Twalekenuhu Kwikala Ashinshika kuWanta Nzambi
“Wena hiyampata yamunu mwishinaku.”—YOW. 17:16.
TUMINA: 63, 129
1, 2. (a) Muloñadi kwikala ashinshika kudi Nzambi chikwalemena kudi akwaKristu, nawa chumichi chesekana ñahi nakubula kudiñija munsañu jamatuña nachiyuulu? (Talenu mwevulu wakutachikilahu.) (b) Antu amavulu amwekeshaña yililu yamuchidinyi, nawa yililu yamuchidiwu mwafumaña yuma yamuchidinyi?
AKWAKRISTU alala atela kwikala ashinshika nakubula kudiñija munsañu yamatuña nachiyuulu mpinji yejima, bayi neyi hampinji yanjita hohuku. Muloñadi? Muloña antu ejima adihana kudi Yehova amukana nawu akumukeña, kwikala ashinshika nikumwovwahila. (1 Yow. 5:3) Twafwilaña kwovwahila nshimbi jaNzambi jaloña kudi kwejima kutwashakamaña nawa hichikweti muloña nankulilu yetu, kwituña kutwafuma hela chisemwa chetuku. Kwikala ashinshika kudi Yehova niWanta windi kwabadika kulema yuma yejima. (Mat. 6:33) Kashinshi kamuchidiwu kakeñekaña hakwila akwaKristu abuli kudiñija mumadombu ejima amukanu kaayi.—Isa. 2:4; tañenu Yowanu 17:11, 15, 16.
2 Antu abula kukuhwelela yuma yitwakuhwelela alemesha chikupu ituña dawu, muchidi wawu, chisemwa chawu niizanvu dayisela damwituña dawu. Kukala kwafumaña mukulemesha yuma yamuchidiwu kwaleteshaña kudibecha, madombu nawa mpinji yikwawu kwaleteshaña kujilumuna antu amuchidi wacheñi. Njila yamanishilañamu antu kukala kwamuchidiwu yekalaña yayiwahi hela yatama, yinateli kutukuma etu hela chisaka chetu nawa mpinji yikwawu tunateli kukabakenamu chikupu. Chineli Nzambi waleñeli antu nawuswa wakufukulahu yuma yayiwahi, yuma yafuukulaña nfulumendi yawantu yinatweshi kuleñela antu kwila yuma yayiwahi hela yatama. (Kutach. 1:27; Kuhit. 32:4) Tunateli kwila ñahi neyi tumona yuma yamuchidiwu? Chikuwaha neyi mukwambuka kunsañu yamatuña nachiyuulu kulonda mubuli kudiñijamu.
3, 4. (a) Muloñadi akwaKristu chiyatela kubula kudiñija munsañu jamatuña nachiyuulu? (b) Achinu chibaaba chikuhosha hanka?
3 Chiyuulu chalombolañawu antu chinateli kukakeja antu kudiñija muyikonkojola yamwekanaña. AkwaKristu alala hiyanateli kwila mwenimuku. Hitwakeñaña kudiñija munsañu jamatuña nachiyuulu hela kwiñila muwushidikaku. (Mat. 26:52) AkwaKristu alala hiyatoñojokaña chiyuulu chimu chamukaayi kaSatana nawu dichi chachiwahi kubadika chikwawuku. (2 Kor. 2:11) Chineli hitwekala ampata yamunu mwishinaku, hitwakeñaña kudiñija munsañu yamatuña nachiyuuluku.—Tañenu Yowanu 15:18, 19.
4 Chineli hitwawaninaku, etu amakwawu tunateli kutachika kukabakana hakwila tufumishi yitoñojoka yatama yachisemwa chetu chachikulu yitwatoñojokaña. (Yere. 17:9; Efwes. 4:22-24) Dichi, achinu chibaaba chikuhosha hanshimbi jikwawu jinateli kutukwasha kumanisha yililu yamuchidiwu. Tukushinshika cheñi chitwatela kufumba yitoñojoka yetu nikwikala namuchima wakwovwahila Wanta waNzambi.
CHITWABULILAÑA KUDIÑIJA MUNSAÑU JAMUKANU KAAYI
5, 6. Indi Yesu welilidi nawantu ashiyashana adiña mwituña mwashakamineñayi, nawa muloñadi?
