1, 2. Chumanyi chamwekeshaña nawu Yesu wakeña chikupu antu?

 MWANA kaNzambi wawedi diyi chakutalilahu chacheni chamaana aYehova asweja kukunama. Maana aNzambi amwekeneni mudi yena nawa wakalakeleña hamu naTata yindi neyi “mukalawenu.” Fwikijenu muzañalu watiyiliyi Yesu hakumona Tata yindi ‘nakuloñesha mawulu’ ‘nikufunjeka hawushimatilu weseki.’ Hela chakwila walemesheli iyi yuma yakadi wumi, Mwana kaNzambi wawedi ‘watiyileña kuwaha nankashi nawanyana kawantu.’ (Yish. 8:22-31) Eñañi, Yesu watachikili kutiya antu kuwaha henohu kanda yekali muntu.

² Mukuhita kwayaaka, hakwila yamwekeshi nindi wamwovwahila nikumukeña Tata yindi kushilahu tuhu nikukeña kwakeñayi chikupu ‘anyana kawantu,’ Wedi waNzambi ‘wadikehesheli’ nakwinza kulonda yekali neyi chekalawu antu. Welili mwenimu kulonda yekali ‘ifutu dakukuula nachu antu amavulu.’ (Fwi. 2:5-8; Mat. 20:28) Wakeña antu nankashi. Hampinji yadiñayi Yesu hanu hamaseki, Nzambi wamwinkeli ñovu yakukoña yihayamisha yamwekesheli nawu wakeñeli antu. Yesu  wamwekesheli yuma yayiwahi yikukoñayi katataka heseki dejima.

3. Tukushinshika hachumanyi?

³ Yesu chenjiliyi hamaseki watwesheli ‘kushimwina nsañu yayiwahi yaWanta waNzambi.’ (Luka 4:43) Yesu welukili nindi iwu Wanta wakajilika ijina daTata yindi nawa wukafumishahu haya nyaka yuma yejima yakabishaña antu. Hampinji yejima yashimwinineñayi, Yesu wamwekesheli chikupu nindi wadiña wakeña antu. Muloñadi chumichi chichalemena kudi etu? Muloña yuma yitukudizilaku yikutuleñela kwikala nachikuhwelelu nikuchiñeja yuma yayiwahi kumbidi. Tushinshikenu yihayamisha yiwana yakoñeliyi Yesu.

4. Lumbululenu chuma chamwekeni chelili Yesu yamoni mukwambumba.

⁴ Yesu wadiña nakuzata mudimu windi wakushimwina muÑaliliya. Mumusumba wumu wamuÑaliliya, Yesu wawanini muntu wamutiyishili luwi. (Maku 1:39, 40) Wamweni iyala wadiña namusoñu wambumba. Hakushimuna nindi musoñu waniwu iyala waswejeli, Luka wadiña ndotolu wamulumbulwili nindi “wazemoka dehi namusoñu wambumba.” (Luka 5:12) “Chanamumoniyi Yesu, hakudinata chamesu heseki, hakumulembelela nindi, Mwanta, neyi wuneteji, wukutwesha kuntookesha.” Chakadi nikujina, iwu iyala wakuhweleleli nindi Yesu wadiña nañovu yakumuuka, ilaña chuma chakeñeleñayi kwiluka chakwila nawu, komana Yesu wafwilileña kumuuka? Indi Yesu wakwili ñahi chamulombeluwu chakufuma hamuchima? Chumanyi chatoñojokeleñayi Yesu chamumweniyi iwu muntu wazemokeli? Komana Yesu wukwikala neyi Afwarisi aheleli antu adiña nakukabakana naniwu musoñu? Indi enu mwadi kwiladi?

5. Chumanyi chamuleñeleli Yesu yahoshi nindi “Neteji” hakuuka mukwambumba?

⁵ Hadaha iwu mukwambumba wabileleli wanyi nindi “Majilo! Majilo!” neyi chahosheli Nshimbi yamwinkeluwu Mosi. Yesu hahosheli haniyi nsañuku. Ilaña washili muchima hadi muntu yomweni nichuma chakeñeleñayi. (Lev. 13:43-46) Tweluka wanyi yuma yatoñojokeleñayi Yesu, ilaña tweluka chuma chadiña mumuchima windi. Muloña wakwikala naluwi, Yesu wakoñeli chuma chakuhayamisha. Wolweli chikasa chindi nakumukwata mukwambumba, nakuhosha nezu dañovu nawa daluwi, Yesu wahosheli nindi: “Neteji, tookaku.” Kuhiñahu “musoñu windi wambumba wumufuma nikumufuma.” (Luka 5:13) Eñañi, ñovu yaYehova yadiñaku, bayi neyi hakwila Kristu yakoñi chihayamisha chamuchidiwuku, ilaña Yesu wamwekesheli nindi wakeñeli antu chikupu.—Luka 5:17.

