1. Tunateli kuzatisha ñahi kulomba kwekala hamukanda waMatewu. 6:9-13 mumudimu wetu wakushimwina?

 ANTU amavulu anateli kuhoshela kumutu mazu ekala muKulomba kwaMwanta. Mumudimu wetu wakushimwina kwitala nikwitala twavula kuzatisha iku kulomba kulonda tukwashi enimatala kwiluka nawu Wanta waNzambi hinfulumendi yalala yikahimpa yuma hamaseki. Hela tunateli kuzatisha kulomba kwatachi kulonda kumwekesha netu Nzambi wukweti ijina dindi, itwatela kujilika.—Mat. 6:9.

2. Tweluka ñahi netu Yesu hatalishili mukwila nindi antu alombeña iku kulomba kwachitalilu hezu hezuku?

² Komana Yesu washimwini nindi antu atela kuzatishaña mazu wowamu ekala muniku kulomba neyi chelañawu aKristendomu? Inehi. Henohu Yesu kanda yahoshi awa mazu ekala muniku kulomba kwachitalilu, wahosheli nindi: ‘Chimukulomba, bayi muhitulukaña nakutenatena mwamukunkulwayiku.’ (Mat. 6:7) Hampinji yikwawu wazatishili iku kulomba kuzatisha mazu acheñi. (Luka 11:1-4) Dichi Yesu watukwashili kwiluka yuma yitwatela kulomba nawa mundonda wayuma yalema. Dichi iku kulomba  kunashikilumu kukutena netu kulomba kwachitalilu.

3. Malwihwinyi itwatela kutoñojokahu chikupu hampinji yitukudiza hakulomba kwachitalilu?

³ Muchinu chibaaba nichinalondeluhu tukudiza nakanañachima hakulomba kwachitalilu. Chitukushinshikaña haniku kulomba, dihulenu nenu, ‘Indi iku kulomba kwachitalilu kunateli kunkwasha ñahi kulomba chiwahi? Sweje-e dinu, komana nelaña yuma kwesekeja nakulomba kwachitalilu?’

4. Indi nhoshelu yakwila nawu “Tata yetu” yatwanukishañadi, nawa munjilanyi Yehova mwekalilayi “Tata” yawakwaKristu akweti kuchiñeja kwakushakama hamaseki?

⁴ Nhoshelu yakwila nawu “Tata yetu,” bayi “Tata yamuku,” yatwanukishaña nawu twekala hakachi ‘kawamana kwetu’ adikeña chikupu. (1 Pet. 2:17) Tukweti kukooleka kweneni. AkwaKristu awayishewa atondawu kwikala anyana kaNzambi akweti chikuhwelelu chakuya mwiwulu, amutenaña Yehova nawu “Tata” namuchima wawu wejima. (Rom. 8:15-17) AkwaKristu akweti kuchiñeja kwakushakama hamaseki haya nyaka niwena anateli kumutena Yehova nawu “Tata.” Diyi Wayinkaña Wumi nawa akwakudifukula indi alala ejima wayinkaña yuma yakeñañawu. Antu akweti kuchiñeja kwakushakama hamaseki akekala anyana kaNzambi chikupu hanyima yakwikala awanina neyi akatwalekuhu kwikala ashinshika hakayesekawu kakukumishaku.—Rom. 8:21; Chim. 20:7, 8.

5, 6. Indi anvwali anateli kwinka anyanawu chawananyi chachiwahi, nawa mwana wudi wejima watela kwila ñahi nanichi chawana? (Talenu mwevulu wakutachikilahu.)

⁵ Anvwali ayinkaña anyanawu chawana chachiwahi neyi ayidizisha chakulomba nikumumona Yehova nawu hiTata wakamenaña wekala mwiwulu. Mana kwetu wunakuzata neyi nkoñi wañinza muSouth Africa wahosheli nindi: “Kufuma tuhu havwalikiluwu anyanetu awambanda nalombeleña nawu mpinji yejima nawufuku, kubula kulomba nawu chiña hohu neyi nafumuhu. Kakavulu anyanetu ahoshaña nawu hiyanukaña nsañu yinalombeleña mafuku ejima nawufukuku. Ilaña, anukaña yuma chiyadiña, kuhanjeka naTata yetu Yehova chikwekala kwajila nikutiya nawu adi mukuwunda. Chelili eluki chakulomba, nayikolesheleña kulomba nezu datiyakana kulonda nitiyi chinakumulejawu Yehova yitoñojoka yawu. Chumichi chanyinkeleña kukooleka kwakwiluka yuma yatoñojokeleñawu. Dichi natachikili kuyikwasha chovu-chovu kulonda asheñamu yuma yalema yekala mukulomba kwachitalilu kulonda kulomba kwawu kwikaleña kwatiyakana.”

