1, 2. Yesu wamukeñelelidi Mata, nawa chiluwanyi chakoñeliyi chamwekeshaña nawu wadiña wawanina wanyi?

 NEYI mwanuka Mata muhela aLazaru, mwatoñojokaña nenu wadiña muntu wamuchidinyi? Bayibolu yahoshaña nawu Mata wadiña ibwambu daYesu nawa Yesu wamukeñeli Mata. Bayi neyi Yesu wakeñeli Mata hohuku, ilaña kudi ambanda amakwawu akeñeliyi nawa alemesheliyi. Chakutalilahu, Mariya muhela aMata niyena wadiña ibwambu daYesu. Nawa Yesu wamukeñeli mama yindi, Mariya. (Yowanu 11:5; 19:25-27) Hanu dinu, muloñadi Yesu chamukeñeleliyi Mata?

² Yesu wamukeñeli Mata muloña wadiña naluwi, chisambu nawa wadiña wadikita. Ilaña chikuhwelelu chindi dichaletesheli Yesu yamukeñi nankashi. Wakuhweleleli nsañu yejima yatañishileñayi Yesu nawa wakuhweleleli nindi diyi Mesiya wakaninuwu. (Yowanu 11:21-27) Hela chochu, Mata wadiña wawanina wanyi. Waluwañesheleña  neyi chitwaluwañeshaña. Chakutalilahu, mpinji yayendeleliyi Yesu, Mata wamuhililili muhelindi Mariya nawa walejeli Yesu nindi watela kumufumba. Mata wahosheli nindi: “Mwanta, chananlekeliyi mwanyikami nyidimu nkanka wami, hiwunashuku muchima weyuku? Mwili enzi ankwashuku.” (Tañenu Luka 10:38-42.) Mata wahoshelelidi awa mazu nawa tukudizilaku kwodi kumazu aYesu alejeliyi Mata?

3, 4. Chumanyi cheliliyi Mariya chamuzañalesheli Yesu, nawa Mata wadizililuku chumanyi? (Talenu mwevulu wakutachikilahu)

³ Yesu watiyili kuwaha chamutambikiluwu kudi Mata naMariya kwitala dawu nawa wakeñeleña kuyileja nsañu yalema. Hohenohu Mariya washakamini kwakwihi naYesu, “nakutiyilila mazu adiña nakuhoshayi.” Wakeñeleña kudiza nsañu yayivulu kudi Ntañishi Muneni. Mata niyena wadi kushakama nakumutiyilila Yesu. Nawa Yesu chiña wamuhamekeli neyi walekeli yuma yelileñayi nakutachika kumutiyilila.

⁴ Ilaña Mata waluwankeni. Muloña wadiña nakumuloñeshela Yesu yakuda niyuma yikwawu. Chamweniyi nindi Mariya nakumukwashaku wanyi, wahilili nawa wamulejeli Yesu. Yesu welukili nindi Mata washili maana kuyuma yelileñayi, dichi wamulejeli nindi: “Mata, Mata, yuma yayivulu wudi nakwakama, wudi nakudikabisha tuhu kweyi.” Wamulejeli cheñi nindi yaloñeshi yakuda yantesha hela chuma chimu. Dichi Yesu wamuhamekeli Mariya hakutiyilila nakanañachima. Wamulejeli nindi: “Chuma chanatondiyi Mariya, dichuma chasweja kuwaha, hiyakamutambulachuku.” Mariya watela wajimbeli yakuda yadiliyi, ilaña wajimbeli wanyi yuma yadiziliyi kudi Yesu nichamuhamekeliyi. Chimwahitili yaaka 60, kapostolu Yowanu wasonekeli nindi: “Yesu wakeñeli Mata nimana kwindi wamumbanda.” (Yowanu 11:5) Awa mazu anakumwekesha nawu Mata wetejeli kufumba kwaYesu nawa wamukalakeleli Yehova nakashinshi mukuhanda kwindi kwejima.

