1-3. Muloñadi muhela wumu chelukiliyi nindi Yehova welukaña yuma yitwakeñaña?

 LANA wakavulamena wanyi yuma yamwekeni hampinji yayiliyi nakuhempula muGermany mu 2012. Wamweni nindi kulomba kwindi kuyedi kwalombeliyi akwakwili. Walombeli kulomba kwatachi hampinji yadiñayi mumasuwa iku nakuya kwibulu dandeki. Walombeli kudi Yehova nindi yamukwashi kulonda yashimwini. Walombeli kamuchiyedi chashikiliyi kwibulu dandeki chelili amuleji nawu lwendu lwindi analuhimpi ifuku dacheñi. Lana walombeli kudi Yehova kulonda yamukwashi muloña wazatishili malindi amavulu amuEurope nawa hadiña nakwakukamaku.

² Lana chamanishiliyi hohu kulomba kwindi kwamuchiyedi, watiyili izu damuntu wunakumutambika nindi, “Kolaku Lana, wunakwiladi kunu?” Iwu mukwenzi weyala atañileña nindi kushikola. Wadiña namama yindi ninkaaka yindi wamumbanda amushinjikijileña hampinji yayileñayi nakukandama  ndeki yayileña kuSouth Africa. Chelili Elke mama yaniwu mukwenzi yeluki kukala kwadiña naLana, wamutambwili Lana namakasa ayedi nakuya nindi kwitala dawu. Elke namama yindi amutambwilili Lana nachisambu nawa amwihwili malwihu kutalisha hayuma yakuhwelelayi nimudimu windi wakushimwina mpinji yejima.

³ Chikwachili nantentemena, hanyima yakudyawula, Lana wakwili malwihu amavulu amuBayibolu nawa watambwili keyala yanawa antu amutambwilili kulonda muntu wacheñi akenzi nakuyakula malwihu awu. Lana wafuntili kumukala windi chachiwahi nawa watwalekeluhu namudimu windi wawupayiniya wampinji yejima. Welukili nindi ‘Mukwakutiya mwalombañawu antu’ wamukwashili hakwila yuma yendi chiwahi.—Mas. 65:2.

4. Yumanyi yitwakeñaña yitukuhanjekahu?

⁴ Neyi tumona kukala kwakukasumwisha, hichinateli kutukalila kulomba wukwashuku muloña Yehova watiyaña kuwaha kutiya kulomba kwawantu jindi ashinshika. (Mas. 34:15; Yish. 15:8) Hela chochu, neyi tutoñojoka chikupu hakulomba kwachitalilu, tukwiluka netu kudi yuma yikwawu yalema yitwatela kudiwula. Chakutalilahu, talenu yuma yakuspiritu yitwakeñaña chayishimunawu mukulomba kusatu kwakukumishaku mukulomba kwachitalilu. Komana kuduhu yuma yikwawu yitunateli kwila kwesekeja nakulomba kwamuchiwana kwahosha hakudya kwetu kwamafuku ejima?—Tañenu Matewu 6:11-13.

5, 6. Muloñadi kulomba kudya kwetu kutukukeña lelu chikwalemena hela chakwila tukweti maheta amavulu?

⁵ Ilukenu nenu iku hikulomba kwamuntu wumuku, muloña hikunakuhosha nawu nyinki kudya “kwami” kunukukeña leluku, ilaña kunakuhosha nawu “twinki” kudya kwetu kutukukeña lelu. Victor nkoñi wañinza wamuAfrica, walumbulwili nindi: “Kakavulu namusakililaña Yehova nami, ami niñodami hitwakamenaña chikupu kutalisha kutunateli kuwana yakudya yitukudya hela netu hinyi wukutufwetela italaku. Amana kwetu atwakamenaña chiwahi hefuku hefuku. Ilaña nalombaña nami antu atukwashaña atwalekuhu kwikala nanjila yakuwaninamu mali chineli akala.”

⁶ Neyi tukweti yakudya yamafuku amavulu, tunateli kutoñojokelaku amana kwetu abula yuma hela adi muwubanji wadimwekenaña. Hitwatela kuyilombelelaña akwetu hohuku, ilaña twatela kwila yuma kwesekeja nachitunakulomba. Chakutalilahu, neyi tukweti yuma, twatela kuyinkahu akwetu akwakudifukula anakaankili. Tunateli cheñi kuhanaña yawana kumudimu wamukaayi kejima muloña iyi yawana yakwashaña amana kwetu anakaankili.—1 Yow. 3:17.