⁶ Chumichi chaleñeleli anyana kamana kwetu kutwalekahu kwila chiwahi kuspiritu. Akweti wuluwi wamuzañalu nawa anakwila mwaya kukeña kwaNzambi nawanfumu jawu mumudimu wampinji yejima. Kwosi chawana chabadika kulema chinateli kwinkawu anvwali anyanawu, kubadika kuyikwasha kulonda ekali nawubwambu wawuwahi naYehova. Hela chochu, chidi kudi muntu yomweni kuhemba iwu wubwambu windi walema. Chumichi chabombelamu kudiza kukeña ijina daNzambi nikudizatisha nakalemesha kakeni.—Mas. 5:11, 12; 91:14.

7. Kukoolekanyi kukwetuwu antu jaNzambi, nawa chumanyi chitwatela kwila?

⁷ Tukweti kukooleka bayi neyi kwakwiluka ijina daNzambi hohuku, ilaña kwakwikala “antu ambala ejina dindi.” (Yil. 15:14; Isa. 43:10) Twamulombaña Tata yetu wamwiwulu netu: ‘Ijina deyi adijiliki.’ Neyi mulombaña muniyi njila chikuyileñela kulomba nenu Yehova yayikwashi kulonda mubuli kwila hela kuhosha yuma yidi yejima  yikuleta kasawuntu hejina dindi dajila. Hitwakeñaña kwikala neyi chadiñawu antu amuyaaka nkulakaji yakusambila abulileña kwila yuma yatañishileñawuku. Kapostolu Pawulu wasonekeli hadi wena nindi: “Ijina daNzambi enda adishiña mukachi kawaJentili hansañu yenwenu.”—Rom. 2:21-24.

8, 9. Shimunenu chakutalilahu chinakumwekesha Yehova chakiswilañayi antu asha maana hakujilika ijina dindi.

⁸ Twafwilaña kujilika ijina daNzambi. Muhela wamuNorway amushili namwana weyala wayaaka yiyedi chafwiliyi nfumwindi. Walumbulwili nindi, “Yadiña mpinji yakala nankashi muchihandilu chami. Nalombeleña mafuku ejima kwakwihi naora niora kulonda Nzambi yankoleshi nitweshi kuumika chineñi kulonda nibuli kumushila Satana iluña dakumusawula Yehova neyi chakwila nifuukulahu chatama hela nibula kwikala washinshika. Nafwilileña kujilika ijina daYehova nawa nakeñeleña mwanami yakamumoni tata yindi cheñi muParadisa.”—Yish. 27:11.

⁹ Komana Yehova wakwili akuna kulomba kwakudizoza? Eñañi. Iwu muhela amukwashili kudi akwawu akwakwitiya adikundileñayi nawu mpinji yejima. Chimwahitili yaaka yitanu, amusumbwili kudi eluda. Chayinu mpinji mwanindi wudi nayaaka 20 yakusemuka nawa himana kwetu wapapatishewa. Wahosheli cheñi nindi, “Nazañalalaña muloña nfumwami nankwashi kumukulisha iwu mwana.”

10. Yumanyi yakeñekaña hakwila ijina daNzambi akadijiliki chikupu?

¹⁰ Yumanyi yakeñekaña hakwila ijina daNzambi adijiliki chikupu nikufumishahu kasawuntu kejima? Hakwila chumichi chizatiki, Yehova watela kufumishahu antu ejima adikañaña nachiyuulu chindi mumushikila. (Tañenu Ezekeli 38:22, 23.) Antu akekalaña awanina chovu-chovu. Twatalilaña mpinji yakela antu ejima niañelu akajilika ijina daYehova. Nkumininaku, Tata yetu wamwiwulu wukweti kukeña ‘wakekala diyi hohu kanka windi chikupu, mwejima.’—1 Kor. 15:28.