5. Muloñadi chichinakukalila sweje-e makonu kumukalakela Nzambi, nawa lwihwinyi lutukwakula?

⁵ Makonu, kudi yuma yayivulu yinateli kutuluwañesha kumukalakela Yehova kubadika hayina mpinji. Kaposhi Kakutalila kaSeptember 15, 1958 kasoñamishili amanakwetu niahela nawu atela kumukalakela Yehova chakadi kuluwankana nayuma yinakutuñatuñawu. Nihaniyi mpinji kwadiña yuma yakutuñatuña. Kwadiña yuma yidi neyi magazini, yisanji, mafilimu nimaTV. Kaposhi kashimwini nawu chitunakuswila kwakwihi nakukuma kwakanu kaayi, “yuma yinateli kutuluwañesha yikavulilaku.” Dichi, anu mafuku yuma yinateli kutuluwañesha yinasweji kuvula. Tunateli kwila ñahi hakwila tumukalakeleña Yehova neyi cheliliyi Mariya?

6. Antu jaYehova anazatishi ñahi yuma yinakutuñatuñawu?

⁶ Antu jaYehova azatishaña yuma yinakutuñatuñawu hakushimwina nsañu  yayiwahi. Chakutalilahu, henohu njita yakaayi kejima yatachi kanda nihampinji yanjita, ashimwinini kuzatisha “Photo-Drama of Creation.” Azatishili nyevulu nitumavidiyo twatwihi twamazu kushimwina mamiliyoni awantu mumatuña amavulu. Chibalu chakukumishaku ‘chaPhoto-Drama’ chamwekesheleña mpinji yakuwunda yakayulañayi Yesu Kristu hamaseki. Antu jaYehova azatishili cheñi yikunzulemba hakutandisha nsañu yaWanta kudi antu mukaayi kejima. Makonu, twazatishaña makompyuta niIntaneti kushimwina antu kwejima kwaduwu.

7. (a) Muloñadi kuzatisha nankashi yuma yamukaayi chikwatamina? (b) Twatela kusoñama kuyumanyi? (Talenu tumazu twaheshina.)

⁷ Bayibolu yatusoñamishaña kubula kuzatisha nankashi yuma yamukaayi. Ichi chinabombelumu kumanishila mpinji yeneni kuyuma yamukaayi. (Tañenu 1 Akorinda 7:29-31.) Yuma yejima yatama wanyi, ilaña yinateli kutumanishila hohu mpinji. Chakutalilahu, twatiyaña kuwaha kutaña nyikanda, kutala TV, kuya kumaluña amawahi, kulanda yuma nikukeña kwiluka yuma yayiha yinakutuñatuñawu. Amakwawu akeña kuhosha hanshiña, kutuma mamesaji nima e-melu, kutala nsañu yinakumwekana nikutala bola. Ilaña antu amakwawu ateñukaña nayumiyi. * (Talenu tumazu twaheshina.) (Mukwakutaŋisha 3:1, 6) Neyi tumanishila mpinji yeneni kuyuma yamukunkulwayi, tukusha wanyi maana kuyuma yalema, dikwila nawu kumukalakela Yehova.—Tañenu Aefwesesa 5:15-17.

8. Muloñadi chitwatela kubulila kukeña yuma yamukaayi?

⁸ Satana wazatishaña jinjila jajivulu kulonda yatukokoli nayuma yamukaayi  nikutuluwañesha kumukalakela Yehova. Dicheliliyi mumafuku awapostolu nawa anu mafuku nasweji. (2 Timotewu 4:10) Dichi twatela kuditala kulonda twiluki neyi tunakuzatisha nankashi yuma yamukaayi kulonda tuhimpi. Bayibolu yatwikaanishaña kukeña yuma yamukaayi. Dichi, twatela kumukeña nankashi Yehova. Neyi twila mwenimu, tukumwovwahilaña Yehova nawa tukukundama kwakwihi nayena.—1 Yowanu 2:15-17.

9. Yesu walejeli atumbanji twindi kusha maana hanka, nawa wayilejeli ñahi?

⁹ Yesu wadizishili atumbanji twindi kubula kuluwankana nayuma yayivulu neyi chochalejeliyi Mata. Wayilejeli kusha maana hakumukalakela Yehova niWanta windi. (Tañenu Matewu 6:22, 33.) Yesu yomweni wadiña wanyi nayuma yadi kumuluwañesha. Wadiña nayuma yayivulu wanyi, itala hela mpata.—Luka 9:58; 19:33-35.

