1. Kapostolu Yowanu watukolesheli kutoñojokadi, nawa muloñadi?

 KAPOSTOLU Yowanu watukolesheli kutoñojoka chikupu hakukeña kwaNzambi kwabadika kwatukeñayi. Ha 1 Yowanu 3:1, twatañañahu nawu: “Tiyenu kukeña kwanatukeñiyi Tata!” Twakundamaña kudi Yehova nikumukeña nankashi neyi tutoñojokaña chikupu chatukeñayi nichatumwekeshelañayi kukeña.

2. Antu amakwawu akañenyañadi kwiluka chayikeñayi Nzambi?

² Chawushona, antu amakwawu eluka wanyi chayikeñayi Nzambi. Atoñojokaña nawu Nzambi wakamenaña wanyi antu. Hadaha eluka nawu Nzambi wahanaña hohu nshimbi nikubabesha abulaña kumwovwahila. Muloña wantañishilu yakutwamba, antu amakwawu atoñojokaña nawu Nzambi watama muchima wukumukeña niwanyi. Antu amakwawu ahoshaña nawu Nzambi wakeña antu ejima hela chakwila elaña yuma yatama. Ilaña kudiza  Bayibolu kunayikwashi kwiluka walala hadi Yehova. Muneluki nenu kukeña hichililu chindi chabadika nawa dichaletesheli yahani Mwanindi neyi ifutu danyiloña yetu. (Yowanu 3:16; 1 Yowanu 4:8) Hela chochu, chinateli kuyikalila kwiluka chayikeñayi Yehova muloña wayuma yimwahitamu.

3. Tunateli kwiluka ñahi netu Yehova watukeña?

³ Hakwila twiluki nawu Yehova watukeña, twatela kwiluka netu Yehova diyi watuleñeli. Watwinka wumi. (Tañenu Masamu 100:3-5.) Dimuloña waweni Bayibolu chiyatenenaña muntu watachi nawu “mwana kaNzambi.” (Luka 3:38) Yesu niyena watulejeli kutena Yehova netu “Tata yetu wekala mwiwulu.” (Matewu 6:9) Dikwila nawu Yehova hiTata yetu nawa watukeña neyi tata yawantu wukweti kukeña chakeñayi anyanindi.

4. (a) Yehova hiTata yetu wamuchidinyi? (b) Tukuhanjekadi muchinu chibaaba nichinalondeluhu?

⁴ Antu amakwawu chayikalilaña kwiteja nawu tata yawantu nateli kwikala nakukeña. Hadaha anukaña chayikabishileñawu kuwansi kudi atata yawu. Yehova wakabishaña wanyi anyanindi. Hitata yetu wamuwahi. (Masamu 27:10) Watukeña nankashi nawa watwakamenaña muyuma yejima. Chitweluka netu Yehova watukeña, tukumukeña chikupu. (Yakoba 4:8) Muchinu chibaaba, tukuhanjeka njila jiwana mwamwekeshelañayi Yehova nindi watukeña. Muchibaaba chinalondeluhu, tukahanjeka njila jiwana mutunateli kumwekesha netu twamukeña.

5. Nzambi wenkañadi antu ejima?

⁵ Pawulu chadiñayi muAtena kuGreece, wamweni nindi mwadiña akishi amavulu nawa antu akuhweleleli nawu anzambi jawu diwu ayinka antu wumi. Pawulu wayilejeli hadi “Nzambi waleñeli mpata yamunu mwishina niyuma yejima yidumu.” Wahosheli nindi Nzambi “wenkaña antu wumi nimuuya niyuma yejima” “muloña mudi yena dimu twahandilaña, dimu twendelaña, dimu twekalilaña.” (Yililu 17:24, 25, 28) Yehova watwinkaña yuma yejima yitwakeñaña kulonda tudiluñishi wumi. Toñojokenu hayuma yatwinkayi muloña wakutukeña.

6. Yehova watwinka iseki damuchidinyi? (Talenu mwevulu wakutachikilahu.)

⁶ Chakutalilahu, Yehova watwinka iseki dadiwahi dakushakamamu. (Masamu 115:15, 16) Hamapulaneti ejima aleñayi, iseki dekala dambukaku chikupu. Asayantisiti ahitañana muluzwizu nawa awana nawu kwekala mapulaneti amavulu, ilaña kanda awaneñahu dehi pulaneti munateli kushakama antu. Yehova watwinkaña hohu wanyi yuma yakwila nawu tudiluñisheña wumi ilaña watwinka iseki dadiwahi nawa dalubanji. (Isaya 45:18) Neyi tutoñojoka heseki datwinkayi Tata yetu, Yehova, tukwiluka netu watukeña chikupu.—Tañenu Yoba 38:4, 7; Masamu 8:3-5.