11, 12. Muchaaka cha 1876, akwaKristu alala ayikwashili kwiluka chumanyi?

¹¹ Henohu Yesu kanda ayi mwiwulu, apostolu indi amwihwili nawu: “Eyi Mwanta, keña wufuntishi wanta kudi Isarela mafuku anu, tahindi?” Ñakwilu yaYesu yamwekesheli nawu hiyadiña mpinji yakwila eluki mpinji yakatachika Wanta waNzambi kuyuulaku. Wayilejeli atumbanji twindi kusha maana kumudimu walema wakushimwina wateleleli kuzatawu. (Tañenu Yililu 1:6-8.) Hela chochu, Yesu wayilejeli atumbanji twindi kutalilaña Wanta waNzambi chiwakenza. Kufuma tuhu kumafuku awapostolu, akwaKristu alombaña nawu Wanta waNzambi winzi.

¹² Chashikili mpinji yakwila Yesu atachiki kuyuula Wanta waNzambi mwiwulu, Yehova wakwashili antu jindi kulonda eluki mpinji yikamwekana yumiyi. Muchaaka cha 1876, Charles Taze Russell wasonekeli chibaaba chedishiluwu mumagazini yaBible Examiner. China chibaaba chadiñi namutu wakwila nawu, “Gentile Times: When Do They End?,” chashimwini nawu 1914 hichaaka chalema. Ichi chibaaba chesekejeli “mpinji jitanu najiyedi” jekala muwuprofwetu waDanyeli ‘nakumana kwayaaka yawaJentili’ yashimwiniyi Yesu. *—Dan. 4:16; Luka 21:24.

13. Yumanyi yamwekeni muchaaka cha 1914, nawa yuma yamwekeni mukaayi yamwekeshelidi?

¹³ Mu 1914, kwavulumukili njita hakachi kanyunza yamuEurope, iyi njita yatandili  nakuwanina kaayi kejima. Iyi njita chiyamanini muchaaka cha 1918, yaleteli nzala yakapwelendendi nichipupu chatenañawu nawu flu chajahili antu amavulu kubadika ninana afwili kunjita. Dichi “chinjikijilu” chashimwiniyi Yesu chakumwekesha kwinza kwindi kwakadi kumona namesu neyi Mwanta wamuha wahamaseki chatachikili kushikijewa. (Mat. 24:3-8; Luka 21:10, 11) Wunsahu wawuvulu washimunaña nawu Mwanta Yesu Kristu ‘amwinkeli chibaaba’ muchaaka cha 1914. “Hakuya nakwimika mushindu kulonda nawa akemikaña mushindu ho-o.” (Chim. 6:2) Wawahishili mwiwulu kuhitila mukulwa njita naSatana niandemoni jindi anatililuwu hamaseki. Kufuma tuhu hayina mpinji, antu eluka chalala chanawa mazu onenawu, akwila nawu: ‘Oyu yihuñu yakamona iseki nakaluñalwiji! Muloña Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.’—Chim. 12:7-12.

14. (a) Muloñadi chichalemena kulomba netu Wanta waNzambi winzi? (b) Mudimwinyi walema wutwatela kuzata chayinu mpinji?

¹⁴ Wuprofwetu wasonekawu hamukanda waChimwekeshu 12:7-12 watukwasha kwiluka yuma yatama chiyatachikili kumwekana hamaseki hampinji yekaliliyi Yesu Mwanta waWanta waNzambi. Yesu, Mwanta waWanta waNzambi watachikili kuyuula hakachi kawayilumbu jindi. Tukutwalekahu kulomba netu Wanta waNzambi winzi kushika nimpinji yakamanishayi Yesu kushinda ayilumbu jindi nikufumisha yuma yatama hamaseki. Chayinu mpinji twatela  kwila yuma kwesekeja nachitwalombaña kuhitila mukuzata mudimu wunakushikija “chinjikijilu” chasweja kulema. Yesu washimwineñahu dehi nindi: ‘Nsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyunza yejima wunsahu; henohu dihu hakenza kukumisha.’—Mat. 24:14.

