1. (a) Chumanyi chamumwekeneni Petulu hakaluñalwiji kaÑaliliya? (Talenu mwevulu wakutachikilahu.) (b) Muloñadi Petulu chatachikiliyi kunekama?

 IFUKU dimu nawufuku, kapostolu Petulu nawatumbanji amakwawu akabakeni kwawuka kaluñalwiji kaÑaliliya muloña wampepela nimankanda. Hohenohu amweni Yesu nakwenda hakaluñalwiji. Petulu wamutambikili Yesu, wamwilili Yesu nindi nleji ninzi kuwudi. Yesu chamulejeliyi Petulu kuya kwadiñayi, wafumini muwatu nakuya. Hashimbwili wanyi, Petulu watachikili kunekama. Muloñadi? Muloña watalili mankanda nimpepela dichi watiyili woma. Petulu wabidikili kulonda amukwashi, dichi Yesu wamukwatili nawa wamulejeli nindi ‘Eyi wukweti chikuhwelelu chantesha, wunalulutilidi?’—Matewu 14:24-32.

2. Nsañwinyi yitukuhanjeka?

² Tuhanjekenu yikuma yisatu yitunateli kudizila kudi Petulu kutalisha hachikuhwelelu: (1) chamwekesheliyi Petulu nindi wakuhweleli Yehova kumukwasha, (2) chaletesheli chikuhwelelu chaPetulu chitachiki kukeha, ni (3) chamukwashili Petulu kwikala cheñi nachikuhwelelu. Kuhanjeka haniyi  yikuma kukutukwasha ‘kwimana chakola muchikuhwelelu.”—1 Akorinda 16:13.

3. Chumanyi chaletesheli Petulu yafumi muwatu, nawa chumanyi chitwela chadifwanaku?

³ Petulu wadiña nachikuhwelelu chakola. Muloñadi wutunahosheli mwenimu? Yesu chamwitejeliyi, Petulu wafumini muwatu nawa watachikili kwenda hamenji. Wakuhweleli nindi Nzambi wukumwinka ñovu yakwenda hamenji neyi chenkeliyi Yesu. Munjila yoyimu, chatwililiyi Yesu kwikala atumbanji twindi, twadihanini kudi Yehova nawa twapapatisheweli. Muloñadi? Muloña twamukuhweleleli Yehova niYesu nawa twelukili chikupu netu akatukwasha.—Yowanu 14:1; tañenu 1 Petulu 2:21.

4, 5. Muloñadi chichalemena kwikala nachikuhwelelu?

⁴ Chikuhwelelu chalema nankashi. Petulu wendeli hamenji muloña wadiña nachikuhwelelu, chuma chamweneñawu antu nawu chakala. Chikuhwelelu chinateli kutukwasha kwila yuma yinateli kumwekana neyi yakala. (Matewu 21:21, 22) Etu amakwawu twahimpa chikupu yililu yetu chakwila antu atwilukili kunyima anakutujina. Twahimpili yililu yetu muloña twamukeña Yehova nawa watukwashili kulonda tuhimpi. (Tañenu Akolose 3:5-10.) Twadihanini kudi Yehova muloña twamukuhweleleli, twekalili amabwambu jindi, chuma chitunateli kubula kwila nañovu jetu—Aefwesesa 2:8.

⁵ Chikuhwelelu chatukwashaña kwikala akola. Chakutalilahu, chikuhwelelu chatukwashaña kushinda kukulukuka kwaDiyabolu, chilumbu chetu wukweti ñovu. (Aefwesesa 6:16) Kukuhwelela Yehova kwatukwashaña kubula kwakama neyi tudi mukukala. Muloña Yehova wakana nindi wakatwinka yuma yitwakeñaña neyi tumukuhwelela nikutwamijaku Wanta windi. (Matewu 6:30-34) Yehova watwikana cheñi wumi wahaya nyaka neyi tumukuhwelela.—Yowanu 3:16.

6, 7. (a) Tunateli kwesekeja nanka mpepela nimankanda amutiyishili Petulu woma? (b) Muloñadi wutwatelela kwiluka netu chaswayi kujimbesha chikuhwelelu chetu?

