1. Chikuhwelelu chalemenadi? (Talenu mwevulu wakutachikilahu.)

 MWADIHULAHU dehi nenu, ‘Yehova wakampulwisha hampinji yalukadi lweneni?’ Kapostolu Pawulu wahosheli nindi hakwila twakapuluki twatela kwikala nachikuhwelelu. Wahosheli nindi: ‘Chakadi kukuhwelela hitunateli kumutiyisha Nzambi kuwahaku.’ (Aheberu 11:6) Chinateli kumwekana neyi chapela, ilaña kuhosha hohu chalala ‘antu amakwawu hiyakweti chikuhweleluku.’ (2 Atesalonika 3:2) Iji nsona jiyedi jinatukwashi kwiluka nawu twatela kwikala nachikuhwelelu chakola.

2, 3. (a) Chikuhwelelu chetu chalemenadi? (b) Yumanyi yitukuhanjekahu?

² Kapostolu Petulu wahosheli hachikuhwelelu chawantu ‘chesekawu.’ (Tañenu 1 Petulu 1:7.) Lukadi lweneni ludi kwakwihi, dichi twatela kwikala ‘nachikuhwelelu chakutambula wamwinu wawumi.’ (Aheberu 10:39) Twatela kuzata nañovu hakwila nawu tukoleshi chikuhwelelu chetu. Tunakukeña kwikala hakachi kawantu akakiswilawu neyi Yesu Kristu, Mwanta wetu, nenzi dehi. Dichi, neyi chochalombeliyi ona iyala nindi amuvulishili chikuhwelelu kudi Yesu, ninetu twatela kuhosha netu: “Nkwashuku chinakañanyi kukuhwelela chachiwahi.” (Maku 9:24) Hela tunateli kuhosha neyi apostolu, ahosheli nawu: ‘Tuvulishili chikuhwelelu.’—Luka 17:5.

 ³ Muchinu chibaaba, tukuhanjeka haniyi yikuma: chitunateli kukolesha chikuhwelelu chetu, chitwatela kumwekesha netu chikuhwelelu chetu chakola nichitunateli kwiluka chikupu netu Nzambi wukutwinka neyi tumulomba netu yatuvulishili chikuhwelelu.

4. Chikuhwelelu chawanyi chinateli kukolesha chikuhwelelu chetu?

⁴ Yehova watuleja yakutalilahu yamuBayibolu yawantu adiña nachikuhwelelu, muloña chikuhwelelu chalema. Awa antu “ayisonekeli kulonda kutuleja nachu maana.” (Aroma 15:4) Chikuhwelelu chamwekesheli Abarahama, Sara, Isaka, Yakoba, Mosi, Rahaba, Gideyona, Baraka niamakwawu chinateli kutwikwasha kukolesha chikuhwelelu chetu. (Aheberu 11:32-35) Bayi neyi awantu diwu adiña nachikuhwelelu hohuku, ilaña nimakonu kudi amanakwetu niahela amwekeshaña chikuhwelelu. * (Talenu tumazu twaheshina.)

5. Elija wamwekesheli ñahi nindi wamukuhweleleli Yehova, nawa malwihwinyi itwatela kudihula.

⁵ Kaprofwetu Elija hichakutalilahu chamuntu wumu wamwekesheli chikuhwelelu. Chimukutoñojokaña hachamwekesheliyi chikuhwelelu, shinshikenu yuma yitanu mwamwekesheleliyi nindi wamukuhweleleli Yehova. (1) Cheliliyi Elija yamuleji Mwanta Ahabi nindi Yehova wakaleta chaaña, wamulejeli chakadi woma nindi: “Chahandayi Yehova Nzambi yaIsarela inemanaña kumesu indi kwaamu, nyaka iyi hikwakekala hela wuumi hela nvulaku.” (1 Anyanta 17:1) (2) Elija welukili nindi Yehova wakamwinka yuma yakakeñawu neyi chaaña chinenzi. (1 Anyanta 17:4, 5, 13, 14) (3) Elija welukili cheñi nindi Yehova wukumusañula mwana kanfwila weyala. (1 Anyanta 17:21) (4) Wajinokeli wanyi nindi kesi kaYehova kakusenda mulambu windi hampidi yaKarameli. (1 Anyanta 18:24, 37) (5) Henohu nvula kanda yinoki, Elija wahosheli chakadi woma kudi Ahabi nindi: “Yaña kweyi wakadyi, wakanwi, muloña kudi lushindu lwanvula yeneni.” (1 Anyanta 18:41) Hanyima yakuhanjeka iyi nsañu, tunateli kudihula netu, ‘Komana chikuhwelelu chami chakola neyi chichadiña chaElija?’