7. Yehova wamwekeshaña ñahi nindi watukeña?

⁷ Yehova watumwekeshela cheñi kukeña hakutwinka wuswa wakumwimbujola. (Kutachika 1:27) Dikwila nawu  tunateli kwiluka netu watukeña nawa tunateli kumukeña. Weluka nindi neyi twiluka netu watukeña tukuzañalala. Anyana atiyaña kuwaha neyi eluka nawu anvwali jawu ayikeña. Neyi mwanuka, Yesu watulejeli nindi tunateli kwikala namuzañalu neyi tukundama kwakwihi naTata yetu, Yehova. (Matewu 5:3) Watwinkaña “yuma yejima nindi tuluñi nachu.” Mwamweni, wahanaña nawa watukeña nankashi.—1 Timotewu 6:17; Masamu 145:16.

8. Muloñadi chitwakeñelaña Yehova kutudizisha?

⁸ Atata yawantu akeña anyanawu nawa akeñaña wanyi anyanawu kuluwankana. Ilaña anvwali amavulu makonu alondelaña wanyi nshimbi jamuBayibolu. Dichi hiyanateli kulombola anyanawu munjila yayiwahuku, chikufumamu hiyakwikala namuzañaluku nawa chikuleta wufwinda. (Yishimu 14:12) Ilaña Yehova  walombolaña anyanindi chachiwahi muloña ‘hiNzambi wansañu yalala.’ (Masamu 31:5) Watulejaña chekalayi. Nawa watulejaña cheñi chitunateli kudifukula kudi yena ninjila mutwatela kuhandila chiwahi. (Tañenu Masamu 43:3.) Yumanyi yatulejayi Yehova yamwekeshaña nawu watukeña nankashi?

9, 10. (a) Muloñadi Yehova chadilumbulwilayi kudi etu? (b) Nsañu yatulejañayi yamwekeshañadi?

⁹ Chatachi, Yehova wadilumbulula yomweni. Wakeñaña nindi tumwiluki. (Yakoba 4:8) Dichi watuleja ijina dindi. MuBayibolu mwekala ijina dindi kapampa kakavulu kubadika majina amakwawu. Yehova watuleja chekalayi. Twelukaña netu wekala namaana niñovu chitwatala yuma yaleñayi. (Aroma 1:20) Neyi tutaña Bayibolu, tukwiluka netu wamuwahi nawa watukeña. Twakundamaña kwakwihi naYehova chitweluka yililu yindi yayiwahi.

¹⁰ Yehova watuleja cheñi chekala nkeñelu yindi. Watuleja nindi twekala amuchisaka chindi. Walumbulula chitwatela kwila kulonda tuleti kuwunda nikunuñañana muchisaka chindi. Bayibolu yahoshaña nawu Nzambi watuleñeli wanyi nawuswa wakufukula kwila yuma yatama niyayiwahi. (Yeremiya 10:23) Yehova weluka yuma yatela kutukwasha. Tunateli kudiluñisha wumi nikwikala mukuwunda neyi twiteja wunlomboli windi nikumwovwahila. Yehova watuleja iyi nsañu muloña watukeña.

11. Tata yetu wukweti kukeña watukanadi?

¹¹ Tata yawantu wukweti kukeña watoñojokaña chikupu yuma yikayikwasha anyanindi kumbidi. Wakeñaña akekali nachihandilu chachiwahi. Chawushona, antu amavulu makonu akamaña hachikekala chihandilu chawu kumbidi hela ombaña mpinji yawu nakuzatila yuma yabulaña kushimbula. (Masamu 90:10) Tata yetu, Yehova watuleja chakushakama chachiwahi nawa watukana yuma yayiwahi kumbidi!

12. Yehova wakwashili ñahi Kena naBaruki?

¹² Yehova chamweniyi nindi Kena hakukeña kwila chuma chatama, wesekeli kumukwasha hakumwihula nindi: Wunazuwilidi? Wunadihombelidi Kumesu? Neyi wukwila chachiwahi hiyakukitiyaku?” (Kutachika 4:6, 7) Kena wakanini kumukwasha kudi Yehova, dichi wamweni yuma yakala. (Kutachika 4:11-13) Yehova wamweni cheñi yililu yatama yadiña naBaruki nindi yamuletesheleña kuzeya nikuneña. Dichi Yehova wamulejeli Baruki  nindi watoñojokeleña mwaluwa nawa wateleleli kuhimpa. Baruki watiyilili kufumba kwaYehova nawa wapulukili.—Yeremiya 45:2-5.

13. Ambuña aYehova ashinshika adizilidi mukweseka mwahitiluwu?

¹³ Yehova watulombolaña nikutufumba muloña watukeña. Bayi neyi watubabeshaña hohuku, ilaña watufumbaña. (Aheberu 12:6) MuBayibolu, twatañañamu hadi ambuña aYehova ashinshika afumbiliyi nawa ekalili antu amawahi. Chakutalilahu, Yosefu, Mosi, niDavidi ahitili mukweseka kweneni. Hadiñawu mukweseka, Yehova wayikwashileña. Nawa yuma yadiziluwu hadiñawu mukweseka yayikwashili hayinkeliyi Yehova nyidimu yamaneni. Neyi tutañaña muBayibolu Yehova chakwashiliyi nikufumba antu jindi, twelukaña chikupu netu watukeña.—Tañenu Yishimu 3:11, 12.

