1, 2. Munyikanda Yajila yaChiheberu, izu dakwila nawu ‘itanda dakunyendu’ datalisha mudihi?

 YEHOVA NZAMBI wahosheli nindi: “Iwulu hiitanda dami dawanta, iseki hiitanda dakunyendu yami.” (Isa. 66:1) Kutalisha kwitanda ‘dakunyendu’ yindi wahosheli cheñi nindi: “Nakalemesha kuwudatilu wanyendu yami.” (Isa. 60:13) Welaña ñahi mwenimu? Nawa chumichi chalumbulukadi kudi etu chineli twashakamaña ‘hetanda dakunyendu’ yaNzambi?

² Kubombela hakutena iseki, izu dakwila nawu ‘itanda dakunyendu’ adizatisha cheñi muchifwikija Munyikanda Yajila yaChiheberu hakulumbulula tembeli yakushankulu yazatishileñawu aIsarela. (1 Kushi. 28:2; Mas. 132:7) Tembeli ayizatishileña hamaseki neyi iluña dakudifukwila kudifuukula kwalala. Diwu muloña waletesheli yikali yasweja kuwaha kumesu aYehova nawa iyi tembeli yalemesheleña iluña danyendu yaYehova.

3. Indi tembeli yaNzambi yeneni yakuspiritu hichumanyi, nawa yekaliluku mpinjinyi?

³ Hamaseki makonu hihekala tembeli yayeni yakudifukwila kudifukula kwalalaku. Hela chochu, kwekala tembeli yakuspiritu yamulemeshaña Yehova kubadika matala ejima. Iyi ntanjikilu yaleteshaña chikali chaswayi  kutiyañana naNzambi kuhitila muwupristu nimulambu waYesu Kristu. Yekaliliku mu 29 C.E. hamupapatishiluwu Yesu nikumuwayisha neyi Kapristu Muneni watembeli yaYehova yeneni yakuspiritu.—Heb. 9:11, 12.

4, 5. (a) Indi mukanda waMasamu 99 walumbulula ñahi mpwila yawakwakudifukula alala aYehova? (b) Lwihwinyi lutwatela kudihula?

⁴ Hakuhameka ntanjikilu yatembeli yakuspiritu, twamuhamekaña Yehova kuhitila mukutiyakesha ijina dindi nikumuhameka haluwi lwindi hakutwinka chawana chefutu. Twatiyaña kuwaha hakwiluka netu akwaKristu alala akubadika ha 8 miliyoni makonu anakuzata nañovu kulonda amulemesheña Yehova. Kwambukaku nawakwakwitiya amakwawu adidimbaña nawu akamuhamekaña Nzambi neyi anayi dehi mwiwulu, aYinsahu jaYehova ejima eluka nawu atela kumuhameka Nzambi hanu hamaseki chayinu mpinji.

⁵ Dichi twalondelaña chakutalilahu chawambuña Yehova ashinshika ashimunawu haMasamu 99:1-3, 5. (Tañenu.) Neyi chiyashimunawu munidi isamu, Mosi, Aroni niSamweli akwashili chikupu ntanjikilu yakudifukula kwalala mumafuku awu. (Mas. 99:6, 7) Makonu, henohu kanda ayi mwiwulu nakuzata neyi atupristu naYesu, amana kwindi ashalahu awayishewa azataña nakashinshi mutembeli yakuspiritu yahamaseki. “Anyikoku acheñi” akushika kumamiliyoni ayikwashaña nakashinshi. (Yow. 10:16) Hela chakwila akweti kuchiñeja kwashiyashana, mazanvu ejima ayedi anuñañana hakudifukula kudi Yehova hanu hetanda dakunyendu yaNzambi. Dichi, twatela kudihula hamuntu hamuntu netu, ‘Komana nakwashaña chikupu ntanjikilu yaYehova yakudifukula kwalala?’

6, 7. Kukalanyi kwamwekeni mukachi kawakwaKristu akusambila, nawa yumanyi yamwekeni chimwahitili makombakaji ayaaka?

⁶ Chimwahitili kwakwihi nayaaka nkulakaji hanyima yakwila chipompelu chawakwaKristu anachituñi dehi, akwakusekesha atachikili kumwekana neyi chiyashimwineñahu dehi. (Yil. 20:28-30; 2 Tesa. 2:3, 4) Chimwahitili yaaka, chakalili nankashi kwiluka antu alala amukalakeleleña Nzambi hatembeli yindi yakuspiritu. Mwahitili yaaka yayivulu chikupu hakwila Yehova yazatishi Yesu hakumwekesha antu aweni amukalakelaña Nzambi.

⁷ Chashikili chaaka cha 1919, antu atondeluwu kudi Yehova nawa azatilileña hatembeli yindi yakuspiritu ayilukili chiwahi. Ayitookesheli kuspiritu kulonda Nzambi yeteji nyidimu yawu yamukalakeleleñawu. (Isa. 4:2, 3; Mal. 3:1-4) Dikwila nawu chimwahitili makombakaji ayaaka, yuma yamweniyi kapostolu Pawulu muchimwenu yatachikili kushikijewa chovu-chovu.