5 Neyi chayikalilaña kwambuka kunsañu jamatuña nachiyuulu, chikuwaha neyi mukudihula nenu, ‘Chumanyi chadi kwilayi Yesu?’ Yesu washakamineña mwituña mwadiña antu akumaluña ashiyashana, Yudeya, Ñaliliya, Samariya nimaluña amakwawu. Bayibolu yashimuna nawu kwadiña yikonkojola hakachi kawantu amunawa maluña ashiyashana. (Yow. 4:9) Yikonkojola yadiña cheñi hakachi kawaFwarisi nawaSadusi (Yil. 23:6-9), hakachi kawantu nawansonkeshi (Mat. 9:11) nihakachi kawantu atañili shikola yawaRabi ninana abulili kutaña muniyi shikola. (Yow. 7:49) Muyaaka nkulakaji yakusambila, aIsarela ayiyuulileña kudi aRoma nawa ayiheleli nankashi kudi aIsarela. Hela chakwila Yesu watañishileña nsañu yalala yahosha hadi Yehova nawa welukili nindi wamwinu wafumini kudi aIsarela, ilaña hayilejeleña atumbanji twindi nindi adiña abadika akwawuku. (Yow. 4:22) Kwambukaku, wayikonkomweneni kukeña antu ejima neyi akwawu.—Luka 10:27.
6 Muloñadi Yesu chabuliliyi kwiteja chaambu chadiña nawaYudeya? Muloña yena hela Tata yindi hiyadiñijaña munsañu jamatuña nachiyuuluku. Yehova chaleñeliyi eyala namumbanda kuhitila mudi Mwanindi, wakeñeli nindi awanini iseki dejima. (Kutach. 1:27, 28) Nzambi waleñeli antu munjila yakwila anateli kuvwala antu amakowa amboka. Yehova naYesu hiyalemeshaña antu ekowa dacheñi, etuña dacheñi hela edimi dacheñi kubadika amakwawuku. (Yil. 10:34, 35; Chim. 7:9, 13, 14) Twatela kulondela chakutalilahu chawu chachiwahi.—Mat. 5:43-48.
7, 8. (a) AkwaKristu atela kudiñija munsañwinyi? (b) Chumanyi chatela kwilukawu akwaKristu kutalisha hakumanisha kukala kwawantu nikwamapolitiki?
7 Hela chochu, kudi chuma chimu chitwatela kudiñijamu wejima wetu, kuhakwilaku chiyuulu chaYehova. Wufwinda watachikilili muEdeni chelili Satana yadikañi nachiyuulu chaYehova. Dichi, antu ejima atela kufuukulahu neyi chakwila atela kukuhwelela nawu njila yelilañamu Nzambi yuma yabadika yaSatana hela nehi. Kuhosha hohu chakufuma hamuchima, komana mwamuhakwilañaku Yehova kuhitila mukwovwahila nshimbi jindi chatela mwileña yuma munjila yimunakeñi? Komana mwamonaña Wanta waNzambi nenu diwu wakamanisha kukala kwamonañawu antu? Indi kwiji mwakuhwelela nenu antu anateli kudiyuula aweni?—Kutach. 3:4, 5.
8 Ñakwilu yenu kutalisha kunawa malwihu yinateli kumwekesha chimunateli kwakula neyi muntu yayihula chimwatoñojokaña kutalisha kunsañu yamatuña nachiyuulu. Akapolitiki, akwakutiyakesha nsañu jamapolitiki niantu afwilaña kuwahisha yuma anakabakani hadi yaaka yayivulu kulonda amanishi kukala. Ekala nayitoñojoka yayiwahi hakwila mwenimu. Ilaña akwaKristu eluka nawu Wanta waNzambi hohu diwu wukamanisha kukala kwamonañawu antu nakuleta kuwunda kwalala. Twatela kukunjika iyi nsañu mumakasa aYehova. Kafwampi neyi akwaKristu ejima adiña nakushimuna chuma chinateli kumanisha kukala, komana yipompelu hiyadi kwambokelamuku?
9. Kukalanyi kwadiña muchipompelu chamuKorinda chamuyaaka nkulakaji yakusambila, nawa kapostolu Pawulu wayifumbili nindidi?
9 Talenu cheliluwu akwaKristu amakwawu amuyaaka nkulakaji yakusambila chelili muchipompelu mumwekani nsañu yaleteli chaambu. Antu amakwawu muKorinda ahosheleña nawu: “Ami nimuntu waPawulu; mukwawu nindi, Ami nimuntu waApolosi; mukwawu nindi, Ami nimuntu waKefwasi; mukwawu nindi, Ami nimuntu waKristu.” Hichikweti namuloña wachuma chaletesheli ahoshi mwenimuku, ilaña kapostolu Pawulu wahilili nayuma yafuminumu. Wehwili nindi, “Komana Kristu anamwambuli?” Chumanyi chadi kumanisha iyi yitoñojoka yaleteleña chaambu? Pawulu wayikonkomweneni akwaKristu nindi: “Enu ana kwetu, nayilembeleli mwijina daMwanta wetu Yesu Kristu, nami hoshenu mazu wowamu wejima wenu; bayi mwambuka aha chendu chimu, aha chendu chikwawuku; chiña kudibomba hamu nayitoñojoka yimu nikutiyañana kumu.” Muchipompelu chawakwaKristu makonu himwatela kwikala chaambu chidi chejimaku.—1 Kor. 1:10-13; tañenu Aroma 16:17, 18.
