinakutukwasha kumwimbujola Yehova. Kafwampi, yitoñojoka yinateli kwikala yatama neyi tutoñojokaña hayuma yazonda. Chakutalilahu, neyi twikala nachaaku chakutoñojoka hayuma yatama, chumichi chikutuleñela kwila yuma yitwatoñojokaña. Mwamweni, kusweja kutoñojoka hayuma yatama kunateli kutamisha wubwambu wetu naYehova.—Tañenu Yakoba 1:14, 15.

13. Yumanyi yafwikijiliyi Evu kutalisha hachihandilu chindi?

¹³ Shinshikenu mumbanda watachi, Evu, watachikili kwikala nachipepa chakufwila kudya mukabu wayikaanishiluwu ‘wamutondu wakwiluka nachu niyayiwahi niyatama.’ (Kutach. 2:16, 17) Kapela wumulejeli nindi: “Chalala, himwakafwaku; muloña Nzambi neluki nindi ifuku dimukudya, mesu enu akatona, mwakekala neyi chadiyi Nzambi, mwakeluka niyayiwahi niyatama.” Evu ‘wamweni nindi mutondu wunawahi wakudya, kuwutala wakutiyisha kuwaha.’ Chumanyi chafuminimu? ‘Wakumwinuku nyikabu, hakudya, yomwinkahu ninfumwindi adiñiyi nindi, niyena hakudya.’ (Kutach. 3:1-6) Evu watiyili kuwaha mazu amulejeluwu kudi Satana. Chatela amulejeña yuma yayiwahi niyatama, Evu wukufuukulañahu yomwenindi. Iwu mumbanda watoñojokeleña yuma yatama! Kuhitila munshidi yanfumwa Evu, Adama, “nshidi yeñilili mumpata yamunu mwishina, ninshidi yaleteli kufwa.”—Rom. 5:12.

14. Indi Bayibolu yatukwashaña ñahi kuleka yililu yatama?

 ¹⁴ Nshidi yavulumwiniyi Evu mwitempa daEdeni hiyadiña yakwila wuvumbuku. Ilaña, Yesu wasoñamishili kutalisha hakufwikija yuma yawuvumbi. Wahosheli nindi: “Muntu wukutala mumbanda namesu akumufwila, neli dehi nindi wuvumbi mumuchima windi.” (Mat. 5:28) Kubombelahu, Pawulu wasoñamishili nindi: ‘Bayi mukeña yakukwasha nachu chisemwa chahesekuku.’—Rom. 13:14.

15. Maheta amuchidinyi itwatela kudilumbikila, nawa muloñadi?

¹⁵ Yitoñojoka yikwawu yatama hikufwikija mudi namaheta amavulu chakwila himunakusha muchima kunyidimu yaNzambuku. Chakadi nikujina, maheta amukwakuheta ‘wayifuukulaña kwindi nindi, himpwembu yanyuña.’ (Yish. 18:11) Yesu washimwini nsañu yamwekeshaña wushona watiyañayi muntu “wadilumbikilaña maheta amavulu, nindi indi yomweni hohu, hekalaña namaheta kumesu aNzambuku.” (Luka 12:16-21) Yehova watiyaña kuwaha neyi twila yuma yamuzañaleshaña. (Yish. 27:11) Wenowu muzañalu wutwatiyaña neyi twikala nawuselewa windi muloña tunakudilumbikila “maheta mwiwulu”! (Mat. 6:20) Nawa kwikala nawubwambu wawuwahi naYehova didu iheta dasweja kulema ditwatela kwikala nadu.

16. Njilanyi yinateli kuyikwasha kulonda mubuleña kusweja kwakama?

¹⁶ Tukusweja kwakamaña neyi chakwila tudilumbikila “maheta hanu hamaseki.” (Mat. 6:19) Yesu wazatishili chakutalilahu kulonda yashimuni “kwakama kwamakonu nikudimbana kwamaheta” chikunateli kuvumbisha mazu aWanta. (Mat. 13:18, 19, 22) Antu amakwawu atwalekañahu nakutoñojoka hayuma yatama yikamwekena neyi anakwakama hansañu yamali hela nehi. Hela chochu, neyi tusweja kudakamena tukukata nawa tukuluwañesha wubwambu wetu naNzambi. Tumukuhwelelenu Yehova nakwanuka netu ‘kaneñu mumuchima wamuntu kaletaña kuzembesha nyima; ilaña izu dadiwahi daleteshaña kutiya kuwaha.’ (Yish. 12:25) Tunateli kuzañalala neyi mukwetu watwiluka yatukolesha namazu amawahi. Neyi tuleja anvwali, mwini kwetu, hela ibwambu detu itwakuhwelela nawa wamwakama Nzambi nsañu yinakutukabisha nateli kutukwasha nawa hitukusweja kwakamaku.

17. Indi Yehova watukwashaña ñahi kulonda tubuli kusweja kwakama?

¹⁷ Kwosi muntu weluka kukala kwetu kubadika chelukayi Yehova. Pawulu wasonekeli nindi, “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Fwi. 4:6, 7) Toñojokenu hadi antu anakutukwasha kulonda tubuli kujimbesha wubwambu wetu naNzambi, akwetu akwakwitiya, aeluda, nduñu wakashinshi, añelu, Yesu niYehova yomweni.

18. Indi kutoñojoka hayuma yayiwahi kunateli kutukwasha ñahi?

¹⁸ Neyi chitunamoni, kutoñojoka hayuma yayiwahi kunateli kutukwasha kwimbujola yililu yaNzambi yidi neyi kukeña. (1 Tim. 1:11; 1 Yow. 4:8) Tukwikala namuzañalu neyi twikala nakukeña kwalala, kwiluka kukala kwafumaña muyuma yitwelaña nikuleka kwakamena yuma yamukaayi yinatela kutuleñela tubuli kwikala namuzañalu. Dichi tufwilenu kuzatisha chiwahi wuswa wetu watwinkayi Nzambi wakufwikija yuma yidi kumbidi yitwachiñejaña nikumwimbujola Yehova wukweti kukeña, luwi, maana nimuzañalu.—Rom. 12:12.