6. Tukumulombadi Yehova kulonda tukoleshi chikuhwelelu chetu?

⁶ Hakwila nawu tukoleshi chikuhwelelu chetu, twatela kumulomba Nzambi spiritu yajila. Muloñadi? Muloña chikuhwelelu chekala hakachi kanyikabu yaspiritu yajila. (Aŋalija 5:22) Komana twatela kulondela kufumba kwaYesu kwakulomba spiritu yajila. Yesu wahosheli nindi Yehova wakenka ‘antu akamulomba spiritu yajila.’—Luka 11:13.

7. Lumbululenu chitunateli kwikala nachikuhwelelu chakola.

⁷ Chitwekala nachikuhwelelu chakola  mudi Nzambi, bayi tuchijiyishaku. Chikuhwelelu tunateli kuchesekeja nakesi. Chitwabutula kesi, muzuzu wekalaña nañovu. Ilaña neyi kwinkahu nchawa nehi kesi kakujima nawa hakushala hohu mawuti. Dichi neyi tutwalekahu kwinkahu nchawa, kesi kakutwalekahu kubutuka. Dichekala nichikuhwelelu chetu. Tukumukeña nankashi Yehova Nizu dindi Bayibolu neyi tukutañañamu nikudizamu mafuku ejima. Chikufumamu, chikuhwelelu chetu chikukola nawa chikujiya wanyi.

8. Chumanyi chikuyikwasha kukolesha nikuhemba chikuhwelelu chenu?

⁸ Bayi mwiluka hohu yuma yimwadizili henohu kanda mupapatishewuku. (Aheberu 6:1, 2) Chakutalilahu, kudiza wuprofwetu wekala muBayibolu washikijewa dehi kuyikwasha kwikala nachikuhwelelu chakola nikuchihemba. Munateli kuzatisha cheñi Izu daNzambi kulonda mwiluki neyi chikuhwelelu chenu chakola.—Tañenu Yakoba 1:25; 2:24, 26.

9, 10. Tunateli kukolesha ñahi chikuhwelelu chetu neyi (a) tudi nawamabwambu amawahi? (b) tuyaña kupompa kwachipompelu? (c) tushimwinaña?

⁹ Kapostolu Pawulu wahosheli nindi akwaKristu anateli ‘kukwashañana kukuhwelela kwawu.’ (Aroma 1:12) Chumichi chinatalishi mudihi? Neyi twikala nakapinji kakuhanjeka nawamanakwetu niahela, wejima wetu tukwikala nachikuhwelelu chakola. Tunateli kwila mwenimu sweje-e neyi twikalaña nakapinji nawantu akweti chikuhwelelu ‘chesekawu.’ (Yakoba 1:3) Amabwambu atama ajiyishaña chikuhwelelu chetu, ilaña amawahi achikoleshaña. (1 Akorinda 15:33) Dichiyatulejelañawu nawu tuyeña nakupompa mpinji yejima. Dichi, twatela kutwalekahu ‘kudikolesha wumu namukwawu.’ (Tañenu Aheberu 10:24, 25.) Kubombelahu, nsañu yitwadizaña hakupompa yakoleshaña chikuhwelelu chetu. Bayibolu yahoshaña nawu “Kukuhwelela kwafumaña hakutiya.” (Aroma 10:17) Dihulenu nenu, ‘Napompaña mpinji yejima?’

