1. Yumanyi yamwekeni mu 66 C.E.? (Talenu mwevulu wakutachikilahu.)

 FWIKIJAKU neyi wudi mukwaKristu wunakushakama muYerusalema mu 66 C.E. Yuma yayivulu yinakumwekana. Chatachi, Ñuvulu wawaRoma Florus natambuli ntalenta 17 muchimbañu chatembeli yajila. Hohenohu, aYudeya hiyakudikaña, hiyakujaha amashidika awaRoma muYerusalema nikukeña kukuulika kuchiyuulu chawaRoma. Ilaña aRoma anazati mukunyakashana. Mutukweji tusatu hohu, amashidika 30,000 hiyakwinza iku anakuyilombola kudi Ñuvulu wawaRoma wamuSyria, Cestius Gallus. Amashidika hiyakunyakala kwiñila kunsa yanyikala yamuYerusalema, nawa aYudeya akwakudikaña hiyakuya nakuswama mutembeli. Kuhiñahu, amashidika awaRoma hiyakutachika kuhumuna mpwembu yatembeli yahanzi. Antu ejima mumusumba atachika nikuzaala. Wukutiya ñahi hakumona yuma yejimiyi yinakumwekana?

2. Indi akwaKristu ateleleli kwiladi mu 66 C.E., nawa chumichi chayipeleleli ñahi?

² Chakadi nikujina wunakwanuka mazu ahosheliyi Yesu asonekeluwu kudi nsoneki waNsañu Yayiwahi Luka nindi:  “Himwakamona Yerusalema anayikuchiki dehi namajita kwi-ndo, henohu kelukenu nenu keña ayibalumuni yikali ihembi.” (Luka 21:20) Hela chochu, wunateli kudihula neyi, ‘Nateli kwovwahila ñahi nshimbi jahaninuwu kushilahu niniku kusoñamisha?’ Yesu wahosheli cheñi nindi: “Henohu adi muYudeya akatemukili kumapidi; adi mukachi kamukala akafumumu; adi mumaha bayi akeñila cheñi muñandaku.” (Luka 21:21) Wunateli kufuma ñahi muYerusalema chakwila amashidika amavulu anayikuchiki? Chuma chakuhayamisha hichikumwekana. Hiwukumona amashidika awaRoma hiyakuya. Neyi chiyashimwineñahu dehi, kulukuka kwawu ‘kwakapinji kantesha hohu.’ (Mat. 24:22) Dichi wukweti kukooleka kwakwovwahila nshimbi jaYesu. Hohenohu hiwukutemukila kumapidi kwishinadi dakaloña Yodana hamu nawakwenu akwaKristu ashinshika amumusumba ninyisumba yikwawu yadikumashana. * Nkumininaku, mu 70 C.E., amashidika amaha awaRoma hiyakuya kuYerusalema nakujilumuna musumba. Ilaña eyi wunapuluki muloña wovwahila nshimbi jaYesu.

3. Yumanyi yadifwanaku nayamwekeni yikumonawu akwaKristu katataka, nawa chumanyi chitukudiza muchinu chibaaba?

³ Katataka ichi wejima wetu keña tumoni kukala kudi neyi iku. Yesu hasoñamishili akwaKristu kutalisha hakujilumuka kwaYerusalema hohuku, ilaña wazatishili yuma yamwekeni muyaaka nkulakaji yakusambila hakushimuna chuma chikamwekana neyi “lukadi lwasweja” lunatachiki chakukasumwisha. (Mat. 24:3, 21, 29) Kafwampi nsañu yayiwahi yakwila nawu “izaza deneni” dawantu dikapuluka iku kukala kukamwekana mukaayi kejima. (Tañenu Chimwekeshu 7:9, 13, 14.) Indi Bayibolu yatulejañadi haniyi yuma yikamwekana? Twatela kufwila kwiluka ñakwilu, muloña neyi twiluka chumichi twakapuluka. Ichi dinu tushinshikenu chikupu iyi yuma yikamwekena kumbidi chiyakatukuma.

