1, 2. Chililwinyi chikwetuwu akwakudifukula aYehova?

 AKWAKUDIFUKULA aYehova atwalekahu kuchiñilila kushikijewa kwawuprofwetu wonenawu. Chakutalilahu, Yeremiya waprofweteli nindi Yuda akamukisañana nawa aBabiloni ajilumwini musumba weniwu muchaaka cha 607 B.C.E. (Yere. 25:8-11) Isaya amoneneni kushimunañahu dehi nindi Yehova wakayifuntisha aYudeya mumukala wawu, wahosheli nindi: “Antu ejima akumuchiñilila yena anakooleki.” (Isa. 30:18) Mika niyena waprofweteli hadi antu jaNzambi akushankulu, wasanyikili nindi: ‘Nukutalaña kudi Yehova.’ (Mika 7:7) Hayaaka yayivulu, antu jaNzambi atwalekeluhu kuchiñilila kushikijewa kwawuprofwetu wahosheli hadi Mesiya hela Kristu.—Luka 3:15; 1 Pet. 1:10-12. *

² Ambuña Nzambi amakonu niwena atwalekañahu kuchiñilila wuprofwetu wukwawu wahosha hadi Mesiya wuchidi kanda wushikijewi. Kuhitila muWanta wawuMesiya, Yehova keña yamanishi makabi awantu kuhitila mukujilumuna antu atama kulonda yakuuli antu jindi mudinu ituña didi mumakasa aSatana. (1 Yow. 5:19) Dichi, tutwalekenuhu kwikala atona nikwiluka netu akanu kaayi kadi kwakwihi nakukuma.

3. Lwihwinyi lutunateli kudihula neyi twatachikili dehi kuhembelela hayaaka yayivulu hakwila kukuma kwakanu kaayi kushiki?

 ³ Hakwikala ambuña Yehova, twafwilaña kumona nkeñelu yaNzambi ‘chakayilawu hamaseki neyi chayilañawu mwiwulu.’ (Mat. 6:10) Hanyima yakutalila kukuma kwakaayi kamakonu kunakumwekana kushimbula, antu amakwawu anateli kudihula nawu, ‘Komana kuduhu yuma yashikila yikutuleñela kutwalekahu kuchiñilila?’ Twayenu tutali.

4. Muloñadi chichalemena kutwalekuhu kwikala atona?

⁴ Bayibolu yahosha jiika chatela kwikala yililu yetu kutalisha hakujilumuka kwakanu kaayi kudi kukamwihi. Yesu walejeli atumbanji twindi nindi ‘tonenuña.’ (Mat. 24:42; Luka 21:34-36) Chineli Yesu watulejeli kwila mwenimu, twatela kutwalekahu nakuchiñilila. Muniyi nsañu, kuloñesha kwaYehova kwatwimikila chakutalilahu chachiwahi. Nyikanda yamukuloñesha yatukonkomwenaña mpinji yejima nawu ‘tutalileña nikukeña nankashi chakenza ifuku daNzambi’ nikuchiñeja ituña dadiha datukanayi Nzambi.—Tañenu 2 Petulu 3:11-13.

5. Muloñadi chichalemena nankashi kwikala atona munanu mafuku?

⁵ Hela chakwila akwaKristu akushankulu ateleleli kuchiñilila, chumichi chalema nankashi kudi etu makonu. Muloñadi? Muloña tunakushakama mumufuku akwinza kwaKristu. Chinjikijilu chakwinza kwindi chatachikili kumwekana kufuma tuhu mu 1914. Nawa chinjikijilu chikweti yuma yayivulu chinabombelimu yuma yamukaayi yinakutaminaku nimudimu wakushimwina Wanta mukaayi kejima, yumiyi yinakumwekesha nawu tunakushakama ‘kumakumishilu anyaka yamakonu.’ (Mat. 24:3, 7-14) Chineli Yesu hashimwini kuleha kwampinji yikahitahu henohu kukuma kanda kwinzuku, twatela kwikala ababala nawa anakutona.

6. Muloñadi chitunateli kukuhwelela netu yuma yamukaayi yikasweja kutaminaku chitunakuswila kwakwihi nakukuma kwanyaka yamakonu?

