MU 1991, aYinsahu jaYehova muRussia azañaleli hama chelili mudimu wawu walekesheluwu hayaaka yayivulu awiteji nawa nfulumendi yayitejeli nawu hichipompelu chetejewa. Hayina mpinji, hadaha antu antesha hohu diwu atoñojokeleña nawu aYinsahu akuvula mapampa ikumi nakushika kwakwihi na 170,000 makonu. Hakachi kanawa akwakushimwina aWanta adikita hiyaYinsahu afumini kumatuña acheñi nakuya kuRussia nakukwasha mudimu wakuspiritu wakumuna. (Mat. 9:37, 38) Twayenu tutiyi chahosheluwu amakwawu.

Chaaka chetejeluwu mudimu wawaYinsahu muRussia, Matthew wakuGreat Britain wadiña nayaaka 28 yakusemuka. Hakupompa kwankambi muchina chaaka, mpanji yakonkomweneni nawu muyipompelu yamuEastern Europe mwadiña kukaankila. Chakutalilahu, nhoshi wateneni chipompelu chamu St. Petersburg, Russia, nindi mwadiña hohu nkoñi wakuzatila wumu nawa himwadiña aeludaku. Hela chochu, akwakushimwina adiña nakulombola atudizi aBayibolu amavulu chikupu. Matthew wahosheli nindi, “Chamanini yina mpanji, natoñojokeleña chikupu hetuña daRussia, dichi nalombeli kudi Yehova kutalisha hankeñelu yami yakuya kuRussia.” Watachikili kuhemba mali nawa walandishili yuma yindi yayivulu, kufumahu wayili kuRussia mu 1992. Yumanyi yamweniyi?

Matthew wahosheli nindi, “Idimi dadiña dakala. Nakañenyeña kuhanjeka chiwahi nsañu yakuspiritu.” Kukala kukwawu kwadiña kwakuwana hakukama. “Nukutwesha wanyi kuchinda mapampa inabuukili kufuma mwitala dimu nakuya mudikwawu chakunleja henohu kunashali mafuku antesha nakubuuka.” Hichikweti muloña naniku kukala kwamweniyi hakusambilaku, Matthew wahosheli nindi: “Nafuukwili chiwahi chikupu nami nibuukili kuRussia.” Walumbulwili nindi: “Nadizi chakumushindamena Yehova chikupu nawa wanlombolaña muyuma yayivulu.” Chimwahitili yaaka, Matthew amutondeli wueluda nawa payiniya wadimena, chayinu mpinji wazatilaña hakasanji kamutayi kwakwihi naSt. Petersburg.

Mu 1999, Hiroo chashikijiliyi yaaka 25 yakusemuka wamanishili Shikola yaKudiza Mudimu wawuNkoñi muJapan, ntañishi wumu wamukolesheli kuya nakukalakela mwituña dacheñi. Hiroo watiyili nindi muRussia mudi  kukaankila kweneni nawa watachikili kudiza idimi damuRussia. Kudi cheñi chuma chikwawu cheliliyi. Wahosheli nindi, “Nayili kuRussia hadi tukweji tutanu nakamu. Chineli chilaaka chachishika mashika aswejaña, nayili muNovember nakumona neyi natweshi kushakama mumashika.” Chamanini chilaaka chamashika, wafuntili kuJapan kwashakamineñayi nachihandilu chapela kulonda yahembeña mali akufunta nachu kuRussia nakushakama.