7. Chakutalilahwinyi chahaniniyi Yesu hakufumba kwindi kwakwila nawu ‘bayi twakama ifuku dakumadikuku’?

⁷ Hakutena hakudya kwetu kwamafuku ejima, chakadi nikujina Yesu watalishili kuyuma yitwakeñaña chikupu. Dichi, watwalekeluhu nakulumbulula Nzambi chavwikañayi nkenu yamumpata, kuhiñahu wahosheli nindi: ‘Abuli kuyivwikenu chakubadika, enu mukweti chikuhwelelu chantesha? Dichi bayi mwakama nenu, . . . Tukuvwaladi?’ Wakunkulwili nakufuntila haniku kufumba kwalema kwakwila nawu: “Bayi mwakama ifuku dakumadikuku.” (Mat. 6:30-34) Chumichi chamwekeshaña nawu hitwatela kufwila kwikala namaheta amavuluku, ilaña twatela kwikala hohu nayuma yantesha yitwakeñaña hefuku hefuku. Yuma yitwakeñaña yabombelamu kwikala nahakukaama hahawahi, mudimu watela kutukwasha nachisaka chetu nikwikala namaana akutukwasha kufuukulahu chiwahi neyi tunakati. Hela chochu, neyi tukulombaña hohu hayuma yakumujimba yitwakeñaña, tukumwekesha netu twasha maana kuyuma yimu hohu. Tukweti yuma yakuspiritu yitwakeñaña yasweja kulema kubadika yuma yejima.

8. Chahosheliyi Yesu nindi kudya kwamafuku ejima kwatwanukishaña chumanyi chalema? (Talenu mwevulu wakutachikilahu.)

 ⁸ Chahosheliyi Yesu nindi kudya kwetu kwamafuku ejima kwatwanukishaña nawu twakeñaña yakudya yakuspiritu. Mwanta wetu wahosheli nindi, ‘Muntu hatela kuhanda namankendi hohuku, ilaña namazu ejima afumaña mukanwa kaYehova.’ (Mat. 4:4) Dichi twatela kutwalekahu nakulomba netu Yehova yatwalekuhu kutwinka yakudya yakuspiritu hampinji yatelela.

9. Munjilanyi nyiloña yetu muyekalila “nyikudi”?

⁹ Muloñadi Yesu chazatishiliyi izu dakwila nawu “nyikudi” henohu hampinji yikwawu wazatishili izu dakwila nindi “nyiloña”? (Mat. 6:12; Luka 11:4) Kubadika hadi yaaka 60 yinahitihu, Kaposhi Kakutalila kawundeli kalumbulwili chiwahi nawu: “Nshidi yitwavulumunaña kutalisha hanshimbi yaNzambi diyi yatuleñela kwikala namukudi kudi Nzambi. . . . Neyi tukoña nshidi kudi Nzambi, dikwila nawu hitunakumuzatila namuchima wumuku. . . . Nzambi nateli kufumishahu kuwunda kwindi nawa wubwambu wetu nayena wunateli kumana. . . . Twatela kumukeña nikumwovwahila; dichi neyi tuvulumuna dikwila nawu tunakañanyi kufweta mukudi wetu wakukeña muloña nshidi yamwekeshaña nawu twamukeña wanyi Nzambi.”—1 Yow. 5:3.

10. Yehova nateli kutwanakena nshidi jetu kushindamena hanka, nawa twatela kutiya ñahi hachumichi?

¹⁰ Chitwakeñaña mafuku ejima netu atwanakeni chamwekeshaña nawu Nzambi nateli kutwanakena hohu nshidi jetu kushindamena hamulambu wefutu danyiloña daYesu. Hela chakwila idi ifutu adihanini kwakwihi nayaaka 2,000 yinahituhu, twatela kudilemesha neyi hichawana chinahanuwu lelu. ‘Wuseya wefutu’ wafweteluwu hawumi wetu ‘walema chikupu’ chakwila muntu wabula kuwanina hanateli kuwufwetaku. (Tañenu Masamu 49:7-9; 1 Petulu 1:18, 19.) Eñañi, hitwatela kuleka kumusakilila Yehova hanichi chawana chalemaku. Cheñi, nhoshelu yakwila nawu ‘nyiloña yetu,’ bayi ‘nyiloña yamuku,’ yatwanukishaña nawu wejima wetu akwakudifukula twakeñaña kutwanakena. Chakadi nikujina, Yehova hakeñaña nindi tudakameneña hohu etu aweni kutalisha hawubwambu wetu naYehovaku, ilaña twatela kwakamenaku niwawakwetu kushilahu niantu atuvulumunaña. Kakavulu, iyi nyiloña yekala yanyanya nawa yatwinkaña kukooleka kwakumwekesha  nawu twayikeña amana kwetu chikupu nawa twafwilaña kuyanakena neyi chatwanakenañayi Nzambi.—Kol. 3:13.