14. Yehova wamwekeshaña ñahi kukeña neyi tunaluwañeshi?

¹⁴ Hela chakwila tunaluwañeshi, Yehova watumwekeshelaña kukeña. Neyi twiteja kufumba kwindi nawa tubalumuka mumuchima, wakatwanakena “nankashi.” (Isaya 55:7) Chumichi chinatalishi mudi? Mazu ahosheliyi Davidi hachanakenañayi Yehova amwekeshaña nawu hiTata yetu wukweti luwi, wahosheli nindi: “Wakwanakenaña mwejima muwaluwilaña; wakuukaña nyisoñu yeyi yejima; Wakuulaña wumi weyi wubuli kukisika; wakuvwikaña chibañula chaluwi nawushona; Nafumishi nyiloña yetu, nayitwali kwakulehi neyi kufumisha kumusela nakushika kumujika.” (Masamu 103:3, 4, 12) Yehova watufumbaña nikutulombola munjila jashiyashana. Mwahimpaña swayi neyi ayifumba? Anukenuña mpinji yejima nenu Yehova watufumbaña muloña watukeña.—Masamu 30:5.

15. Njilanyi yikwawu mwamwekeshelañayi Yehova nindi watukeña?

¹⁵ Tata yawantu wukweti kukeña wakiñaña chisaka chindi kuwubanji. Dichelañayi Tata yetu, Yehova. Ñimbi yaMasamu wahosheli nindi: “Yena wahembaña chachiwahi wumi wawantu indi ajila; wayipulwishaña kudi antu atama.” (Masamu 97:10) Toñojokenu hanichi chuma: Neyi chochimwakiñaña mesu enu muloña alema, Yehova niyena wanyakalaña kukiña antu jindi muloña alema kudi yena.—Tañenu Zekariya 2:8.

16, 17. Yehova wakiñili ñahi antu jindi kunyima nimakonu?

¹⁶ Kufuma tuhu kunyima, Yehova wuchidi kuzatisha añelu jindi kulonda yakiñi antu jindi. (Masamu 91:11) Kañelu wumu wajahili amashidika awaAshuri 185,000 wufuku wumu nawa wakiñili  antu jaNzambi. (2 Anyanta 19:35) Mumafuku awapostolu, añelu apulwishili Petulu, Pawulu niantu amakwawu mukaleya. (Yililu 5:18-20; 12:6-11) Chakatataka, kwadiña njita yeneni mwituña dimu muAfrica. Ituña dadiña muwufwinda muloña antu adiña nakuzuña, kwiya, kwila wuvumbi nikujahañana. Hela chakwila kwosi amanakwetu afwili, amavulu ajimbesheli yuma yawu. Ilaña elukili nawu Yehova wayikeña nawa elukili nawu wayakameneneña. Adiña namuzañalu hela chakwila akabakeni. Chelili ñimenu wakasanji keneni yayi nakuyihempula, wayihwili amanakwetu niahela chaduwu, ahosheli nawu, “yuma yejima yindi chiwahi, tunamusakilili Yehova!”

¹⁷ Ilaña ambuña aYehova amakwawu chidi neyi Stefwanu niamakwawu afwili muloña wakashinshi kawu. Mpinji yikwawu Yehova wakañeshaña wanyi yuma yamuchidiwu kumwekana. Ilaña wakiñaña antu jindi hamu neyi izanvu kuhitila mukuyisoñamisha njila jinateli kuzatishayi Satana kuyidimba. (Aefwesesa 6:10-12) Twawanaña iku kusoñamisha muBayibolu nimunyikanda yasonekaña kuloñesha kwaYehova. Chakutalilahu, twadizaña wubanji wakuzatisha Intaneti, kukeña mali nimafilimu, nyikanda niyisela yamwekeshaña yuma yatama. Mwamweni Yehova watukeña nawa watukiñaña.

18. Mwatiyaña ñahi chayikeñayi Yehova?

¹⁸ Mosi chatoñojokeliyi hayaaka yamukalakeleliyi Yehova welukili nindi Yehova wamukeña. Mosi wahosheli nindi: “Atwikutishi mwani budidi naluwi lweyi, kulonda tutiyi kuwaha nakuzañalala mafuku etu ejima.” (Masamu 90:14) Twakooleka nankashi muloña chatukalilaña wanyi kwiluka netu Yehova watukeña. Twazañalalaña chikupu hakwiluka netu Yehova watukeña! Twatiyaña neyi chatiyili kapostolu Yowanu wahosheli nindi: “Tiyenu kukeña kwanatukeñiyi Tata!”—1 Yowanu 3:1.