10. Chumanyi cheliliyi Yesu chitwatela kwimbujola?

¹⁰ Yesu wakeñeleña wanyi chuma chidi chejima kumukañesha kushimwina. Chakutalilahu, hanyima yakwila natachiki dehi mudimu wakushimwina, mazaza awantu muKaperinawu akeñeleña Yesu kushakama mumusumba wawu. Welili ñahi? Watwalekeluhu namudimu windi. Wahosheli nindi: “Chiña nishimwina nsañu yaWanta waNzambi yayiwahi nikunyikala yikwawu yinashali nawa; muloña dichi chantemesheleluwu.” (Luka 4:42-44) Yesu wendeli maluña amalehi nakushimwina nsañu yayiwahi nikutañisha antu amavulu. Wadiña wawanina, ilaña wazeyeleña muloña wazatileña nañovu nawa wanokeleña.—Luka 8:23; Yowanu 4:6.

11. Yesu welilidi chelili iyala wumu yamulombi wukwashu? Yesu wayidizishilidi atumbanji twindi?

¹¹ Yesu hadizishileñayi atumbanji twindi nsañu yalema, muntu wumu wamuketwili nakuhosha nindi: “Eyi Nkuluñaña, mwili mana kwami twambuli nindi wuswana wetu.” Yesu watachikili wanyi kumanisha kukala kwaniwu iyala. Ilaña watwalekeluhu kudizisha atumbanji twindi. Wazatishili iyi mpinji kuyileja nindi neyi asha maana kukwikala nayuma yayivulu, akukañanya kumukalakela Nzambi.—Luka 12:13-15.

12, 13. (a) Chumanyi cheliliyi Yesu chatiyishili aGriki kuwaha muYerusalema? (b) Yesu wahosheli nindidi chamulejeluwu kudi Fwilipu nawu aGriki anakukeña kudimona nindi?

¹² Yesu wadiña nayuma yayivulu yakwila chikwashalili mafuku antesha nakufwa. (Matewu 26:38; Yowanu 12:27) Welukili nindi wakakabakana nankashi nikufwa. Welukili cheñi nindi wukweti mudimu weneni wakuzata henohu kanda yafwi. Chakutalilahu, haMulungu Nisani 9, Yesu weñilili muYerusalema hachimbulu. Mazaza amutambwilili  neyi Mwanta wawu. (Luka 19:38) Chikwachili, Yesu wahañili amayala alwisu adiña nakulandishila yuma yawuseya mutembeli nakudila antu mabula hanyitu.—Luka 19:45, 46.

¹³ A Griki amakwawu ayili kuchidika chaChipandakenu muYerusalema amweni yuma yakoñeliyi Yesu nawa atiyili kuwaha. Dichi amulejeli kapostolu Fwilipu kulonda adimoni naYesu. Ilaña Yesu wakeñeleña wanyi antu akumukwasha hela kumuhakwilaku. Washili maana hachuma chalema. Nawa wakeñeleña kwila nkeñelu yaYehova, dikwila nawu kuhana wumi windi neyi mulambu. Dichi wayanukishili atumbanji twindi nindi keña yafwi nawa antu ejima amulondaña atela kuhana wumi wawu. Wahosheli nindi: “Muntu wukukeña wumi windi wakawujimbesha; muntu wukuhela wumi windi mumpata yamunu mwishina, wakawuhemba nikukuhanda kwahaya nyaka.” Yesu wakanini nindi ‘Tata wakahameka’ atumbanji twaYesu nikuyinka wumi wahaya nyaka. Fwilipu chiña diyi wayilejeli aGriki iyi nsañu yakukundeja.—Yowanu 12:20-26.

