1. Indi antu mukaayi amonaña ñahi kubula kwila wuvumbi?

 MUKAAYI mwenzala yililu yawuvumbi. Chumichi chinakumwekana sweje-e munanu mafuku etu. Mumatuña amavulu, wuvumbi weyala neyala nikwila wuvumbi namuntu wubula kwikala wamuwuluwi awumonaña neyi hichuma chachiwahi. Yuma yamuchidiwu ayitiyakeshaña nimuyisela. (Mas. 12:8) Wuvumbi wunasweji chakwila munateli kudihula nenu, ‘Komana muntu nateli kushakama chakubula kwila wuvumbi?’ Tunateli kwakula namuchima wumu netu, Eñañi, Yehova nateli kukwasha akwaKristu alala kutwalekahu kwikala ashinshika chabula kwila wuvumbi.—Tañenu 1 Atesalonika 4:3-5.

2, 3. (a) Muloñadi chichalemena kukaana kufwila kwatama? (b) Yumanyi yitukudiza muchinu chibaaba?

² Chatachi, twatela kwiluka netu hakwila twikali ashinshika chakubula kwila wuvumbi, twatela kukaana yililu yawuvumbi. Neyi chochinateli ilowa dikweti ndisha kukokola inshi, yitoñojoka yakukeña kwila wuvumbi niyena yinateli kumudimba  mukwaKristu neyi yabula kuleka kutoñojoka hayumiyi chakubula kuumba mpinji. Yinateli kutukokola nakutuleñela kwila wuvumbi. Mukuhita kwampinji, kudimbana kwanshidi kunateli kusweja chakwila kufwila kwatama kunateli kubaaba ivumu. Hampinji yamuchidiwu hela kambuña Yehova nateli kwila yuma yafwilañayi neyi yawana mpinji yakwila mwafwilañayi. Eñañi, ‘kufwila kwatama . . . kwavwalaña nshidi.’—Tañenu Yakoba 1:14, 15.

³ Chalema kutoñojokaña hayuma yitwafwilaña hakapinji kantesha chiyinateli kumuleñela muntu kukoña nshidi yahamesu bwi-i. Dichi chachiwahi kwiluka netu neyi tukañesha kufwila kwatama kumena nyiji mudi etu, hitwatela kudiñija muyililu yawuvumbi kulonda twakamoni jomisha mbañaku. (Ŋal. 5:16) Tushinshikenu yuma yisatu yinateli kutukwasha kukaana kufwila kwatama: wubwambu wetu naYehova, kufumba kwaMwizu dindi niwukwashu wawakwetu akwaKristu apama.

4. Muloñadi chichalemena kukundama kwakwihi naYehova?

⁴ Bayibolu yakoleshaña antu afwilaña ‘kukundama kwakwihi naNzambi’ nawu: ‘Tookeshenu kumakasenu, . . . tookeshenu munyichima yenu.’ (Yak. 4:8) Neyi tulemesha wubwambu wetu naYehova, tukufwilaña kumuzañalesha muyuma yejima yamuchihandilu chetu kushilahu niyuma yitwatoñojokaña. Twafwilaña kwikala ‘namuchima wutooka’ kuhitila mukutoñojoka yuma yitooka, yasweja kuwaha niyuma yaya mpuhu yayiwahi. (Mas. 24:3, 4; 51:6; Fwi. 4:8) Kafwampi, Yehova weluka nindi twawanina wanyi. Weluka nindi twekala nachaaku chakufwila kwila yuma yatama. Ilaña tweluka netu Nzambi waneñaña neyi tuleka yitoñojoka yatama yikuli chatela tuzati nañovu kulonda tuleki kutoñojoka yuma yamuchidiwu. (Kutach. 6:5, 6) Kutoñojoka hachumichi kwatukwashaña kufuukulahu kutoñojoka yuma yitooka.

5, 6. Indi kulomba kunateli kutukwasha ñahi kulonda tubuleña kutoñojoka yuma yatama?

