1, 2. AkwaKristu ejima afwilañadi? Shimunenu chakutalilahu.

 MAMA yawantu welaña ñahi neyi nayi nakulanda nyikabu hachisankanu? Bayi neyi washikenaña kulanda nyikabu yinawaniyi hachisankanuku. Ilaña wasambilaña kutala nyikabu yinakumwekana chiwahi yabula kutoka. Wakeñaña mukabu wunanhi chiwahi bayi wandendaku.

² Hanyima yakwila muntu nadizi dehi hadi Yehova nawa nakukeña kupapatishewa, wubwambu windi naNzambi watwalekañahu kukola. Muloña nakufwila kwikala mukwaKristu wapama. Iku kupama kwatalisha wanyi mukwikala mukulumpi. Ilaña kwatalisha kukupama kwakuspiritu, dikwila nawu kwikala nawubwambu wakola naNzambi. Kapostolu Pawulu wakeñeleña akwaKristu amuEfwesesa kwikala apama. Wayikolesheli kwikala anuñañana muchikuhwelelu nikutwalekahu kudiza nsañu yahosha hadi Yesu kulonda ‘ashiki mwiyala walala chikupu, mwashika chiminu chaKristu.’—Aefwesesa 4:13.

3. Antu amuchipompelu chamuEfwesesa ayesekeja ñahi nawantu jaYehova makonu?

 ³ Chipompelu chamuEfwesesa chadiñikoku hampinji Pawulu yayisonekeleliyi mukanda. Antu amavulu muchina chipompelu adiña akwaKristu apama. Ilaña, mwadiña antu amakwawu ateleleli kukolesha wubwambu wawu naYehova. Nimakonu, amanakwetu niahela amavulu anamuzatili Yehova yaaka yayivulu nawa anekali akwaKristu apama. Hela chochu, antu amakwawu muchipompelu kanda apami. Chakutalilahu, antu amavulu apapatishewaña chaaka nichaaka, dichi atela kupama. Ndochu enu?—Akolose 2:6, 7.

4, 5. AkwaKristu apama ambuka ñahi wumu namukwawu, nawa yililwinyi yikwetuwu ejima wawu yesakana? (Talenu mwevulu wakutachikilahu.)

⁴ Neyi mutala nyikabu yekalaña hachisankanu, mukuwana yikwawu yanha yikwawu yahisha wanyi. Ilaña, kunateli kwikala yuma yikuyileñela mwiluki nenu iyi nyikabu yinanhi. Dichekala niakwaKristu apama. Ekala esekana wanyi. Muloña afuma kumatuña nikuyitachi yashiyashana. Akweti yaaka yoyimu wanyi nawa niyuma yakeñañawu niyabula kukeñawu yashiyashana. Hela chochu, akwaKristu ejima akweti yililu yimu yesakana yayileñelaña kuyitena nawu apama. Yililwinyi yeniyi?

⁵ MukwaKristu wapama wembujolaña Yesu nikulondela “mumahaji indi.” (1 Petulu 2:21) Yesu wahosheli nindi muntu watela kumukeña Yehova namuchima windi, wumi nimaana indi ejima nawa watela kukeña mukwawu neyi chadikeñayi yomweni. (Matewu 22:37-39) MukwaKristu wapama wovwahilaña iku kufumba. Yuma yelañayi muchihandilu chindi yamwekeshaña nawu walemesha nankashi wubwambu windi naYehova nikukeña kwakeñayi akwawu.

6, 7. (a) Yililwinyi yikwawu yamwekeshaña nawu mukwaKristu wapama? (b) Malwihwinyi itwatela kudihula?

⁶ Kukeña hichililu chekala hakachi kayililu yayivulu yamwekeshañayi mukwaKristu wapama. (Aŋalija 5:22, 23) Wekala cheñi nayililu yidi neyi kwovwaha, kudihemba nikudiwunjika. Iyi yililu yinateli kumukwasha kuumika kukala chakubula kuhila nikuumika yuma yatama yinamumwekeni chakadi kujiyisha chikuhwelelu chindi. Hakudiza  nkawindi, mukwaKristu wapama wasandujolaña yishina yamuBayibolu yinateli kumukwasha kwiluka yuma yayiwahi niyatama. Kuhiñahu, neyi yazatisha chinleji chindi chafumbewa naBayibolu, wukufulaña chiwahi. MukwaKristu wapama wekala wadizoza, dichi weluka nindi yitoñojokaña yindi yalema wanyi kubadika wunlomboli waYehova ninshimbi jindi. * (Talenu tumazu twaheshina.) Washimwinaña nsañu yayiwahi neyena nawa wazataña nañovu kulonda yakwashi chipompelu kwikala chanuñañana.

⁷ Hela chakwila tunamuzatili Yehova yaaka yayivulu, twatela kudihula netu: ‘Kuduhu yuma yinatela kuleka kulonda nimwimbujoli Yesu chikupu? Kuduhu yuma yinatela kuzatilahu?’