4. Indi lukadi lweneni lukatachika ñahi, nawa yumiyi yikamwekana ñahi?

⁴ Indi lukadi lweneni lukatachika ñahi? Mukanda waChimwekeshu wakula kuhitila mukulumbulula chakajilumunawu “Babiloni Muneni.” (Chim. 17:5-7) Kwitiya kwakutwamba kwejima chakwesekejawu nachivumbi chatelela. Akulumpi jakwitiya elaña wuvumbi nawanlomboli amukanu kaayi katama. Chatela akwasheña Yesu niWanta windi nakashinshi, akwashaña anyuuli awantu nawa afumpaña nshimbi jaNzambi kulonda adiñiji munsañu yajipolitiki. Ambukaku chikupu nawawayishewa aNzambi afwana ajiki nawa akadi majilu. (2 Kor. 11:2; Yak. 1:27; Chim. 14:4) Hinyi wakajilumuna iku kuloñesha kudi neyi chivumbi? Yehova Nzambi wakasha ‘yitoñojoka yindi’ munyichima ‘yanseñu ikumi’ ‘jakanyama kachinana.’ Iji nseñu jemenañaku yiyuulu yejima yamakonu yamapolitiki yikweti ñovu yakwashaña United Nations, chipompelu chemenañaku “kanyama kachinana.”—Tañenu Chimwekeshu 17:3, 16-18.

5, 6. Muloñadi chitukuhoshela netu kujilumuka kwaBabiloni Muneni hikwatalisha kukufwa kwawantu amuyipompelu ejimaku?

⁵ Komana tunateli kuhosha netu chakajilumunawu yipompelu yaBabiloni Muneni, akajilumuna niantu ejima ayileña muniyi yipompelu? Inehi. Kaprofwetu Zekariya amoneneni kusoneka nsañu yakundama kuyina mpinji. Hakuhosha hadi muntu wadiña mukwitiya kwakutwamba, Bayibolu yahosha nawu: “Yena wakela nindi, Ami hinikaprofwetuku, nidi mukwakudima kwami; ami kwami ankwata dehi wuduñu kufuma kuwansi wami.  Muntu wumu wakamwihula nindi, Indi iyi yitu yidi mukachi kamakaseyi yanka? Yena wakaakula nindi, Yoyu yantapiluwu mwitala dawamabwambu jami.” (Zek. 13:4-6) Chakadi nikujina, akulumpi jayipompelu amakwawu akashiya yifulu yawu nakukaana nawu hiyadiña mukwitiya kukutwamba.

⁶ Yumanyi yikamwekana kudi antu jaNzambi hayina mpinji? Yesu walumbulwili nindi: ‘Neyi akabula kukehesha wena mafuku owu, hikwakekala antu akahandaku. Ilaña mafuku owu akayikeheshela hanyijimba yawatondewa.’ (Mat. 24:22) Neyi chitwamona, muchaaka cha 66 C.E. mafuku alukadi ‘ayikehesheli.’ Chumichi chayikwashili “atondewa,” akwaKristu awayishewa kutemuka mumusumba ninyikala yikwawu yadikuminuwu nayu. Munjila yoyimu, mafuku alukadi lweneni akutachikilahu ‘akayikehesha’ hamuloña ‘wawatondewa.’ Anyuuli ajipolitiki ‘yanseñu ikumi’ akweti ñovu hiyakayiteja kujilumuna antu jaNzambuku. Ilaña, kwakekala kuwunda kwantesha.

7, 8. Kukoolekanyi kutwakekala naku hanyima yakujilumuna kwitiya kwakutwamba, nawa antu jaNzambi ashinshika akekala ambukaku ñahi hayina mpinji?

⁷ Yumanyi yakamwekana neyi yipompelu yakutwamba anayijilumuni dehi? Yakekala mpinji yakumwekesha yuma yayeni yekala mumuchima wetu. Antu amavulu akakeña kubatama muyipompelu yawantu esekejawu ‘namalola akumapidi.’ (Chim. 6:15-17) Hela chochu, antu jaNzambi akatemukila kwiluña kwakayiloñeshelayi Yehova. Muyaaka nkulakaji yakusambila, mpinji yafuntiluwu aRoma hiyadiña mpinji yakushimwina aYudeya kulonda ekali akwaKristuku. Yadiña mpinji yakwila antu adiña dehi akwaKristu ovwahili nshimbi yayinkeluwu. Munjila yoyimu, hitunateli kukuhwelela netu mpinji yakumbidi yakakañeshawu lukadi lwasweja yakekala mpinji yaketiyawu antu amavuluku. Ilaña yakekala mpinji yekala akwakwitiya alala ejima akamwekeshi nawu amukeña Yehova nikukwasha amana kwaKristu.—Mat. 25:34-40.

