1, 2. (a) Maluña amuchidinyi akudifukwila azatishileñawu ambuña Yehova kushankulu? (b) Indi Yesu wamweneña ñahi tembeli yaNzambi yadiña muYerusalema? (c) Indi ichi chibaaba chikweti nkeñelwinyi?

 KUFUMA tuhu kushankulu, ambuña Nzambi adiña namaluña awu akudifukwila kudifukula kwalala. Abeli watela wazatishili kameña hampinji yamulambwiliyi Nzambi. (Kutach. 4:3, 4) Nowa, Abarahama, Isaka, Yakoba niMosi atuñili tumeña. (Kutach. 8:20; 12:7; 26:25; 35:1; Kwid. 17:15) Yehova wayinkeli aIsarela nshimbi yakutuña tabanaka. (Kwid. 25:8) Chimwahitili yaaka, atuñili tembeli yakudifukwilamu kudi Yehova. (1 Anya. 8:27, 29) Chiyafuntiluwu kufuma muwunkoli muBabiloni, aYudeya adiña nakupompela mafuku ejima mumasinagogi. (Maku 6:2; Yow. 18:20; Yil. 15:21) AkwaKristu akusambila apompeleleña mumatala awantu amuchipompelu. (Yil. 12:12; 1 Kor. 16:19) Makonu, antu jaYehova apompelaña muMatala aWanta amavulu chikupu mukaayi kejima kulonda adizi nikudifukula.

² Yesu wakeñeli chikupu nikulemesha tembeli yaYehova yamuYerusalema chakwila nsoneki waNsañu Yayiwahi wamukunjikili mazu awuprofwetu akwila nawu: “Iyena detala deyi dikuñudya kumuchima.” (Mas. 69:9; Yow. 2:17) Kwosi Itala daWanta dinateli kutenawu chikupu nawu “itala daYehova”  munjila yoyimu neyi mwakunjikiluwu awa mazu kutembeli yadiña muYerusalema. (2 Kushi. 5:13; 33:4) Hela chochu, Bayibolu mwekala nshimbi yatulejaña chitwatela kuzatisha nikulemesha maluña etu akudifukwila amakonu. Nkeñelu yachinu chibaaba yakuhituluka muniji nshimbi jikwawu nikudiza chiyakundama kunjila yitwatela kumona Matala etu aWanta, kuhana mali akutuña nachu nikuloñesha hanahumoki. *

3-5. Itala daWanta dazataña mudimwinyi, nawa chumichi chinateli kutukwasha ñahi kutalisha hakupompa?

³ Itala daWanta hiluña mwabulakenañawu antu amuchituñilu nakudifukula kudifukula kwalala. Hakachi kayuma yatuloñeshelayi Yehova yakoleshaña wubwambu wetu nayena, hikupompa kwamulungu nimulungu Hetala daWanta. Dihu hitwatambwilaña yakudya yalema yakuspiritu niwunlomboli wafumaña mukuloñesha kwindi. Antu ejima enzaña nakupompa etejaña mutambi waYehova niMwanindi. Hela chakwila tukweti kukooleka kwakututambika nakudya ‘kumesa yaYehova,’ bayi tumona iwu mutambi netu wamukunkulwayuku.—1 Kor. 10:21.

⁴ Yehova wamonaña iyi mpinji yakudifukula nikudikolesha nindi yalema, dichi chaletesheli yamoneni kapostolu Pawulu kutukolesha nindi bayi tuleka kupompaku. (Tañenu Aheberu 10:24, 25.) Komana tunateli kumwekesha kalemesha kudi Yehova neyi tujiña kukupompa kwawakwaKristu chakadi nyiloña yatelela? Kafwampi, tunateli kumwekesha netu twamusakililaña Yehova hama nikuloñesha kwindi kuhitila mukuloñesha chiwahi nikwakulañahu hakupompa chakufuma hamuchima.—Mas. 22:22.