Hiroo nashakami dehi yaaka 12 muRussia nawa nazatili muyipompelu yayivulu. Muyipompelu yikwawu diyi wakalakeleña neyi eluda nkawindi nakwakamena akwakushimwina akubadika ku 100. Muchipompelu chimu, hamulungu nimulungu wahanineña mpanji jajivulu jamuKupompa kwaMudimu, walombweleña Shikola Yawakwakushimwina, Kudiza kwaKaposhi Kakutalila nimazanvu atanu aKudiza Mukanda haChipompelu. Wayileña cheñi nakubiña antu amuchipompelu. Chanukayi haniyi yaaka, Hiroo wahoshaña nindi: “Natiyileña muzañalu waweni hakuyikwasha amana kwetu niahela kwikala akola kuspiritu.” Indi kuzatila kudi kukaankila kweneni kwamukwasha ñahi? Wahosheli nindi: “Henohu kanda niyi kuRussia, nazatileña neyi eluda nawa payiniya, ilaña natiyaña neyi natuñi wubwambu wawuha naYehova hakwinza kuRussia. Nadizi chakumukuhwelela Yehova chikupu muyuma yejima muchihandilu chami.” Mu 2005, Hiroo wasumbwili Svetlana, nawa wejima wawu atwalekeluhu nakuzata wupayiniya.

Matthew wudi nayaaka yakusemuka 34 mana kwindi Michael wudi nayaaka yakusemuka 28 akuCanada. Wejima wawu ayili nakuhempula kuRussia nawa atiyili kuwaha hakumona antu adiñi nampwila chenjiluwu nakupompa, ilaña kwadiña hohu amana kwetu antesha akuyilombola. Matthew wahosheli nindi: “Chipompelu chinahempwili mwadiña antu 200 apompeli, ilaña eluda wumu hohu wachikulumpi ninkoñi wakuzatila wakansi diwu alombweleña kupompa kwejima. Chinamweni chumichi, chanleñeleli kufwila kubuukila kunidi iluña kulonda nakakwashi ana amana kwetu.” Wabuukilili kuRussia mu 2002.

Chimwahitili yaaka yiwana, Michael wabuukilili kuRussia nawa wamweni nindi kwachidiña kukaankila kweneni kwawamana kwetu. Chineli wadiña nkoñi wakuzatila, amwinkeli mudimu wakutala mali, nyikanda niiluña dakushimwinamu. Amwinkeli cheñi mudimu watela kuzatawu kudi nsoneki wamuchipompelu, kuhana mpanji jawantu amavulu, kuloñesha kupompa kwamaneni nikutuña Matala Wanta. Kafwampi, nimakonu muyipompelu yayivulu muchidi kukaankila kweneni. Hela chakwila kuzata nyidimu yayivulu himudimu wakala, Michael wunakukalakala neyi eluda chayinu mpinji wahosheli nindi: “Kukwasha amana kwetu kwanzañaleshaña hama. Dichi chuma chinatiyaña kuwaha muchihandilu chami!”

Chimwahitili mpinji, Matthew wasumbwili Marina, nawa Michael wasumbwili Olga. Awa amayala ayedi niañodi jawu kushilahu niakwakushimwina amavulu, atwalekahu kukwasha yipompelu yinakukula.

Mu 1994, henohu Tatyana wudi nayaaka 16 yakusemuka, apayiniya adimena atanu nawumu afumini kuCzech Republic, Poland, nikuSlovakia atachikili kukalakela muchipompelu chawu muUkraine. Wayanukaña namuzañalu nindi: “Awa adiña apayiniya adikita nawa akasuluka, akweti luwi nawa elukili Bayibolu chiwahi.” Wamweni Yehova chayikiswililiyi hamuloña waspiritu yawu yakudihana, nawa watoñojokeli nindi, ‘Ninami inakukeña kwikala neyi wena.’

Muloña amukolesheli kudi apayiniya, Tatyana wazatishileña mafuku indi akunooka kushikola kulonda yayi nawantu amakwawu kumaluña akwakulehi muUkraine niBelarus kwabulahu dehi kushimwinawu kudi aYinsahu. Wadiluñishileña hama chayayi nakushimwina chakwila wafuukwiluhu kuzata nankashi mumudimu wakushimwina kuhitila mukubuukila kuRussia. Chatachi, wayili hadi kapinji kantesha nakuhempula muhela wabuukili kufuma kwituña dacheñi nawa Tatyana wayili nakukeña mudimu wunateli kumukwashaku kuwana mali akudikwasha nachu  muwupayiniya. Muchaaka cha 2000, wabuukilili kuRussia. Komana yuma yamukalilili chabuukiliyi?