10. Indi kapostolu Pawulu walumbulwili ñahi chatelelawu akwaKristu kubula kudiñija munsañu yamatuña nachiyuulu?
10 Pawulu wayikonkomweneni akwaKristu awayishewa kusha maana hawenimbu wawu wakushakama mwiwulu chatela ashi maana hayuma yamaseki. (Fwi. 3:17-20) * Ateleleli kwikala neyi añimenu jaKristu. Añimenu hiyadiñijaña munsañu yamatuña mwayitemeshawuku. Ovwahilaña antu ayitemeshaña. (2 Kor. 5:20) AkwaKristu akweti chikuhwelelu chakushakama hamaseki niwena hiyantu akayuulawu kudi Wanta waNzambi, dichi niwena hiyatela kudiñija munsañu jamatuña nachiyuuluku.
DIFUMBENU KULONDA MWIKALI ASHINSHIKA KUDI YEHOVA
11, 12. (a) Nshakaminu yamuchidinyi yinateli kumukalila mukwaKristu kwikala washinshika kuWanta waNzambi? (b) Kukalanyi kwamweniyi mukwaKristu wumu, nawa wakwimanishili ñahi?
11 Mumatuña amavulu, antu ashakamaña hamu. Ekala adinuña kuhitila mukwikala nachihandilu chimu, chisemwa nidimi datiyañawu kuwaha antu wenawa. Mumaluña amuchidawa, akwaKristu atela kufumba yitoñojoka yawu nichinleji chawu kulonda akuleña chiwahi neyi kunamwekani nsañu yamatuña nachiyuulu. Anateli kwila ñahi mwenimu?
12 Talenu chakutalilahu chaMirjeta * wakwiluña dadiña daYugoslavia. Mumbanda yeniwu chakulileñayi waheleli antu akuSerbia. Chelukiliyi nindi Yehova hekala nachaambuku nawa nindi Satana diyi waletaña kukala kudi antu ambuka makowa, wafwilili kuzata nañovu kulonda yabuli kwikala nachaambu chadiñayi nachu. Ilaña chelili antu anyichidi yacheñi atachiki kuzuña mwiluña dawu, kuhelañana kwadiñayi naku kwasañumukili chakwila Mirjeta chamukalilileña kushimwina kudi antu akuSerbia. Muhela yeniwu welukili nindi hateleleli kushakama hohu nakukuhwelela nindi yitoñojoka yatama yamuchidiwu yinateli kudimanina nkawayuku. Wamulembeleli Yehova kulonda yamukwashi bayi neyi yamanishi iku kukala hohuku, ilaña nindi yekali neyena dakuzata mudimu wakushimwina nikwikala payiniya. Wahosheli nindi, “Namoni neyi kusha maana hamudimu wakushimwina wunankwashi chikupu. Neyi inakushimwina, nafwilaña kwimbujola yililu yayiwahi yaYehova nawa yililu yami yatama yamana.”
13. (a) Chumanyi chamuleñeleli Chinsahu wumu kutiya kutama, nawa welilidi? (b) Chumanyi chitunateli kudizila kuyuma yamweniyi Zoila?
13 Shinshikenu chakutalilahu chikwawu chaZoila. Wafuma kuMexico, chayinu mpinji iwu muhela wapompelaña muchipompelu chamuEurope. Wamweni nindi muchipompelu chenichi, amana kwetu amakwawu afuma kumaluña amakwawu akuLatin America ahosheleña chatama kutalisha kwituña kwafumayi, tushidikilu twawu kushilahu nitumina twawu. Indi enu mwadi kwila ñahi? Zoila hatiyili kuwaha nanhoshelu yamuchidiwuku. Ilaña chawahili muloña walombeli kulonda Yehova yamukwashi kufumisha yitoñojoka yatama yenjili mumuchima windi. Twatela kwiteja netu amakwawu hakachi ketu achidi kukabakana nayitoñojoka yamuchidiwu. Bayi tuhoshaña mazu hela kwila yuma yidi yejima yinateli kuleñela antu amakwawu kumwekana neyi abadika akwawu hela yuma yinateli kuleta chaambu hakachi kawamana kwetu, chili antu acheñuku.—Rom. 14:19; 2 Kor. 6:3.
