1. Tunakushakama mumufuku amuchidinyi makonu?

 TUNAKUSHAKAMA mumufuku akala chikupu. Bayibolu yatenaña mafuku atachikili mu 1914 nawu “mafuku akukuminina.” Muniyi “nyaka yakala” munakumwekana yuma yasweja kutama kubadika yamweneñawu antu henohu ichi chaaka kanda chishiki. (2 Tim. 3:1-5) Kubombelahu, yuma mukaayi yikatwalekahu kutaminaku muloña wuprofwetu wamuBayibolu washimwineñahu dehi nawu “antu atama niakwakutwamba [akaya] nakusweja.”—2 Tim. 3:13.

2. Yililwinyi yavula kumwekeshawu muyisela yamukaayi? (Talenu mwevulu wakutachikilahu.)

² Antu amavulu amonaña hela kwila yuma yashimunawu muBayibolu nawu himadombu, wuvumbi, kupanda hela yililu yikwawu yatama nawu hiyisela. Chakutalilahu, Intaneti, maprogiramu ahaTV, mafwilimu, nyikanda niyibaaba yamumagazini yavula kumwekesha madombu niwuvumbi neyi hiyuma yayiwahi. Yililu yamweneñawu nawu yatama ichi ayiteja munshimbi mumatuña amakwawu. Ilaña Nzambi hetejaña yililu yamuchidiwuku.—Tañenu Aroma 1:28-32.

3. Indi antu alondelaña nshimbi jaBayibolu ayimonaña ñahi?

 ³ Muyaaka nkulakaji yakusambila atumbanji twaYesu hiyadiñijileña muyisela yatamaku. Hamuloña wakwikala nayililu yayiwahi nikubula kudiñija muniyi yisela, adiña nakuyifukejela nikuyikabisha kudi antu amakwawu. Kapostolu Petulu wasonekeli nindi, “Dichi wena anahayami chimwabulaña [enu akwaKristu] kuya nawu lufuchi mukubajama kwasweja; enda ayitena chatama.” (1 Pet. 4:4) Makonu, antu alondelaña nshimbi jaNzambi ayimonaña nawu ambukaku chikupu nakaayi. Kubombelahu, ‘antu ejima akeña nawu ashakami mudi Kristu Yesu nikwakama Nzambi, akayikabisha.’—2 Tim. 3:12.

4. Indi Bayibolu yatufumbaña nawudi kutalisha kumpata yamunu mwishina?

⁴ Bayibolu yafumbaña antu akeñaña kwila nkeñelu yaNzambi nawu bayi akeña mpata yamunu mwishina niyililu yamunu mwishinaku. (Tañenu 1 Yowanu 2:15, 16.) Akwakwitiya, akapolitiki niakwakuselujola amunu mukaayi, kushilahu ninsañu yawu yahayikunzulemba ayiluwañeshaña kudi “nzambi yampata yamakonu,” Satana Diyabolu. (2 Kor. 4:4; 1 Yow. 5:19) Chineli twekala akwaKristu twatela kwiluka antu itwadikundaña nawu. Izu daNzambi donenawu dashimuna iyi nsañu yalala yalema nawu: “Bayi ayidimbaku; kudikunda nawantu atama kwatamishaña maana amawahi.”—1 Kor. 15:33.

5, 6. Antu amuchidinyi itwatela kubula kudikunda nawu, nawa muloñadi?

⁵ Hakwila tubuli kutamisha yililu yetu yayiwahi, hitwatela kudikunda nawantu elaña yuma yatamaku. Ichi hichakundama hohu kukudikunda nawantu elaña yuma yatama abula kwitiyaku, ilaña ninawantu atwambaña nawu adifukulaña kudi Yehova afumpaña nshimbi jindi mumushikila. Neyi antu aditenaña nawu hiyakwaKristu akoña nshidi yahamesu bwi-i nawa abula kubalumuka mumuchima, hitwatela kutwalekahu kudikunda nawuku.—Rom. 16:17, 18.

⁶ Neyi tudikundaña nawantu abulaña kwovwahila nshimbi jaNzambi, tunateli kwikala nachaaku chakwila yuma yelañawu hakwila tutiyañaneña nawu. Chakutalilahu, neyi tudikundaña chikupu nawantu elaña wuvumbi, tunateli kutachika kwila wuvumbi. Chumichi chayimwekeneni akwaKristu amakwawu adihana, nawa amakwawu ayihañili muchipompelu hamuloña wakubula kubalumuka mumuchima. (1 Kor. 5:11-13) Neyi abula kubalumuka munyichima, anateli kwikala neyi antu ashimwiniyi Petulu.—Tañenu 2 Petulu 2:20-22.

