1. Muloñadi Pawulu chahosheleliyi nindi “Kristu diyi ñovu yaNzambi”?

 YEHOVA wamwekesheli ñovu jindi kuhitila mudi Yesu Kristu munjila yakuhayamisha. Nyikanda yaNsañu Yayiwahi yiwana yashimuna yuma yakoleshaña chikuhwelelu kutalisha hayihayamisha yikwawu yakoñeliyi Kristu. Chakadi nikujina, wakoñeli yihayamisha yikwawu yayivulu. (Mat. 9:35; Luka 9:11) Eñañi, ñovu jaNzambi jamwekeneni mudi Yesu. Dichi chaletesheli kapostolu Pawulu yahoshi hadi Yesu nindi: “Kristu diyi ñovu yaNzambi.” (1 Kor. 1:24) Hanu dinu, yihayamisha yaYesu yatudizishañadi muchihandilu chetu?

2. Yumanyi yitukudizila kuyihayamisha yakoñeliyi Yesu?

² Kapostolu Petulu wahosheli nindi Yesu wakoñeli “yihayamisha.” (Yil. 2:22) Nyidimu yañovu yakoñeliyi Yesu hamaseki yemeneneñaku yuma yamaneni yakelayi muchiyuulu chindi. Yemenañaku yihayamisha yakakoñayi Yesu mwituña dadiha daNzambi heseki dejima. Yihayamisha yindi yatukwashaña cheñi kwiluka chikupu yililu yindi niyaTata yindi. Ichi dinu tudizenu hayihayamisha yantesha yakoñeliyi Yesu kulonda tumoni chiyinateli kutukwasha muchihandilu chetu makonu nikumbidi.

3. (a) Shimunenu yuma yaletesheli Yesu yakoñi chihayamisha chatachi. (b) Indi Yesu wamwekesheli ñahi chililu chakuhana kuKana?

³ Yesu wakoñeli chihayamisha chindi chatachi, hachawija chadiña kuKana wamuÑaliliya. Hadaha kwayili enyi amavulu kubadika akuhweleleluwu. Hela chochu, vinyu yamanini. Hakachi kawenyi ayili, hadiña niMariya mama yaYesu. Chakadi nikujina, hayaaka yayivulu watoñojokeleña chikupu hayikaninu yejima yawuprofwetu wahosha hadi mwanindi, welukiliyi nindi akamutena nawu “Mwana kaMukwakubadika Mwiwulu.” (Luka 1:30-32; 2:52) Komana wakuhweleli nindi Yesu wukweti ñovu yabuliliyi kumwekeshayi? Chamwekana hatooka to-o nawu Mariya naYesu atiyilili wushona antu adisumbwileña muKana nawa akeñeleña nawu awa antu abuli kutiya nsonyi. Yesu welukili nindi wateleleli kumwekesha chisambu. Dichi wabalumwini muchihayamisha kwakwihi namalita 380 amenji nakwikala “vinyu yayiwahi.” (Tañenu Yowanu 2:3, 6-11.) Komana Yesu wateleleli kwila ichi chihayamisha? Inehi. Wadiña hohu nakwakamena antu nawa wamwimbujoleli Tata yindi wekala mwiwulu hakwikala nachililu chakuhana.

4, 5. (a) Chumanyi chitwadizilaña kuchihayamisha chaYesu chatachi? (b) Indi chihayamisha chakuKana chatudizishañadi hayuma yidi kumbidi?

⁴ Yesu wayinkeli vinyu yayiwahi yayivulu muchihayamisha yakuwanina antu ejima apompeli. Muneluki chuma chitwadizilaña kunichi chihayamisha? Hakwila Yesu yakoñi chuma chachiwahi, chumichi chatulejaña chikupu nawu yena niTata yindi alemesha antu. Bayi neyi Tata yawantu hela Mwana kawantu akweti chifwaku. Hanu dinu fwikijenu Yehova chakazatishayi ñovu jindi chiwahi mwituña dadiha hakuhana yakudya yayiwahi ‘kudi antu ejima’ mukaayi kejima.—Tañenu Isaya 25:6.

⁵ Toñojokenu chumichi! Mpinji yinakwinza yekala antu ejima akekala nayuma yatelela yakeñekaña yidi neyi yakudya yayiwahi nimatala amawahi. Twatela kuzañalala chikupu chitunakutalila yuma yayiwahi yakatwinkayi Yehova muParadisa hamaseki.

