HINADIÑA nayaaka 9, nalekeli kukula. Ichi nidi nayaaka 43, ilaña naleha hohu mita yimu. Anvwali jami chiyelukiluwu nawu nakaleha wanyi, anlejeli kuzata nañovu kulonda nibuleña kutoñojoka nankashi hachiminu chami. Natachikili kulandisha nyikabu hetala nawa nahembeleña mesa nawunyonji hinalandishilileña nyikabu. Nawa antu amavulu enjileña nakulanda.

Hela chochu, kuzata nañovu kwahimpili yuma yejima wanyi. Nadiña wamwihi nankashi chakwila nakañenyeña kuhana mali kudi muntu wunakulandisha mushopu. Yuma yejima yankalilileña kwila, ilaña antu amalehi yayipeleleña. Naneñeleña nankashi, ilaña chinashikijili yaaka 14 yuma yahimpili.

Ifuku dimu, aYinsahu jaYehova awambanda ayedi anlandili nyikabu nawa atachikili kundizisha Bayibolu. Hashimbwili wanyi nelukili nami kumwiluka Yehova ninkeñelu yindi kwalema kubadika chinaditiyileña hachiminu. Natiyili kuwaha nankashi. Nakeñesheli nankashi nsona yaMasamu 73:28. Mazu atachi muniyi nsona ahoshaña nawu: “Chachiwahi kukundama kwakwihi naNzambi.”

Chisaka chetu chabukili kufuma kuCôte d’ Ivoire nakuya kuBurkina Faso, nawa chihandilu chami chahimpili chikupu. Kutwashakamineña hatachi, antu enjilili kunmona nashakama nakuladisha nyikabu. Ilaña kwiluña kutwabukilili nadiña mwenyi, dichi antu amavulu añilukili wanyi. Ahayamineña chiyanmona, dichi nashakamini mwitala hadi nyilungu yayivulu. Ilaña nanukili chinatiyili kuwaha kukundama kwakwihi naYehova. Nasonekeli mukanda kukasanji kamutayi kawaYinsahu jaYehova nawa antemesheleli muntu wankukwasha. Kamishonali wejina daNani, wenjili nankutala nahonda.

Nyikwakwa yadiña yatama nankashi nawa mumpinji yanvula mwekalileña mateshi. Kakavulu muhela Nani wadimbukileña nahonda yindi neyi nakwinza nankudizisha, ilaña walekeli wanyi. Ifuku dimu, wanlejeli nindi tuyi chimu nakupompa. Nelukili nami chinaya antu ankusehaña. Kunsenda hahonda nikwena kwadi kuleta kukala kukwawu chineli wakabakenaña kwendesha honda muloña wakutama kwanyikwakwawu. Hela chochu, netejeli  kuya, nanukili mazu amakwawu ekala hansona yinakeña yamasamu akwila nawu: “namwili Mwanta Yehova nami dimu mwani mwakubatamina.”

Mpinji yikwawu twadimbukileña mumateshi, ilaña twashiluku maana wanyi muloña twakeñeli kupompa. Antu Mwitala daWanta ammwekesheleli kukeña nawa anseheleña wanyi. Chimwahitili tukweji 9, napapatisheweli.

Mazu akukumishaku munsona yami yinakeña ahosha nawu “kulonda nishimuni nyidimu yeyi yejima.” Nelukili nami kushimwina kukunkalilaña nankashi. Hela chochu nanukaña mpinji yatachi yinayili nakushimwina kwitala nikwitala. Atwansi niakulumpi ejima anlondeleleña nakuseha chinendeleña. Chankatileña kumuchima, ilaña chinanukili nami niwena anakukeña Paradisa neyi chochinnakuyikeña, nomikili.

Nalandili kakinga katufumbu tusatu kulonda chimpeleleñaku kwenda. Muhela wunazatileña nindi wanshinjikileña kumukandu nawa neyi hitukunkumuka niyena wakandamineña. Hela chakwila hatachi mudimu wakushimwina wakalileña, natachikili kutiya kuwaha chakwila mu 1998, natachikili wupayiniya wampinji yejima.

Nalombweleña atudizi aBayibolu amavulu nawa awana apapatisheweli. Muhelami wutwasemuka nindi ivumu dimu niyena wetejeli chalala. Chinatiya amakwawu chiyanakuyilaku hambidi nankolelaku nankashi. Ifuku dimu dinakatili maleriya, natambwilili mukanda kufuma kuCôte d’Ivoire. Natachikili kudiza Bayibolu hachiisu nakadizi wahayunivesiti yakuBurkina Faso nawa nenkeli manakwetu iwu kadizi. Kadizi wabuukilili kuCôte d’Ivoire. Natiyili kuwaha chinatiyili nawu nekali mukwakushimwina wabula kupapatishewa!

Nawanaña kudihi mali akudikwasha nachu? Kuloñesha kwakwashaña ayifwayi kwandizishili kuchima. Ntañishi wumu wamweni chinazatileña, dichi wahosheli nindi, “Twatela kumudizisha chakutuña sopu.” Andizishili. Natuñilileña hetala sopu yakukosela yakuvwala niyeña. Antu akeña sopu yami nawa alejañaku amakwawu kuyilanda. Nayaña nakuyilandisha amaweni kuzatisha kahonda katufumbu tusatu.

Chawushona, natachikili kukata nyima, dichi mu 2004 nalekeli wupayiniya. Ilaña nichidi kushimwina.

Antu ahoshaña nawu nekala waseha. Mwalala natela kwikala namuzañalu muloña chachiwahi kukundama kwakwihi naNzambi.—Ashimwini aSarah Maiga.