7. Antu amuchidinyi itwatela kukwata nawu amabwambu chikupu?

⁷ Hela chakwila twakeñaña kwikala akasunuka nikudi antu abulaña kulondela nshimbi jaNzambi, hitwatela kukwata nawu wubwambuku. Dichi, chatama neyi Chinsahu chaYehova mujiki yatachika kudiluka namuntu wakusumbula hela kusumbuka nindi wabula kudihana nikumukuhwelela Nzambi nawa wabulaña kulemesha nshimbi Jindi. Kwikala ashinshika kudi Nzambi hichuma chalema chikupu kubadika kuzañalesha antu abulaña kulemesha nshimbi jaYehova. Twatela kudikunda chikupu nawantu elaña nkeñelu yaNzambi. Yesu wahoshela nindi: “Muntu wukwila mwaya muchima waNzambi, diyi mana kwami, diyi muhelami, diyi mama yami.”—Maku 3:35.

8. Indi kudikunda nawantu atama kwaluwañesheli ñahi aIsarela akushankulu?

⁸ A Isarela amweni kukala kweneni muloña adikundili nawantu atama. Chelili Yehova yayipulwishi kufuma muwuduñu muEjipitu nakuyitwala Mwituña daChikaninu, wayisoñamishili kutalisha hakudikunda nawantu ashakamineña kwakwihi nindi: ‘Bayi wakafukamina ankishi jawuku, hela kuyipeshaku,  hela kwila mwelañawuku; chiña wakayihinuna hamaseki chikupu, nakuchika tuposhi twawu puchi-puchi. Mwakamukalakelaña Yehova Nzambi yenu.’ (Kwid. 23:24, 25) A Isarela amavulu hiyadiña nakwovwahila nshimbi jaNzambuku. (Mas. 106:35-39) Chineli hiyadiña ashinshika kudi Nzambuku, chimwahitili mpinji Yesu wayilejeli nindi: “Talenu itala denu anayishiyilidu dehi.” (Mat. 23:38) Yehova wayikaanini aIsarela nakutonda chipompelu chachiha chawakwaKristu chatuñiluwu.—Yil. 2:1-4.

9. Muloñadi yuma yamwekeshañawu hayikunzulemba yamukaayi chiyinateli kuleta wubanji?

⁹ Yuma yayivulu yamwekeshañawu hayikunzulemba yamukaayi yinateli kuleta wubanji wakuspiritu kudi akwaKristu. Yuma yeniyi hiyakoleshaña chikuhwelelu chetu mudi Yehova niyikaninu yinduku. Ilaña, yamwekeshaña kaayi katama kaSatana niyuma yekalamu. Dichi, twatela kwikala asoñama kulonda tubuli kutonda yuma yinateli kusañumuna ‘kufwila yuma yatama yampata yamunu mwishina.’—Tit. 2:12.

10. Indi nyikanda yatama ninyevulu yatama yamukaayi akayiladi?

¹⁰ Katatakichi antu keña aleki kutaña nikutala nyevulu yatama. Yuma yejimiyi akayifumishahu chakela kaayi kaSatana anakijilumuni dehi. Izu daNzambi dahosha nawu: “Mpata yamunu mwishina yikuhita, nikufwila kwayu kwatama, hakwinza muntu welaña muchima waNzambi washakamaña haya nyaka.” (1 Yow. 2:17) Munjila yoyimu, ñimbi yamasamu wembili nindi: “Antu elaña yuma yatama akayifumishamu; ilaña akumuchiñeja Yehova akaswana ituña. Ilaña akwakudizoza akaswana ituña, akatiya kuwaha nankashi nakushakama chachiwahi chamwena.” Akashakamamu yaaka yiñahi? “Akwakuloña akaswana ituña, akashakamamu haya nyaka.”—Mas. 37:9, 11, 29.

11. Indi Nzambi waloñeshelaña ñahi antu jindi yakudya yayiwahi yakuspiritu?

¹¹ Kwambukaku nayuma yedishaña kaayi, yuma yedishaña kuloñesha kwaYehova munanu mafuku akukuminina yatukwashaña kwikala nayililu yakatutwala kuwumi wahaya nyaka. Yesu walombeli kudi Yehova, nindi: “Wumi wahaya nyaka woweniwu, wakukwiluka eyi Nzambi walala wumu hohu, niYesu Kristu watemesheli.” (Yow. 17:3) Tata yetu wamwiwulu watuloñeshelaña yakudya yayivulu yatukoleshaña kuspiritu kuhitila mukuloñesha kwindi. Tukweti kukooleka chikupu kwakwikala namagazini, mabuloshuwa, nyikanda, mavidiyo niWebu sayiti yinakutiyakesha kudifukula kwalala. Kuloñesha kwaNzambi kwatanjika cheñi ntanjikilu yakupompa mpinji yejima muyipompelu yakubadika ha 110,000 mukaayi kejima. Haniku kupompa nikupompa kwanyanya nikwamaneni, twatañaña nsañu yashindamena haBayibolu yakoleshaña chikuhwelelu chetu mudi Nzambi niyikaninu yindi.—Heb. 10:24, 25.