6. Indi Yesu wazatishileña ñahi ñovu jindi muchihayamisha, nawa tunateli kumwimbujola ñahi?

⁶ Chelili Diyabolu yamweseki Yesu nindi yabalumuni malola kwikala mankendi, Kristu wakaanini kuzatisha ñovu jindi jachihayamisha kulonda yaditiyishi kuwaha. (Mat. 4:2-4) Ilaña wazatishili ñovu jindi kulonda yakwashi antu adiña nakukaankila. Tunateli kwimbujola ñahi yililu yayiwahi yaYesu? Yesu wakolesheli ambuña Nzambi nindi ekali nachaaku ‘chakuhana.’ (Luka 6:38) Komana tunateli kumwekesha chililu chachiwahi chakuhana kuhitila mukutambika antu kumatala etu nakudiila hamu yakudya yakumujimba hela yakudya yakuspiritu? Komana tunateli kuzatisha mpinji yetu hanyima yakupompa kuhitila mukukwasha muntu wunakukeña wukwashu, chidi neyi kumutiyilila mana kwetu wunakuhituluka mumpanji yindi? Tunateli kukwasha ñahi antu anakukeña kuyidizisha chakushimwina mumudimu wamwiha? Twamwekeshaña netu tunadizili kudi  Yesu kuhitila mukwikala namuchima wakuhana yuma yakumujimba niyakuspiritu kudi akwetu kwesekeja nahanakumini ñovu jetu.

7. Kukalanyi kukamwekanaña neyi kanu kaayi katwalekahu?

⁷ Wuzweñi hikukala kwakukulu. Yehova wayilejeli aIsarela akushankulu nindi atuzweñi hiyamba kamana mwituñaku. (Kuhit. 15:11) Chimwahitili yaaka yayivulu, Yesu wahosheli nindi: “Atuzweñi mwekala nawu mafuku ejima.” (Mat. 26:11) Komana Yesu watalishili mukwila nindi hanu hamaseki hakutwalekañahu kwikala atuzweñi hohu? Inehi, watwalili mukwila nindi kwakekalaña atuzweñi chakala neyi kanu kaayi katama kachidi kutwalekahu. Dichi, twazañalalaña hakwiluka netu yihayamisha yaYesu yazataña neyi yinjikijilu yayuma yayiwahi yikamwekana kumbidi muchiyuulu chaWanta, mwakadyañawu antu ejima nakwikuta.

8, 9. (a) Chumanyi chamuleñeleli Yesu yakoñi chihayamisha chakudiisha antu amavulu? (b) Indi ichi chihayamisha chinayitiyishi ñahi?

⁸ Ñimbi yamasamu wahosheli hadi Yehova nindi: “Wakamununaña muchikasa cheyi, yuma yejima yikweti wumi wayiikutishaña nayuma yakeñawu.” (Mas. 145:16) Chineli wadiña nakumwimbujola Tata yindi, ‘Kristu, ñovu yaNzambi,’ kakavulu wakamunwineña chikasa chindi nakwinka atumbanji twindi yuma yakeñeleñawu. Bayi neyi welileña chumichi muloña yamwekeshi nindi wadiña nañovuku. Wadiña nakwakamena antu. Tushinshikenu mukanda waMatewu 14:14-21. (Tañenu.) Atumbanji twaYesu enjili nakumuleja kukala kwadiñawu naku kwakubula yakudya. Bayi neyi wena diwu afwili nzalaku, ilaña adiña nakwakamena mazaza amulondeleli Yesu hamaseki kufuma munyisumba muloña azeyeli nawa adiña nanzala. (Mat. 14:13) Chumanyi cheliliyi?

⁹ Yesu wadiishili amayala 5,000 kushilahu ambanda nianyana namankendi atanu ninshi jiyedi. Komana hitwatiyaña kuwahaku neyi tutoñojoka hanjila yazatishiliyi Yesu ñovu jindi jakuhayamisha hakwakamena yisaka yejima kushilahu nianyana? Mazaza “Adiili, ekutili wejima wawu.” Chumichi chinakumwekesha nawu kwadiña yakudya yayivulu. Bayi neyi Yesu wayinkeli mankendi amawahi hohuku, ilaña yakudya yakwinka mazaza ñovu yakwendela lwendu lwalulehi hakufunta kumatalawu. (Luka 9:10-17) Nawa yimpaya 12 ayinzesheli nayakudya yashaliluhu.