⁵ Yililu yitwamwekeshaña Hetala daWanta, mmwekenu yetu yakumujimba ninyidimu yakuspiritu yazatikañahu yatela kumwekesha kalemesha kakeni. Komana yililu yetu hiyesekana nachitwatiyaña kutalisha hejina daNzambi, dasonekawu hachinjikijilu Chetala daWanta?—Esekejenu 1 Anyanta 8:17.

6. Indi antu amakwawu ahosheli nawudi kutalisha hamaTala etu aWanta niantu apompeleñamu? (Talenu mwevulu wakutachikilahu.)

⁶ Kakavulu antu abula kwikala aYinsahu, amonaña chitwalemesha maluña etu akudifukwila. Chakutalilahu, iyala wumu muTurkey wahosheli nindi: “Wunyoji nikuhemba yuma chiwahi yinamweni Hetala daWanta yanzañalesheli. Antu avwalili chiwahi, amwemweteleña nawa añimushili namuzañalu. Chumichi chanzañalesheli nankashi.” Iwu iyala watachikili kuya nakupompa mpinji yejima nawa chimwahitili mpinji yantesha wapapatisheweli. Mumusumba wumu muIndonesia, chipompelu chatambikili akulumpi jafulumendi amwiluña dawu niantuñi kuya nakutala Itala daWanta dadiha henohu kanda adihani. Mwanta waboma wayili. Watiyili kuwaha chadituñiluwu chiwahi, niinji yayiwahi. Wahosheli nindi, “Wunyoji wanidi Itala wamwekeshaña chikuhwelelu chenu chalala.”

7, 8. Yumanyi yalema yatela kwanukawu antu enzaña kukupompa kwawakwaKristu?

⁷ Kalemesha kitwamumwekeshelaña Nzambi watutambikaña kukupompa kwawakwaKristu katela kumwekena muyililu yetu, nvwalilu nimmwekenu yetu. Twatela cheñi kuleka yililu yatama. Neyi tudi Hetala daWanta, hitwatela kusweja kukolesha nshimbi yahosha hayililu yayiwahi yitwatela kwikala nayu hakupompaku nawa hitwatela kuleta maleñu neyi chitwelaña kumatala  etuku. Kafwampi Yehova wakeñaña nindi antu jindi nienyi atiyeña kuwaha neyi adi Hetala daWanta. Neyi tunakupompa hitwakeñaña kaluwañesha akwetu kuhitila mukuvwala yakuvwala yabula kutelela, kutemesha meseji hanshiña, kuhanjeka hampinji yakupompa hela kudya yakudya kushilahu niyuma yikwawuku. Anvwali atela kudizisha anyanawu kulonda eluki nawu Itala daWanta bayi neyi hiluña dakukidimokela hela kuhemenaku.—Mukwa. 3:1.

⁸ Muloña wakwila wahilili, Yesu wahañili mutembeli yaNzambi antu atachikili nyidimu yakuselujola. (Yow. 2:13-17) Matala etu aWanta himaluña akudifukwila kudifukula kwalala nishikola yakuspiritu. Dichi nyidimu yejima yakuselujola hiyakundama kuyuma yakuspirituku, twatela kuyilila kwacheñi.—Esekejenu Nehemiya 13:7, 8.

9, 10. (a) Indi Matala aWanta amaha ayituñaña ñahi, nawa mali afumaña kudi, nawa yumanyi yinafumumu? (b) Ntanjikilwinyi yayiwahi yakwasha chikupu yipompelu yabula mali akutuña nachu Itala daWanta?

⁹ Kuloñesha kwaYehova kwazataña nañovu hakuhana mali akutuña nachu Matala aWanta ashikilamu. Mudimu wakufunjijeka, kutuña nikutuñulula awuzataña kudi antu azataña mukudikeñela abulaña kufwetawu. Yumanyi yafumamu? Kufuma tuhu muNovember 1, 1999, maluña akudifukwilamu kudifukula kwalala amawahi akubadika ha 28,000 ayituñila yipompelu mukaayi kejima. Chumichi chinayi mukwila nawu muyaaka 15 yinahituhu, atuñaña Matala aWanta amaha atanu hefuku hefuku.