8. Yesu welukili ñahi Nsona nikuyitiyisha?

⁸ Yesu Kristu welukili Nsona nikuyitiyisha chikupu. Nihampinji yadiñayi nayaaka 12, wazatishili Nsona hakuhanjeka nawantañishi mutembeli. ‘Ejima  adiñi nakumutiya ahayamini kashinshi kindi nimwayakwileñayi.’ (Luka 2:46, 47) Yesu wazatishili Izu daNzambi chiwahi hadiñayi nakushimwina kulonda yamweneshi ayilumbu jindi.—Matewu 22:41-46.

9. (a) Mukwakristu wapama wekalaña nandandanda yamuchidinyi? (b) Muloñadi wutwadizilaña Bayibolu?

⁹ Muntu wakeñaña kwikala mukwaKristu wapama wembujolaña chakutalilahu chaYesu nawa wakeñaña kutiyisha Bayibolu chikupu. Wasandujolaña yuma yakunama yamuNsona, muloña weluka nindi “kudya kwakola kwambala kwawantu apama dehi.” (Aheberu 5:14) MukwaKristu wapama wakeñaña kwiluka ‘nsañu yalala’ yamuBayibolu. (Aefwesesa 4:13) Dihulenu nenu: ‘Natañaña Bayibolu mafuku ejima? Nikweti ndandanda yakudiza kwahalwami? Twekalaña nakudifukula kwachisaka mulungu nimulungu?’ Neyi munakudiza Bayibolu, keñenu yishina yinateli kuyikwasha kwiluka chatoñojokañayi Yehova nichatiyañayi. Kuhiñahu zatishenu iyi yishina neyi munakufukula. Neyi mwila mwenimu mukukundama kwakwihi naYehova.

10. MukwaKristu wapama wamonaña ñahi kufumba niyishina yaNzambi?

¹⁰ Bayi neyi mukwaKristu wapama watela kwiluka hohu chahosha Bayiboluku. Ilaña watela kukeña kufumba kwaNzambi niyishina yindi. Dichi wamwekeshaña iku kukeña neyi yekala nampwila yakwila nkeñelu yaYehova bayi yinduku. Wahimpaña nshakaminu, yitoñojoka niyuma yelañayi. Chakutalilahu, wembujolaña Yesu nikuvwala muntu wamwiha “aleñeluwu mwekalilayi Nzambi mukuloña nakujila kwansañu yalala.” (Tañenu Aefwesesa 4:22-24.) Mwatela kwanukaña nenu Nzambi wazatishili spiritu yindi yajila hakulombola antu asonekeli Bayibolu. Dichi neyi mukwaKristu yadiza Bayibolu, spiritu yaNzambi yajila yikumukwasha kwiluka yuma, kwikala nakukeña nikwikala nawubwambu wakola naYehova.

11. Yesu washakamineña nawantu amuchidinyi?

¹¹ Yesu wadiña wawanina. Ilaña hadiñayi hamaseki, washakamineña nawantu abula kuwanina. Anvwali jindi, amanakwindi niahelindi adiña awanina wanyi. Atumbanji twindi niwena aditiyileña nawa akeñeleña yuma yakuditiyisha aweni kuwaha. Chakutalilahu, wufuku wakwila Yesu kanda yafwi, atumbanji twindi aditadikishileña nawu “mwinetwinyi aketejawu nawu nabadiki akwawu.” (Luka 22:24) Hela chakwila atoñojokeleña mwaluwa, Yesu welukili nindi atumbanji twindi katataka ekali akwaKristu apama nawa akutuña chipompelu chanuñañana. Wufuku wowumu, Yesu wayilombeleluku atumbanji twindi kwikala anuñañana. Wamulombeli Tata yindi wamwiwulu nindi ekali anuñaña, walombeli nindi: “Neyi chiwekala eyi Tata mudami ninami mudeyi.” Watwalekeluhu nindi: “Kulonda akekali wumu neyi chitwekaletu wumu.”—Yowanu 17:21, 22.

12, 13. (a) Chumanyi chitwakeñaña kwila? (b) Manakwetu wumu wadizili ñahi chakuleta kunuñañana?

¹² MukwaKristu wapama welaña yuma  yaletaña kunuñañana muchipompelu. (Tañenu Aefwesesa 4:1-6, 15, 16.) Chineli tudi akwaKristu, twakeñaña kwikala ‘anuñañana chiwahi,’ dikwila nawu kuzatila hamu mukunuñañana. AkwaKristu atela kwikala adizoza kulonda ekali anuñañana. Mukwakristu wapama wazataña nañovu kulonda yaleti kunuñañana muchipompelu hela chakwila naneñi nayiluwa yawamanakwetu. Dihulenu nenu: ‘Nelaña ñahi neyi manakwami hela muhela naluwañeshi? Natiyaña ñahi neyi ananvulumuni? Nalekaña kuhosha namuntu wunanvulumuni? Indi kwiji nesekaña kumanisha kukala?’ MukwaKristu wapama wamanishaña kukala bayi kuleta kukalaku.