⁸ Hela chakwila hituneluki jiika yuma yejima yikamwekana hayina mpinji yakwesekaku, tunateli kukuhwelela netu twatela kudihana muyuma yikwawu. Muyaaka nkulakaji yakusambila, akwaKristu ashili yikumba yawu nakutatakena hakwila ahandi. (Maku 13:15-18) Hakwila tutwalekuhu kwikala ashinshika, komana twaketeja kujimbesha maheta? Komana twakadiloñesha kwila yuma yejima yikakeñeka kulonda twakamwekeshi netu twamwovwahila Yehova? Toñojokenu chumichi. Haniyi mpinji, yetu hohu twakalondelaña chakutalilahu chakaprofwetu wakushankulu Danyeli kuhitila mukutwalekahu kudifukula kudi Nzambi yetu hela chakwila yuma yikakala.—Dan. 6:10, 11.

9, 10. (a) Nsañwinyi yikashimunawu antu jaNzambi hayina mpinji? (b) Chumanyi chakelawu ayilumbu jawantu jaNzambi?

⁹ Iyi hiyakela mpinji yakushimwina ‘nsañu yayiwahi yaWantaku.’ Mpinji yakushimwina yikekala yahita dehi. Mpinji ‘yakukumisha’ yakashika. (Mat. 24:14) Chakadi nikujina, antu jaNzambi akashimwina nsañu yawunsompeshi chakadi woma. Nsañu yeniyi mukabombela nikubidika kwakwila nawu kaayi kaSatana katama keña kamani. Bayibolu yesekeja iyi nsañu nanvula yamalola nawu: ‘Ninvula yamalola amaneni, ilola dimu desekana nantalenta yimu, hiyikufuma mwiwulu hiyikunoka hadi antu. Antu hiyakumutuka Nzambi nachipupu chanvula yamalola, muloña chipupu ochu chabadika nankashi kutoha.’—Chim. 16:21.

¹⁰ Nsañu iyi hiyakamwekana chakubula kuyitiya kudi ayilumbu jetuku. Kaprofwetu  Ezekeli amwoneneni kulumbulula kutalisha hachuma chikelayi Gogi waMagogi, nyunza yayivulu, nindi: ‘Mwanta Yehova nindi, Dena ifuku odu mumuchima weyi mwakenza yuma, wakatoñojoka chuma chatama. Wakela neyi, Nukukanduka mwituña dikweti nyikala yakadi mpwembu. Nukuya kudi antu ashakama nzo-o, ashakama chakadi kwakama, wejima wawu ashakama chakadi mpwembu, hiyakweti hela nyikomenu hela yenzeluku. Wakayipupi, wakayikwati, wakatalishi chikasa cheyi kuyinkalampata yatuñawu dehi antu, wukabishi antu apompeshawu dehi, afumishawu dehi munyunza, aheta dehi niyimuna niyuma, ashakama hakachi keseki.’ (Ezek. 38:10-12) Munjila yikwawu, antu jaNzambi akekala ambukaku “hakachi keseki.” Chumichi chiyikalila nyunza. Eñañi, akafwila chikupu kulukuka awayishewa aYehova nialundanawu.

11. (a) Yumanyi yitwatela kwanuka kwesekeja nayuma yikamwekana mundonda hampinji yalukadi lwasweja? (b) Indi antu akela ñahi kutalisha hayinjikijilu yikamwekana mwiwulu?

¹¹ Chitukushinshika hachuma chikalondelahu, twatela kwanuka netu Izu daNzambi hidashimuna jiika mpinji yikamwekana yuma mundondaku. Chinamwekani neyi yuma yikwawu yikamwekena hampinji yoyimu. Yesu wahosheli muwuprofwetu windi kutalisha hakukuma kwakaayi kamakonu nindi: ‘Mwitañwa mwakekala yinjikijilu, nimukakweji, nimututumbwa; nyunza yakakaba nankashi hamaseki, hiyakuhayama lushindu lwakaluñalwiji namankanda. Antu akahwidijela nawoma, nakutalila yuma yidi nakwinza hamatuña, muloña ñovu jamawulu jakakanka. Henohu akamona Mwana kamuntu hakwinza mwivu, nañovu yayeni, nalubanji lwakulema kwasweja.’ (Luka 21:25-27; tañenu Maku 13:24-26.) Komana kushikijewa kwaniwu wuprofwetu kukabombelamu niyinjikijilu yakutiyisha woma niyuma yikamwekana mwiwulu? Twatela kuhembelela kulonda twakamoni. Hichikweti muloña nachikekala yumaku, iyi yinjikijilu yikaleta kukala nikutiyisha woma munyichima yawayilumbu jaNzambi.