¹⁰ Azataña nañovu hakwila akwashuku mudimu wakutuña Matala aWanta anakukeñeka kudi kwejima. Iyi ntanjikilu yakukeña yashindamena hanshimbi yamuBayibolu yakwila nawu yuma yayivulu yikweti antu amakwawu yikwashi akwawu anabuli ‘kulonda kwakekali kwesekana.’ (Tañenu 2 Akorinda 8:13-15.) Chinafumumu, yipompelu yayivulu ayituñila maluña amawahi akudifukwilamu kudifukula kwalala nawa yipompelu yeniyi hiyadi kutwesha kutuña Matala aWanta namali awu awenuku.

11. Indi amana kwetu amakwawu ahoshaña nawudi kutalisha Hetala daWanta dadiha, nawa chumichi chinayitishi ñahi?

¹¹ Chipompelu chamuCosta Rica chahetelelumu muniyi ntanjikilu chasonekeli nawu: “Neyi twimana kumbidi Yetala daWanta, twatiyaña neyi kwiji hichilota. Twahayamaña chikupu. Itala detu daWanta dadiwahi twadituñili hohu mumafuku atanu nasatu! Twadituñili muloña wankisu yaYehova, ntanjikilu yakuloñesha kwindi niwukwashu watukwashiluwu amana kwetu. Idi iluña dakudifukwila hichawana chasweja kulema chatwinkeliyi Yehova. Twazañalalaña chikupu nanichi chawana.” Komana himwazañalalaña  hakutiya nsañu yamuchidiwu yakusakilila kutalisha haMatala aWanta nikwiluka nenu amana kwetu amavulu mukaayi kejima niwena anakutiya muzañalu wowumuku? Iwu himudimu waYehova, chamanishawu hohu kutuña Matala aWanta antu amavulu akweti nyichima yayovu nawa afwilaña kumwiluka Nleñi wukweti kukeña ayaña nakupompa.—Mas. 127:1.

12. Munateli kukwasha ñahi mudimu wakutuña Matala aWanta?

¹² Amana kwetu niahela amavulu ekala namuzañalu chikupu kuhitila mukuzataku mudimu wakutuña Matala aWanta. Hela tukutwesha kuzataku mudimu wakutuña hela nehi, wejima wetu tukweti kukooleka kwakukwasha iwu mudimu kuhitila mukuhana yawaana. Iyena dakudifukula kwalala dayikwashili antu akushankulu kuhana mali akuzatisha kunyidimu yaNzambi, nimakonu dichi chelañawu kulonda mpuhu yiyi kudi Yehova.—Kwid. 25:2; 2 Kor. 9:7.

13, 14. Nshimbinyi yamuBayibolu yahosha hakuhemba Matala aWanta nawunyonji?

¹³ Chamanishawu kutuñawu Itala daWanta, twatela kudihemba nawunyonji kulonda dimwekesheña yililu yaNzambi wutwadifukulaña, Nzambi wakuloña. (Tañenu 1 Akorinda 14:33, 40.) Bayibolu yesekejaña kujila niwunyonji wakuspiritu nawunyonji wakumujimba. (Chim. 19:8) Dichi, neyi antu anakukeña kwikala nawuselewa waYehova, atela kwikala awunyonji.

¹⁴ Kwesekeja naniji nshimbi, twatela kutiyaña kuwaha hakutambika antu akweti mpwila kukupompa kwetu, nikukuhwelela netu wunyonji Wetala daWanta wakwashaña nsañu yayiwahi yitwayishimwinaña. Akwiluka nawu  twadifukulaña kudi Nzambi wajila nawa keña yabalumuni iseki kwikala paradisa yakadi majilu.—Isa. 6:1-3; Chim. 11:18.

15, 16. (a) Muloñadi chichinateli kwikala chakala kuhemba Itala daWanta nawunyonji, nawa muloñadi chichalemena? (b) Ntanjikilwinyi yakuwahisha Itala daWanta yimwatanjika muchipompelu chenu, nawa wejima wetu tukweti kukoolekanyi?