10. Yumanyi yidi kwakwihi nakuhimpika kutalisha hawuzweñi?

¹⁰ Makonu antu amavulu hiyatuzweñi muloña wawanyuuli atama. Hela amana kwetu amakwawu hiyakweti yakudya yayivulu yakudya ‘nakwikutaku.’ Hela chochu, mpinji keña yishiki yikela antu ovwahila akadiluñisha mwituña mwakabula maseleka niwuzweñi. Neyi mwadiña nañovu, komana himwadi kwilila antu yuma yakeñañawuku? Nzambi Mukwakubadika wekala nañovu nawa nakufwila kuyilila antu yuma yakeñañawu katataka. Eñañi, makabi keña amani!—Tañenu Masamu 72:16.

11. Muloñadi chimunakuhweleli nenu Kristu keña yazatishi ñovu jindi heseki dejima, nawa chumichi chayileñelaña kwiladi?

¹¹ Hampinji yadiñayi hanu hamaseki, Yesu wazatilili mwiluña danyanya hadi yaaka yisatu nachikunku hohu. (Mat. 15:24) Chineli himwanta alemeshawu, iluña dindi dikashika kujimbañu jiwana jahamaseki. (Mas. 72:8) Yihayamisha yakoñeliyi Yesu yatuleñelaña kukuhwelela netu wukweti wuswa nawa wafwilaña kuzatisha ñovu jindi munjila yikatukwasha. Hela chakwila hitunateli kukoña yihayamishaku, ilaña tunateli kuleja antu Izu daNzambi donenawu neyena. Wuprofwetu wamuBayibolu watulejaña chikupu nawu kumbidi tukekala nachihandilu chachiwahi. Chineli twekala aYinsahu jaYehova adihana nawa tweluka yuma yikamwekana kumbidi,  komana hitwamonaña netu tukweti mukudi wakulejaku antu acheñuku? (Rom. 1:14, 15) Neyi tutoñojokaña chikupu haniyi nsañu, chumichi chikutusañumuna kulejaku akwetu nsañu yayiwahi yaWanta waNzambi.—Mas. 45:1; 49:3.

12. Muloñadi chitunateli kukuhwelela netu Yesu weluka chikupu chekala iseki?

¹² Nzambi waleñeli iseki niyuma yejima yekalahu hamu naMwanindi wasemuka nkawindi wakalakeleña neyi “mukalawenu.” (Yish. 8:22, 30, 31; Kol. 1:15-17) Dichi, Yesu weluka chachiwahi chekala iseki. Weluka chakuzatisha nikuyuula yuma yejima yekalahu munjila yayiwahi.

13, 14. Shimunenu chakutalilahu chinakumwekesha Kristu chekalayi nañovu hayuma yadimwekenaña.

¹³ Hampinji yadiñayi hamaseki, Yesu wamwekesheli nindi diyi “ñovu yaNzambi” kuhitila mukufwomona yuma yañovu yadimwekenaña. Talenu Yesu chamwenesheliyi mpepela yeneni yatiyishili atumbanji twindi woma nawu hiyakujilumuka. (Tañenu Maku 4:37-39.) Muntu wumu wadiza jaBayibolu wahosheli nindi: “Izu dachiGriki [dakwila nawu “mpepela yeneni” dasonekawu haMaku 4:37] adizatishaña kumpepela yeneni chikupu hela nvula yeneni nankashi yampepela. Hidatalisha kumpepela yeneni yakapinji kanteshaku . . . ilaña himpepela yeneni yenzaña namavu eyila hamu nayidudumina yañovu, nanvula yeneni nawa yuma yejima yaluwankanaña.”

¹⁴ Fwikijenu chumichi: Kristu nazeyi namudimu wakushimwina. Mankanda anakweta kuwatu nakusamona menji nikafulolu muwatu. Hela chakwila kudi ipumba danvula yampepela nawa watu wunakupitoka nañovu, Yesu natwalekuhu kukama. Nakukeña kunooka. Atumbanji anatiyi woma hiyakumuhindwisha Yesu nakubilela nawu: “Tunafwi!” (Mat. 8:25) Yesu chinahindukiyi hakumwenesha mpepela nikaluñalwiji namazu akwila nindi: ‘Mwenaku, wundaku nzo-o’! nimpepela yakunkileña yileka nikuleka. (Maku 4:39) Munjila yikwawu, Yesu nakuleja mpepela nikaluñalwiji kumwena nikutwalekahu kumwena. Yumanyi yinafumumu? ‘Kumwena nibetete-e.’ Yesu namwekeshi nindi wukweti ñovu chikupu.