⁶ Tunateli kudihula netu: Komana ‘kukuma kwanyaka yamakonu’ hikwatalisha kumpinji yakumbidi yakela yuma yamukaayi yakasweja kutaminaku? Bayibolu yashimuna nawu kutama kukaswejelaku nankashi “kumafuku akukuminina.” (2 Tim. 3:1, 13; Mat. 24:21; Chim. 12:12) Dichi tunateli kukuhwelela netu yuma yatama yamukaayi yinakumwekana makonu yikatwalekahu nakutaminaku.

7. Indi mukanda waMatewu 24:37-39 washimuna nawu yuma yikekala ñahi mumafuku akukuminina?

⁷ Munakuhweleli nenu yuma yikataminaku ñahi henohu ‘yihuñu yamaneni’ kanda? (Chim. 7:14) Chakutalilahu, munakukuhwelela nenu kwakekala njita mumatuña ejima, antu ejima ekekala nanzala nawa hetala hetala antu akekala akata? Neyi yuma yizatika muniyi njila, niantu abulaña kukuhwelela anateli kuyikakeja kwiteja nawu wuprofwetu wamuBayibolu wunakushikijewa. Hela chochu, Yesu wahosheli nindi antu amavulu ‘hiyakeluka’ kwinza kwinduku, akatwalekahu nakudiluñisha nanyidimu yawu nichakashika ifuku odu. (Tañenu Matewu 24:37-39.) Kafwampi, Nyikanda Yajila yashimuna nawu yuma mukaayi hiyikasweja kutaminaku kumafuku akukuminina kulonda yikayileñeli antu kwiteja nawu kukuma kudi mukamwihuku.—Luka 17:20; 2 Pet. 3:3, 4.

8. Yumanyi yamonañawu antu ovwahilaña kufumba kwaYesu kwakwila nawu ‘tonenuña’?

⁸ Munjila yikwawu, hakwila chinjikijilu chikweti yuma yayivulu chikakoñi mudimu wachu, chatela kumwekana chikupu nawu chinakushikijewa kulonda achimoni kudi antu ovwahilaña kufumba kwaYesu kwakwila nawu ‘tonenuña.’ (Mat. 24:27, 42) Nawa diyi yuma yamwekanaña kufuma tuhu mu  1914. Kufuma tuhu hayina mpinji, yuma yashimunawu muchinjikijilu yinakushikijewa. Chakadi nikujina, tunakushakama ‘kumakumishilu anyaka yamakonu,’ mukapinji kantesha hohu kanashaluku hakwila nyaka yatama ayijilumuni.

9. Muloñadi wutwatela kutwalekahu nakuchiñilila kukukuma kwanyaka yamakonu?

⁹ Hanu dinu muloñadi akwaKristu makonu chiyatela kutwalekahu nakuchiñilila? Hamuloña wakumwovwahila Yesu Kristu, twatwalekañahu nakuchiñilila. Tweluka cheñi chinjikijilu chakwinza kwindi. Bayi neyi twachiñililaña hamuloña wakukuhwelela yuma yejima yitwatiyañaku, ilaña twakuhwelela wunsahu walala wekala muNsona watuleñelaña kwikala asoñama nawa atona hakuchiñilila kukuma kwayinu nyaka yatama.

10, 11. (a) Yesu wayilejeli atumbanji twindi kwiladi? (b) Indi Yesu wayilejeli atumbanji twindi kwiladi neyi chakwila achiñilila kukuma hampinji yeneni kubadika yakuhweleleluwu? (Talenu mwevulu wakutachikilahu.)

¹⁰ Etu amavulu tunatwalekuhu kwikala atona kuspiritu hayaaka yayivulu. Hela chochu, bayi tuzeya nakuleka kuchiñilila muloña wampinji yeneni yinahituhuku. Twatela kudiloñesha chakenzayi Yesu nakujilumuna kaayi kaSatana. Anukenu nenu Yesu wayikonkomweneni atumbanji twindi nindi: ‘Babalenu, tonenuña, lombenu; muloña himuneluki mpinji oyuku. Chidi neyi muntu nayi njila yayilehi kumpata yacheñi, nashiyi itala dindi, nenki anduñu jindi ñovu, ninyidimu yawu, iwu nawindi iwu nawindi, naleji mukwakuhemba chisu nindi atoneña. Dichi tonenuña; muloña himuneluki hakenza nkaka yetalaku, kwiji melela, kwiji mukachi kawufuku, kwiji hedikilaña ikombu, kwiji budidi; kuchina kwila chakenzayi chakukasumwisha hakayiwana mutulu. Chinukuyilenu, nayili niantu ejima, nami, Tonenuña.’—Maku 13:33-37.

