1, 2. Hinyi watwinka chinleji nawa muloñadi wutwatelela kumusakilila hakutwinka chinleji?

 YEHOVA NZAMBI waleñeli antu nawuswa wakufukula munakeñuwu aweni. Hakwila nawu tufuukuleña mwaloña, Yehova watwinka chuma chatwikwashaña. Ichi chuma chatukwashaña hichinleji, chaleñelaña twilukeña netu ichi chachiwahi ichi chatama. Neyi tuzatisha chinleji chetu munjila yayiwahi, chikutukwasha kwila yuma yayiwahi nikutondolwela yatama. Chinleji chetu chamwekeshaña nawu Yehova watukeña nawa wakeñaña nindi twileña yayiwahi.

² Antu amakwawu makonu elaña yuma yayiwahi hela chakwila eluka wanyi nshimbi jamuBayibolu. (Tañenu Aroma 2:14, 15.) Muloñadi? Muloña akweti chinleji. Chakwashaña antu amavulu kubula kwila yuma yatama. Toñojokenu yuma chiyadi kutama mukaayi neyi chakwila twadiña tudana chinleji! Twadi kutiyaña yuma yatama kubadika yitunakutiya. Twatela kumusakilila Yehova hakutwinka chinleji.

3. Chinleji chetu chinateli kutukwasha kwiladi muchipompelu?

³ Antu amavulu akeñaña wanyi kufumba chinleji chawu. Ilaña, antu jaYehova akeñaña chinleji chawu kuzata chiwahi muloña chinateli kuyikwasha kuleta  kunuñañana muchipompelu. Tunakukeña chinleji chetu chitwanukisheña nshimbi jamuBayibolu jahosha hakwila yuma yayiwahi niyatama. Hela chochu, hakwila tufumbi chinleji chetu nikuchizatisha twatela kwila yuma yitunakudiza muBayibolu. Twatela kukeña nshimbi jaNzambi nikukuhwelela netu jikutukwasha. Pawulu wasonekeli nindi: “Mwakulejeluwu mwalonda kukeña kwakufuma mumuchima wutooka, nachinleji chamuchima chachiwahi, nikukuhwelela kwakadi kudimbana.” (1 Timotewu 1:5) Neyi tufumba chinleji chetu nikuchilondela, tukumukeña nankashi Yehova nawa tukumukuhwelela. Chitwazatishaña chinleji chetu chamwekeshaña nawu wubwambu wetu naYehova wakola nawa tunakukeña kumuzatila. Chinleji chetu chamwekeshaña cheñi chitwekala.

4. Tunateli kufumba ñahi chinleji chetu?

⁴ Tunateli kufumba ñahi chinleji chetu? Twatela kudiza Bayibolu mpinji yejima, kutoñojoka hansañu yitunakutaña nikumulomba Yehova netu yatukwashi kuzatisha jitunadizi. Dikwila nawu kuzatisha nsañu yitunakudiza kubadika kwiluka hohu chahosha Bayibolu. Neyi tunakudiza Bayibolu, twakeñaña kumwiluka chiwahi Yehova. Twelukaña chikupu chekalayi, yuma yakeñayi niyahelayi. Chitwamwiluka nankashi Yehova, chinleji chetu chikwilukaña swayi yuma yamonañayi nindi yayiwahi niyamonañayi nindi yatama. Neyi tufumba chinleji chetu, tukutachika kutoñojoka neyi chatoñojokañayi Yehova.

5. Yumanyi yitukuhanjeka muchinu chibaaba?

⁵ Ilaña, tunateli kwihula netu: Chinleji chafumbewa chiwahi chinateli kutukwasha ñahi neyi tunakufuukula? Tunateli kulemesha ñahi chinleji chawakwetu akwaKristu? Nawa chinleji chetu chinateli kutukwasha ñahi kwila mwamuwahi? Twayenu tutali njila jisatu mutunateli kuzatisha chinleji chafumbewa chiwahi: (1) Kukola kwakumujimba, (2) mpinji yakunooka, ni (3) mudimu wetu wakushimwina.

