1, 2. Antu amakwawu atoñojokaña nawudi?

 ANTU amavulu amonaña nawu Nzambi washañaku maana wanyi kuyuma yelañawu. Atoñojokaña nawu Nzambi wakamenaña wanyi yuma yayimwekenaña. Chakutalilahu, hanyima yakwila nvula yampepela yinakisañani dehi yuma yayivulu kuPhilippines muNovember 2013, mukulumpi waboma yimu yeneni wahosheli nindi: “Nzambi watela wadiña kwacheñi.”

² Antu amakwawu atoñojokaña nawu Nzambi wamonaña wanyi yuma yelañawu. (Isaya 26:10, 11; 3 Yowanu 11) Mumafuku akapostolu Pawulu, antu amakwawu atoñojokeleña chochimu. Pawulu wahosheli nindi: ‘Alekeli kwikala namaana akwiluka Nzambi.’ Adiña aloña wanyi nawa elileña yuma yatama.—Aroma 1:28, 29.

3. (a) Twatela kudihula malwihwinyi? (b) MuBayibolu “Chikasa” chaNzambi chemenañaku kwodi?

³ Indochu etu? Tweluka netu Yehova wamonaña yuma yejima yitwelaña. Mwalala twakuhwelela netu Yehova watukeña? Twamonaña chatukwashañayi muchihandilu chetu?  Kwesekeja nachahosha Bayibolu, “chikasa” chaNzambi chemenañaku ñovu. Wazatishaña ñovu yindi kulonda yakwashi ambuñindi nikushinda ayilumbu jindi. (Tañenu Kuhituluka 26:8.) Yesu wahosheli nindi, antu amakwawu “akamona Nzambi.” (Matewu 5:8) Tudi hakachi kanawantu? Tunateli ‘kumumona’ ñahi “Nzambi”? Twayenu tudizili kudi antu ashimunawu muBayibolu amweni niabulili kumona chayikwashiliyi Nzambi. Tukudiza cheñi chikuhwelelu chichatukwashaña kumona chatukwashañayi Nzambi.

4. Muloñadi ayilumbu jawaIsarela chakañenyuwu kumona Nzambi chakwashileñayi antu jindi?

⁴ Kunyima, antu adiña nakukooleka kwakumona nikutiya chayikwashileñayi Nzambi aIsarela. Yehova wazatishileña yihayamisha kupulwisha antu jindi muEjipitu nikushinda anyanta Mwituña daChikaninu. (Yoshuwa 9:3, 9, 10) Hela chakwila anyanta amakwawu atiyili nikumona Nzambi chapulwishiliyi antu jindi, ‘apompeli namuchima wawu wumu nawu akalwi naYoshuwa naIsarela.’ (Yoshuwa 9:1, 2) Awa anyanta adiña nakukooleka kwakumona Nzambi chakwashileñayi antu jindi hiyazuñileñawu nawu. Yehova chazatishiliyi ñovu jindi jabadika, “itañwa demeni nikakweji kemeni kuyadiñi, nichaditendeli muza waIsarela hadi ayilumbu jawu.” (Yoshuwa 10:13) Ilaña Yehova walekeli nyichima yawayilumbu jawaIsarela ‘kuchinchika,’ kulonda azuñi njita nawaIsarela. (Yoshuwa 11:20) Ayilumbu awaIsarela ayishindili muloña akaanini kweteja nawu Yehova wadiña nakuyizuñilaku antu jindi.