⁶ Petulu chendeleñayi Hejiya daÑalaliya, watiyili woma. Muloñadi? Muloña wampepela nimankanda. Yumiyi tunateli kuyesekeja nayihuñu yayivulu nikweseka kunakumonawu akwaKristu makonu. Hela chakwila kukala kunasweji, Yehova nateli kutukwasha kwikala akola. Anukenu yuma yamumwekeneni Petulu. Bayi neyi watachikili kujiya hamuloña wampepela nimankanda amuhumineñaku. Ilaña, Bayibolu yahosha nawu: “Chamweniyi mpepela, hakutiya woma.” (Matewu 14:30) Petulu walekeli kutala kudi Yesu nakutachika kushinshika ñovu yampepela. Dichi chikuhwelelu chindi chakeheli.  Munjila yoyimu, neyi tusweja kudakamena nakukala kutunakumona, tukutachika kujinoka netu Yehova hanateli kutukwashaku.

⁷ Twatela kwiluka netu chidi chaswayi kujimbesha chikuhwelelu chetu. Muloñadi? Muloña Bayibolu yahoshaña nawu kujimbesha chikuhwelelu ‘hinshidi yanyakalaña kutulamata.’ (Aheberu 12:1) Kufwana Petulu, neyi tushinshikaña hayuma yatama, chikuhwelelu chetu chikuzeya. Tunateli kwiluka ñahi neyi chikuhwelelu chetu chinakujiya? Malwihu analondelihu akutukwasha kudishinshika etu aweni.

8. Yikaninu yaNzambi yinateli kumwekana ñahi neyi yalala wanyi kubadika chiyamwekeneña hakusambila?

⁸ Komana inakukuhwelela yikaninu yaNzambi neyi chinayikuhweleleli hakusambila? Chakutalilahu, Nzambi wakana kujilumuna kaayi kaSatana. Komana twadiñijaña muyisela yamboka-mboka yamukaayi kaSatana? Neyi dimu, tunateli kutachika kujinooka neyi kukuma kudi mukamwihi. (Habakuki 2:3) Toñojokenu hachakutalilahu chikwawu. Yehova watwinkeli mulambu wefutu danyiloña nawa watukana kutwanakena nyiloña yetu. Ilaña neyi tushinshikaña hayuma yakunyima, tunateli kutachika kujinooka neyi Yehova natwanakeni chikupu. (Yililu 3:19) Chikufumamu, muzañalu wetu wakumukalakela Nzambi wukumana nawa tukuleka kushimwina.

9. Chumanyi chinateli kumwekana neyi tushindamena hayuma yakuditiyisha etu aweni kuwaha?

⁹ Komana nichidi kumukalakela Yehova namuchima wejima? Neyi tumukalakelaña Yehova chikupu, chikutukwasha kukuhwelela yuma yakumbidi. Indi neyi tutachika kushindamena hayuma yakuditiyisha etu aweni kuwaha? Chakutalilahu, tunateli kwiteja mudimu wukweti nfwetu yayiwahi, ilaña hitukuwanaña mpinji yakumukalakela Yehovaku. Chumichi chinateli kuzeyesha chikuhwelelu chetu nawa tukutachika “kushimpokela,” hakumuzatila Yehova kubadika chitwatela kumuzatila.—Aheberu 6:10-12.

10. Tunateli kumwekesha ñahi netu twamukuhwelela Yehova neyi twanakena akwetu?

¹⁰ Nanakenaña akwetu swayi wanyi? Neyi akwetu atwila katama, twayihililaña hela kuleka kuhosha nawu? Neyi dichitwelaña, dikwila nawu twashaña maana hakutama kwatwililiwu. Kwanakena akwetu kwamwekeshaña nawu twamukuhwelela Yehova. Munjilanyi? Muntu chatwilayi katama, wekalaña namukudi nanetu.  Chitwamuvuluna Yehova, twekalaña namukudi nayena. (Luka 11:4) Dichi, chitwanakena akwetu twamwekeshaña nawu twamukuhwelela Yehova. Twamukuhwelela netu wukutukiswila nawa nkisu yindi yabadika nkisu yitunateli kutambwila neyi twanakena muntu watwilili katama. Atumbanji twaYesu niwena adizili nawu atela kwikala nachikuhwelelu kulonda anakeneña akwawu. Yesu chayilejeliyi kwanakena antu ayilileña katama mapampa kakavulu, atumbanji twindi amulombeli nawu: “Tuvulishili kukuhwelela kwetu.”—Luka 17:1-5.

