BEZALELI niOholiyabi elukili mudimu wakutuña. Hampinji yadiñawu anduñu muEjipitu, afwatwili matafwali amavulu nankashi nawa akeñeleña wanyi kwanuka iyi nsañu. Ilaña iyi yadiña yaaka yakunyima. Ichi dinu akwikala akwawukalawenu amuntu wasweja kulema neyi anayinki mudimu wakulombola hakutuña tabanaka. (Kwid. 31:1-11) Hela chochu, antu antesha hohu diwu akamona mudimu wawu wasweja kuwaha wukuzatawu. Komana akutiya kutama muloña kwosi antu akeluka nawu wena diwu azatili iwu mudimu? Komana afwilileña chikupu kwiluka muntu wamweneña mudimu wawu? Komana mwafwilaña kwiluka muntu wamonaña mudimu wenu?

Yuma yikwawu yamutabanaka yadiña yayiwahi chikupu. Chakutalilahu, shinshikenu akerubi awuru adiña hewulu dachimbañu chachitiyañenu. Kapostolu Pawulu wayitena iyi yuma nindi ‘yalubanji lwakulema.’ (Heb. 9:5) Iyi yuma yakutuña nawuru yakuchila yadiña yalubanji chikupu.—Kwid. 37:7-9.

Yuma yatuñiluwu aBezaleli niOholiyabi neyi ayiwana makonu anateli kuyisha mumatala amawahi chikupu mwahembelañawu yuma yalema yakunyaka, nawa anateli kuyilemesha chikupu kudi antu amavulu. Hampinji yayituñiluwu, antu añahi amweni chikupu lubanji lwaniyi yuma? Akerubi ayishili Mwamweni Mwajila; dichi ayimweneña hohu kudi kapristu muneni wadiña nakwiñilamu kamu hohu hachaaka, Hefuku daKubuta Nshidi. (Heb. 9:6, 7) Dichi antu antesha hohu diwu ayimoni.

Neyi iyeyi wadiña Bezaleli hela Oholiyabi nawa wazatili nankashi hakwila wutuñi yuma yayiwahi chikupu yawukalawenu, wadi kutiya ñahi hakwiluka neyi antu antesha hohu diwu akayimona? Makonu antu atiyaña kuwaha hanyidimu yazatañawu neyi ayihameka nikuyilemesha kudi akwawu. Atoñojokaña nawu diyi njila yakwilukilamu nawu nyidimu yawu yalema. Ilaña ambuña Yehova ambukaku. Kufwana Bezaleli niOholiyabi, twatiyaña muzañalu hakwila nkeñelu yaYehova nikwikala nawuselewa windi.

Mumafuku aYesu, akulumpi jakwitiya adiña nakulomba munjila yakuzañalesha antu. Ilaña Yesu walejeli atumbanji twindi kulomba munjila yacheñi: Kulomba chakufuma hamuchima nawa chakadi kukeña netu atuhameki kudi antu anakutumona. Chumanyi  chinateli kufumamu? “Tata yeyi wamonaña kumbadi wakakwinka wufwetu weyi.” (Mat. 6:5, 6) Mwamweni, chuma chalema chakwila nawu, bayi chuma chatoñojokañawu antu amakwawu hakulomba kwetu dichi chalemaku, chiña chuma chatoñojokañayi Yehova. Yitoñojoka yindi diyi yaleñelaña kulomba kwetu kwikali kwalema chikupu. Tunateli kuhosha chuma chochimu kutalisha hamudimu wejima wutunateli kuzata mumudimu wetu wajila. Hitwamonaña netu mudimu wetu walema muloña antu amakwawu anakutuhamekaku; ilaña wamuzañaleshaña Yehova “wamonaña kumbadi.”

Chamanishiluwu kutuña tabanaka, ivu “dabutili itenti dakubulakena wi-i, nikulema kwaYehova kwenzesheli tabanaka.” (Kwid. 40:34) Chumichi chamwekesheli chikupu nawu Yehova wetejeli tabanaka. Munakutoñojoka nenu Bezaleli niOholiyabi atiyili ñahi hayina mpinji? Hela chakwila majina awu ayibazilili wanyi hayuma yatuñiluwu, atela atiyili kuwaha hakwiluka nawu Nzambi wakiswilili nyidimu yawu. (Yish. 10:22) Muyaaka yalondeleluhu, azañaleli hakumona nawu yuma yatuñiluwu atwalekeluhu kuyizatisha mumudimu waYehova. Chakayisañulawu mwituña dadiha, chakadi nikujina Bezaleli niOholiyabi akatiya kuwaha hakwiluka nawu tabanaka ayizatishili mukudifukula kwalala kwakwihi nayaaka 500.

Mukuloñesha kwaYehova makonu, antu atuñaña mafilimu atudoli, akwakuleñaleña, añimbi, akwakukwata nyevulu, akwakubalumuna niansoneki wejima wawu azataña chakubula kuyiluka. Muniyi njila kwosi muntu “wamonaña” nyidimu yazatañawuku. Tunateli kuhosha chuma chochimu kutalisha kunyidimu yazatañawu muyipompelu yakubadika 110,000 mukaayi kejima. Hinyi wamonaña ankoñi ahembaña mali chasonekañawu yipapilu yakeñekaña hakumana kwakakweji? Hinyi wamonaña neyi nsoneki nakuloñesha chileji chamudimu wamwiha chamuchipompelu? Hinyi wamonaña neyi mana kwetu hela muhela nakuloñesha hanahumoki Mwitala daWanta?

Chafwiluwu aBezaleli niOholiyabi hiyatambwililuhu lupasa hela mendulu chakwila adisambili nawu atuñili yuma yayiwahi chikupuku. Ilaña atambwilili chuma chasweja kulema, wuselewa waYehova. Tunateli kukuhwelela chikupu netu Yehova wamweni nyidimu yawu. Twimbujolenu chakutalilahu chawu chakudizoza nikudihana hakuzata.