14. Yesu wekalileña nampinji yakwiladi hela chakwila washili maana kumudimu wakushimwina?

¹⁴ Yesu chadiñayi hamaseki washili maana kumudimu wakushimwina nsañu yayiwahi. Hela chakwila washili maana hakushimwina, ilaña welileña niyuma yikwawu. Chakutalilahu, wayili kuchawija kwabalumwiniyi menji kwikala vinyu yayiwahi. (Yowanu 2:2, 6-10) Wadiili kumatala awamabwambu jindi niantu atambwilileña nsañu yayiwahi. (Luka 5:29; Yowanu 12:2) Hela chochu, Yesu wekalileñaku nampinji yakunooka, kutoñojoka nikulomba nkawindi.—Matewu 14:23; Maku 1:35; 6:31, 32.

15. Pawulu wahosheli nindi akwaKristu atela kwiladi, nawa yena welili ñahi mwenimu?

¹⁵ Kapostolu Pawulu wasonekeli nindi akwaKristu adi neyi akwakutemuka lufuchi lwachintampu chachilehi, hakwila nawu ashiki kumufunda atela kuleka yuma yejima yikuyikañesha. (Tañenu Aheberu 12:1.) Pawulu niyena dicheliliyi. Wadi kwikala waheta nawa mukulumpi waya mpuhu muYudeya, ilaña wakaanini nawa washili maana ‘kuyuma yabadika kuwaha.’ Wazatili nañovu mumudimu wakushimwina, dichi wendeli maluña amavulu kubombelahu Siriya, Asia Minor, Masidoniya niYudeya. Pawulu wadiña nakutalila wumi wahaya nyaka wakushakama mwiwulu. Wahosheli nindi: “Navulamenaña yuma yamunyima, nafwilaña  nami nakashiki kuyuma yakumbidi. Nadikwatishaña nankashi, nakukabila nami nakashiki kumufunda.” (Afwilipi 1:10; 3:8, 13, 14) Pawulu wasumbwili wanyi nawa chumichi chamukwashili ‘kumukalakela Mwanta chakadi kuluwankana.’—1 Akorinda 7:32-35.

16, 17. Tunateli kumwimbujola ñahi Pawulu chili twasumbula hela nehi? A Mark naClaire elili ñahi mwenimu?

¹⁶ Ambuña aYehova amakwawu makonu asumbulaña wanyi kulonda ashi maana kumudimu waYehova neyi cheliliyi Pawulu. (Matewu 19:11, 12) Ajiki adana yuma yayivulu yakwakamena kubadika asumbula. Chili twasumbula hela nehi, wejima wetu twatela ‘kutenteka yuma yikutulemena yejima’ kulonda tumukalakeleña Yehova chakadi kuluwankana. Twatela kuleka yuma yatumanishilaña mpinji hakwila tumukalakeli Yehova chikupu.

¹⁷ Chakutalilahu, aMark niClaire, akulilili kuWales, atachikili wupayiniya chiyamanishiluwu shikola. Chadisumbwiluwu, atwalekeluhu wupayiniya. Ilaña akeñeleña kukumina hohu muwupayiniya wanyi. Mark walumbulwili nindi: “Twapelesheluku chihandilu chetu chitwalandishili itala nikuleka mudimu wutwazatileña kulonda tutachiki mudimu wakutuña wamukaayi kejima.” Hadi yaaka 20 yinahituhu, anendi matuña amavulu muAfrica nakukwasha kutuña Matala aWanta. Mpinji yikwawu ashalileña namali antesha, ilaña Yehova wayakameneneña. Claire wahosheli nindi: “Twatiyaña kuwaha kumuzatila Yehova mafuku ejima. Tunakwati amabwambu amavulu nawa kwosi chuma chitwabulenaña. Yuma yitwashili, kwila tuyesekeja nankisu yitunatambwili kudi Yehova muloña wakuzata mudimu wampinji yejimaku.” Antu adi mumudimu wampinji yejima niwena atiyaña chochimu. *—Talenu tumazu twaheshina.

18. Malwihwinyi itwatela kudihula?

¹⁸ Munakutoñojoka nenu mwatela kumuzatila Yehova chikupu? Kuduhu yuma yinakuyiluwañesha kusha maana kumudimu walema? Neyi yidikoku, mukwila ñahi? Hadaha mwatela kuhimpa chimwatañaña nikudiza Bayibolu. Chibaaba chinalondeluhu chikulumbulula chitwatela kutaña nikudiza Bayibolu.