6. Yumanyi Yehulañawu amanakwetu kutalisha hanjila yakukilamu?

⁶ Bayibolu yatulejaña kutondolwela yuma yatama nawa yatulejaña kutoñojoka chiwahi hayuma yidi neyi kudya nikunwa. (Yishimu 23:20; 2 Akorinda 7:1) Kwovwahila kufumba kwamuBayibolu, kunateli kutukiña kuyikatu. Ilaña twakataña nikushinakaja. Chumanyi chitwatela kwila? Mumatuña amakwawu, mwekala njila jajivulu jakukilamu. Tusanji twamutayi twatambwilaña nyikanda kufuma kudi amanakwetu niahela ehulaña njila yakukilamu yelukawu neyi yatelela. Amavula ehulaña nawu, “Mwalala kambuña Yehova nateli kwiteja iyi njila yakukilamu?”

7. Yumanyi yitunateli kufuukula kutalisha hamashi?

⁷ Kasanji kamutayi hela aeluda muchipompelu  ekala wanyi nawuswa wakufuukwila mukwaKristu njila yakukilamu, hela chakwila nalombi wukwashu. (Aŋalija 6:5) Ilaña, aeluda akuzatisha Bayibolu kumukwasha mukwaKristu yafuukuli chiwahi. Chakutalilahu, Nzambi watwinka nshimbi yakuleka mashi. (Yililu 15:29) Iyi nshimbi yakwashaña mukwaKristu kwiluka nindi watela kukaana njila yakukilamu kuzatisha mashi hela nyichidi yiwana yejima yamashi. Iyi nsañu yikumuleñela mukwaKristu kuzatisha chinleji chindi neyi wukwiteja tuyuma twanyanya twafumishañawu munyichidi yejima yiwana yamashi. * (Talenu tumazu twaheshina.) Kufumbanyi kukwawu kwamuBayibolu kunateli kutukwasha kukeña njila yayiwahi yakukilamu?

8. Mukanda waAfwilipi 4:5 watukwashaña ñahi kufukula chiwahi hakukola kwakumujimba?

⁸ Yishimu 14:15 nayu: “Muntu wakadi maana wetiyaña mazu ejima, ilaña muntu wadihoñeshaña mumuchima watalaña chachiwahi mwakuyayi.” Makonu, yikatu yikwawu yidana yitumbu. Dichi twatela kubabala nayitumbu yinakwilawu nawu yinakuka henohu kwosi muntu wunokuwu. Pawulu wasonekeli nindi: “Mwekeshenu kwovwaha kwenu kudi antu ejima.” (Afwilipi 4:5) Kutoñojoka kukutukwasha kusha maana kukudifukula kudi Yehova chatela tushi maana hakukala kwetu kwakumujimba. Neyi tusha maana kukukola kwakumujimba, tukutoñojokaña hohu hayuma yitunakukeña. (Afwilipi 2:4) Tweluka netu mukanu kaayi hitunateli kwikala akola kumujimba mpinji yejimaku. Dichi, mwatela kudishinshika kulonda mwiluki neyi mwalemesha kumukalakela Yehova muchihandilu chenu.—Tañenu Afwilipi 1:10.

9. Mukanda waAroma 14:13, 19 watukwashaña ñahi kufuukula chiwahi hakukola kwakumujimba, nawa tunateli kuluwañesha ñahi kuwunda kwetu?

⁹ MukwaKristu wamwovu hakanjikijaña akwawu kwila munakukeñayuku.  Mwituña dimu, adisumbula alejeleña akwawu nawu neyi mudyaña yakudya yamuchidiwu yikuyikwasha kumujimba. Akanjikijileña amanakwetu amakwawu kudya iyi yakudya, ilaña amakwawu akanini. Chelili yeniyi yakudya kuzatika nehi, amanakwetu niahela amavulu ahilili. Awa adisumbula adiña nawuswa wakutonda aweni neyi chakwila anakukeña kudya iyi yakudya. Komana chadiña chachiwahi kuluwañesha kuwunda kwadiña muchipompelu hamuloña wakudya yakudya yakukwasha mujimba? MuRoma wakushankulu, akwaKristu amakwawu adiña nayitoñojoka yambuka hayakudya niyidika yakwanakana. Pawulu wayifumbili nindidi? Wayifumbili nindi: “Muntu wumu walemeshaña ifuku dimu nindi dabadika dikwawu; mukwawu nindi mafuku ejima wowamu hohu. Chachiwahi antu ejima eluki chalala awenawu, iwu mwanatoñojokiyi, iwu mwanatoñojokiyi.” Dichi tubabalenu kulonda tubuli kudimbwisha akwetu.—Tañenu Aroma 14:5, 13, 15, 19, 20.