8, 9. Lumbululenu yuma yisatu yakundama ‘kuparadisa’ yamweniyi Pawulu muchimwenu.

⁸ Chimwenu chaPawulu achilumbulula hamukanda wa 2 Akorinda 12:1-4. (Tañenu.) Yuma yamweniyi Pawulu muchimwenu chabadika ayitenaña nawu chimwekeshu. Mwabombela yuma yikamwekana kumbidi, bayi neyi yuma yadiñaku mumafuku induku. Pawulu ‘chamuhukwiluwu nakumutwala kwiwulu damuchisatu,’ wamweni “paradisa” yamuchidinyi? Paradisa yateneniyi Pawulu yadiña yakumujimba, yakuspiritu niyamwiwulu yikashikijewa nawa ejima akamwekana kumbidi. Yinateli kwikala yakumujimba, Paradisa yahamaseki yidi kwakwihi nakwinza. (Luka 23:43) Yinateli kutalisha cheñi kuparadisa yakuspiritu yakadiluñishawu chikupu antu  mwituña dadiha. Kubombelahu, yinateli kutalisha kunkisu jakekala mwiwulu “muparadisa yaNzambi.”—Chim. 2:7.

⁹ Muloñadi Pawulu chahosheleliyi nindi ‘watiyili mazu akukañanya kuhoshewa, ajila kuyitena kudi muntu’? Hiyadiña mpinji yakwila yatachiki kulumbulula yuma yamweni muchimwenu yabadika kulemaku. Ilaña makonu chachiwahi kuhosha hankisu yekala hakachi kawantu jaNzambi.

10. Muloñadi mazu akwila nawu “paradisa yakuspiritu” “nitembeli yakuspiritu” chiyabulila kudifwana?

¹⁰ Nhoshelu yakwila nawu “paradisa yakuspiritu” twayizatishaña mukuloñesha kwetu. Yalumbululaña kuwunda kwetu kwadimena kutwadiluñishaña naNzambi ninawamana kwetu. Kafwampi hitwatela kukunkulula netu mazu akwila nawu “paradisa yakuspiritu” “nitembeli yakuspiritu” wowamuku. Tembeli yakuspiritu hintanjikilu yaNzambi yakudifukula kwalala. Paradisa yakuspiritu yamwekeshaña chikupu antu akwetu wuselewa waNzambi nawa amukalakelaña makonu hatembeli yindi yakuspiritu.—Mal. 3:18.

11. Kukoolekanyi kutukweti makonu kutalisha kuparadisa yakuspiritu?

¹¹ Tukweti muzañalu hakwiluka netu kufuma tuhu mu 1919, Yehova weteja antu abula kuwanina kuzata nindi nikukolesha antu amavulu hamaseki kwikala naparadisa yakuspiritu. Komana ninenu mwazatañaku iwu mudimu walema? Komana munakukeña kutwalekahu kuzata naYehova hakulemesha ‘kuwudatilu wanyendu yindi’?

12. Yumanyi yitwakuhwelela wonsu wetu kutalisha hakushikijewa kwamukanda waIsaya 60:17? (Talenu mwevulu wakutachikilahu.)

¹² Mudimu walema wakuhimpa yuma kutalisha hakuloñesha kwaYehova kwahamaseki akwishimwineñahu dehi hamukanda waIsaya 60:17. (Tañenu.) Atwansi hela amaha muchalala atañahu dehi wunsahu wahosha hakuhimpa yuma hela atiyahu dehi nsañu yamuchidiwu kudi antu amakwawu. Ilaña amana kwetu niahela amonahu dehi aweni yuma chiyahimpikili akweti kukooleka. Dichi eluka chikupu nawu Yehova nakulombola kuloñesha Kwindi kuhitila mudi Mwanta aswanishayi. Eluka nawu akuhwelela yuma yalala nawa wejima wetu twakuhwelela chumichi. Neyi mutiya chasakililañawu chakufuma hamuchima chikukolesha chikuhwelelu chenu nawa mukumukuhwelela Yehova.

13. Kwesekeja namukanda waMasamu 48:12-14, yumanyi yitwatela kwila?

¹³ Hela chakwila tunashimbuli chikupu muchalala, twatela kulejaku antu amakwawu kutalisha hakuloñesha kwaYehova. Hakwila twikali naparadisa yakuspiritu mukanu kaayi katama, katoka nawa mwekala antu abula kukeñañana, hichihayamisha chamakonu. Twatela kuyileja “anyana amba kavwalika” yuma yayiwahi yamukuloñesha kwaYehova hela “Ziyona,” ninsañu yalala yahosha haparadisa yakuspiritu.—Tañenu Masamu 48:12-14.

14, 15. Kuhimpikanyi kwamwekeni mukuloñesha kwaNzambi muma 1970, nawa mwafuma yumanyi yayiwahi?