¹⁰ Twakoleshaña cheñi chikuhwelelu chetu neyi tushimwinaña nikudizisha antu nsañu yayiwahi yamuBayibolu. Kufwana akwaKristu akusambila, twamukuhwelelaña Yehova nawa twahoshaña chakadi woma neyi tudi mukweseka.—Yililu 4:17-20; 13:46.

11. Muloñadi Yoshuwa niKalebi chekaliluwu nachikuhwelelu chakola, nawa tunateli kuyimbujola ñahi?

¹¹ Chitwatoñojoka chatukwashañayi Yehova nichakulañayi kulomba kwetu, chikuhwelelu chetu chakolelañaku. Ichi dichamwekeni kudi Kalebi niYoshuwa. Amwekesheli nawu amukuhweleleli Yehova hampinji yayiluwu nakwendesha Ituña daChikaninu. Chimwahitili mpinji, chikuhwelelu chawu chakoleleluku chelili amoni chayikwashiliyi Yehova. Yoshuwa wayilejeleña aIsarela chakadi kujina nindi: “Hikunakañanyi chuma chachiwahi nichimu chayiteneniyi Yehova Nzambi yenuku.” Wahosheli cheñi nindi: “Dichi dinu mwakamenu Yehova, mukalakelenu chakadi kudimbana nakashinshi.”  Kufumahu wayilejeli nindi: “Hakwila ami nimutaña wami tukumukalakela kwetu Yehova.” (Yoshuwa 23:14; 24:14, 15) Neyi tumukuhwelela Yehova nikumona chatukwashañayi, chikuhwelelu chetu chikukola.—Masamu 34:8.

12. Tunateli kumwekesha ñahi netu tukweti chikuhwelelu chakola?

¹² Tunateli kumwekesha ñahi netu tukweti chikuhwelelu chakola? Kambanji Yakoba wahosheli nindi: ‘Nukukuleja kukuhwelela kwami nanyidimu yami.’ (Yakoba 2:18) Yuma yitwelaña diyamwekeshaña nawu tukweti chikuhwelelu chakola. Twayenu tutali.

13. Twamwekeshaña ñahi chikuhwelelu chetu neyi tunakushimwina?

¹³ Kushimwina hinjila yayiwahi yamwekeshaña nawu tukweti chikuhwelelu chakola. Muloñadi? Muloña neyi tukushimwinaña mpinji yejima, tukumwekeshaña nawu twakuhwelela netu kukuma kudi kwakwihi nawa ‘hikwakalabaku.’ (Habakuki 2:3) Hakwila twiluki neyi chikuhwelelu chetu chakola, twatela kudihula netu: ‘Komana nalemesha mudimu wakushimwina? Nazataña nañovu kulonda nilejeñaku antu amwiluki Nzambi? Nakeñaña njila jajivulu kulonda nidikiteña chikupu mumudimu waYehova?’ (2 Akorinda 13:5) Dichi tukoleshenu chikuhwelelu chetu kuhitila ‘mukubidika nsañu yakuhanda,’ dikwila nawu kushimwina nsañu yayiwahi.—Tañenu Aroma 10:10.

14, 15. (a) Tunateli kumwekesha ñahi chikuhwelelu muchihandilu chetu? (b) Shimunenu chakutalilahu chinakumwekesha kwikala nachikuhwelelu chakola chikwakwashanaña.

¹⁴ Twamwekeshaña cheñi netu twamukuhwelela Yehova neyi tuumika kukala kutunakumona mukanu kaayi. Neyi twakata,  anatuneñeshi, anatuhilishi, tudi atuzweñi hela tudi nakukala kukwawu, twatela kukuhwelela netu Yehova niYesu ‘akutukwasha hitukumona kukala.’ (Aheberu 4:16) Twamwekeshaña netu twamukuhwelela Yehova neyi tumulombaña wukwashu. Yesu wahosheli nindi tunateli kumulomba Yehova kulonda yatwinkeña “hefuku hefuku kudya kwetu kutunakeñi.” (Luka 11:3) Nsañu yamuBayibolu yamwekeshaña nawu Yehova nateli kutwinka yuma yejima yitunakukeña. Chakutalilahu, hampinji yikwadiña chaaña cheneni muIsarela, Yehova wamwinkeli Elija yakuda nimenji. Bayibolu yahosha nawu, “makololu hiyakumuletela nimankendi nimbiji habudidi, nimankendi nimbiji hamelela, hakunwaña mukakaloña.” (1 Anyanta 17:3-6) Twatela kukuhwelela cheñi netu Yehova nateli kutwinka yuma yitwakeñaña.