12. Lumbululenu kufumba kwamuBayibolu kwahosha hakusumbula hela kusumbuka “mudi Mwanta hohu.”

¹² Kwiluka antu akudikunda nawu hichuma chalema kudi akwaKristu ajiki anakukeña kusumbula hela kusumbuka. Izu daNzambi datufumbaña nawu: “Bayi mudibombaña nawabula kwitiya mumpanda yoyimuku. Kuloña nakuluwa akutwesha kulondañana? Hela chejeji namwidima akutwesha kutiyañana?” (2 Kor. 6:14) Bayibolu yafumbaña ambuña Nzambi anakukeña kwiñila muwuluwi nawu atela kusumbula hela kusumbukila ‘chiña mudi Mwanta hohu,’ dikwila nawu, kusumbula hela kusumbuka chiña namuntu wadihana nawa mukwakudifukula waYehova wapapatishewa walondelaña chatañishaña Bayibolu. (1 Kor. 7:39) Neyi yasumbula hela yasumbuka namukwawu mukwakwitiya, mukwaKristu  wakwataña wulunda namuntu wadihana kudi Yehova nawa wukumukwasha kuhemba kashinshi kindi.

13. Nshimbinyi yayinkeluwu aIsarela kudi Nzambi kutalisha hakusumbwañana?

¹³ Yehova weluka yuma yinateli kuyizañalesha ambuñindi nawa wayikoleshaña mpinji yejima kulondela nshimbi jahosha hawuluwi. Talenu nshimbi yindi yapela yayinkeliyi aIsarela kuhitila mudi Mosi. Hakutena nyunza yawantu ayinyeñumukili abulileña kumukalakela Yehova, aIsarela ayilejeli nawu: ‘Kusumbwañana nawu nehi, mwaneyi wamumbanda kumwinkayi mwanindi weyala nehi, hela mwanindi wamumbanda kumusumbwilayi mwaneyi weyala nehi. Wakenda kakubalumwina mwaneyi weyala hakaleka kunlondela, hakapesha ankishi, hiyakayizuwila kudi Yehova, hakakujilumuna swayi swayi hohu.’—Kuhit. 7:3, 4.

14, 15. Indi kudiwula nshimbi jaYehova kwamuleñeleli Solomoni kwiladi?

¹⁴ Kumatachikilu achiyuulu chamwanta Solomoni mwana kaDavidi, iwu mukwenzi walombeli maana nawa Nzambi wamwinkeli maana abadika. Mwanta Solomoni wayili mpuhu yakwikala nyuuli wamaana mwituña damaheta. Kafwampi, mwanta wamumbanda wakuSheba chayiliyi nakumutala Solomoni, wahosheli nindi: ‘Mwashimwinuwu hinetejeli mwokuku; ichi chinenzi namoni dehi namesu ami; komana hiyanshimwinini hela chibaluku; nimaana eyi nimaheteyi anabadiki mumpuhu yinatiyili.’ (1 Anya. 10:7) Ilaña Solomoni wekalili chakutalilahu chatama, nawa chumichi chinateli kumumwekena muntu wudi wejima neyi yadiwula nshimbi yaNzambi yakusumbula hela kusumbuka namukwakwitiya hohu.—Mukwa. 4:13.

¹⁵ Hela chakwila Nzambi wamwilili yuma yayivulu, Solomoni wadiwili nshimbi yaNzambi yakaanisha kusumbula ambanda akunyunza yacheñi, antu abulileña kudifukula kudi Yehova. Solomoni “wakeñeli ambanda amavulu akwacheñi nakwacheñi” nawa mukuhita kwampinji wekalili nawambanda 700 niantombu 300. Chumanyi chafuminumu? Chelili Solomoni nakuli dehi, añodi jindi abulili kukuhwelela mudi Nzambi ‘amubalumwini muchima windi hiwukulondela ankishi, . . . nawa Solomoni welili chatama kumesu aYehova.’ (1 Anya. 11:1-6) Muloña wakudikunda nawantu atama, Solomoni wajimbesheli maana indi nawa walekeli kudifukula kudi Nzambi walala. Iku hikusoñamisha kwakweni kudi akwaKristu anakukeña kusumbula hela kusumbuka namuntu wabula kumukeña Yehova.