15. Indi Nzambi Mukwakubadika wamwekesha ñahi nindi wukweti ñovu jakufwomona yuma yañovu yadimwekenaña?

¹⁵ Yehova diyi Nsulu yañovu yaKristu, dichi twatela kukuhwelela netu Nzambi Mukwakubadika watela kufwomona yuma yañovu yadimwekenaña. Shinshikenu yakutalilahu yantesha. Henohu Dibaji kanda ditachiki, Yehova wahosheli nindi: “Kunashali mafuku atanu nayedi, nakanokesha nvula hamaseki mafuku makumi awana nimwaana niwufuku.” (Kutach. 7:4) Chochimu nihamukanda waKwidika 14:21, twatañañahu nawu: “Yehova wafuntishili kaluñalwiji hanyima nampepela yañovu yakumusela.” Hamukanda waYona 1:4 nihena twatañañahu nawu: ‘Yehova watemesheli mpepela yeneni kukaluñalwiji, menji hiyakusweja nankashi kuzuwa, niwatu wakeñeli kubaluka.’ Chatuzañaleshaña hakwiluka netu Yehova nateli kufwomona yuma yañovu yadimwekenaña. Chakadi nikujina, iseki akadiwahisha kumbidi.

16. Muloñadi chitwazañalelaña hakwiluka netu Nleñi yetu niMwanindi wawedi akweti ñovu yakufwomona yuma yañovu yadimwekenaña?

¹⁶ Chatuzañaleshaña hakwiluka netu Nleñi yetu ‘nimukalawenu’ windi akweti ñovu chikupu. Hampinji yakatachikawu kuyuula iseki muyaaka ikombakaji, antu ejima akashakamaña chiwahi. Hikwakekala wubanji wadimwekenañaku. Hikwakekala kutiya woma wawubanji wadimwekenaña chidi neyi nvula yeneni yampepela, dibaji deneni dafumaña mukaluñalwiji, kusuñunuka kwajimpidi hela nyitentanshi mwituña dadihaku. Twazañalalaña neyi tutoñojoka hampinji  yikwakabula yuma yañovu yadimwekenaña yikajahaña hela kukatisha antu muloña “tabanaka yaNzambi [yakekala] nawantu.” (Chim. 21:3, 4) Twatela kukuhwelela netu ñovu yaNzambi yekala mudi Kristu yikafwomona yuma yañovu yadimwekenaña Muyaaka Ikombakaji.

17. Tunateli kumwimbujola Nzambi munjilanyi makonu?

¹⁷ Kwambukaku naYehova niYesu, hitunateli kukañesha wubanji wadimwekenañaku, ilaña tukweti ñovu yantesha. Twayizatishaña ñahi? Njila yimu yidi yakuzatisha Yishimu 3:27. (Tañenu.) Neyi amana kwetu anakuyanda, tunateli kuyikundeja nikuyikwasha muyuma yakumujimba, muyitoñojoka nikuspiritu. (Yish. 17:17) Chakutalilahu, tunateli kuyikwasha neyi adi mukukala kwadimwekenaña. Tiyenu nfwila wumu chasakilililiyi chakufuma hamuchima hanyima yakwila itala dindi dinakisiki dehi nanvula yeneni yampepela, welili nindi: “Nasakililaña chikupu hakwikala mukuloñesha kwaYehova, bayi neyi hawukwashu wunatambwili wakumujimba hohuku ilaña nihawukwashu wakuspiritu.” Tiyenu cheñi mazu ahosheliyi muhela wumu mujiki waneñeli nikuhayama hanyima yakumona itala dindi chidakisikili nanvula yampepela. Chamukwashiluwu wahosheli nindi: “Nakañanyi nimwakuhosha! Hinikutwesha kulumbulula chinatiyiluku . . . Nasakilili Yehova!” Twatiyaña kuwaha hakwikala hakachi kawana kwetu akwashaña amakwawu chakufuma hamuchima muyuma yakeñekaña. Twazañalalaña chikupu muloña Yehova niYesu Kristu akamenaña antu jaNzambi.

18. Yumanyi yinayizañaleshi kutalisha hankeñelu yaYesu yakukoña yihayamisha?

¹⁸ Hampinji yazatileñayi mudimu wakushimwina, Yesu wamwekesheli nindi diyi “ñovu yaNzambi.” Hanu dinu Yesu wadiña nankeñelwinyi? Hazatishileña ñovu jindi hakuzañalesha antu hela kuditiyisha yamweni kuwahaku. Mwamweni, yihayamisha yakoñeliyi Yesu yamwekeshaña kukeña kwakeñeliyi antu. Tukadiza hayumiyi muchibaaba chinalondeluhu.