Tatyana wahosheli nindi: “Chineli hinatwesheli kwikala netala damuku, nasonkeleleña kapeka mwitala dawantu acheñi. Hichadiña chapela kushakama muniyi njilaku. Kwadiña mpinji yinafwilileña kufunta kwetu. Ilaña mpinji yejima Yehova wankwashileña kulonda niluki nkisu yikafumamu neyi nitwalekahu namudimu wami.” Makonu, Tatyana wazataña neyi kamishonali muRussia. Wakunkulwili nindi: “Yaaka yejima yinashakami mwituña dacheñi namoni yuma yayivulu yayiwahi nawa nakwati wubwambu nawantu amavulu. Sweje-e dinu, chikuhwelelu chami chinakoleluku.”

Masako wakuJapan, wudi nayaaka yindi yatachi yamuma 50, wadiña nachikonkwanyi chakukalakala neyi kamishonali, ilaña chamukalilili kwila mwenimu muloña wakukatakata. Ilaña chelili iwu muhela yatiyuku chiwahi, wafuukwiluhu kubuukila kuRussia kulonda yakwashuku mudimu wakumuna. Hela chakwila chadiña chakala kuwana matala amawahi nimudimu watelela, watwalekeluhu kuzata wupayiniya kuhitila mukutañisha idimi dakuJapan nikuzata nyidimu yakukomba mwitala nikukosa yakuvwala. Yumanyi yamukwashili kutwalekahu namudimu windi?

Hakwanuka hayuma yamweniyi mumudimu wakushimwina hadi yaaka 14 muRussia, Masako wahosheli nindi: “Muzañalu wunatiyaña neyi nidi mumudimu wakushimwina wanleñelaña kuvulamena makabi ejima inamonaña. Kushimwina mwiluña mudi kukaankila kweneni kwawakwakushimwina aWanta kwaletaña muzañalu hama.” Wabombeleluhu nindi: “Namonaña neyi hichihayamisha chamakonu hakumona Yehova chinankwashiyi yaaka yejimiyi, wanyinkaña yakudya, yakuvwala nihakukama.” Kubombela hakuzatila kwadiña kukaankila kweneni muRussia, Masako wazatiluku cheñi mudimu wakumuna kuKyrgyzstan. Kubombelahu, watwesheli cheñi kukwasha mazanvu edimi daEnglish, Chinese niUighur. Chayinu mpinji wazataña neyi payiniya muSt. Petersburg.

Hamuloña wakukala kwamali, yisaka yavula kubuukila kumatuña acheñi kulonda ekaluku nayuma yayivulu yakudikwasha nachu. Kufwana Abarahama naSara akushankulu, yisaka yikwawu yabuukila kumatuña acheñi hamuloña  wakufwila yikonkwanyi yakuspiritu. (Kutach. 12:1-9) Shinshikenu chakutalilahu chaMikhail naInga, adisumbula akuUkraine ayili kuRussia mu 2003. Awanini antu adiña nakukeña chalala chamuBayibolu.

Mikhail washimwini nindi: “Hampinji yimu twashimwinini mwiluña mwabulawu dehi kushimwinawu kudi aYinsahu. Kashinakaji wumu wedikili mwitala nawa wayihwili nindi, ‘Mudi akwakushimwina?’ Chitwetejeli, wahosheli nindi: ‘Nelukili nami ifuku dimu mwakenza. Mazu aYesu hiyanateli kubula kushikijewaku.’ Kufumahu iwu iyala wahosheli mazu ekala haMatewu 24:14.” Mikhail wabombeleluhu nindi: “Mudina iluña twawaninumu cheñi izanvu dawambanda ikumi amuchipompelu chaBaptist adiña nampwila yakudiza chalala. Adiña namukanda wekala namutu wakwila nawu You Can Live Forever in Paradise on Earth nawa awuzatishileña mafuku ejima kunsa yamulungu hakudiza Bayibolu. Twahanjikili maora amavulu nakwakula malwihu awu nikwimba nawu tumina twaWanta, nawa twadilili hamu yakudya yamelela. Ilu lwendu lwekala hakachi kamalwendu inadiluñishili.” Mikhail naInga eteja nawu kuzatila kumaluña kudi kukaankila kweneni kwawakwakushimwina kwayileñela kukundama kwakwihi naYehova, kukeña antu chikupu nikwikala namuzañalu muchihandilu chawu. Makonu, azataña mudimu wawunkoñi wañinza.