¹¹ Chelukiluwu nawu Kristu watachikili kuyuula mu 1914, atumbanji twaYesu elukili nawu kukuma keña kwinzi kala mpinji. Elili mwenimu kuhitila mukudikita chikupu mumudimu wakushimwina Wanta. Yesu washimwini nindi nateli kwinza mpinji yacheñi, “hedikilaña ikombu, kwiji budidi.” Neyi chumichi chamwekeni, atumbanji twindi adi kwiladi? Wahosheli nindi: ‘Tonenuña.’ Hela chakwila hanahiti mpinji yeneni kufuma hitwatachikili kuhembelela, hichinayi mukwila nawu kukuma kuchidi kwakulehuku hela hikwakenza mwikiñu detuku.

12. Indi Habakuki wamwihwilidi Yehova, nawa Nzambi wamwakwili ñahi?

¹² Shinshikenu chakutalilahu chakaprofwetu Habakuki, enkeluwu mudimu wakushimunañahu dehi chakamujilumunawu Yerusalema. Hampinji yatachikiliyi kuprofweta, mazu akutena kujilumuna iwu musumba adiña ayishimuna dehi hayaaka yayivulu. Yuma yatamini chakwila ‘antu atama akuchikili antu aloña nawa wuñaji adiña nakuwuheñesha.’ Hichatuhayamishañaku hakumona neyi Habakuki wehwili nindi: “Eyi Yehova, nukudila dile-e kushika kumwakanyi chakadi eyi kutiya?” Chatela yakuli ilu lwihu kwesekeja nachakeñeleñayi, Yehova wamukolesheli kaprofwetu windi washinshika nindi kujilumuna kwashimwineñahu dehi ‘hikwakalabaku.’ Nzambi wamulejeli Habakuki ‘kutwalekahu kuchiñilila.’—Tañenu Habakuki 1:1-4; 2:3.

13. Yililwinyi yadi kwikala naHabakuki, nawa yililu yeniyi yadikwikala ñahi yatama?

¹³ Twili netu Habakuki wazeyeli nakutoñojoka nindi: ‘Hanahiti yaaka yayivulu kufuma hampinji yinatachikili kutiya nawu Yerusalema akamujilumuna. Indi neyi kuchidi yaaka yayivulu hakwila amujilumuni? Chikuwaha wanyi neyi nitwalekahu kuprofweta henohu musumba anakuwujilumuna wanyi katataka. Nukushila akwetu iwu mudimu.’ Neyi Habakuki watachikili kutoñojoka  muniyi njila wadi kujimbesha wuselewa windi naYehova, nawa chiña wafwili hampinji yajilumwinuwu Yerusalema kudi akaBabiloni.

14. Muloñadi wutukukuhwelela chikupu netu hitwakatiya nsonyuku neyi tutwalekahu kuchiñilila?

¹⁴ Mwituña dadiha, tukekala nawunsahu wakatuleñela kutoñojoka hayuma yejima yashimwineñahu dehi yakundama kumakumishilu anyaka yamakonu netu chalala yamwekeni. Neyi tutoñojokaña chikupu yuma chiyamwekeni, chumichi chikakolesha chikuhwelelu chetu mudi Yehova niyikaninu yindi yikekala kanda yishikijewi. (Tañenu Yoshuwa 23:14.) Chakadi nikujina tukamusakililaña Nzambi ‘washili mpinji niyilaaka yatoñweliyi mumuchima windi,’ watukonkomweneni kulonda twiluki netu ‘yuma yejima yashikili kwakwihi nakukuma.’—Yil. 1:7; 1 Pet. 4:7.

15, 16. Muloñadi chitwatela kuzata nañovu mumudimu wakushimwina munanu mafuku akukuminina?