¹⁵ Antu amakwawu alemesha wunyoji kubadika amakwawu. Chuma chaleteshaña antu amakwawu kubula kwikala nawunyonji chashindamena hankulilu niyuma yidi neyi mateshi, lunkuñu, nyikwakwa yatama nikukeha kwamenji niyuma yakuwahisha nachu. Hichikweti muloña nayitoñojoka yawantu hela chekala yumaku, twatela kuhemba Itala detu daWanta nawunyonji muloña demenañaku ijina daYehova nawa hiiluña dakudifukwila kudifukula kwalala.—Kuhit. 23:14.

¹⁶ Twatela kuwahishaña Itala daWanta mpinji yejima. Mazanvu awaeluda ejima atela kwiluka nawu analoñeshi ndandanda nikulanda yuma yakuzatisha hakuwahisha chipompelu kulonda iluña dakudifukwila dikaleña dawunyonji. Chineli nyidimu yikwawu yakuwahisha yakeñekaña kuyizata mafuku ejima hanyima yakupompa nawa yikwawu hiyakeñekaña kuyizata mpinji yejimaku, chakeñekaña kuloñesha chiwahi kulonda nyidimu yikwawu abuleña kuyidiwula. Antu ejima amuchipompelu akweti kukooleka kwakuzataku iwu mudimu.

17, 18. (a) Chumanyi chitukudizilaku muBayibolu kutalisha hachahembeleñawu maluña akudifukwila kudifukula kwalala? (b) Muloñadi chitwatela kuhemba Matala aWanta chiwahi?

¹⁷ Ambuña Yehova azataña cheñi nañovu kulonda ahembi chiwahi iluña dawu dakudifukwila. Mwanta wawaYuda Yehowashi walejeli atupristu kuzatisha yawana yalambwiluwu kwitala daYehova kulonda “akaloñeshi nachu itala hanahumoki kwonsu [kwamwenuwu nawu] kunahumoki.” (2 Anya. 12:4, 5) Chimwahitili yaaka kubadika 200, Mwanta Yosiya niyena wazatishili yawana yalambwileñawu kutembeli kulonda aloñeshi hahumokeli.—Tañenu 2 Kushindulula 34:9-11.

¹⁸ Mumatuña amakwawu tusanji twamutayi twashimwini nawu antu hiyasha muchima hakuloñesha matala hanahumoki hela kuwahisha yuma yikwawu yakuzatishaku. Hekwawu antu antesha mumatuña amuchidiwu eluka nawu atela kuloñesha hanahumoki, ilaña hiyekalaña namali akwila mwenimuku. Chakadi nikujina, neyi aleka kuloñesha hanahumoki Mwitala daWanta, chumichi chikuleñela itala kuhumuka swayi nawa chikuhana wunsahu wawuwahi wanyi kudi antu amuchituñilu. Munjila yikwawu, neyi antu amuchipompelu azata nañovu hakwila aloñesha Itala daWanta chiwahi, chumichi chaletaña kalemesha kudi Yehova nawa mukuhemba mali ahanañawu akwetu akwakwitiya.

19. Chumanyi chimunakufwila kwila kutalisha kumatala itwazatishaña hakudifukula kudifula kwalala?

¹⁹ Itala daWanta hiitala dahanawu kudi Yehova. Dichi, kwosi chipompelu hela muntu wunateli kuhosha nindi dinduku, hichikweti muloña nejina dazatishañawuku. Nshimbi jawakwaKristu jahosha nawu twatela kuzatila hamu kulonda nkeñelu yatuñililuwu idi itala yizatikeña chiwahi. Antu ejima muchipompelu atela kuzatila hamu kulonda alemeshi maluña etu akudifukwila kuhitila mukuhana chawana chakutuña nachu Matala aWanta amaha nikudihana kulonda awahisheña nikuloñesha Matala aWanta chiwahi. Kuhitila mukuzataku iwu mudimu, tunakumwekesha iyena damaluña aYehova akudifukwila neyi cheliliyi Yesu.—Yow. 2:17.