11. Yumanyi yinateli kutukañesha kubula kwiteja kufumba?

¹¹ Nahilaña neyi afumba? Mwatela kusendamu chikuma mukufumba chatela mushinshiki yiluwa yamuntu wunayifumbi hela njila mwayifumbilayi. (Yishimu 19:20) Zatishenu iku kukooleka kulonda mutachiki kutoñojoka neyi chatoñojokañayi Yehova!

12. Muloñadi chichatamina neyi muntu yatobelaña antu anakulombola makonu?

¹² Natobaña nawantu anakulombola muchipompelu? AIsarela chiyatachikiluwu kusha maana hansañu yatama yashimwinuwu akwakwendesha ituña ikumi, atachikili kuyitobela aMosi naAroni. Dichi Yehova wamwilili Mosi nindi “Awa antu saña andiwilawu tahindi?” (Kuchinda 14:2-4, 11) Yehova welukili nindi aIsarela amukuhweleleli wanyi muloña atachikili kutobela aMosi naAroni, amayala atondeliyi. Munjila yoyimu, neyi tutobelaña antu anakulombola antu jaYehova makonu, chikumwekesha nawu hitukukweti chikuhwelelu chakola naNzambuku.

13. Muloñadi chitukubulila kuneña neyi tumona netu chikuhwelelu chetu chinazeyi?

 ¹³ Hanyima yakushinshika hanawa malwihu bayi muneñaku neyi mwiluka nenu chikuhwelelu chenu chinazeyi. Anukenu nenu nikapostolu Petulu niyena watiyili woma nawa watachikili kujinooka. Yesu wayifumbili cheñi atumbanji twindi ejima hamuloña wakwikala ‘nachikuhwelelu chantesha.’ (Matewu 16:8) Hela chochu, tunateli kudizilaku chikuma chalema kuyuma yamumwekeneni Petulu. Talenu chuma cheliliyi Petulu hanyima yakwila natachiki dehi kujinooka nikunekama mukaluñalwiji.

14, 15. (a) Petulu welili ñahi chatachikiliyi kunekama? (b) Tunateli “kutalisha” ñahi kudi Yesu?

¹⁴ Petulu welili ñahi chatachikiliyi kunekama? Petulu welukili kusala, kachi wasalili nakuya muwatu. (Yowanu 21:7) Hanu dinu, muloñadi chabuliliyi kusala? Muloña wakeñeleña wanyi kudipulwisha yomweni. Washili maana kudi Yesu nawa wetejeli kumukwasha. Neyi twiluka netu chikuhwelelu chetu chinazeyi, twatela kwimbujola Petulu. Tunateli kumwimbujola ñahi?

¹⁵ Neyi chochataliliyi Petulu kudi Yesu cheñi kulonda yamukwashi, ninetu twatela “kutalisha” kudi Yesu. (Tañenu Aheberu 12:2, 3.) Ilaña tunateli kumumona wanyi namesu kapu neyi chamumweniyi Petulu. Hanu tunateli “kutalisha” ñahi kudi Yesu? Kuhitila mukudiza nsañu yatañishileñayi, yuma yelileñayi nikumwimbujola. Neyi twila mwenimu, tukwikala nachikuhwelelu chakola. Tuhanjekenu hachitunateli kumwimbujola Yesu.

16. Bayibolu yinateli kutukwasha ñahi kukolesha chikuhwelelu chetu?

¹⁶ Kuhwelelenu Bayibolu. Yesu welukili chikupu nindi Bayibolu Hizu daNzambi nawa mwekala kufumba kwakuwahi. (Yowanu 17:17) Hakwila nawu tumwimbujoli Yesu, twatela kutañaña Bayibolu mafuku ejima, kudiza nikutoñojoka chikupu nsañu yitunakudiza. Twatela cheñi kuwana ñakwilu yamalwihu itukweti. Chakutalilahu, mwalala mwakuhwelela nenu tunakushakama mumafuku akukuminina? Koleshenu chikuhwelelu chenu kuhitila mukudiza wuprofwetu wunakumwekesha nawu tunakushakama mumafuku akukuminina. Munakukeña kukuhwelela chikupu yuma yakanayi Nzambi kumbidi? Komana dizenuña wuprofwetu washikijewa dehi. Mwakuhwelela chikupu nenu Bayibolu yinateli kutukwasha makonu? Mwatela kutaña nsañu yahosha hadi amanakwetu niahela ahimpili yihandilu yawu muloña wakudiza Bayibolu. * (Talenu tumazu twaheshina.)—1 Atesalonika 2:13.