5. Mwanta watama Ahabi wakaanini kwitejadi?

⁵ Kuhiñahu, Mwanta watama Ahabi niyena wadiña nakukooleka kwakumona ñovu yaNzambi. Elija wamulejeli nindi: “Hikwakekala hela wuumi hela nvulaku, chiña nihoshamu.” (1 Anyanta 17:1) Chumichi chamwekeni muloña wañovu yaNzambi, ilaña Ahabi wakaanini kwiteja. Kuhiñahu, Elija walombeli kudi Yehova, nawa Nzambi wakwili kulomba kwindi nakesi kufuma mwiwulu. Ahabi wamweni chumichi. Dichi, Elija wamulejeli Ahabi nindi Yehova wukumanisha chaaña nawa wukunokesha nvula. (1 Anyanta 18:22-45) Ahabi wamweni yihayamisha yejimiyi ilaña wakaanini kumona ñovu yaYehova. Yumanyi yitukudizila kuniyi yuma yamwekeni? Twatela kumona chatukwashañayi Nzambi.

6, 7. AGibeyoni naRahaba elukilidi?

⁶ A Gibeyoni ambukiluku chikupu nanyuza yikwawu yadikumashaninuwu nayu. Elukili nawu Nzambi wukweti ñovu. Chatela ayi nakuzuña nawaIsarela, aGibeyoni akeñeleña kuleta kuwunda. Muloñadi? Ahosheli nawu muloña atiyili mpuhu yaYehova niyuma yakoñeliyi. (Yoshuwa 9:3, 9, 10) Atoñojokeli mwamaana hakwiluka nawu Yehova wadiña nakulwilaku aIsarela.

⁷ Rahaba niyena welukili nindi Yehova wukweti ñovu. Wadiña kaIsarela wanyi,  ilaña watiyili yuma yeliliyi Yehova hakufumisha antu jindi muEjipitu. Chelili amuwani kudi akwakwendesha ituña ayedi, wayilejeli nindi: “Neluki nami Yehova nayinki ituñidi.” Rahaba welukili nindi Yehova wakamupulwisha hamu nachisaka chindi. Wamwekesheli chikuhwelelu chindi mudi Yehova hela chakwila welukili nindi kwila mwenimu kwadi kumuletela wubanji.—Yoshuwa 2:9-13; 4:23, 24.

8. A Isarela amakwawu elukili ñahi ñovu yaNzambi?

⁸ Kwambukaku naMwanta watama Ahabi, aIsarela amakwawu amweni kesi kafumineña mwiwulu hakwakula kulomba kwaElija, elukili nawu Nzambi diyi waholweli kesi. Abidikili nawu: “Yehova diyi Nzambi.” (1 Anyanta 18:39) Elukili chikupu nawu Nzambi wukweti ñovu.

9. Tunateli kumona ñahi chikasa chaYehova makonu?

⁹ Tunahanjeki yuma yamwekeni yinatukwashi kwiluka mwatalisha ‘kumumona Nzambi’ hela ñovu jindi. Neyi tumwiluka Yehova niyililu yindi, tukumonaña chikasa chindi ‘namesu amunyichima yetu.’ (Aefwesesa 1:18) Chumichi chikutusañumuna kwimbujola antu ashinshika akunyima niamakonu amona Yehova chakwashayi antu jindi. Hela chochu, kuduhu wunsahu wunakumwekesha nawu Yehova wuchidi kukwasha antu?

10. Wunsahwinyi wunakumwekesha nawu Yehova wuchidi kukwasha antu? (Talenu mwevulu wakutachikilahu.)

¹⁰ Tukweti wunsahu wawuvulu wunakumwekesha nawu Yehova nakukwasha  antu makonu. Kakavulu twatiyaña nsañu yahoshaña hadi antu amulombeli Nzambi kuyikwasha nawa wakwili kulomba kwawu. (Masamu 53:2) Chakutalilahu, mpinji yashimwinineñayi Allan hakachitutu kanyanya muPhilippines, wawanini mumbanda watachikili kudila. Allan wahosheli nindi, “Iwu mumbanda walombeli nantetemena nindi aYinsahu jaYehova ayi nakumushimwina.” Hadiñayi kansi, wadizileña Bayibolu nawaYinsahu, ilaña chasumbukiliyi wabuukilili hakachitutu nawa walekeli kudiza. Nzambi wakwili kulomba kwindi mukunyakashana chakwila watiyili kuwaha. Chimwahitili tukweji, wadihanini kudi Yehova.