¹⁵ Twatela kukuhwelela netu kuloñesha kwaYehova kukutwalekahu kutwanukishaña nawu twatela kunyakala hakumuzatila Yehova. Yanukishu yamuchidiwu hiyatulejaña hohu nawu tuzateña ñovu mumudimu waNzambuku, ilaña yatukwashaña kwiluka netu chinjikijilu chakwinza kwaKristu chinakushikijewa. Chumanyi chasweja kuwaha chitwatela kwila muyinu mpinji yitunakushakama? Twatela kutwalekahu kukeña Wanta nikuloña kwaNzambi kuhitila mukushimwina nsañu yayiwahi neyena.—Mat. 6:33; Maku 13:10.

¹⁶ Muhela wumu wahosheli nindi: “Kushimwina nsañu yayiwahi yaWanta waNzambi, etu . . . tunateli kupulwisha antu kukufwa mulukadi lukamwekana mukaayi.” Weluka nsañu yakundama kukupulwisha, muloña yena ninfumwindi apulukili muwubanji wamumenji wasweja kutoha mukuhanda kwawantu, mbopolu yalubanji yejina daWilhelm Gustloff yajiyili mu 1945. Hela tuhu muwubanji wamuchidiwu, muntu hanateli kwiluka chuma chasweja kulemaku. Iwu muhela wanukaña nindi mumbanda wumu watwalekeluhu kubilela nindi: “Sutikesi yame-e! Sutikesi yame-e! Yingelingeli yame-e! Yingelingeli yami yejima yinashali heshina mukapeka. Najimbeshi yuma yejima!” Kwambukaku naniwu mumbanda, antu amavulu adihanini kukwashana chakwila ashili wumi wawu hakatoña hakwila apulwishi antu aholokeleli mumenji atuta chikupu. Kufwana ana antu adiña namuchima wakukwashana, anetu nawa twazataña hakumina ñovu jetu hakukwasha antu. Tweluka netu twatela kuzata mudimu wetu wukushimwina swayi-swayi kulonda tukwashi antu amakwawu  hakwila apuluki kulukadi henohu kanda lushiki.

17. Yumanyi yinateli kutuleñela kukuhwelela netu kukuma kunateli kwinza kala mpinji?

¹⁷ Yuma yinakumwekana mukaayi yinakumwekesha nawu wuprofwetu wamuBayibolu wunakushikijewa nawa kukuma kwanyaka yatama kudi mukamwihi. Dichi, bayi tutoñojoka netu kunakukeñeka mpinji yeneni kulonda yuma yamukaayi yishiki hachipimu chakwila nawu “nseñu ikumi” ‘nikanyama’ akamubalumukili Babiloni Muneni, wanta wamukaayi kejima wakwitiya kwakutwamba neyi chiyashimunawu haChimwekeshu 17:16. Twatela kwiluka netu Nzambi ‘wakasha munyichima yawu’ hakwila chumichi chikamwekani, nawa chumichi chinateli kumwekana mukunyakashana nawa kala mpinji. (Chim. 17:17) Kukuma kwanyaka yamakonu hikudi kwakulehuku. Kafwampi, twatela kulondela kusoñamisha kwaYesu kwakwila nawu: “Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu.” (Luka 21:34, 35; Chim. 16:15) Dichi tufwilenu kumukalakela Yehova mukunyakashana, nakukuhwelela netu ‘wakoñelaña antu amuchiñililaña.’—Isa. 64:4.

18. Lwihwinyi lutwakahanjekahu muchibaaba chinalondeluhu?

¹⁸ Hampinji yitunakuchiñilila kukuma kwanyaka yatama yamakonu, tufwilenu kwovwahila mazu akambanji Yuda onenawu akwila nawu: ‘Akwetu twakeña, dituñenu mukukuhwelela kwenu kwabadika kujila, nakulomba naspiritu yajila. Dihembenu kulonda mushakami mukukeña kwaNzambi, nakutalila luwi lwaMwanta wetu Yesu Kristu lwashika kuwumi wahaya nyaka.’ (Yuda 20, 21) Hanu dinu, tunateli kumwekesha ñahi netu tunakushakama nakuchiñilila chikaninu chaNzambi chakushakama mwituña dadiha nawa netu tunakutalila chikupu ichi chikaninu? Tukahanjeka iyi nsañu muchibaaba chinalondeluhu.