1, 2. Yehova watudizisha ñahi kumukeña?

 TATA yawantu nateli kudizisha anyanindi chachiwahi neyi yayimikila chakutalilahu chachiwahi. Neyi yayikeña, dikwila nawu nakuyidizisha kwikala nakukeña. Kwosi muntu watukeñahu dehi neyi chatukeñayi Tata yetu, Yehova. Twamwekeshaña kukeña “nanochu chasambililiyi yena kutukeñetu.”—1 Yowanu 4:19.

² Yehova wamwekeshaña ñahi nindi diyi ‘wasambilili kutukeñetu’? Bayibolu yahoshaña nawu: “Hohitwachidiñi akwanshidi, Kristu watufwilili.” (Aroma 5:8) Tata yetu wukweti kukeña, Yehova, waheni Mwanindi neyi ifutu danyiloña kulonda yatukuuli kunshidi nikukufwa. Ichi chawaana chalema chatuleñelaña kukundama kwakwihi naYehova nikumukeña. Yehova watwimikila chakutalilahu kuhitila mukuhana mulambu walema. Watudizishaña kwikala nakukeña kuhitila mukubula ichima nikwikala akwakuhana.—1 Yowanu 4:10.

3, 4. Tunateli kumwekesha ñahi netu twamukeña Nzambi?

³ Kukeña hichililu chaYehova chabadika. Dichaletesheli Yesu kuhosha nindi lushimbi lwalema lwakwila nawu: “Keñaku Yehova Nzambi yeyi namuchima weyi wejima, nawumi  weyi wejima, namaaneyi ejima, nañovu jeyi jejima.” (Maku 12:30) Yehova wakeñaña nindi tumukeñi “namuchima wetu wejima.” Yehova watiyaña kutama neyi tukeña muntu hela chuma chacheñi kubadika chitwamukeña yena. Ilaña kukeña kutwamukeña hikwatela kwikala hohu muyitoñojokaku. Yehova cheñi wakeñaña nindi tumukeñi ‘namaanetu ejima’ ‘ninañovu jetu jejima.’ Dikwila nawu kukeña kutwamukeña Yehova kwabombelamu chitwatoñojokaña niyuma yitwelaña.—Tañenu Mika 6:8.

⁴ Dichi twatela kumukeña Yehova namuchima, nawumi, namaana niñovu yetu yejima kushilahu niyuma yejima yitukweti. Tukumwekeshaña netu twamukeña chikupu neyi tumutwamijañaku muchihandilu chetu. Muchibaaba chinafumuhu, twahanjekeli jinjila jiwana mwamwekeshelañayi Yehova kukeña kwindi kwabadika kudi anyanindi. Ichi dinu tushinshikenu chitunateli kukolesha kukeña kwetu naYehova nikumwekesha netu twamukeña.

5. Tunateli kwiladi, neyi tutoñojoka hayuma yejima yatwililayi Yehova?

⁵ Neyi muntu yayinka chawaana, twasakililaña. Neyi muchilemesha ichi chawana, munateli kuchizatisha. Yakoba wasonekeli nindi: “Yuma yayiwahi yahanañawu yejima, niyamukunkulu yalala yejima, yasulukaña kwiwulu kudi Tata yayejeji; kudi yena hikwekala kubalumuka, hela mwevulu wakushetumukaku.” (Yakoba 1:17) Twasakililaña chikupu chineli Yehova watwinkaña yuma yejima yitwakeñaña hakwila tuhandi nikwikala namuzañalu. Twamonaña chatukeñayi nawa twakeñaña kumwekesha netu twamukeña. Komana dichimwatiyaña ninenu?

6. AIsarela ateleleli kwiladi hakwila nawu Yehova yatwalekuhu kuyikiswila?

⁶ AIsarela atambwilili yuma yayivulu yayiwahi kufuma kudi Yehova. Hayaaka yayivulu, wayilombweleña nanshimbi jindi nikuyinka yuma yayivulu yakeñeleñawu kulonda atwalekuhu kuhanda. (Kuhituluka 4:7, 8) Nawa aIsarela amwekesheleña kusakilila kudi Yehova kuhitila mukwovwahila nshimbi jindi. Chakutalilahu, neyi anakuhana nyilambu kudi Yehova, ahanineña ‘nyikabu yayiwahi yatachi yamahawu’ yamwituña. (Kwidika 23:19) AIsarela elukili nawu Yehova nateli kutwalekahu kuyikiswila neyi atwalekahu kumwovwahila nikumulambula yuma yayiwahi.—Tañenu Kuhituluka 8:7-11.