12, 13. (a) Chumanyi chikamwekana neyi Yesu nenzi dehi “mulubanji lwakulema kwasweja”? (b) Indi ambuña Nzambi akeladi hayina mpinji?

¹² Chumanyi chikamwekana neyi Yesu nenzi dehi “mulubanji lwakulema kwasweja”? Iyi yakekala mpinji yakwinka wuloku antu ashinshika nikubabesha antu abula kushinshika. (Mat. 24:46, 47, 50, 51; 25:19, 28-30) Kwesekeja naMatewu, Yesu wamanishili kuhosha hachinjikijilu chikweti yuma yashiyashana nachishimu chawanyikoku nawampembi, nindi: ‘Ilaña chakenzayi Mwana kamuntu nalubanji lwakulema kwindi, hamu nawañelu jindi ejima, wakashakama hetanda dawanta dakulema kwindi. Akapompesha nyunza yejima kumesu indi; wakaambola munza namunza, neyi chaambulañayi kabiña anyikoku nawampembi. Anyikoku wakayisha kuchikasa chindi chachidiilu, ampembi kuchimunswa.’ (Mat. 25:31-33) Indi anyikoku niampembi akayiketwila ñahi nyiloña? Ichi chishimu chamana namazu akwila nawu: “Wenawa [ampembi] akaya kwawu mukubabesha kwahaya nyaka; aloña akaya muwumi wahaya nyaka.”—Mat. 25:46.

¹³ Indi ampembi akeladi chakelawu akeluki nawu ‘akayibabesha haya nyaka’? “Akatumpa.” (Mat. 24:30) Hanu dinu amana kwaKristu nialundanawu ashinshika akeladi hayina mpinji? Hamuloña wakumukuhwelela Yehova Nzambi niMwanindi, Yesu Kristu, akwovwahila nshimbi yaYesu yakwila nawu: “Yumiyi chiyakatachika kumwekana, katalenu kwiwulu, kabandulenu nyitu yenu, muloña kukuula kwenu hikukushika kwakwihi.” (Luka 21:28) Eñañi, twakekala nayitoñojoka yayiwahi nakukuhwelela netu akatukuula.

14, 15. Mudimwinyi wakupompesha wukatachika hanyima yakulukuka kwaGogi waMagogi, nawa iwu mudimu wakupompesha wabombelamu mwodi?

¹⁴ Chumanyi chikamwekana hanyima yakwila Gogi waMagogi natachiki dehi kulukuka antu Nzambi? Matewu niMaku asonekeli nsañu yoyimu nawu: ‘[Mwana kamuntu] wakatemesha añelu jindi, wakapompesha indi atondewa kumpepela jiwana, kufumisha kunsa yamaseki, ndo-o nikunsa yewulu.’ (Maku 13:27; Mat. 24:31) Iwu mudimu wakupompesha watalisha wanyi kukupompesha kwatachi kwawawayishewa; nawa watalisha wanyi kukusha chilamiku chamakumishilu chawawayishewa ashalahu. (Mat. 13:37, 38) Akayisha chilamiku henohu lukadi lwasweja kanda lutachiki. (Chim. 7:1-4) Dichi, iwu mudimu wakupompesha washimwiniyi Yesu himudimwinyi? Himpinji yakatambwilawu ashalahu a 144,000 wuloku wawu wamwiwulu. (1 Tesa. 4:15-17; Chim. 14:1) Chumichi chikamwekana hampinji yikwawu hanyima yakwila Gogi waMagogi nalukuki dehi. (Ezek. 38:11) Kufumahu, awa mazu aYesu akwila nawu, ‘Henohu aloña akatoñeka muWanta waTata yawu neyi itañwa,’ akashikijewa.—Mat. 13:43. *