11, 12. (a) Yehova nakukwasha ñahi ambuñindi? (b) Lumbululenu Yehova chakwashiliyi Amy.

¹¹ Ambuña aYehova amavulu, amona Nzambi chayikwashayi kuleka yililu yatama yidi neyi kunwa makanya, kuzatisha yitumbu yashetana hela kutala nyevulu yanzekesi. Ahoshaña nawu esekeli kuleka aweni ilaña akañenyeña. Chamulombeluwu Yehova kuyikwasha, wayinkeli “ñovu jabadika nankashi,” nawa atwesheli kuleka yililu yawu yatama.—2 Akorinda 4:7; Masamu 37:23, 24.

¹² Yehova wakwashaña cheñi ambuñindi kuumika kukala. Dichamumwekeneni Amy. Amutumini kukwasha mudimu wakutuña Itala daWanta niitala dawamishonali hakachitutu kanyanya kuPacific Ocean. Chisemwa chadiña chambuka nawa kakavulu malayiti nimenji ayileña, munyikwakwa mwenzeleña menji, wanukileña antaña jindi nawa washakamineña mukapeka kanyanya muhotelu. Ifuku dimu, wazuwilili muhela wazatileñayi nindi. Watiyili kutama nacheliliyi. Chafuntiliyi mukapeka kindi mwadiña mwidima, walombeli wukwashu kudi Yehova. Chenjili malayiti, watañili chibaaba muKaposhi Kakutalila chahosheleña hashikola yaGileyadi. Chibaaba chahosheleña hakukala kwamweneñayi. Amy wahosheli nindi: “Natiyili nami Yehova wahosheleña nanami. Ichi chibaaba chankwashili kutwalekahu namudimu wami.”—Masamu 44:25, 26; Isaya 41:10, 13.

13. Wunsahwinyi wunakumwekesha nawu Yehova nakwashi antu jindi kuhakwilaku nsañu yayiwahi?

¹³ Yehova nakwashi cheñi antu jindi kuhakwilaku nsañu yayiwahi. (Afwilipi 1:7) Chakutalilahu, nfulumendi chiyatulekesheluwu mudimu wakushimwina, twadihakwililuku muchota. Kufuma mu 2000, tunayiñi nyiloña 268 mukaayi kejima muyota yamaneni nawa hakachi kaniyi nyiloña, nyiloña 24 yadiñaku muchota cheneni chaEuropean Court of Human Rights. Mwalala kwosi wunateli kukañesha chikasa chaNzambi!—Isaya 54:17; tañenu Isaya 59:1.

14. Wunsahwinyi wukwawu wunakumwekesha nawu Yehova wudi nawantu jindi?

¹⁴ Nsañu yayiwahi chiyinatandi mukaayi  kejima chinakumwekesha nawu Nzambi nakukwasha antu jindi. (Matewu 24:14; Yililu 1:8) Antu jaYehova akunyuza yejima ekala anuñañana muloña Yehova wayikwashaña. Iku kunuñañana kwambukaku chikupu. Antu abulaña kumuzatila Yehova ahoshaña nawu: “Chalala Nzambi wekala mukachi kenu.” (1 Akorinda 14:25) Tukweti wunsahu wawuvulu wunakumwekesha nawu Nzambi wudi nawantu jindi. (Tañenu Isaya 66:14.) Indochu enu? Mwamonaña Yehova chayikwashañayi?