6. Chumanyi chalema kutalisha hayihayamisha yakoñeliyi Yesu, nawa chamwekeshañadi?

⁶ Ñovu yaNzambi yamukwashili Yesu Kristu kukoña yihayamisha yashiyashana. Wokili mbumba hohu wanyi, ilaña wokili nyisoñu yejima niyikatu yejima yadiña nawantu. Bayibolu yatulejaña nawu: “Izaza dawantu hiyakuhayama chanamonuwu atumama hiyakuhosha, ayifwayi hiyakukola, akwakubalakata hiyakwenda, amputamesu hiyakumona.” (Mat. 15:31) Makonu mpinji yikwawu andotolu anonaña yiidi yamuntu wacheñi hakwila oki ayeji awu. Ilaña Yesu wokili yiidi yayeni yamujimba yadiña yakata. Nawa wadiña nakuuka antu hohenohu, mpinji yikwawu wayuukileña hela adi kwakulehi. (Yow. 4:46-54) Indi iyi yakutalilahu yakuhayamisha yamwekeshañadi? Yamwekeshaña nawu Yesu, Mwanta wawanta wamwiwulu hakweti ñovu hohuku, ilaña wafwilaña cheñi kuuka antu haya nyaka. Chitwadiza njila  yahanjikileñayi Yesu nawantu chikutuleñela kukuhwelela netu mwituña dadiha, wuprofwetu wamuBayibolu wakashikijewa, wahosha nawu: “Niwazeya niwabula yuma wakayitiyila wushona.” (Mas. 72:13) Eñañi, Yesu wakela kwesekeja nachuma chafwilañayi mumuchima windi hakukwasha akabakana.

7, 8. Shimunenu yuma yaletesheli Yesu yadimoni namuntu wakata kalepa kwijiya daBeteseda.

⁷ Mwahitili tukweji twantesha kufuma hampinji yokiliyi Yesu iyala mukwambumba muÑaliliya. Wafumini kuÑaliliya nakuya kuYudeya nakushimwina nsañu yayiwahi yaWanta waNzambi. Kwadiña antu amavulu chikupu ashimwininiyi Yesu nawa atiyili kuwaha muloña wayikeñeli. Wakeñeleña kushimwina nsañu yayiwahi kudi atuzweñi, kuyibidika ankoli nsañu yakuyisubula nikukasakasa chachiwahi abaluka nyichima.—Isa. 61:1, 2; Luka 4:18-21.

⁸ Kuhiñahu, kakweji kaNisani kashikili. Hakwila yovwahili nshimbi yaTata yindi, Yesu wayili nakwanakana Chipandakenu muYerusalema. Mumusumba mwenzeli luntu chelili antu ayi nakwanakana chawija. Kuchimunswa chatembeli kwadiña ijiya dateneneñawu nawu Beteseda, kweniku Yesu wawaninuku iyala wakata.

9, 10. (a) Chumanyi chaleñeleli antu kuya kwijiya daBeteseda? (b) Chumanyi cheliliyi Yesu kwijiya, nawa chumichi chatudizishañadi? (Talenu mwevulu wakutachikilahu.)

⁹ Mazaza amaneni awantu akata niayifwayi apompeleleña kwijiya daBeteseda. Chumanyi chaleñeleli hakwila apompeleña kunidi iluña? Hamuloña wabula kulumbululawu, antu wenawa akuhweleleli nawu neyi muntu wakata yeñila mwijiya hampinji yavundwileñawu menji, wukukola muchihayamisha. Kunidi iluña kwatela kwadiña wufwinda chikupu. Antu amavulu afwilileña kuyuuka muloña adiña nachineñi nawa adiña nakwakamena. Indi Yesu wadiña wamaninina nawa wakadi wufwayi wayili nakwiladi kunidi iluña? Muloña waluwi, Yesu wayili kudi muntu wadiña wakata hayaaka yayivulu kubadika yashakaminiyi Yesu hamaseki.—Tañenu Yowanu 5:5-9.