¹⁵ Komana chumichi chaya mukwila nawu awayishewa “akayisenda nakuya muluzwizu”? Antu amavulu amuKristendomu akuhwelela iyi ntañishilu, yakwila nawu akwaKristu akayisenda munyijimba yawuntu kufuma hamaseki. Kuhiñahu, akuhwelela nawu akamumona Yesu chakenzayi nakuyuula hamaseki. Hela chochu, Bayibolu yashimuna hatooka nawu “chinjikijilu chaMwana kamuntu” chikamwekana mwiwulu nawa nawu Yesu wakenza  “hamavu amwiwulu.” (Mat. 24:30) Mazu ejima awa amwekeshaña yuma yakamonewaña. Kubombelahu, ‘mashi nimujimba hiwukutwesha kuswana Wanta waNzambuku.’ Dichi antu akaya mwiwulu atela kusambila ‘kuyibalumuna hohenohu, mukulabula kwadisu, hampuña yakukuminina.’ * (Tañenu 1 Akorinda 15:50-53.) Hela chakwila hitwazatishaña mazu akwila nawu ‘kuyisenda nakuya muluzwizuku’ muloña akundama kuntañishilu yakutwamba, awayishewa ashinshika akayipompesha hamu neyi mukulabula kwadisu.

16, 17. Yumanyi yikamwekana henohu chawija chaMwana kaMukoku kanda chitachiki mwiwulu?

¹⁶ Neyi a 144,000 ejima anayi dehi mwiwulu, akatachika kuloñesha kwamakumishilu kwachawija chaMwana kaMukoku. (Chim. 19:9) Ilaña kudi yuma yikwawu yakamwekana henohu ichi chawija kanda. Anukenu nenu, henohu ashalahu a 144,000 kanda ayi mwiwulu, Gogi wakalukuka antu jaNzambi. (Ezek. 38:16) Chumanyi chikamwekana? Antu jaNzambi hamaseki akamwekana neyi kwosi wakuyamwina. Akwovwahila nshimbi yahaninuwu mumafuku aMwanta Yehoshafwati yakwila nawu: ‘Hichikweti enu kulwa kunjita iyuku. Mwakakumina dakwimana, mwakaduñumika kwenu nzo-o, mwakamona wamwinu waYehova wudi nanenu, enu aYuda nawakwaYerusalema. Bayi mutiya woma hela kwakamaku.’ (2 Kushi. 20:17.) Hela chochu, mwiwulu mwakamwekana chuma chacheñi. Kutalisha hampinji yakela awayishewa ejima anayi dehi mwiwulu, mukanda waChimwekeshu 17:14 watulejaña nsañu yakundama kudi ayilumbu jawantu jaNzambi nawu: ‘Wenawa akaasa njita naMwana kaMukoku; Mwana kaMukoku wakayimika mushindu, muloña diyi Mukulumpi wawakulumpi, diyi Mwanta wawanyanta; ninawa adiyi nawu atambikewa, atondewa, ashinshika.’ Yesu wakazatila hamu nawa 144,000 akayuulayi nawu mwiwulu hakupulwisha antu jaNzambi hamaseki.

¹⁷ Njita yaAmagedoni yikaleñela kulemesha ijina daYehova dajila. (Chim. 16:16) Haniyi mpinji, antu ejima adi neyi ampembi “akaya kwawu mukubabesha kwahaya nyaka.” Heseki akafumishahu antu atama ejima nawa izaza deneni dikapuluka chibalu chakukumishaku chalukadi lwasweja. Chuma chakuzañalesha chashimunawu kumakumishilu amukanda waChimwekeshu chikamwekana, chawija chaMwana kaMukoku. (Chim. 21:1-4) * Antu ejima akekala amomi hamaseki akekala nawuselewa waNzambi nawa akamona nawu Nzambi wayikeña chikupu. Ichi chawija chikawaha chikupu. Komana hitunakutalila dina ifuku kulonda twakadiluñishuku?—Tañenu 2 Petulu 3:13.

18. Chineli tunakutalila yuma yayiwahi yashimwineñawu dehi yidi kumbidi, chumanyi chitwatela kufwila kwila?

¹⁸ Chineli tunakutalila yuma yayiwahi yidi kumbidi, chumanyi chitwatela kwila hamuntu hamuntu? Kapostolu Petulu amoneneni kusoneka nindi: “Ochu chineli yumiyi yejima yakasuñunuka chochichi, shakamenu nakujila nakwakama Nzambi, nakutalila nakukeña nankashi chakenza ifuku daNzambi . . . Dichi enu akwetu twakeña chimwatalilaña yumiyi, dikwatishenu kulonda akayiwani munashakami chachiwahi [nzo-o], chakadi ihuji, nakubula hakuyinkela muloña kumesu indi.” (2 Pet. 3:11, 12, 14) Dichi twatela kufwila kutwalekahu kwikala atooka kuspiritu nikukwasha Mwanta waKuwunda.