¹³ Toñojokenu hayuma yeliliyi Uwe. Hatachi, watiyileña kutama nayuma yaluwañesheleñawu amanakwetu niahela. Dichi watachikili kudiza hachihandilu chaDavidi kuzatisha Bayibolu nimukanda waInsight on the Scriptures. Muloñadi chatondeleliyi Davidi? Muloña Davidi niyena amuvulumwineña kudi ambuña aNzambi. Chakutalilahu, akeñeleña kumujaha kudi Mwanta Sawulu, antu amakwawu akeñeli kumwasa malola, ñodindi niyena wamuseheli. (1 Samweli 19:9-11; 30:1-6; 2 Samweli 6:14-22) Hela chakwila antu amuvulumwineña, Davidi wamukeñeli Yehova nawa wamukuhweleleli. Wamwekesheli cheñi luwi. Uwe wahosheli nindi natela kwila neyi cheliliyi Davidi. Natela kuhimpa chinatiyaña hayiluwa yawamanakwami. Nawa natela kuleka kutoñojoka hayiluwa yawu nikutachika kwila yuma yikuleta kunuñañana muchipompelu. Ninenu mwakeñaña kuleta kunuñañana muchipompelu?

14. Yesu watondeli ñahi amabwambu jindi?

¹⁴ Yesu Kristu wakeñeli antu. Yesu wadiña wakasunuka dichi amayala, ambanda, atwansi, akulumpi nianyana anyanya enjileña kudi yena. Ilaña wadiña wababala hakutonda amabwambu jindi. Walejeli apostolu indi nindi: “Neyi mukwila munukuyileja mukwikala amabwambu jami.” (Yowanu 15:14) Yesu watondeli amabwambu jindi adiña nakumulondela nawa adiña amukeña Yehova nikumukalakela. Mwatondaña amabwambu amukeña Yehova namuchima wawu wejima? Muloñadi wumwatela kutondela antu amukeña Yehova?

15. Atwansi anateli kuhetelamu ñahi neyi adikundaña nawakwaKristu apama?

¹⁵ Nyikabu yayivulu yahaña chiwahi neyi kunatati. Munjila yoyimu, kukeña kwawamanakwetu kunateli kuyikwasha kwikala mukwaKristu wapama. Neyi wudi kansi, wunakutoñojoka yuma yiwakela muchihandilu cheyi? Neyi dimu, watela kutonda amabwambu anamukalakeli Yehova hadi mpinji yayilehi nawa aletaña kunuñañana muchipompelu.  Hadaha amonahu dehi kukala mukuhanda kwawu nawa omikili kukala kwakuvulu iku anakumukalakela Yehova. Anateli kukukwasha kutonda yuma yikakukwasha muchihandilu cheyi. Neyi wudikundaña nawu akukwasha kufukula chiwahi nikwikala mukwaKristu wapama.—Tañenu Aheberu 5:14.

16. Antu amuchipompelu amukwashili ñahi muheletu wumu hadiñayi kansi?

¹⁶ Helga wanukaña chaaka chamanishileñayi shikola, akwawu atañileñayi nawu ahosheleña yuma yikelawu kumbidi. Amavulu ahosheleña nawu akaya kuyunivesiti. Ilaña Helga yena wenhwili amabwambu jindi apama amuchipompelu. Dichi wahosheli nindi: “Amavulu adiña akulumpi nawa ankwashili hama. Ankolesheli kutachika mudimu wampinji yejima. Kuhiñahu, nazatili yaaka yitanu mumudimu wawupayiniya. Chayinu mpinji, nidi namuzañalu chineli nashili maana hamudimu waYehova nawansi wami. Inakuditoñesha wanyi.”

17, 18. Tunateli kumuzatila ñahi Yehova chiwahi?

¹⁷ Neyi tumwimbujola Yesu, tukwikala akwaKristu apama. Tukukundama kwakwihi naYehova nawa mpwila yetu yakumuzatila yikuswejelaku. Muntu nateli kumuzatila chiwahi Yehova neyi wapama. Yesu walejeli atumbanji twindi nindi: “Chejeji chenu chitoñekaña kumesu awantu, kulonda amonaña nyidimu yenu yayiwahi, alemeshaña Tata yenu wudi mwiwulu.”—Matewu 5:16.

¹⁸ Tunamoni mukwaKristu wapama chinateliyi kuleta kunuñañana muchipompelu. MukwaKristu wamwekeshaña cheñi nindi wapama kwesekeja nachazatishañayi chinleji chindi. Chinleji chetu chinateli kutukwasha ñahi kufukula chiwahi? Nawa tunateli kulemesha ñahi chinleji chawakwetu? Twakakula awa malwihu muchibaaba chinalondeluhu.