15. Muloñadi mpinji yikwawu chitunateli kukañenya kumona chatukwashañayi Yehova?

¹⁵ Mpinji yikwawu tunateli kumona wanyi chatukwashañayi Nzambi. Muloñadi? Neyi tunakukabakana, tunateli kuvulamena netu Yehova watukwashahu dehi kakavulu. Dichamumwekeneni Elija. Wadiña wahamuka, ilaña watiyili woma chelili Mwadi Yezebeli yakeñi kumujaha. Wavulameneni chamukwashiliyi Yehova. Bayibolu yamwekeshaña nawu Elija wakeñeleña kufwa. (1 Anyanta 19:1-4) Kudihi kwadi kuwanayi wukwashu nikuhamuka? Wateleleli kulomba kudi Yehova.—1 Anyanta 19:14-18

16. Tunateli kumumona ñahi Nzambi neyi tudi mumakabi?

¹⁶ Yoba washili maana hakukala kwadiñayinaku chakwila wakañenyi kukwimona neyi chakwimweneñayi Yehova. (Yoba 42:3-6) Ninetu chinateli kutukalila kumona chatukwashañayi Nzambi muloña wamakabi etu. Tunateli kwila ñahi hakwila nawu tumoni yuma yatwililayi Nzambi? Twatela kutoñojoka chahosha Bayibolu hamakabi etu. Twakeluka chikupu netu Yehova watwikwashaña nawa ninetu twakahosha netu: “Nakutiyili  kwamumatu hohu, ichi dinu nakumoni namesu ami.”

17, 18. (a) Munateli kumona ñahi chayikwashañayi Yehova muchihandilu chenu? (b) Yumanyi yinakumwekesha nawu Nzambi nakukwasha antu makonu.

¹⁷ Munateli kwiluka ñahi chayikwashañayi Yehova? Tuhanjekenu haniyi yikuma yitanu. Chatachi, Yehova wayikwashili kuwana chalala. Chamuchiyedi, hadaha munakwanuka ifuku dimwayili kukupompa kwawaKristu hela kutiyilila mpanji himukuhosha nenu, “Diwukwashu wunakeñeleña!” Chamuchisatu, mwamona Yehova chakulayi kulomba kwenu. Chamuchiwana, hadaha mwakeñeleña kumuzatila nankashi Yehova nawa mwamweni chayikwashiliyi. Chamuchitanu, hekwawu mwalekeli mudimu muloña wayimanishilileña mpinji yakumuzatila Yehova, ilaña mwamweni Nzambi chashikijiliyi mwakanayi kwila nawu: “kukushiya hinakakushiyaku.” (Aheberu 13:5) Neyi twikala nawubwambu wakola naYehova, chikutupelelaña kumona chatukwashañayi muchihandilu chetu.

¹⁸ Muhela Sarah wakuKenya, wahosheli nindi: “Kadizi wami wamwekeneña neyi wakeñeleña wanyi kudiza Bayibolu. Dichi nalombeli kudi Yehova neyi natela kuleka kumudizisha. Ilaña chinakumishili hohu kulomba, foni yami yidila nikudila. Kadizi wami waBayibolu diyi watemesheli nindi tuyi hamu kukupompa! Nahayamini chikupu!” Neyi twiluka yuma yinakutwililayi Nzambi, tukumona chinakutukwashayi. Muhela Rhonna wakuAsia, wahosheli nindi hahitaña mpinji hakwila tumoni chatukwashañayi Yehova. Wabombeleluhu nindi: “Neyi tumona chatukwashañayi, tukwiluka chikupu netu watwisha maana!”

19. Yumanyi yikwawu yitwatela kwila kulonda tumumoni Nzambi?

¹⁹ Yesu wahosheli nindi, antu “akamona Nzambi” atela kwikala “atooka munyichima.” (Matewu 5:8) Awa mazu atalisha mudihi? Atalisha mukwila nawu twatela kwikala nayitoñojoka yitooka nikuleka yuma yatama. (Tañenu 2 Akorinda 4:2.) Muchinu chibaaba tunadizi netu hakwila tumumoni Nzambi, twatela kutwalekahu kukolesha wubwambu wetu nayena. Muchibaaba chinalondeluhu, tukahanjeka hachikuhwelelu chichinateli kutukwasha kumona chatukwashañayi Yehova.