10. Muloñadi wutwatela kubulila kudiwula munafuukuli akwetu (Talenu mwevulu wakutachikilahu.)

¹⁰ Mpinji yikwawu, tunateli kwiluka wanyi chuma chinaleñeli muntu muchipompelu yafuukwileñaku akwawu. Tunateli kwila ñahi? Twatela wanyi kunyakashana kukana yitoñojoka yindi hela kumuleja yahimpi munatoñojokiyi. Hadaha wafumba chinleji chindi wanyi hela watuboka hohu. (1 Akorinda 8:11, 12) Indi kwiji yetu twabula kufumba chinleji chetu. Wejima wetu twatela kudifuukwila njila yakutukilamu nikwiteja yuma yinateli kufumamu.

11, 12. Bayibolu yatukwashaña ñahi kutonda mpinji yakunooka?

¹¹ Yehova watuleña munjila yakwila tudiluñisheña mpinji yakunooka. Solomoni wasonekeli nindi kwekala “mpinji yakuseha nimpinji yakuhañana.” (Mukwakutaŋisha 3:4) Hela chochu, bayi neyi mpinji yejima yakunooka yekala yayiwahi hela yatukwashañaku. Hitwatela kumanisha mpinji yeneni hampinji yakunookaku. Chinleji chetu chinateli kutukwasha ñahi kudiluñisha mpinji yakunooka nikuhetela muyuma yetejayi Yehova?

¹² Bayibolu yatusoñamishaña kubula kudiñija ‘munyidimu yachisemwa chaheseki.’ Iyi nyidimu yabombelamu “wuvumbi, wuzondu wamumuchima, kufwila yatama, kupesha, kupanda, kuhelañana, kuzuña, ichima, madombu, kukokwela kwenu, kudambola, kwitiya nsañu yaheña, lwisu, kusheta, yisela, niyuma yidi neyi iyi.” Pawulu wasonekeli nindi, “antu akwila mwenimu hiyamba  kaswana wanta waNzambuku.” (Aŋalija 5:19-21) Dichi twatela kudihula netu: ‘Komana chinleji chami chankwashaña kutondolwela yisela mandombu, kudibecha hela kukeña nankashi ituña? Komana chinleji chami chankanishaña kutala filimu mudi nyevulu yanzekesi hela yinakuhosha hayililu yatama yidi neyi wuvumbi, kusheta hela kupesha?’

13. Mukanda wa 1 Timotewu 4:8 niYishimu 13:20 watukwashaña ñahi kutalisha hampinji yakunooka?

¹³ Yishina yamuBayibolu yatukwashaña kufumba chinleji chetu kulonda tutondi chiwahi yuma yakwila hampinji yakunooka. Chakutalilahu, Bayibolu yahoshaña nawu “kukolesha mujimba kwawahishaña mpinji yantesha.” (1 Timotewu 4:8) Antu amavulu amonaña nawu kuhema mpinji yejima kwayikwashaña kumujimba. Indochu neyi tunakukeña kuhema nawantu amavulu? Twatela kuhema nawantu adi ejima? Yishimu 13:20 yatulejaña nawu: “Endaku nawakwamaana nineyi wakekala mukwamaana; ilaña wadikunda nawayisupi wakamwenamu jakala.” Dichi, twatela kuzatisha chinleji chetu chafumbewa naBayibolu hakutonda yuma yakwila hampinji yakunooka.