7. Tunateli kumwekesha ñahi netu twamukeña Yehova neyi tuzatisha ‘yuma yetu’?

⁷ Ninetu tunateli kumwekesha netu twamukeña Yehova kuhitila mukumwinka ‘yuma yetu.’ (Yishimu 3:9) Twamwinkaña kuhitila mukuzatisha yuma yetu yitukweti hakwila tumulemeshi. Chakutalilahu, tunateli kuhana yawana yakukwasha mudimu waWanta muchipompelu chetu nimukaayi kejima. Hela tukweti yuma yayivulu hela nehi, wejima wetu twatela kuzatisha yuma yitukweti hakwila tumwekeshi kukeña kwetu kudi Yehova. (2 Akorinda 8:12) Ilaña kudi njila jikwawu mutunateli kumwekesha netu twamukeña Yehova.

8, 9. Chumanyi chikwawu chitunateli kwila kulonda Yehova yeluki nindi twamukeña? Mike nichisaka chindi elilidi?

 ⁸ Yesu watulejeli nindi bayi twakama hayakudya niyakuvwalaku, ilaña tusambileña kukeña Wanta. Tata yetu watukana nindi wukutwinkaña yuma yitwakeñaña. (Matewu 6:31-33) Twamukuhwelela Yehova nawa tweluka netu wukutwinkaña yuma yatukanayi. Muloña neyi wumukeña muntu nankashi wunateli kumukuhwelela. Dichi neyi tumukuhwelela chikupu Yehova, tukumwekeshaña netu twamukeña. (Masamu 143:8) Twatela kudihula netu: ‘Komana yuma yinafuukulaña, chinazatishaña mpinji niñovu yami yamwekeshaña nawu namukeña Yehova chikupu? Komana nashindamena hadi Yehova nami wukuñakamenaña mpinji yejima?

⁹ Mike nichisaka chindi amukuhweleleli Yehova. Mike hadiñayi kansi, wafwilileña nankashi kuya nakushimwina kwituña dacheñi. Mpwila yindi yatwalekeluhu hela chakwila wasumbwili nikwikala nawanyana ayedi. Mike nichisaka chindi chatañiluwu nsañu yawamanakwetu niahela azatilileña kudi kukankila kweneni, afukwili kupelesha chihandilu chawu. Alandishili itala dawu nakubukila mukaditala kanyanya. Mike cheñi wakehesheluku akasitoma ekalayi nawu mubizinisi yindi nawa wawanini njila yakuzatilamu bizinisi yindi kuzatisha Intaneti neyi nayi dehi kwituña dacheñi. Chafuminumu, Mike nichisaka chindi abukilili kwituña dacheñi nawa adiluñishili chikupu mudimu wakushimwina. Mike wahosheli nindi, “Twamweni kushikijewa kwamazu aYesu asonekawu haMatewu 6:33.”

10. Muloñadi chichawahila kutoñojoka hayuma yitunakudiza hadi Yehova neyi cheliliyi Mwanta Davidi?

¹⁰ Mwanta Davidi wasonekeli nindi: “Mawulu ashimunaña kulema kwaNzambi, luzwizu lwamwekeshaña wukalawenu windi.” Wabombelelihu nindi: “Nshimbi jaYehova jalala hohu, jahandishaña muchima wamuntu; yuma yashimunañayi Yehova yakashinshi, yalejaña wakadi maana.” Davidi chatoñojokeleñayi hanshimbi jaYehova jalala nikuleña kwindi kwalubanji, wakundamini kwakwihi naYehova nawa wakeñelaña kwila yuma yikumwekesha nawu wamukeña Nzambi. Davidi wahosheli nindi: ‘Mazu amukanwa kami, niyitoñojoka yamumuchima wami yiikali yakukutiyisha kuwaha, eyi Yehova, yeyi ilola dami, yeyi nkuuli yami.’—Masamu 19:1, 7, 14.