¹⁵ Twakuhwelela chikupu netu neyi tuzatishaña nshimbi jamuBayibolu, chikutukwashaña kwakamena yuma yakeñaña yisaka yetu. Rebecca, muhela wasumbuka wakuAsia, walumbulwili yena nichisaka chindi chiyazatishiluwu nshimbi yekala haMatewu 6:33 nihaYishimu 10:4. Wahosheli nindi nfumwindi wamweni mudimu windi nindi wadi kujiyisha wubwambu wawu naYehova. Dichi walekeli mudimu windi. Ilaña adiña nawanyana awana  ahembeleñawu, dichi atachikili kuloñesha yakuda yakulandisha. Chineli azatileña nañovu, akwatileña mali amavulu akwakamena nachu chisaka chawu. Wahosheli nindi: “Twamweni netu Yehova hanatushiyuku. Hitwakaminuhu nanzala hela ifuku nidimuku.” Komana ninenu mwamonahu dehi yuma yamuchidiwu yakolesheli chikuhwelelu chenu?

16. Muloñadi chitwatelela kumukuhwelela Nzambi?

¹⁶ Bayi tujinooka netu Yehova hanateli kutukwashaku neyi tulondelaña wunlomboli windi. Pawulu wahosheli hamazu ekala haHabakuki nindi: “Mukwakuloña wakahanda nakwitiya kwakukuhwelela.” (Aŋalija 3:11; Habakuki 2:4) Dimuloña wutwatelela kwikalila nachikuhwelelu chakola mudi Muntu wunateli kutukwasha chikupu. Pawulu watwanukishaña nindi Nzambi “natweshi kwila chakubadika nankashi mutukulomba hela mutukutoñojoka mwejima, mwesekela ñovu yakoñaña mudi etu.” (Aefwesesa 3:20) Ambuña aYehova azataña nañovu hakwila nkeñelu yaNzambi, hela chochu eluka nawu awanina wanyi. Twamusakililaña Nzambi chekalayi nanetu nichatukiswilañayi.

17. (a) Yesu wakwili ñahi apostolu indi? (b) Muloñadi chitukukuhwelela netu Yehova nateli kwakula kulomba kwetu kwakutuvulishila chikuhwelelu?

¹⁷ Nsañu yitunahanjekuhu yinateli kutuleñela kutiya neyi chatiyiluwu apostolu hamulombeluwu Yesu nawu: ‘Tuvulishili chikuhwelelu.’ (Luka 17:5) Yesu wayakwili apostolu munjila yadimena chatambwililuwu spiritu yajila haPentekosta muchaaka cha 33 C.E., dichi atachikili kutiyisha nkeñelu yaNzambi. Chikuhwelelu chawu chakoleli. Mwafuminidi? Atachikili kampeni yeneni yakushimwina hayina mpinji. (Akolose 1:23) Tunateli kukuhwelela netu kulomba kwetu kwakutuvulishila chikuhwelelu akakwakula? Yehova watuleja nindi nateli kutukwakula neyi “tukulomba chuma chamwaya muchima windi.”—1 Yowanu 5:14.

18. Yehova wakiswilaña ñahi antu akoleshaña chikuhwelelu chawu?

¹⁸ Neyi tumukuhwelela chikupu Yehova, wukutiya kuwaha. Wakakula kulomba kwetu, chikuhwelelu chetu chikakola nawa twakekala ‘atelela wanta waNzambi.’—2 Atesalonika 1:3, 5.