HANYIMA yakwila Anita * anamupapatishi dehi nakwikala Chinsahu chaYehova, nfumwindi watachikili kumudimbulula nankashi. Anita wahosheli nindi, “Wankaanishileña kuya nakupompa nikutena ijina daNzambi. Chinatena hohu nami Yehova nfumwami wahilileña chikupu.”

Anita wamweneña cheñi kukala kukwawu kweneni hakwila yadizishi anyanindi nsañu yaYehova. “Akanishili kudifukula kudi Yehova mwitala dami. Hinatwesheleña kuyidizisha anyanami hatooka hela kuya nawu nakupompaku.”

Yuma yamweniyi Anita yinakumwekesha nawu ikañesha dawantaña dinateli kuleñela kashinshi kamukwaKristu kwikala mukweseka. MukwaKristu nateli kumona cheñi kukala kukwawu kudi neyi kuyekela nakankati, kufwisha mwana hela mwinikwindi hela neyi muntu wamuchisaka yamufutalela Yehova. Hanu dinu, chumanyi chinateli kumukwasha mukwaKristu kutwalekahu kwikala washinshika kudi Yehova?

Neyi wumona kukala kwamuchidiwu, wunateli kwila ñahi? Kapostolu Pawulu wahosheli nindi: ‘Mwatela kutatakena.’ (Heb. 10:36) Hanu dinu, chumanyi chinateli kukukwasha hakwila wuumiki?

Njila yimu yatukoleshaña chikupu kulonda tuumiki kukala kutunakumona hikulomba nakushindamena hadi Yehova. Shinshikenu chakutalilahu chimu. Hefuku daChimu namwaana chisaka chaAna chamweni kukala. Nfumwindi ashakaminiyi nindi muwuluwi hadi yaaka 30 wafwili chakukasumwisha. Ana wahosheli nindi, “Nfumwami hafuntili kwitala kufuma kumudimuku nawa wadiña hohu nayaaka 52 yakusemuka.”

Indi Ana womikili ñahi naniku kukala? Watwalekeluhu kuzata, nawa mudimu windi wamukwashili muloña wateleleli kushaku kashinshi kakeni hakuzata, ilaña iwu mudimu hiwamanishili chineñi chatiyileñayuku. Wahosheli nindi: “Namulejeli Yehova yuma yejima yinatoñojokeleña nami yankwashi kuumika nachineñi chinadiña nachu.” Komana Yehova wakwili kulomba kwindi? Wetejeli chikupu nindi Yehova wakwili. Wahosheli nindi: “Kuwunda kwahanañayi Nzambi hohu diku kwankwashili chikupu. Nakuhweleli chikupu nami Yehova wukamusañula nfumwami.”—Fwi. 4:6, 7.

‘Mukwakutiya mwalombañawu antu’ wakana nindi wakuyinka ambuñindi yuma yejima yakeñañawu kulonda atwalekuhu kwikala ashinshika. (Mas. 65:2) Komana hiwunateli kwitejaku neyi ichi chikaninu chalala nawa chatukoleshaña? Komana chumichi hichinateli kukukwasha kulonda nineyi wiluki neyi wunateli kuumikaku?

Yehova nakwashi antu jindi kuhitila muchipompelu chawakwaKristu. Chakutalilahu, hampinji yayikabishileñawu chikupu antu amuchipompelu chamuTesalonika, Pawulu wayikonkomweneni akwaKristu ‘kutwalekahu kudikundeja wejima wawu nikudikolesha wumu namukwawu neyi mwomwelileñawu.’ (1 Tesa. 2:14; 5:11) Chineli adikundili nawa adikwashileña, akwaKristu amuTesalonika atwalekeluhu kwikala nachikuhwelelu hampinji yayesekeluwu. AkwaKristu amuTesalonika atwimikilili chakutalilahu chachiwahi nawa amwekesheli chuma chinateli kutukwasha kuumika makonu.