11. Tunateli kuzatisha ñahi yuma yatudizishañayi Yehova kulonda tumwekeshi netu twamukeña? (Talenu mwevulu wakutachikilahu.)

¹¹ Makonu, Yehova watudizishaña yuma yayivulu hadi yomweni, nkeñelu yindi, yuma yaleñayi Nizu dindi. Kaayi kakoleshaña antu kudiza nankashi, ilaña  mashikola ahewulu ayileñelaña aleki kumukeña Nzambi. Kwambukaku, Yehova hakeñaña nindi tudizi hohuku, ilaña watukwashaña kwikala namaana. Wakeñaña nindi tuzatisheña yuma yitunakudiza kulonda tuhetelumu nikukwasha amakwawu. (Yishimu 4:5-7) Chakutalilahu, wakeñaña nindi tushimwini antu “nsañu yalala chikupu” nikuyikwasha kulonda akapuluki. (1 Timotewu 2:4) Twamwekeshaña netu twamukeña Yehova niantu neyi tudizishaña antu amavulu nsañu yahosha haWanta waNzambi niyuma yiwukelila antu.—Tañenu Masamu 66:16, 17.

12. Muhela wumu wakansi wahosheli nindidi hamukanda watambwililiyi kudi Yehova?

¹² Atwansi niwena atela kutoñojoka hayuma yayinkayi Yehova niyuma yayidizishayi. Shannon wanukaña chatiyiliyi hakupompa kweneni hadiñayi nayaaka 11 nawa muhelindi wadiña nayaaka 10. Hakupompa kwaNkambi kwadiña namutu wakwila nawu “Kwakama Nzambi”, atwansi ejima kushilahu Shannon namwanyikindi ayilejeli kushakama heluña dayiloñesheleluwu. Hatachi, Shannon watiyili woma. Ilaña wahayamini chelili atwansi ejima ayinki mukanda waQuestions Young People Ask​—Answers That Work. Iwu mukanda wawuwahi wamuleñeleli kwiluka nindidi? Wahosheli nindi: “Dihu nelukili nami mwalala Yehova wekalakoku nawa wankeña chikupu. Twakooleka nankashi muloña Yehova, Nzambi yetu muneni watwinkaña yuma yayiwahi chidi neyi iwu mukanda.”

13, 14. Twatela kwila ñahi neyi Yehova yatufumba nawa muloñadi?

¹³ Bayibolu yahosha nawu: ‘Muloña Yehova wafumbaña antu akeñayi; dimu mwelaña tata yamuntu namwanindi atiyayi kuwaha.’ (Yishimu 3:12) Neyi twiteja Yehova kutufumba nikutudizisha, tukwilaña yuma yaloña nawa tukushakama mukuwunda. Ilaña, “kufumba kwejima hikwatiyishaña kuwaha hanuku, kwaneñeshaña.” (Aheberu 12:11) Hela chochu, twatela kwila ñahi neyi Yehova yatufumba? Twatela kudiwula wanyi kufumba kwaYehova hela kutwalekahu kuhila neyi tunakeñi wanyi mwanatufumbiyi. Chineli twamukeña Yehova, twamutiyililaña neyi yatufumba nawa twahimpaña.

¹⁴ Mumafuku aMalaki, a Yudeya amavulu amutiyilileña wanyi Yehova. Hela chakwila nyilambu yamulambwileñawu yamutiyishileña kutama, wena ashiluku maana wanyi. Dichi Yehova wayizuwilili nankashi. (Tañenu Malaki 1:12, 13.) Yehova wayizuwilili kakavulu, ilaña akaanini kumutiyilila. Wayilejeli nindi: “Ami nukuyikunkwila ishiñu, nukushiña ninkisu jenu.” (Malaki 2:1, 2) Kuhosha hohu walala, neyi tukaana kutiyilila kufumba kwaYehova hela kukwimona netu kwalema wanyi, wubwambu wetu naNzambi wukumana.

