Komana mwatañili nakanañachima yibaaba yakatataka yaKaposhi Kakutalila? Talenu neyi mukutwesha kwakula awa malwihu:

Chumanyi chitwatela kwila kulonda tudiloñeshi kwanakana kufwa kwaYesu kwahachaaka hachaaka?

Chuma chimu chitwatela kwila hikulondela ndandanda yakutaña Bayibolu yakundama kukufwa kwaYesu. Twatela cheñi kutoñojoka chakuzata chikupu mumudimu wetu wakushimwina mumpinji yaChanukishu. Tunateli kulomba nakutoñojoka hakuchiñeja kwetu kwatwinkayi Nzambi.—1/15, mafu 14-16.

Indi amana kwetu muJapan atambwilili chawananyi chabulili kukuhwelelawu?

Atambwilili kamukanda mwadiña mukanda waMatewu kufuma muBayibolu yaNew World Translation. Anakuwuhana mumudimu wakushimwina nawa antu amavulu abula kwiluka nsañu yamuBayibolu anakuwiteja. —2/15, mafu 3.

Yumanyi yakwashili kutandisha nsañu yayiwahi muyaka nkulakaji yakusambila?

Kuwunda kwadiña muRoma kwakañesheleña antu kuzuña njita. Atumbanji akusambila endeleleña munyikwakwa yayiwahi. Idimi daGriki adihosheleña kudi antu amavulu, chumichi chayikwashili atumbanji kushimwina nikudi aYudeya ashakamineña muwanta wejima. Nawa atumbanji azatishileña nshimbi jawaRoma hakuhakwilaku nsañu yayiwahi.—2/15, mafu 20-23.

Muloñadi makonu nyikanda yetu chiyabulilaña kutena antu amuBayibolu neyi mwevulu nikushikijewa?

Bayibolu yashimuna nawu antu amakwawu emeneneñaku antu acheñi. Chakutalilahu chimu chekala hamukanda waAŋalija 4:21-31. Hela chochu, chikusweja kuwaha neyi tubula kufwikija hela kuhosha netu nsañu yejima yashimunawu muBayibolu yemenañaku muntu. Dichi, tunateli kudiza yuma yalema kudi antu niyuma yamwekeni yashimunawu muBayibolu. (Rom. 15:4)—3/15, mafu 17-18.

Muloñadi ntanjikilu yakuhaña muntu muchipompelu chiyawahila?

Bayibolu yashimuna ntanjikilu yalema yakuhaña muntu muchipompelu nawa mwafumaña yuma yayiwahi. (1 Kor. 5:11-13) Kwaletaña kalemesha hejina daNzambi, kwakiñaña chipompelu chakadi majilu nawa kunateli kuleñela muntu wavulumwini kufuntishamu muchima.—4/15, mafu 29-30