11. Muloñadi chichalemena kwikala namuchima wakwanakena?

¹¹ Chineli twawanina wanyi, mpinji yikwawu tunateli kushila akwetu nkunyi. (Lev. 19:18) Neyi tukuhoshaña nsañu yinatwiluwu akwetu, tukuleta chaambu muchipompelu. Neyi tukwiteja yuma yamuchidiwu kutwalekahu, tukumwekesha netu hitwasakililaña haluwi lwaNzambi niifutu danyiloñaku. Neyi twikala namuchima wakubula kwanakena, Tata yetu niyena hanateli kutwanakena kuhitila mwifutu daMwaninduku. (Mat. 18:35) Yesu washimwini chumichi chamanishiliyi tuhu kuhosha hakulomba kwachitalilu. (Tañenu Matewu 6:14, 15.) Dichi hakwila nawu Nzambi yatwanakeni, twatela kuzata nañovu kulonda tuleki chaaku chakukoña nshidi yahamesu bwi-i. Chineli twafwilaña kuleka kukoña nshidi, chumichi chatuleñelaña kulombela kulomba kunalondeluhu.—1 Yow. 3:4, 6.

12, 13. (a) Yumanyi yamumwekeneni Yesu hanyima yakumupapatisha? (b) Muloñadi chitukubulila kwinka akwetu nyiloña neyi tunaholokeli mukweseka? (c) Yesu wamwekesheli chumanyi chelili yatwalekuhu kwikala washinshika kushika nikukufwa?

¹² Neyi tushinshikaña hayuma yamumwekeneni Yesu hanyima yakupapatishewa, yinateli kutukwasha kwiluka chitwatela kulombela netu: “Bayi wututwala mukwesekaku.” Yesu amutwalili muchinkalampata kudi spiritu yaNzambi. Muloñadi? ‘Kulonda akamweseki kudi Diyabolu.’ (Mat. 4:1; 6:13) Komana chumichi chatela kutuhayamisha? Tunateli kuhayama neyi tuneluki wanyi muloña waweni wamutemesheleliyi Nzambi Mwanindi hamaseki. Wenjili nakumanisha nyiloña yavulumwinuwu Adama naEvu chelili akaani kwovwahila chiyuulu chaNzambi. Hateleleli kuhita mpinji yeneni kulonda amanishi iku kukala kwaleteliyi Satana. Chakutalilahu, komana hadi haluwañesheliyi Nzambi hakuleña antu? Komana chadiña chaswayi muntu wawanina kuhakwilaku chiyuulu chaNzambi hela chakwila amwesekeleña kudi ‘watama’? Komana antu anateli kudimena chakubula kuyiyuula kudi Nzambi neyi chahosheliyi Satana? (Kutach. 3:4, 5) Hakwakula malwihu amuchidiwu hatela kuhita mpinji yeneni kulonda antu ejima niañelu akeluki nawu chiyuulu chaYehova dichi chachiwahi.

¹³ Yehova wajila, dichi hesekaña muntu wudi wejima kulonda yakoñi chuma chatamaku. Ilaña, Diyabolu diyi “Mukwakweseka.” (Mat. 4:3) Diyabolu nateli kuleta njila jajivulu jakwesekelamu antu. Dichi, chidi kudi muntu yomweni kwiteja kumweseka hela nehi. (Tañenu Yakoba 1:13-15.) Ilaña Yesu wakaanini kweseka kudi kwejima chakubula nikuumba mpinji kuhitila mukuzatisha mazu alema aMwizu daNzambi. Dichi, Yesu wahakwililuku chiyuulu chaNzambi chaloña. Ilaña Satana hazeyeluku. Wahembeleli “nindi amoni hekwawu hakamwesekelayi.” (Luka 4:13) Yesu watwalekeluhu kukaana mwejima mwamwesekeluwu kudi Satana nindi yafumpi kashinshi kindi. Kristu wakakeleli kuchiyuulu chaYehova chaloña nakumwekesha nindi muntu wawanina nateli kutwalekahu kwikala washinshika hela chakwila anamweseki chikupu. Hela chochu, Satana wesekaña kuhuñumuna atumbanji twaYesu, kushilahu nineyi.