15, 16. Tunateli kwilaña ñahi yuma kwesekeja nakulomba kwakwila nawu nkeñelu yaNzambi ayili hamaseki?

¹⁵ Kwakwihi nayaaka 6,000 yinahitihu, nkeñelu yaNzambi ayilileña hamaseki. Diwu muloña waweni Yehova chamweniyi yuma yayiwahi yayinkeliyi antu nindi: “Yinawahi nankashi.” (Kutach. 1:31) Kufuma tuhu hampinji yadikañiliyi Satana, antu antesha hohu diwu anakwila nkeñelu yaNzambi hamaseki. Ilaña makonu tukweti kukooleka kwakushakama mumafuku akwila aYinsahu akushika ku 8 miliyoni hiyanakulomba hohu nawu nkeñelu yaNzambi ayili hanu hamasekuku, ilaña anakufwila kwila yuma kwesekeja nakulomba kweniku. Elaña mwenimu kuhitila mukwikala nachihandilu chamuzañaleshaña Nzambi nikudikita chikupu mumudimu wakwilisha atumbanji.

¹⁶ Chakutalilahu, muhela wapapatisheweli mu 1948 nawa wakalakeleli muAfrica neyi kamishonali wahosheli nindi: “Kwesekeja nanichi chibalu chakulomba kwachitalilu, kakavulu nalombaña nami antu adi neyi anyikoku akayendela nikuyikwasha kulonda amwiluki Yehova henohu kukuma kanda kushiki. Cheñi nawa, neyi inakukeña kumushimwina muntu, nalombaña nami Nzambi yanyinki maana kulonda nimushiki hamuchima. Kutalisha kudi antu adi neyi anyikoku awanawu dehi, nalombaña nami Yehova yatukiswili kulonda tuyakameneña.” Dichi chaletesha iwu muhela wudi nayaaka 80 yakusemuka kuzata chiwahi mumudimu wakushimwina nawa chineli amukwashaña kudi akwawu, nakwashi antu amavulu kwikala aYinsahu jaYehova. Chakadi nikujina, munateli kutoñojoka hadi antu amakwawu akweti chakutalilahu chachiwahi anakudihana hakwila eli nkeñelu yaNzambi hela chakwila anakumona kukala kudi neyi wushinakaji.—Tañenu Afwilipi 2:17.

17. Mwatiyaña ñahi hayuma yikelayi Yehova hakwakula kulomba kwetu kwakwila nawu nkeñelu yindi ayili hamaseki?

¹⁷ Tukutwalekahu nakulomba netu nkeñelu yaNzambi ayileña, kushika nikumpinji yakafumishawu ayilumbu jaWanta waNzambi hanu hamaseki. Dihu dinu hitwakamona nkeñelu yaNzambi chikayilañawu chikupu hamaseki neyi mabiliyoni awantu anayisañwili dehi muparadisa hamaseki. Yesu wahosheli nindi, “Bayi muhayama chumichuku; mpinji yakenza henohu antu ejima adi mumajamu [achanukishu] akatiya izu [dami] akedikamu.” (Yow. 5:28, 29) Tukatiya muzañalu nankashi haniyi mpinji hakutambwila antaña jetu itwakeña afwa dehi. Nzambi ‘wakakombola madilu ejima kumesu etu.’ (Chim. 21:4) Antu amavulu akasañulawu akekala “abula kuloña,” afwili chakubula kudiza nsañu yalala yahosha hadi Yehova niMwanindi. Twakekala nakukooleka kwakuyidizisha antu akasañulawu nkeñelu yaNzambi, chumichi chikayikwasha kulonda akatweshi kuheta “wumi wahaya nayaaka.”—Yil. 24:15; Yow. 17:3.

18. Yumanyi yakeñañawu antu chikupu?

¹⁸ Wanta waNzambi wukajilika ijina daYehova nawa wukaleta kuwunda nikunuñañana mukuleña kwejima. Dichi, ñakwilu yayeni yakulomba kwatachi kusatu kwekala mukulomba kwachitalilu kukashikija yuma yakeñañawu antu chikupu. Chayinu mpinji, tukweti yuma yalema yitwakeñaña yashimunawu mukulomba kuwana kunashaluku kwekala mukulomba kwaYesu kwachitalilu. Tukuyihanjeka muchibaaba chinalondeluhu.