17. Chumanyi chamukwashili Yesu kuumika kweseka kwasweja, nawa tunateli kumwimbujola ñahi?

¹⁷ Shenu maana hankisu yakanayi Yehova. Yesu washili maana hankisu yakumbidi nawa chumichi chamukwashili kuumika kweseka kwasweja. (Aheberu 12:2) Washili wanyi maana kuyuma yamukaayi. (Matewu 4:8-10) Tunateli kumwimbujola ñahi Yesu? Tunateli kumwimbujola neyi tutoñojokaña chikupu hayikaninu yaYehova. Difwikijenu mudi mwituña dadiha. Sonekenu hela leñenu yuma yimukela muParadisa. Hela sonekenu antu akasañuka imunakukeña kuhanjeka nawu niyuma yimukahanjeka nawu.  Monenuña iyi yuma nenu Nzambi wayikana nkawenu bayi nawakwenuku neyi chayimweneñayi Yesu.

18. Chumanyi chikuyikwasha kwikala nachikuhwelelu chakola?

¹⁸ Lombenu ayivulishili chikuhwelelu. Yesu walejeli atumbanji twindi kumulomba Yehova spiritu yajila. (Luka 11:9, 13) Chimukulombaña spiritu yajila, lombenu ayivulishili chikuhwelelu. Chikuhwelelu chekala hakachi kanyikabu yaspiritu yajila. Mwatela kutena chuma chimunakukeña mukulomba. Chakutalilahu, Neyi chayikalilaña kwanakena, mulombenu Yehova kulonda mwikali nachikuhwelelu chakola nawa yayikwashi mwanakeneña.

19. Antu amuchidinyi itwatela kutonda kwikala amabwambu?

¹⁹ Tondenu amabwambu akweti chikuhwelelu chakola. Yesu watondeli amabwambu jindi chiwahi. Amabwambu jindi apostolu adiña nachikuhwelelu, ashinshika nawa ovwahila. (Tañenu Yowanu 15:14, 15.) Mwimbujolenu Yesu kulonda mutondi amabwambu chiwahi. Atela kwikala antu akweti chikuhwelelu chakola amwovwahilaña Yesu. Amabwambu amawahi adihitaña mumbadi wanyi neyi anakudifumba nawa adihililaña wanyi.—Yishimu 27:9.

20. Chumanyi chikumwekana neyi tukwasha akwetu kukolesha chikuhwelelu chawu?

²⁰ Kwashenu amakwawu kwikala nachikuhwelelu chakola. Nsañu yahosheleñayi Yesu niyuma yelileñayi yakwashili atumbanji twindi kwikala nachikuhwelelu chakola. (Maku 11:20-24) Dichi twatela kumwimbujola Yesu. Neyi twila mwenimu, tukukolesha chikuhwelelu chetu nichawakwetu. (Yishimu 11:25) Munateli kukwasha ñahi antu amwiluña denu dimwashimwinaña? Neyi munakudizisha antu Bayibolu, yikwashenu eluki nawu Nzambi wekala kwoku, watwakamenaña nawa nenu Bayibolu Hizu daNzambi. Munateli kukwasha ñahi amanakwenu niahela kwikala nachikuhwelelu chakola? Neyi mwiluka nenu manakwetu nakutobela amanakwetu anakulombola, bayi mushikena dakumwambukaku. Ilaña wanenu njila yakukoleshelamu chikuhwelelu chindi. (Yuda 22, 23) Neyi muchidi kuya kushikola nawa antañishi hiyakuhosha nsañu yakwila nawu yuma yadileñeli yayeni, ikalenu ahamuka hakuyileja yuma yimwakuhwelela hakuleña. Mukuhayama chikuzañalalawu antañishi niakwenu akwashikola.

21. Yehova watukanadi?

²¹ Yehova naYesu amukwashili Petulu kuleka kujinoka nikutiya woma. Mukuhita kwampinji Petulu wekalili nachikuhwelelu chakola, dichi twatela kumwimbujola. Munjila yoyimu, Yehova watukwashaña wejima wetu kwimana chakola muchikuhwelelu. (Tañenu 1 Petulu 5:9, 10.) Twatela kuzata nañovu hakwila tukoleshi chikuhwelelu, nawa Yehova nateli kutukiswila hañovu jetu.