Kumukalakela Yehova ‘muMafuku Atama’
ERNST wudi nayaaka yamuma 70 wahosheli nakudishishimona nindi, “Yikatu yami yinakutohelaku hohu.” * Komana ninenu dichi chimwatiyaña? Neyi munakushinakaja nawa munakutiya nenu ñovu jinakumana nawa munakukatakata, munateli kwesekeja chihandilu chenu namazu ekala hamukanda waMukwakutaŋisha kapetulu 12. Muvasi 1, mafuku awushinakaji ayitenaña nawu “mafuku atama.” Hela chochu, hichinayi mukwila nawu mukwikalaña nachihandilu chamakabi hohuku. Munateli kwikala nachihandilu chachiwahi nikumuzatila Yehova namuzañalu waweni.
KUTWALEKAHU KWIKALA NACHIKUHWELELU CHAKOLA
Enu amana kwetu niahela atushinakaji himunakumona kukala nkawenuku. Ambuña Nzambi atushinakaji akushankulu niwena amweni kukala kwokumu. Chakutalilahu, Isaka, Yakoba niAhiya alekeli kumona. (Kutach. 27:1; 48:10; 1 Anya. 14:4) Sara watiyili ‘kuzeya chikupu.’ (Kutach. 18:11, 12) Mwanta Davidi ‘wakañenyeña kutiya iyena.’ (1 Anya. 1:1) Samaheta Bazilayi hatwesheleña kwiluka ivumba dayakudya hela kutiya yivumina yatuminaku. (2 Sam. 19:32-35) Abarahama niNyawomi wejima wawu amweni kukala muloña afwishili eni kwawu.—Kutach. 23:1, 2; Luti 1:3, 12.
Chumanyi chayikwashili wejima wawu kutwalekahu kwikala ashinshika kudi Yehova nikwikala namuzañalu? Henohu wakula dehi, Abarahama ‘wekalili nañovu muloña wachikuhwelelu chindi’ muloña wakuhweleleli muchikaninu chaNzambi. (Rom. 4:19, 20) Anetu nawa twatela kwikala nachikuhwelelu chakola. Chikuhwelelu chamuchidiwu hichashindamena hayaaka yetu yakusemuka, wuswa wutukweti hela chihandiluku. Chakutalilahu, hela chakwila wazeyeli, wapuutili mesu nawa wakamenineña hohu mukadidi, nkakulula Yokaba wakuhweleleli chikupu muyikaninu yaNzambi. (Kutach. 48:1-4, 10; Heb. 11:21) Makonu, Ines wudi nayaaka 93 yakusemuka wakabakanaña nayikatu yakuzeya mujimba, ilaña wahosheli nindi: “Mafuku ejima namonaña nami Yehova wankwashaña. Ifuku dejima natoñojokaña haparadisa. Chumichi chakoleshaña.” Wemika chakutalilahu chachiwahi.
Twakoleshaña chikuhwelelu chetu kuhitila mukulomba, kutalatala Mwizu daNzambi nikuya kukupompa kwawakwaKristu. Kaprofwetu Danyeli washinakajili wadiña nakulomba mpinji yejima kasatu hefuku nawa wadizileña Izu daNzambi. (Dan. 6:10; 9:2) Ana ntuluwa wakashinakaji “hafuminaña mutembeluku.” (Luka 2:36, 37) Neyi mutwesha kuya nakupompa nikwakulañahu kwesekeja nahanakumini ñovu jenu, chumichi chikuyikwasha enu niejima adi mwizaza. Nawa Yehova watiyaña kuwaha nakulomba kwenu, hela chakwila mwatela kwila hohu yuma yantesha.—Yish. 15:8.
Ikalenu nachisambu
Enu amavulu ashinshika mwakeñaña kumona, kutaña nikwikala nañovu yakuya nakupompa, ilaña chayikalilaña nawa mpinji yikwawu mwakañanyaña. Chumanyi chimwatela kwila? Zatishenuña chiwahi yuma yejima yimukweti. Antu amavulu akañanyaña kuya nakupompa atiyaña kuwaha kutiyilila maprogiramu ahakupompa kuzatisha nshiña. Hela chakwila mesu amukabishaña, Inge wukweti yaaka 79 waloñeshaña nsañu yakupompa kuzatisha nsañu yansona yamaneni yakupulinta hakompyuta yamwinkañawu kudi mana kwetu muchipompelu.
Hadaha mukweti mpinji yabula kwikala nawakwenu. Kwila muzatisha iyi mpinji kuhitila mukutiyilila mazu akwatawu amuBayibolu, amunyikanda yashindamena haBayibolu, jimpanji niyimwenu yamazu nehi? Cheñi nawa, munateli kutemeshelaña akwenu akwakwitiya nshiña kulonda mudilejeña nsañu yakuspiritu kulonda ‘mudikolesheña.’—Rom. 1:11, 12.
KUTWALEKAHU KUKALAKALA MUDIMU WANZAMBI
Shimwinenu izu
Christa wudi nayaaka 85 yakusemuka wabili nindi, “Chakala nankashi kuleka chantesha kuzata nyidimu yiwazatileña kubadika hakusambila.” Hanu dinu atushinakaji anateli kutwalekahu ñahi kwikala namuzañalu? Peter wudi nayaaka 75 yakusemuka wahosheli
nindi, “Kuhitila mukwikala nayitoñojoka yayiwahi, bayi mutoñojokaña hohu hayuma yimukubula kwilaku, ilaña mwatela kudiluñishaña yuma yimunakwila.”Komana munateli kutoñojoka hajinjila jimunateli kutwesha kuzatisha hakushimwina? Heidi hatweshaña kuya nakushimwina kwitala nikwitala neyi chelileñayuku. Hela chakwila iwu muhela wudi muyaaka yamuma 80, ilaña wadizili chakuzatisha kompyuta kulonda yasonekeña nyikanda. Akwakushimwina amakwawu atushinakaji atachikaña kuhanjeka nsañu yamuBayibolu nawantu henohu anashakami hachitwamu mupaaki hela hachitesheni chamabasi. Hela neyi mwashakamaña mumatala mwahembelañawu atushinakaji, komana munateli kwikala “neluña denu dakushimwina” kuhitila mukushimwina antu ayakamenaña niantu amakwawu imwashakamaña nawu?
Koleshenu akwenu
Mwanta Davidi watwalili kudifukula kwalala hambidi. Wahanini mali nawa waloñesheli yuma yakutuña nachu tembeli. (1 Kushi. 28:11–29:5) Munjila yoyimu, ninenu mwatela kwiluka yuma yinakuzatika mumudimu wakushimwina Wanta mukaayi kejima nikukwasha iwu mudimu. Kwila mukwasha apayiniya hela akwakushimwina amakwawu adikita amuchipompelu chenu kuhitila mukuyikolesha, kuyinka chawana chanyanya, hela yakudya yapela nehi? Mukulomba kwenu, munateli kubombelamu atwansi niyisaka, adi mumudimu wampinji yejima, akata ninana akweti nyidimu yamaneni.
Enu nimudimu wenu awulemesha chikupu. Tata yetu wamwiwulu hamba kayivulamena enu atushinakajuku. (Mas. 71:9) Yehova wayikeña nawa wayilemesha. Katataka ichi, wejima wetu twakatwalekahu nakukula chadi kumona yihuñu hela kukala. Kafwampi, twakekala nañovu chikupu nawa awanina kulonda twakatwalekahu kumukalakela Yehova Nzambi yetu wukweti kukeña haya nyaka.
^ Majina amakwawu anayihimpi.