15. Yililu yamuchidinyi yitwatela kutondolwela?

¹⁵ Kaayi kaSatana kaleteshaña antu kuditiya nikwikala nechima. Antu amavulu akeñaña wanyi kuyifumba hela kuyileja chakwila. Amakwawu atiyililaña kufumba muloña wekakeja. Bayi twila mwenimuku. Bayibolu yatukanishaña ‘kulondeja mwelañawu antu amakonu.’ Dichi, twatela kwiluka yuma yakeñañayi Yehova kudetu nikumutiyisha kuwaha. (Aroma 12:2) Wazatishaña kuloñesha kwindi kulonda yatufumbi hampinji yatelela. Chakutalilahu, atulejaña chitwatela kudikunda nawantu awamayala hela awambanda, chakutonda amabwambu niyuma yitwatela kwila hampinji yakunooka. Neyi twiteja kufumba kwaYehova chakufuma  hamuchima nikuhimpa kulonda tumutiyishi kuwaha, tukumwekeshaña kusakilila hawunlomboli windi nawa netu twamukeña hama.—Yowanu 14:31; Aroma 6:17.

16, 17. (a) Muloñadi wutwatela kusandujolela kulonda twiluki chinakutoñojokayi Yehova hanoyu nsañu henohu kanda tufuukuli? (b) Chumanyi cheliluwu aIsarela chatela amukuhweleli Yehova?

¹⁶ Anyana anyanya ashindamenaña hawukwashu nikukiñewa kwawanvwali jawu. Anyana akula dehi niwena anateli kukeña wukwashu kudi anvwali jawu. Hela chakwila anateli kudifuukwila aweni, eluka nawu anvwali jawu anateli kuyikwasha kufuukula chiwahi. Tata yetu, Yehova, watwiteja kufuukulahu etu aweni. Chineli twamukuhwelela nikumukeña, twalombaña wukwashu windi nawa twasandujolaña kulonda twiluki chatoñojokañayi hanoyu nsañu henohu kanda tufuukuli. Neyi tushindamena hadi Yehova, wukutwinka spiritu yindi yajila kulonda yitukwashi kwila mwaloña.—Afwilipi 2:13.

¹⁷ Mumafuku aSamweli, aIsarela ayishindili kudi aFwilistinu. Chatela alombi wukwashu kudi Yehova, ahosheli nawu: “Twakaleti chimbañu chachitiyañenu chaYehova chidi kuShilo, chakenzi kunu chakekali mukachi ketu, chakatwamwini kudi ayilumbu jetu.” Yumanyi yafuminumu? “Kwadiña kutapana kweneni nankashi; kwadimbokeli aIsarela akwakwendela hamaseki makombakaji makumi asatu. Akwatili nichimbañu chaNzambi.” (1 Samweli 4:2-4, 10, 11) A Isarela atoñojokeleña nawu kwikala naChimbañu mukachi kawu kukuleñela Yehova yayikwashi nikuyikiña. Ilaña, alombeli wanyi wukwashu kudi Yehova hela kusandujola kulonda eluki chatoñojokeleñayi. Elili mwatoñojokeleñawu nawu mwaloña nawa chumichi chaletesheli ayishindi.—Tañenu Yishimu 14:12.

18. Indi Bayibolu yatulejaña nawudi hakumukuhwelela Yehova?

¹⁸ Ñimbi yamasamu washindameneni hadi Yehova nawa wamukeñeli chikupu wasonekeli nindi: “Muchiñeji Nzambi, namba kamusakilila hohu nachina chakunkwashayi namesu indi. Eyi Nzambi yami, muchima wami wunadihombi dehi mukachi kami: Dichi chinukukwanukaña.” (Masamu 42:5, 6) Komana dichimwatiyaña hadi Yehova? Komana mwatiyaña nenu mwakundama kwakwihi naNzambi nawa mwamukuhwelela? Munateli kumukuhwelela Nzambi chikupu. Bayibolu yatulejaña nawu: “Mukuhweleli Yehova namuchima weyi wejima, bayi wushindamena kukashinshi keyeyi awenuku. Mwitijaña Yehova mwejima muwukwilaña, niyena wakakwolwelaña njila jeyi.”—Yishimu 3:5, 6.

19. Yumanyi yitwatela kwila kulonda Yehova yeluki nindi twamukeña?

¹⁹ Chineli wasambilili kutukeña, Yehova watudizisha chitwatela kumukeña. Dichi tutoñojokeña mpinji yejima hayuma yatwililayi nichatukeñayi. Nawa twileña yuma yikumwekesha nawu twamukeña namuchima, nawumi, namaana ninañovu jetu jejima.—Maku 12:30.