¹⁰ Munateli kufwikija chineñi chatiyiliyi iwu iyala chelili Yesu yamwihuli neyi nakukeña kukola? Wakwili chakubula kuumba mpinji. Iwu iyala wakeñeleña kumuuka, ilaña helukili chakukewayi wanyi muloña hikwadiña muntu wakumukwasha kwiñila mwijiyaku. Dichi Yesu wamulejeli iwu iyala kwila chuma chakala, kusenda chikaña chindi kulonda yendi. Chineli wakuhweleleli mwahosheliyi Yesu, iwu iyala wasendeli chikaña chindi nakutachika kwenda. Ichi chuma chachiwahi chamwekeshaña yuma yikakoñayi Yesu mwituña dadiha. Munichi chihayamisha twamonaña cheñi netu Yesu wekala naluwi. Wakeñeli antu adiña nakukala. Chakutalilahu chaYesu chatusañumunaña kukeñakeña antu mwiluña detu dakushimwina ananeñi muloña wayuma yatama yamwekanaña mukanu kaayi.

11. Indi mukanda waMaku 5:25-34 wamwekeshaña ñahi Yesu chatiyilañayi luwi antu akabakanaña nayikatu?

¹¹ Tañenu Maku 5:25-34. Iwu mumbanda wakatili hadi yaaka 12 musoñu wamuleñeleleña kutiya nsonyi. Musoñu windi wamuleñeleli kumona kukala muchihandilu chindi chejima kushilahu nikudifukula kwindi. Hela chakwila ‘wamweni kukala nayuma yayivulu yamweniyi kudi ayimbuki amavulu, wamanishili yuma yindi yejima to-o,’ ilaña waswejeli nikuswejelaku. Ilaña ifuku dimu iwu mumbanda watoñojokeli  chatela kukolayi. Wayili heluña hatela kwikalayi kwakwihi namuntu wejina daYesu. Iwu mumbanda weñilili mwizaza nakukunka kumahina aYesu. (Lev. 15:19, 25) Yesu welukili nindi ñovu yinafumi mudi yena, dichi wehwili muntu wamukunkili. Mumbanda “hakutiya woma nikuzaala . . . hakwinza nakudinata hamaseki kumesu indi, hakumuleja nsañu yejima.” Chelili yeluki nindi Tata yindi, Yehova diyi wunamuuki iwu mumbanda, Yesu wahosheli nindi munjila yayiwahi nindi: ‘Eyi mwanami, chikuhwelelu cheyi chinakukoleshi dehi; yaña nakuwunda, musoñu weyi wukufumi.’

12. (a) Hayuma yejima yitunadizi, munateli kumulumbulula ñahi Yesu? (b) Chakutalilahwinyi chatwimikililiyi Yesu?

¹² Yesu wukweti luwi hama. Tuneluki netu wadiña wakeña antu akabakeneña nayikatu. Satana wakeñaña kutushinjila kulonda tutoñojokeña netu atukeña wanyi nawa tudi amukunkulwayi. Yihayamisha yakoñeliyi Yesu yamwekeshaña hatooka to-o nawu watwakamenaña etu nikukala kwetu. Tukweti Mwanta nawa Kapristu Muneni wukweti luwi. (Heb. 4:15) Chapela wanyi kwiluka chatiyañawu antu ayekelaña nayikatu, sweje-e neyi kanda tukateñahu dehi yikatu yamuchidiwu. Twatela kwanuka netu Yesu watiyilileña luwi antu akata hela chakwila yena hakatiluhuku. Chakutalilahu chaYesu chatuleñelaña kuzata hakumina ñovu jetu kulonda tutiyili antu luwi.—1 Pet. 3:8.

13. Indi Yesu chamusañwiliyi Lazaru chamwekeshaña yililwinyi yikwetiyi?

¹³ Yesu waneñeli hakumona antu amakwawu chaneñeluwu. Chamweniyi antu anakudila hamuloña webwambu dindi Lazaru wafwili, Yesu ‘wadishishimwini’ nawa ‘watiyili kukala.’ Waneñeli hela chakwila  welukili nindi keña yamusañuli Lazaru. (Tañenu Yowanu 11:33-36.) Yesu hatiyili nsonyi yakudilaku. Antu adiña nakutala amweni Yesu chamukeñeliyi Lazaru nichisaka chindi. Yesu wamwekesheli luwi hakuzatisha ñovu yamwinkeluwu kudi Nzambi hakumusañula ibwambu dindi.—Yow. 11:43, 44.