⁵ Njila yalema mutwatela kumwekeshela netu twashindamena hadi Yehova hikutwalekahu kulomba kulonda tubuleña kutoñojoka yuma yatama. Neyi tukundama kwakwihi naYehova mukulomba, niyena wukukundama kwakwihi nanetu. Watwinkaña spiritu yindi yajila kulonda yitwinki ñovu yakukaana yitoñojoka yakwila wuvumbi nikutwalekahu kwikala ashinshika. Dichi tumwekeshenu mpwila yetu yakukeña kumuzañalesha Nzambi nayitoñojoka yamumuchima wetu. (Mas. 19:14) Komana twadizozaña hakulomba netu Yehova yatukwashi kwiluka ‘yitoñojoka yatama’ yidi neyi kufwila kwatama hela yuma yashakama mumuchima yikutuleñela kuvulumuna? (Mas. 139:23, 24) Komana twamulombaña mpinji yejima kulonda yatukwashi kuhemba kashinshi ketu neyi tunaholokeli mukweseka?—Mat. 6:13.

⁶ Nkulilu yetu hela yaaku yetu yayikulu yinateli kutuleñela kukeña yililu yahelayi Yehova. Hela chochu, nateli kutukwasha kuhimpa kulonda tutwalekuhu kumukalakela munjila yetejayi. Mwanta Davidi welukili chumichi. Hanyima yakwila wuvumbi naBatisheba, Davidi wamulombeli Yehova nindi: “Nleñelumu muchima wutooka . . . mbalumwini spiritu yayiha yakashinshi mukachi kami.” (Mas. 51:10, 12) Mujimba wetu wazeya wunateli kutiya kuwaha nayililu yatama, ilaña Yehova nateli kutwinka muchima wakumwovwahila. Hela chakwila yitoñojoka yatama yinashimati chikupu nawa yinakufwila kuluwañesha yitoñojoka yetu yitooka, Yehova nateli kukiña nyendu yetu kulonda twovwahili nshimbi jindi nikutwesha kujilondela. Nateli kutukwasha kuyuula yitoñojoka yetu yatama.—Mas. 119:133.

7. Indi Izu daNzambi dinateli kutukwasha ñahi kulonda tubuleña kutoñojoka yuma yamajilu?

⁷ Yehova nateli kwakula kulomba kwetu kuhitila Mwizu dindi Bayibolu. Maana ekala  Mwizu daNzambi ‘hakusambila amawahi.’ (Yak. 3:17) Kutaña Bayibolu mpinji yejima nikutoñojoka chikupu yuma yitunakutaña yinateli kutukwasha kubula kutoñojoka yuma yatama. (Mas. 19:7, 11; 119:9, 11) Kubombelahu, muBayibolu mwekala yakutalilahu nikufumba kwakuwahi kunateli kutukwasha kulonda tubuli kwila yuma yamajilu.

8, 9. (a) Chumanyi chamuleñeleli mukwenzi weyala kwila wuvumbi namumbanda chivumbi? (b) Yumanyi yamakonu yitunateli kwesekeja nachakutalilahu chakusoñamisha chekala mumukanda waYishimu kapetulu 7?

⁸ Hamukanda waYishimu 5:8, twatañañahu nawu: “Endelaku kwakulehi [namumbanda chivumbi], bayi wukundama kwakwihi nachisu chetala dinduku.” Wubanji wafumaña mukubula kwovwahila iku kufumba awishimuna mumukanda waYishimu kapetulu 7, hitwatañaña nsañu yamukwenzi weyala wayili nakwendujola kwakwihi netala damumbanda chivumbi. Wufuku hiwukwila. Hiyakumubulakana hamaakenu amukwakwa kudi mumbanda, hadaha navwali yakuvwala yinakumwekesha mujimba. Mumbanda hakumukwata iwu mukwenzi nakumupwepujola. Mumbanda hakuhosha munjila yakumukokola iyala kulonda yakañanyi mwakwilila. Elili wuvumbi. Hamwaha ona mukwenzi weyala hatoñojokeli jakuya nakwila wuvumbuku. Iwu mukwenzi hadiña  namaana nikashinshuku. Hela chochu, watela kumona yuma yatama hachuma chakoñeliyi. Chadi kuwaha neyi wabulili kuya kwadiñayi iwu mumbanda.—Yish. 7:6-27.