14. Indi akwaKristu anateli kufumba ñahi yitoñojoka nichinleji chawu kutalisha hakubula chaambu?
14 Komana nkulilu yenu hela iluña dimwashakamaña dayileñelaña kumona nenu iluña denu hela ituña denu dalema kubadika dikwawu? Komana muchidi nakutoñojoka yuma yamuchidiwu munyichima yenu? AkwaKristu hiyatela kutoñojokaña nawu ituña dawu dalema kubadika dawakwawuku. Chumanyi chimukwila neyi mwiluka nenu mukweti yitoñojoka yatama kutalisha hadi antu akwituña, chisemwa, idimi hela ikowa dacheñi? Chikuwaha neyi mukutoñojoka chikupu chamonañayi Yehova antu amonaña nawu ituña dawu dalema kubadika dawakwawu nichaambu. Kusandujola iyi nsañu ninsañu yadifwanaku yinateli kuyikwasha nankashi hakudiza kwahalwenu hela kudifukula kwachisaka. Dichi mulombenu Yehova kulonda yayikwashi kwikala namaana akumonaña yuma neyi chayimonañayi yena.—Tañenu Aroma 12:2.
Hakwila twikali ashinshika kudi Yehova, twatela kumwovwahila hela chakwila tunamoni kukala kweneni (Talenu maparagilafu 15, 16)
15, 16. (a) Chumanyi chinateli kwilawu antu amakwawu muloña twambukaku? (b) Indi anvwali anateli kukwasha ñahi anyanawu kulonda atwalekuhu kwikala ashinshika kudi Yehova?
15 Ambuña Yehova ejima afwilaña kumukalakela nachinleji chitooka kulonda ekali ambukaku nawakwawu akanyidimu, akashikola, antuñi nawu, antaña hela antu amakwawu. (1 Pet. 2:19) Ilaña twatela kwikala ambukaku. Hitwatela kuhayamaku neyi kaayi katuhela hamuloña wakwikala ambukaku; Yesu watusoñamishili nindi akatuhela. Akwakudimbulula amavulu hiyeluka chalemeshawu akwaKristu kubula kudiñija munsañu jamatuña nachiyuuluku. Ilaña etu twayilemesha iyi nsañu chikupu.
16 Hakwila twikali ashinshika kudi Yehova, twatela kumwovwahila hela chakwila tunamoni kukala kweneni. (Dan. 3:16-18) Antu ejima achinaña, ilaña atwansi chayikalilaña nankashi kwikala ambukaku hakachi kawakwawu. Neyi anyanenu anakumona kukala kudi neyi kubuzwila mpandela hela kwanakana mafuku amukaayi, bayi mushintajala kuyikwashaku. Zatishenu progiramu yaKudifukula kwaChisaka kulonda mukwashi anyanenu kwiluka yuma yabombelamu kulonda alumbululi yuma yakuhwelelawu chakadi woma. Yikwashenu alumbululi chiwahi nawa nakalemesha. (Rom. 1:16) Hakwili muyikwashi anyanenu, hanjekenu nawantañishi jawu neyi chinatwesheki.
LEMESHENU YILEÑALEÑA YAYEHOVA YEJIMA
17. Yililu yamuchidinyi yitwatela kuleka, nawa muloñadi?
17 Chalala twakeña ituña detu, chisemwa, idimi detu niyakudya yamwituña mutwakulila. Hela chochu, hitwatela kwikala nayililu yakwila nawu “yuma yamwituña detu yayiwahuku.” Yehova waleñeli yuma yayivulu yashiyashana yatutiyishaña kuwaha. (Mas. 104:24; Chim. 4:11) Muloñadi chitwatela kuhoshela netu njila yimu yakwililamu yuma yabadika yikwawu?
18. Indi kwikala nayitoñojoka neyi yaYehova kwaletaña ñahi nkisu?
18 Nzambi wakeñaña nindi antu ejima eluki nsañu yalala chikupu kulonda akaheti wumi wahaya nyaka. (Yow. 3:16; 1 Tim. 2:3, 4) Twatiyililaña yitoñojoka yawakwetu nawa twayitejaña hela chakwila yambukaku nayetu nawa chumichi chahembaña kunuñañana kwetu kwawakwaKristu. Hakwila tuhembi kashinshi ketu kudi Yehova, hitwatela kudiñija mumadombu amukaayuku. Hitwadiñijaña munsañu jamatuña nachiyuuluku. Twamusakililaña Yehova hakutusubula kuyililu yaletaña chaambu, kudinka wanta nikudibecha yenzala mukaayi kaSatana. Dichi tufwilenu kwikala nayililu yakuwunda neyi yamwekeshiliyi ñimbi yamasamu, wahosheli nindi: “Tiyenu, o kuwaha o kutowala antu amwivumu dimu akushakama hamu nakutiyañana!”—Mas. 133:1.