14, 15. (a) Chumanyi chamwekeshaña nawu Yehova wafwilaña kufumishahu yuma yakabishaña antu? (b) Muloñadi nhoshelu yakwila nawu ‘majamu achanukishu’ chiyalemena?

¹⁴ Bayibolu yamulumbulula Yesu nawu “wamufwana chikupu [Nleñi] mwekalilayi.” (Heb. 1:3) Dichi, yihayamisha yakoñeleñayi Yesu yamwekesheli nawu yena niTata yindi afwilaña kufumishahu chineñi chatiyañawu antu hamuloña wakukata nikufwa. Chumichi bayi neyi achimwekesheli hohu kudi antu ashimunawu muBayibolu asañwiluwuku. Yesu wahosheli nindi: ‘Mpinji yinakwinza yakela antu ejima adi mumajamu achanukishu . . . akedikamu.’—Yow. 5:28, 29.

¹⁵ Yesu wazatishili chiwahi nhoshelu yakwila nawu ‘majamu achanukishu’ muloña Nzambi wakayanuka. Nzambi Mukwakubadika, Waleñeli mawulu nimaseki, nateli kwanuka yuma yejima hadi ayetu itwakeña afwa dehi kushilahu niyililu yawu. (Isa. 40:26) Bayi neyi nateli kwanuka hohuku ilaña yena niMwanindi akeñaña kwila mwenimu. Kusañuka kwaLazaru nikwawantu amakwawu asonekawu muBayibolu kwemenañaku chakasañulawu antu mukaayi kejima mwituña dadiha.

16. Indi akwaKristu amavulu amakonu ashinshika akekala nakukoolekanyi?

¹⁶ Neyi tuhemba kashinshi ketu kawakwaKristu, tunateli kumona chihayamisha cheneni chahaya nyaka chakupuluka kulukadi lweneni. Katataka hanyima yanjita yaAmagedoni, kukumwekana yihayamisha yayivulu yidi neyi yakwinka antu nyijimba yayiwahi. (Isa. 33:24; 35:5, 6; Chim. 21:4) Fwikijenu munakutala antu anakunata malolu, nyikombu, makinga awayifwayi, tuyuma twakwashaña antu kutiyisha chiwahi niyuma yikwawu. Yehova wukaleñela antu akapuluka haAmagedoni kwikala akola kumujimba. Antu akapuluka akekala nanyidimu yayivulu yakuzata. Akatiya kuwaha kubalumuna iseki, chawana chatwinkayi Nzambi kwikala paradisa.—Mas. 115:16.

17, 18. (a) Muloñadi Yesu chakoñeleleñayi yihayamisha? (b) Muloñadi chimwatela kuzata nañovu kulonda mwakeñili mwituña dadiha daNzambi?

¹⁷ Yesu chayuukileñayi antu kunyima, chumichi chakoleshaña ‘amwizaza deneni’ makonu nawa akweti muzañalu wakuchiñeja nawu akayuuka yikatu yawu yejima. (Chim. 7:9) Muloña wakuuka antu, Mwana kaNzambi wawedi wamwekesheli nindi wakeña antu chikupu. (Yow. 10:11; 15:12, 13) Luwi lwaYesu lwamwekeshaña Yehova chakamenañayi ambuñindi ejima.—Yow. 5:19.

¹⁸ Antu anakwaaba, anakumona yihuñu nawa anakufwa. (Rom. 8:22) Tunakukeña ituña daNzambi dadiha mwakatuukawu chikupu kumujimba neyi chatushiikayi. Mukanda waMalaki 4:2 watulejaña muloña wutwatela kukuhwelela netu antu akokawu ‘akakiloka neyi anyana kañombi anuna,’ akazañalala chakekalawu awanina. Twatela kumusakililaña Nzambi nikukuhwelela chikupu muyikaninu yindi yikutuleñela kuzata nañovu kulonda tukatweshi kwiñila mwituña dadiha. Twazañalalaña hakwiluka netu yihayamisha yakoñeliyi Yesu hampinji yadiñayi hamaseki yamwekeshaña yuma yahaya nyaka yikadiluñishawu antu muchiyuulu chaMesiya.