16. Kufumbanyi kwamuBayibolu kwahosha hadi kambuña Nzambi wukweti mwinikwindi wabula kwitiya?

¹⁶ Chumanyi chatela kwilayi muntu neyi yekala mukwakudifukula waNzambi, ilaña wasumbula hela wasumbuka namuntu wabula kwitiya? Bayibolu yahosha nawu: “Enu ambanda, shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu.” (1 Pet. 3:1) Awa mazu ahoshaña hadi ambanda akwaKristu, ilaña akundama cheñi nikudi amayala ekalaña akwakudifukula aYehova henohu asumbula muntu wabula kwitiya. Kufumba kwamuBayibolu kwahosha hatooka to-o nawu: Ikalenu iyala hela mumbanda wamuwahi nawa londelenuña nshimbi jaloña jaNzambi jahosha hawuluwi. Antu amavulu akweti eni kwawu abula kwitiya adizaña chalala hamuloña wakumona yililu yayiwahi mudi eni kwawu ahimpili chihandilu chawu hanyima yakudiza nshimbi jaNzambi.

17, 18. Muloñadi Nowa chapulukililiyi kuDibaji niakwaKristu amuyaaka nkulakaji yakusambila chapulukililuwu chajilumwinuwu Yerusalema?

¹⁷ Hela chakwila kudikunda kwatama kwatamishaña maana amawahi, kudikunda  kwakuwahi mwafumaña yuma yayiwahi. Shinshikenu Nowa washakamineña mukaayi mwadiña antu atama, ilaña hakeñeli kudikunda nawantu wenawaku. Hayina mpinji, “Yehova wamweni kutama kwawantu kunatohi hamaseki, nimwafuukwiluwu mwejima nakutoñojoka munyichima yawu munatami hohu bweñi mafuku ejima.” (Kutach. 6:5) Nkumininaku Nzambi wafuukwiluhu kujilumuna antu atama nadibaji damukaayi kejima. Hela chochu, “Nowa wadiñi muntu waloña, muntu walala hadi akwawu antu; Nowa wendeli naNzambi.”—Kutach. 6:7-9.

¹⁸ Nowa hakeñeleña kudikunda nawantu abulileña kumwakama Nzambuku. Yena nichisaka chindi chawantu atanu nayedi adikitileña mudimu wayinkeluwu kudi Nzambi kushilahu nikutuña watu. Hampinji yoyimu, Nowa wadiña cheñi “mukwakushimuna kuloña.” (2 Pet. 2:5) Muloña wakwila Nowa wadiña nakushimwina, kutuña watu nikudikunda nachisaka chindi, yumiyi yamuleñeleli kwila yuma yayiwahi yamuzañalesheleña Nzambi. Chumichi chaleñeleli Nowa nichisaka chindi kupuluka Dibaji. Twatela kuyisakilila muloña wejima wetu makonu twafuma kudi antu apulwishiluwu kudi Yehova, Nowa washinshika, ñoda Nowa, anyanindi niañodijawu. Chochimu, akwaKristu ashinshika nawa ovwahila amuyaaka nkulakaji yakusambila atwalekeluhu nakubula kudibomba nawantu abulileña kumwakama Nzambi nawa apulukili chajilumwinuwu Yerusalema nichiyuulu chawaYudeya mu 70 C.E.—Luka 21:20-22.

19. Hakwila Nzambi yatutiyili luwi, twatela kwiladi?

¹⁹ Chineli tudi akwakudifukula aYehova, twatela kumwimbujola Nowa nichisaka chindi niakwaKristu amuyaaka nkulakaji yakusambila ovwahilili. Twatela kutwalekahu kwambuka kudi antu atama amukaayi, nakukeña amabwambu anateli kutukolesha hakachi kawamana kwetu niahela ashinshika amavulu. Kudikunda chikupu nawantu anakulombolawu namaana aNzambi chikutukwasha ‘kwimana chakola mukukuhwelela’ muyinu mpinji yakala chikupu. (1 Kor. 16:13; Yish. 13:20) Toñojokenu hakuchiñeja kwetu kwakuwahi. Neyi twiluka antu itwadikundaña nawu munanu mafuku akukuminina, tunateli kupuluka nakwiñila mwituña daYehova daloña dadiha didi kwakwihi.