KUFUMA MUNKALAÑA JETU
“Yehova Wayileteli kuFrance Kulonda Mudizi Chalala”
HAMPINJI yadiñayi kansi, Antoine Skalecki wadikundili nankashi nakawalu kindi. Endeleña nakawalu chovu-chovu munyikwakwa yakupokola iku anasendi yiteli yamakala kufuma mumugoti wakunama mamita 500 kuya heshina. Tata yaAntoine wadikatishili mumugoti wabuvukili nawa chisaka hichadiña namwakwililaku, dichi amwitejeli Antoine kuya nakuyandila mumugoti hadi maora atanu nawana hefuku. Hampinji yimu, Antoine kachi wafwilili mwiyeñu.
Yozelu yazatishileñawu akwanyigoti akuPoland, nimugoti wakuDechy, kwakwihi naSin-le-Noble, kwazatileñayi Antoine Skalecki
Antoine wadiña hakachi kawanyana amavulu avwaliluwu muFrance kudi anvwali akuPoland muyaaka yamuma 1920 nakushika muma 1930. Muloñadi antu akuPoland chayililuwu kuFrance? Chelili ituña daPoland dikuuliki hanyima yaNjita Yakaayi Yatachi, antu aswejeli kuvula munidi ituña. Hela chochu, muFrance mwafwili amayala akubadika hamiliyoni yimu nanjita nawa akeñeleña chikupu antu akuzata mumugoti wamakala. Dichi muSeptember 1919 nfulumendi yakuFrance niyakuPoland yaditejeli nakufwachika nawu antu akuPoland ayi kuFrance. Chashikili chaaka cha 1931 antu akuPoland ayili kuFrance ashikili ku 507,800, chakwila antu amavulu akuPoland ashakamineña mumaluña akukabeta kachimunswa kekala nanyigoti.
Antu afumini kuPoland atwalili nichisemwa chawu chambukaku kushilahu nikukuhwelela kwakuhwelelawu mudi Nzambi. Antoine, wudi nayaaka 90 yakusemuka wahosheli nindi, “Nkaka yami weyala Joseph wahosheleña haNyikanda Yajila nakalemesha neyi chamudizishiluwu kudi tata yindi.” Hamafuku aNyilungu, yisaka yakuPoland yazatilileña kunyigoti yadiña nakuvwala chiwahi nakuya kuchechi neyi chelileñawu mwituña dawu nawa chumichi chahilishileña antu amakwawu akuFrance akeña kuzata.
Antu amavulu akuPoland adimweni katachi nawaTudizi aBayibolu, adiña nakushimwina neyena kuNord-Pas-de-Calais kufuma tuhu 1904. Kufuma tuhu mu 1915, Kaposhi Kakutalila atachikili kukipulinta mwidimi daPolish kakweji nikakweji nawa The Golden Age (yatenañawu makonu nawu Awake!) atachikili kuyipulinta munidi idimi mu 1925. Yisaka yayivulu yatambwilileña chiwahi nsañu yashindamena haBayibolu yadiña munawa magazini kushilahu namukanda waThe Harp of God mwidimi daPolish.
Chisaka chaAntoine chelukili Atudizi aBayibolu kuhitila mudi mandumi yindi wayili nakupompa nawu katachi mu 1924. Muchaaka chochimu, Atudizi aBayibolu apompeli katachi kupompa kwanyanya mwidimi
daPolish, muBruay-en-Artois. Chimwahitili kwakwihi nakakweji kamu, ñimenu wakukasanji keneni mukaayi kejima Joseph F. Rutherford, wayili nakuhana mpanji mumusumba wowumu mwapompeli antu 2,000. Muloña wakwila antu amavulu apompeli ahosheleña idimi daPolish, Manakwetu Rutherford wayilejeli nindi: “Yehova wayileteli kuFrance kulonda mudizi chalala. Ichi dinu enu nianyanenu mwatela kukwasha antu ahosha idimi daFrench! Kuchidi mudimu weneni wakushimwina nawa Yehova wukuleta akwakushimwina akuzata iwu mudimu.”Dichi chuma cheliliyi Yehova Nzambi. Awa akwaKristu akuPoland ashimwinineña namuchima wejima neyi chochazatileñawu munyigoti. Kafwampi, afuntili kwituña dawu daPoland nakushimwina nsañu yalala yalema yadiziluwu. Teofil Piaskowski, Szczepan Kosiak, niJan Zabuda adiña hakachi kawantu afumini kuFrance nakuya nakushimwina nsañu yayiwahi mumaluña ejima amaneni amuPoland.
Ilaña akwakushimwina amavulu akuPoland ashalili muFrance nakutwalekahu kushimwina neyena hamu nawamana kwawu niahela akuFrance. Hakupompa kwawantu ejima kwadiñaku mu 1926 muSin-le-Noble, antu akuPoland akushika ku 1,000 apompeli hamu nawantu 300 akuFrance. Yearbook yamu 1929 yahosheli nawu: “Munichi chaaka amana kwetu niahela 332 akuPoland amwekesheli kudihana kwawu kuhitila mukupapatishewa.” Henohu Njita Yakaayi Yamuchiyedi kanda yitachiki, yipompelu 32 hakachi kayipompelu 84 yamuFrance yadiña yawantu ahosheleña idimi daPolish.
Amana kwetu niahela ahoshaña idimi daPolish amuFrance anakuya kukupompa kwankambi. Chinjikijilu chinakuhosha nawu “aYinsahu jaYehova”
Mu 1947 aYinsahu jaYehova amavulu etejeli mutambi wanfulumendi yakuPoland kulonda afunti kwituña dawu. Hela chakwila afuntili, mudimu wazatiluwu hamu nawakwawu akwakwitiya amuFrance wamwekeni chavuliluwu akwakushimwina Wanta china chaaka namapasenti 10. Halondeleli cheñi kuvula kwamapasenti 20, 23, ni 40 kufuma muchaaka cha 1948 nakushika mu 1950. Hakwila akwashi awa akwakushimwina amaha, mutayi wakuFrance watondeli ankoñi añinza atachi mu 1948. Hakachi kawankoñi atanu atondeluwu, awana adiña amuPoland, nawa Antoine Skalecki wadiña hakachi kawu.
A Yinsahu jaYehova amavulu amuFrance achidi kuzatisha majina amuchiyedi awankakulula jawu amuPoland azatili nañovu munyigoti nimumudimu wakushimwina. Makonu nawa, añinza amavulu anakudiza chalala muFrance. Hela chakwila akwakushimwina akumatuña amakwawu afunta kumatuña kwafuminuwu hela ashakama mwituña dawu dadiha, ashimwinaña neyena kufwana akwakushimwina Wanta adi neyi ana asambilili kuya kuPoland.—Kufuma munkalaña jetu muFrance.