⁹ Komana ninetu tunateli kumwekesha yililu yoyimu yakubula kashinshi hadaha nikudiñija muyuma yatama yinateli kusañumuna yitoñojoka yatama? Chakutalilahu, maprogiramu amakwawu ahaTV amwekeshañawu nawufuku ekala atama. Chumanyi chinateli kumwekana neyi tunakuhimpa himpa machanewu? Chinateli kwikala chatama neyi tuyaña haIntaneti nakwenzulula hadi hejima chakubula kwiluka yuma yitunakwenzulula, kushilahu nikuhanjekela haIntaneti hela kutala haWebu sayiti hatiyakeshañawu yililu yawuvumbi ninyevulu yanzekesi. Komana yuma yamuchidiwu yikutuleñela kumona yuma yinateli kusañumuna kufwila kwila yuma yatama nikutwalekahu kwikala ashinshika chabula kwila wuvumbi?

10. Muloñadi kukenkama chikwatamina? (Talenu mwevulu wakutachikilahu.)

¹⁰ Bayibolu yatukwashaña cheñi kuhitila mukutufumba chakushakama namuntu weyala hela wamumbanda. (Tañenu 1 Timotewu 5:2.) Iku kufumba kwakaanisha kukenkama. Amakwawu amonaña neyi kuzatisha yiidi yamujimba nikutala muntu munjila yakumwekesha kukeña hikunateli kuleta kukalaku muloña anakudikwata wanyi. Ilaña kukenkama hela kwiteja muntu kukukenkamina, kwaleteshaña kwikala nayitoñojoka yatama yinateli kukojeja muntu kwila wuvumbi. Chumichi chamwekanahu dehi nawa chinateli kumwekena cheñi.

11. Yosefu wemikili chakutalilahu chachiwahi chamuchidinyi?

¹¹ Yosefu hetejeli kumukenkaminaku. Chelili ñoda mwanta windi Potifwari yatachiki kumukenkamina, Yosefu wakaanini. Ilaña mumbanda yeniwu halekeluku. Mafuku ejima wamulejeleña Yosefu nindi ashakami nindi. (Kutach. 39:7, 8, 10) Kwesekeja namuntu wadiza jaBayibolu, munjila yikwawu ñoda Potifwari wahosheleña nindi: “‘Twaya tushakami hamu kankawetu hakapinji kantesha,’ nakukuhwelela nindi wukumuleñela [Yosefu] kutachika kumukeña.” Hela chochu, Yosefu wafuukwiluhu kubula kwila yuma yatama hela kwiteja kumukenkamina. Wakaanini kumukenkamina kudi iwu mumbanda, niyena hamukenkamininuku, chumichi chamukwashili kubula kwikala nakufwila kwatama mumuchima windi. Chesekeliyi nindi yamukanjikiji kwila nindi wuvumbi, Yosefu wakaanini chakubula nikumba mpinji. ‘Yena washiyili ihina dindi muchikasa chamumbanda, watemukilili hanzi.’—Kutach. 39:12.

12. Tweluka ñahi netu yuma yitwatalaña yinateli kuluwañesha muchima wetu?

¹² Bayibolu yatusoñamishaña cheñi hakukala kunateli kumwekana neyi twiteja muchima wetu kulondela yuma yamonaña mesu. Disu dalwisu dinateli kutusañumuna kufwila kwatama kwakwila wuvumbi. Yesu wasoñamishili nindi “muntu wukutala mumbanda namesu akumufwila, neli dehi nindi wuvumbi mumuchima windi.” (Mat. 5:28) Anukenu chuma chamumwekeneni Mwanta Davidi. ‘Hewulu detala hadiñiyi [Davidi] wamweni mumbanda wudi nakuwela.’ (2 Sam. 11:2) Wakañenyi kutala kwacheñi nikutoñojoka hayuma yacheñi. Chumichi chamuleleli kutachika kumukeña mumbanda wadiña ñoda muntu wacheñi nawa welili nindi wujila.

13. Muloñadi chitwatelela ‘kutiyañana namesu etu,’ nawa chumichi chakeñekaña kwiladi?

¹³ Hakwila tudikañi nayitoñojoka yawuvumbi, twatela ‘kutiyañana namesu etu’ neyi cheliliyi Yoba washinshika. (Yoba 31:1, 7, 9) Dichi twatela kufuukulahu chikupu kuyuula mesu etu kulonda tubuli kutala muntu wacheñi namesu akufwila kwila nindi wuvumbi. Chumichi chabombelamu kubula kushinshika nyevulu yinateli kusañumuna wuvumbi, yidi hakompyuta, hachipamba, hefu dahewulu damagazini hela kudi kwejima.