¹⁴ Hayaaka yayivulu yinahituhu, amana kwetu achikulumpi muchipompelu anamoni yuma yinahimpuwu mukuloñesha yinaleteshi kuloñesha kwaYehova kwahamaseki kuwahilaku. Anukaña mpinji yadiña yipompelu nankoñi wamuchipompelu chatela kwikali izanvu dawaeluda, mpinji yadiña matuña nankoñi wamutayi chatela kwikali Komiti yaMutayi, nimpinji yahanineñawu nshimbi kudi presidenti waWatch Tower Society chatela kwikali Izanvu Dalombolaña dawaYinsahu jaYehova. Hela  chakwila awa amana kwetu ejima adihana ayikwashileña kudi ankwashi ashinshika, muntu wumu hohu diyi wadiña nakufuukula mwakwilila muyipompelu, hatusanji twamutayi nihakasanji keneni kamukaayi. Muma 1970, ahimpili kulonda mazanvu awa aeluda alomboleña chatela muntu wumu alomboleña.

¹⁵ Komana mwafuma yuma yayiwahi muniku kuhimpika? Eñañi. Muloñadi? Muloña iku kuhimpika kwashindameneni hayuma yayivulu yelukawu yashimunawu muNyikanda Yajila. Chatela muntu wumu hohu yafuukuleña yuma yejima, kuloñesha kwaNzambi kwahetelaña muyililu yayiwahi yawaaeluda ejima ‘yamukunkulu mudi antu’ atwinkayi Yehova.—Efwes. 4:8; Yish. 24:6.

16, 17. Kuhimpikanyi kwakatataka kunayizañaleshi, nawu muloñadi?

¹⁶ Toñojokenu hakuhimpika kwakatataka, chidi neyi mmwekenu yanyikanda, yuma yasonekañawu ninjila yakuhaninamu nyikanda yetu. Twatiya kuwaha kuhana nyikanda yikweti nsañu yakwashaña antu nawa yaletaña ikoku mumudimu wakushimwinaku. Nawa neyi tuzatisha yuma yakutuñatuña yakatataka hakutandisha chalala, chidi neyi webusayiti ya jw.org, twamwekeshaña mpwila yaYehova yakulombola antu amavulu akeñaña kuyilombola kwejima kudiwu.

¹⁷ Twasakililaña hakuhimpa ntanjikilu yetu yakupompa hakwila twikaleña nampinji yaKudifukula kwaChisaka hela kudiza nkawetu. Twasakililaña cheñi hakuyilaku hambidi mumaprogiramu ekalaña hakupompa kwanyanya nikwamaneni. Twavula kuhosha netu, awahilañaku chaaka nichaaka. Twazañalalaña chikupu hayuma yayivulu yatudizishañawu mumashikola amukuloñesha kwaNzambi. Yehova diyi walombolaña yuma yejima yahimpañawu. Wawahishaña chovu-chovu lubanji lwakuloñesha  kwindi niparadisa yakuspiritu yitunakudiluñisha makonu.

18, 19. Tunateli kuwahisha ñahi lubanji lwaparadisa yakuspiritu?

¹⁸ Tukweti kukooleka muloña Yehova watwiteja kuwahisha paradisa yetu yakuspiritu. Twelaña mwenimu kuhitila mukudikita chikupu mumudimu washimwina nsañu yayiwahi yaWanta nikwilisha atumbanji amavulu. Neyi tumukwasha muntu nawa yadihana nakwikala mukwaKristu, dikwila nawu tunakutohesha paradisa yakuspiritu.—Isa. 26:15; 54:2.

¹⁹ Tunateli cheñi kuwahisha lubanji lwaparadisa yetu yakuspiritu kuhitila mukuwahisha yililu yetu yawakwaKristu. Chitwela mwenimu, tukwilisha iyi paradisa kwikala yayiwahi chikupu kudi antu. Kakavulu antu enzaña mukuloñesha kwaYehova nikukundama kudi Nzambi niKristu muloña twekala awunda nawa tukweti yililu yayiwahi, bayi neyi enzaña muloña tweluka nsañu yamuBayiboluku.

20. Kwesekeja namukanda waYishimu 14:35, yumanyi yitwatela kufwila kwila?

²⁰ Yehova naYesu atiyaña kuwaha makonu neyi amona paradisa yetu yakuspiritu yalubanji. Muzañalu wutukweti chayinu mpinji hakuwahisha lubanji lwaparadisa yakuspiritu wemenañaku muzañalu wutukatiya kumbidi hakuzata nakwilisha iseki kwikala paradisa. Twatela kutoñojokaña hamukanda waYishimu 14:35, wahosha nawu: “Wuselewa wakudi mwanta awumonaña kudi kambuñindi wakoñaña yamaana.” Twatela kutwalekahu kwikala namaana chitukuzataña nañovu hakuwahisha lubanji lwaparadisa yakuspiritu.