14. Muhela wakansi wazatishili ñahi mukanda waRoma 14:2-4?

¹⁴ Adisumbula aChristian naDaniela akweti anyanawu ayedi atunkaña. Christian wahosheli nindi: “Hampinji yitwadiñi nakudifukula kwachisaka kwamelela, twahanjekeli hansañu yakunooka. Twadizili netu njila jikwawu jakuhemenamu jatama wanyi ilaña jikwawu jatama. Anyi atela kwikala amabwambu amawahi? Mwanetu wumu wahosheli nindi hiyadiña nayisela hashikola, atwansi amakwawu aYinsahu elileña yuma yamweniyi nindi yatama. Nawa wahemenuku wanyi yisela yahemeneñawu akwawu. Twamulejeli netu wejima wetu twekala nachinleji, nawa twatela kuchizatisha hayuma yitunakukeña kwila nikutonda antu akuhema nawu.”—Tañenu Aroma 14:2-4.

15. Matewu 6:33 yatukwashaña ñahi neyi tunakukeña kwikala nampinji yakunooka?

 ¹⁵ Mwamanishaña maora añahi hampinji yakunooka? Komana mwalemesha kupompa, kushimwina nikudiza kwahalwenu, indi kwiji mwalemesha mpinji yakunooka? Yumanyi yimwalemesha? Yesu wahosheli nindi: “Sambilenu kukeña wanta windi nikuloña kwindi, niyuma yejimiyi akayishilaku.” (Matewu 6:33) Komana chinleji chenu chayanukishaña kufumba kwaYesu neyi munakufuukula chakuzatisha mpinji yenu?

16. Chinleji chetu chatusañumunaña ñahi kushimwina?

¹⁶ Chinleji chafumbewa chatusoñamishaña kubula kwila yuma yatama, nawa chatusañumunaña kwila yuma yayiwahi. Njila yimu yidi yakushimwina kwitala nikwitala nikudi antu itwabulakanaña. Dicheliliyi Pawulu. Wasonekeli nindi: “Anankunjiki mudimu wakushimuna, chiña nishimuni hohu. O yihuñu yinukumonami neyi nukubula kushimuna nsañu yayiwahi!” (1 Akorinda 9:16) Chitukumwimbujolaña Pawulu, tukwikala nachinleji chitooka, muloña tuneluki netu yuma yitunakwila yayiwahi. Neyi tunakuyishimwina antu nsañu yayiwahi, dikwila nawu tunakukeña kubalumuna yinleji yawu yiteji. Pawulu wahosheli nindi: “Chitwashimunaña nsañu yaNzambi yalala chalumbuluka, twadimwekeshaña kuyinleji yanyichima yawantu ejima, niNzambi namoni.”—2 Akorinda 4:2.

17. Muhela wumu wakansi watiyilili ñahi mwamulejeli chinleji chadizishewa naBayibolu?

¹⁷ Jacqueline hadiñayi nayaaka 16, wadizileña biology kushikola. Dichi, atudizi adizileña nsañu yahosheleña nawu yuma yadileñeli yayeni. “Nakañenyi kwakulahu neyi chinelaña mpinji yejima muloña wachinleji chami. Hinetejeli yitoñojoka yakwila nawu yuma yadileñeli yayenuku. Nayili nakuwana antañishi kulonda niyilumbulwili yuma yinakuhwelela. Kukooleka, adiña chiwahi nawa añitejeli kuhanjeka nawakwetu ejima mushikola nsañu yayileñaleña.” Jacqueline watiyili kuwaha chelukili nindi watiyilili nikulondela chinleji chindi chadizishewa naBayibolu. Chinleji chenu chayikwashaña kwila yuma yaloña?

18. Muloñadi wutwakeñelaña kwikala nachinleji chinateli kutukwasha nawa chachiwahi?

¹⁸ Twakeñaña kushakama kwesekeja nachahosha yishina ninshimbi jaYehova. Chinleji chetu chinateli kutukwasha kwila mwenimu. Tukufumba chinleji chetu neyi tudizaña, kutoñojoka chikupu Hezu daNzambi nikuzatisha yuma yitunadizi. Ichi chawaana chatwinkawu chikutukwasha muchihandilu chetu.