Mu 2007, Yury naOksana, adisumbula akuUkraine, adi muyaaka yawu yamuma 35, nimwanawu Aleksey, chayinu mpinji wudi nayaaka 13 yakusemuka ayili nakuhempula kasanji kamutayi muRussia. Hakasanji kamutayi amweni mapu yaRussia hadiña maluña amaneni mwabula akwakushimwina. Oksana wahosheli nindi, “Chitwamweni iyi mapu, twelukili chikupu netu muRussia mudi kukaankila kweneni kwawakwakushimwina aWanta. Chatukwashili kufuukula netu tubuukili kuRussia.” Chumanyi chayikwashili cheñi? Yury wahosheli nindi: “Kutaña yibaaba yekalaña munyikanda yetu yidi neyi ‘Can You Serve in a Foreign Field?’ (Munateli Kuzatila Mwituña daCheñi?) yatukwashili hama. * Twayili nakuhempula kwiluña damuRussia datulejeluwu kumutayi nawu didu iluña ditunateli kubuukila nakukeña itala nimudimu.” Mu 2008, abuukilili kuRussia.

Hakusambila, chakalili kuwana mudimu nawa kakavulu adiña nakutuntujoka kufuma mwitala dimu nakuya mwitala dikwawu. Yury wahosheli nindi: “Kakavulu twalombeleña netu tubuleña kutiya kutama kulonda tutwalekuhu kuzata mudimu wakushimwina nikukuhwelela netu Yehova wukutukwasha. Twamweni Yehova chatwakamenañayi neyi tutwamijaku Wanta windi hambidi. Iwu mudimu wakolesheli chisaka chetu.” (Mat. 6:22, 33) Indi kuzatila kudi kukaankila kweneni kwamukwashili ñahi Aleksey wuchindi kansi? Oksana wahosheli nindi, “Kwamukwasha chikupu. Wadiheni kudi Yehova nakupapatishewa henohu wudi nayaaka yitanu nayiwana yakusemuka. Muloña weluka nindi kudi kukaankila kweneni kwawakwakushimwina, chumichi chamuleñelaña kuzata wupayiniya wakukwasha mpinji yejima yakunooka kushikola. Twatiyaña muzañalu chikupu hakumona iyena dikwetiyi nichakeñayi kushimwina.” Makonu, aYury naOksana akalakalaña neyi apayiniya adimena.

Neyi chinahoshuwu awa akwakumuna, kubuukila kumatuña acheñi nakuzatilaku mudimu wakushimwina chakeñekaña kumukuhwelela Yehova chikupu. Chakadi nikujina, antu akalakeleña kudi kukaankila kweneni amonaña kukala mumaluña mwakalakelañawu, ilaña atiyaña cheñi muzañalu waweni wafumaña hakushimwina nsañu yayiwahi kudi antu atambwilaña nsañu yaWanta. Komana munateli kukwashana hakuzata mudimu wakumuna kumaluña kuchidi kukaankila kweneni kwawakwakushimwina aWanta? Neyi mufuukula kwila mwenimu, munateli kutiya neyi chatiyiliyi Yury, wahosheli hakufuukulahu kwindi kwakuya nakuzatila kudi kukaankila kweneni nindi: “Chuma chinaditoñeshaña hohu, chakwila nawu chiña natachikili swayi.”