14. Yumanyi yitwatela kwila hakwila tubuli kuholokela mukweseka?

¹⁴ Hamuloña wansañu yachiyuulu chaNzambi, Yehova wamwiteja Mukwakweseka kuzatisha kanu kaayi kulonda yatweseki. Nzambi hatwesekañaku. Ilaña, wakuhwelela nindi tukwikala ashinshika nawa wakeñaña kutukwasha. Hela chochu, chineli watwinka wuswa wakufuukulahu etu aweni, Yehova hatukañeshaña kulonda tubuli kuholokela mukwesekaku. Ilaña twatela kwila yuma yiyedi, kwikala atona kuspiritu nikutwalekahu nakulomba. Indi Yehova wakulaña ñahi kulomba kwetu?

15, 16. (a) Kwesekanyi kukwawu kutwatela kukaana? (b) Hinyi yitunateli kutwika muloña neyi tuholokela mukweseka?

¹⁵ Yehova watwinkaña spiritu yindi yajila yikweti ñovu yinateli kutukolesha nikutukwasha  kulonda tuumiki kweseka. Nzambi watusoñamishaña cheñi kuhitila Mwizu dindi nimuchipompelu kutalisha kuyuma yitwatela kutondolwela yidi neyi kumanisha mpinji yeneni, mali niñovu kuyuma yamukunkulwayi. Espen naJanne ashakamaña mwituña dimu damuEurope mwekala mali amavulu. Azatili yaaka yayivulu wupayiniya wampinji yejima mwituña dawu kwiluña kwadiña kukaankila kweneni. Chiyekaliluwu namwana wawedi alekeli wawupayiniya, chayinu mpinji adi namwana wamuchiyedi. Espen wahosheli nindi: “Kakavulu twalombaña kudi Yehova kulonda tubuli kuholokela mukweseka chineli hitwatweshaña kuzata mpinji yeneni mumudimu wakushimwina neyi chitwazatileña kumafuku akunyimaku. Twamulombaña Yehova kulonda yatukwashi kutwalekahu kwikala akola kuspiritu nikwikala neyena mumudimu wakushimwina.”

¹⁶ Kutala nyevulu yanzekesi hikweseka kukwawu kunakumwekana makonu. Neyi tuholokela mukweseka kwamuchidiwu hitwatela kumutwika Satana muloñaku. Muloñadi? Muloña Satana nikaayi kindi hiyanateli kutukakeja kulonda twili yuma yitunabuli kukeñaku. Antu amakwawu anaholokeli mukweseka kweniku muloña wakutwalekahu nakutoñojoka hayuma yatama. Ilaña tunateli kukaana kweseka neyi chelawu amana kwetu amavulu.—1 Kor. 10:12, 13.

17. (a) Tunateli kwila ñahi yuma kwesekeja nakulomba kwetu kwakwila nawu twamwini kudi watama? (b) Keña tutiyi muzañalwinyi?

¹⁷ Hakwila twileña yuma kwesekeja nakulomba kwakwila nawu ‘twamwini kudi watama,’ twatela kufwila kubula kwikala “ampata yamunu mwishina [yaSatana].” Hitwatela ‘hela kukeña mpata [yaSatana] yamunu mwishina, hela yuma yamunu mwishinaku.’ (Yow. 15:19; 1 Yow. 2:15-17) Twatela kutwalekahu kuzata nañovu hakwila twili mwenimu. Twakazañalala hampinji yakakulayi Yehova kulomba kwetu kuhitila mukumufumishahu Satana nikaayi kindi katama. Hela chochu, twatela kwiluka netu, chamunatililuwu Satana hanu hamaseki welukili nindi wadiña nakapinji kantesha. Chineli wahila, wazataña hakumina ñovu jindi kulonda tufumpi kashinshi ketu. Dichi twatela kulomba mpinji yejima hakwila atwamwini kudi iwu watama.—Chim. 12:12, 17.

18. Hakwila tukapuluki kukanu kaayi kaSatana kanakukuma, twatela kutwalekahu nakwiladi?

¹⁸ Komana wafwilaña kumona iyi yuma chiyikashikijewa? Dichi twalekakuhu nakulomba neyi Wanta waNzambi wujiliki ijina daNzambi nakuleñela nkeñelu yindi kuyila hanu hamaseki. Talenu kudi Yehova kulonda yakakwinki yuma yakuspiritu niyakumujimba yiwakeñaña. Eñañi, fwilaku kwila yuma kwesekeja nakulomba kwachitalilu.