14. Tunateli kuhetelamu ñahi mukufumba kwakutwalekahu kwikala ashinshika chakubula kwila wuvumbi?

 ¹⁴ Neyi chakwila hayuma yejima yinashimunuwu haduhu yuma yimunamoni nenu yinateli kuyikwasha kudikaña nakufwila kwatama, mwatela kuzatilahu swayi-swayi. Itejenu kufumba kwaMwizu daNzambi kunateli kuyikwasha kubula kuvulumuna nikutwalekahu kwikala ashinshika chakubula kwila wuvumbi.—Tañenu Yakoba 1:21-25.

15. Neyi tunakukabakana nakufwila kwatama, muloñadi chichalemena kukeña wukwashu?

¹⁵ Neyi tunakukabakana nakufwila kwatama kwakwila wuvumbi, akwetu akwaKristu anateli kutukwasha. Hela chochu, kulejamu akwetu nsañu yamuchidiwu chinateli kwikala chakala. Ilaña neyi tuhamuka nakulejamu mukwaKristu wapama nateli kutukwasha kulonda tubuli kufwila yuma yatama. (Yish. 18:1; Heb. 3:12, 13) Neyi tuleja akwaKristu apama kuspiritu kukala kwetu anateli kutukwasha kwiluka mwakwilila. Chumichi chinateli kutukwasha kuhimpa hanakukeñeka kulonda tushakami mukukeña kwaYehova.

16, 17. (a) Indi aeluda anateli kukwasha ñahi antu anakukabakana nakufwila kwatama? Lumbululenu. (b) Muloñadi chichalemena kudi antu atalaña nyevulu yanzekesi kukeña wukwashu mukunyakashana?

¹⁶ Aeluda akwaKristu anateli kutukwasha. (Tañenu Yakoba 5:13-15.) Mukwenzi wumu muBrazil wakabakeni nakufwila kwatama hadi yaaka yayivulu. Wahosheli nindi: “Nelukili nami yuma yinatoñojokeleña yamuneñesheleña Yehova, ilaña natiyileña sonyi yakulejaku antu amakwawu chinatiyileña.” Kukooleka, eluda wumu wukweti muchima wakukwashana wamukolesheli nindi yalejumu aeluda kulonda amukwashi. Iwu mukwenzi washimwini nindi: “Nahayamini aeluda chanmwekesheleluwu luwi, antiyilili luwi nankashi kubadika chinakuhweleleli. Atiyilili kukala kwami nakanañachima. Azatishili Bayibolu kulonda amwekeshi nawu Yehova wankeña nawa alombeli kudi Nzambi hamesu ami. Chumichi chankwashili kwiteja kufumba kwamuBayibolu kwanfumbiluwu.” Chimwahitili yaaka, hanyima yakuyilaku hambidi muyuma yakuspiritu, wahosheli nindi: “Ichi neluki chichalemena kukeña wukwashu chatela tuswekeña nshidi jetu.”

¹⁷ Chalema kukeña wukwashu neyi chuma chinakuyileñela kufwila kwila wuvumbi hichaaku chakutala nyevulu yanzekesi. Neyi mushintajalaña kukeña wukwashu mukwiñila mukukala chakwila kufwila kwatama ‘kukubaaba ivumu nakuvwala nshidi’ nawa chumichi chikuneñesha antu amakwawu nikuleta kasawuntu hejina daYehova. Mpwila yakukeña kumuzañalesha Yehova nikutwalekahu kwikala muchipompelu chawakwaKristu yaleñela ambuñindi amavulu kwiteja mwayikwashañawu.—Yak. 1:15; Ps. 141:5; Heb. 12:5, 6.

18. Chumanyi chimunakufwila kwila?

¹⁸ Chineli antu mukaayi kaSatana anatwalekuhu nakwila wuvumbi, Yehova watela watiyaña kuwaha hakumona ambuñindi adihana anakuzata nañovu kulonda ekali nayitoñojoka yitooka nikwovwahila nshimbi jindi jaloña. Dichi, wejima wetu tufwilenu kutwalekahu kukundama kwakwihi naYehova nikwiteja kufumba kwatufumbañawu Mwizu dindi nimuchipompelu chawakwaKristu. Neyi tutwalekahu kwikala ashinshika chakubula kwila wuvumbi, tukwikala nachinleji chitooka. (Mas. 119:5, 6) Kumbidi neyi Satana anamufumishuhu dehi, tukekala nakukooleka kwakushakama haya nyaka mwituña mukabula yililu yatama.