Kwikala nawubwambu wawuwahi nawakwetu amuchipompelu kunateli kutukwasha kudileja “yuma yakudikolesha nachu wumu namukwawu.” (Rom. 14:19) Yumiyi yalema sweje-e mumpinji yakala. Pawulu wamweni makabi amavulu, ilaña Yehova wamukolesheli hakwila yomiki. Hampinji yikwawu, Nzambi wamukolesheleña Pawulu kuhitila mudi akwawu akwakwitiya. Chakutalilahu, Pawulu chemushiliyi antu amuchipompelu chamuKolosi, wahosheli nakutena nindi: ‘Diwu ankundejaña chikupu.’ (Kol. 4:10, 11) Eñañi, kukeña kwawu kwamukeñeluwu  Pawulu kwayileñeleli amukundeji nikumukolesha hampinji yakeñeleñayi wukwashu. Aneyi nawa hekwawu akukoleshahu dehi nikukukwasha munjila yoyimu kudi antu amuchipompelu.

Aeluda hinjila yikwawu yatukwashilañayi Nzambi mukachi kachipompelu chawakwaKristu. Awa amayala apama kuspiritu anateli kwikala ‘neyi kwakubatama mpepela nikwakweyama nvula; neyi tuloña twamenji twamwawuma, neyi wulelu welola deneni mwituña dasweja nkanza.’ (Isa. 32:2) Yumiyi yatukoleshaña. Komana watambwilaña wukwashu kudi awa amayala akweti kukeña? Wukwashu wahanañawu aeluda wunateli kukukwasha kutatakena.

Hela chochu, aeluda hiyakoñaña yihayamishaku. Hiyantu abula kuwanina, ‘atiyaña mutwatiyaña etu.’ (Yil. 14:15) Ilaña, kulomba kwawu kunateli kutukwasha chikupu. (Yak. 5:14, 15) Mana kwetu wamuItaly wakabakeni chikupu nakankati hadi yaaka yayivulu wahosheli nindi: “Kukeña kwamwekesheleluwu amana kwami nikunhempula mpinji yejima kwankwashili kutatakena.” Komana wunateli kuhetelamu nankashi muyuma yayiwahi yaloñeshayi Yehova kuhitila mudi aeluda?

Kudi cheñi yuma yikwawu yitunateli kwila kulonda tutatakeni. Chuma chimu chikutukwasha hikutwalekahu kumuzatila Yehova. Shinshikenu chakutalilahu chaJohn wayaaka 39, wakatili kansa. Wahosheli nindi: “Natiyili kutama muloña nachidiña kansi.” Hayina mpinji mwana kaJohn weyala wadiña hohu nayaaka yisatu yakusemuka. John wahosheli nindi, “Ñodami hadiña hohu nakuhemba mwanetuku, ilaña wadiña nakuñakamena cheñi ami kushilahu nikuntwala nakudimona nawandotolu mpinji yejima.” Yitumbu yamwinkeleñawu John yamuzeyesheleña chikupu nawa yamuleñeleleña nikusanza. Nawa hidiku kukala kwadiñayi naku hohuku. Tata yaJohn wakatili chikupu nawa wakeñeleña wakumwakamena.

Indi John nichisaka chindi atwesheli ñahi kuumika naniku kukala? Washimwini nindi, “Hela chakwila nazeyeleña chikupu, nazatileña nañovu kulonda chisaka chami chitwalekuhu kumuzatila Yehova. Twayileña kukupompa kwejima, kushimwina mulungu nimulungu nikudifukula kwachisaka mpinji yejima hela chakwila chadiña chakala.” Chakadi nikujina, John welukili nindi chuma chinateli kumukwasha kutatakena hikwikala nawubwambu wakola naYehova. Komana wuduhu namazu akukolesha antu amonaña kukala? Wahosheli nindi: “Hanyima yakwila makabi iwamonaña anamani dehi, kukeña niñovu yaYehova yasinsaña hayitoñojoka yatama. Yehova nateli kukukolesha neyi chankolesheliyi ami.”

Chakadi nikujina, Nzambi nateli kutukwasha kulonda tutatakeni neyi tumona kukala kwasweja hela tunakukabakana chayinu mpinji hela kumbidi. Tulombenuña nakumushindamena Yehova, kwikala nawubwambu wakola nawantu amuchipompelu, kwiteja wukwashu kufuma kudi aeluda nikutwalekahu kumuzatila Yehova. Neyi twila mwenimu, tukwilaña yuma kwesekeja namazu aPawulu akwila nawu: ‘Mwatela kutatakena.’