1, 2. Antu ambuka ñahi nawanyama?

 WOÑU wamuntu wekala wambukaku chikupu. Chakutalilahu, antu atweshaña kudiza idimi. Idimi datukwashaña kutaña, kusoneka, kuhosha nikwiluka munatalishi nsañu yinakuhosha akwetu. Watukwashaña cheñi kulomba nikwimba tumina twakumuhameka Yehova. Yuma yejimiyi yatuleñelaña kwambukaku chikupu nawanyama. Asayantisiti akañanyaña kwiluka chaleteshaña woñu wetu wuzateña muniyi njila yakuhayamisha.

² Chitwatweshaña kuzatisha idimi, hichawaana chatwinkayi Yehova. (Masamu 139:14; Chimwekeshu 4:11) Watwinka cheñi chawana chikwawu chatuleñelaña kwikala ambukaku nawatunyama. Antu ayileñeli neyi “chochekalayi Nzambi.” Tukweti chawaana, chakudifuukwila etu aweni mutunakeñi. Nawa tunateli kutondahu kuzatisha idimi hakumuzatila nikumuhameka Yehova.—Kutachika 1:27.

3. Chumanyi chatwinkayi Yehova chatukwashaña kwikala namaana?

 ³ Yehova watuleja muBayibolu chitunateli kumuzatila nikumuhameka. Bayibolu yamukuma hela yachibalu yidi mumadimi kubadika 2,800. Neyi tutoñojokaña chahosha Bayibolu, tunateli kutachika kutoñojoka neyi Yehova. (Masamu 40:5; 92:5; 139:17) Yitoñojoka yaYehova yatukwashaña kwikala namaana nikutuleñela tukatambwili wumi wahaya nyaka.—Tañenu 2 Timotewu 3:14-17.

4. Neyi muntu nakutoñojoka dikwila nawudi, nawa malwihwinyi itukuhanjekahu?

⁴ Muntu neyi nakutoñojoka dikwila nawu nakutoñojokahu chikupu hayuma yinakudizayi. (Masamu 77:12; Yishimu 24:1, 2) Twahetelañamu nankashi neyi tutoñojokaña hansañu yitwadizaña hadi Yehova niYesu. (Yowanu 17:3) Muchinu chibaaba tukwakula malwihu analondeluhu: Tunateli kutaña ñahi hakwila nawu chitupeleli kutoñojokaña hansañu yitunakutaña? Yumanyi yitwatela kutoñojokañahu? Nawa yumanyi yikutukwasha kutoñojokaña mpinji yejima nikudiluñisha?

5, 6. Munateli kwila ñahi hakwila mwanukeña nsañu yimunakutaña nikuyitiyisha?

⁵ Mweluka nenu kwekala yuma yikwawu yitwelaña chakubula kutoñojokahu, chidi neyi koona, kwenda nikuchovwa nkinga? Chawushona, mpinji yikwawu munateli kutaña chakubula kutoñojoka. Hadaha munateli kutachika kutoñojoka yuma yacheñi iku munakutaña. Munateli kwiladi hakwila nawu mukañeshi yumiyi? Mwatela kusha maana hayuma yimunakutaña nikutoñojoka muyinatalishi. Dichi, neyi munamanishi kutaña paragilafu hela kamutu mumukanda, hudikilenu nawa toñojokenu hansañu yimunatañeña. Toñojokenu hayuma yimunadizi nawa mwatela kuyitisha chikupu.

⁶ Asayantisiti awaana nawu muntu nateli kwanuka swayi nsañu neyi yataña nezu datiyakana. Nleñi yetu weluka chikumichi, dichaletesheli yamuleji Yoshuwa kutaña mukanda waNshimbi ‘nezu datiyakana.’ (Tañenu Yoshuwa 1:8.) Kutaña Bayibolu nezu datiyakana kukuyikwasha kusha maana hansañu yimunakutaña nikuyanuka chikupu.

7. Mpinjinyi yitwatela kutoñojoka hansañu yekala muBayibolu? (Talenu mwevulu wakutachikilahu.)

⁷ Twatela kuzata nañovu hakwila tutoñojokeña nikusha maana hansañu yitunakudiza. Dichi, twatela kutoñojokaña hampinji yitunabuli kuzeya nawa tudi kwiluña damwena. Ñimbi yaMasamu Davidi watoñojokeleña nawufuku neyi nakami hakadidi iku nakutona. (Masamu 63:6) Yesu, muntu wadiña wawanina watondeleña maluña  amwena akutoñojokelaku nikulomba.—Luka 6:12.

8. (a) Yumanyi yitwatela kutoñojokañahu? (b) Yehova watiyaña ñahi neyi tuhanjeka nawakwetu nsañu yahosha hadi yena?

⁸ Kudi cheñi yuma yikwawu yitwatela kutoñojokañahu bayi hohu nsañu yamuBayiboluku. Chakutalilahu, neyi tumona chuma chaleñayi Yehova, twatela kudihula netu, ‘Chinakundizishadi hadi Yehova?’ Kutoñojoka muniyi njila kukutuleñela kumusakilila Yehova mukulomba. Nawa tukulejañaku akwetu itudi nawu yitoñojoka yetu. (Masamu 104:24; Yililu 14:17) Yehova washañaku maana nawa watiyaña kuwaha neyi tutoñojokaña, tulombaña nikuhanjeka nawakwetu nsañu yahosha hadi yena. Bayibolu yatulejaña nawu: “Asonekeli mukanda wakwanukaña nachu kumesu indi, wanawa amutiyilaña Yehova woma, atoñojokelaña ijina dindi.”—Malaki 3:16.

9. (a) Pawulu walejeli Timotewu kutoñojokadi? (b) Twatela kutoñojoka hanka neyi tunakudiloñesha kuya nakushimwina?

⁹ Kapostolu Pawulu walejeli Timotewu kutoñojoka hanhoshelu, yililu nintañishilu yindi chiyadi kukwasha amanakwindi. (Tañenu 1 Timotewu 4:12-16.) Ninenu munateli kutoñojoka hamazu  amulejeluwu Timotewu. Chakutalilahu, mwatela kwikala nampinji yakutoñojoka neyi munakuloñesha kuya nakulombola kadizi. Toñojokenu hadi kadizi wenu, nawa wanenu lwihu hela chakutalilahu chikumukwasha kuyilaku hambidi. Neyi mukudiloñeshaña kulombola kadizi muniyi njila, chikuhwelelu chenu chikukola nawa mukwikala ntañishi waBayibolu wamuwahi. Mukuzataña chiwahi neyi mutoñojokañahu henohu kanda muyi nakushimwina. (Tañenu Ezera 7:10.) Kutaña kapetulu mumukanda waYililu kunateli kuyikwasha kwikala neyena dakushimwina. Munateli kutoñojoka cheñi hansona yimunakukeña kuzatisha odu ifuku nimukanda wumukuhana. (2 Timotewu 1:6) Toñojokenu hadi antu ekala mwiluña denu dakushimwina ninsañu yikuyitiyisha kuwaha. Neyi mukudiloñeshaña muniyi njila, mukuzatishaña Bayibolu chiwahi hakushimwina antu.—1 Akorinda 2:4.

10. Yumanyi yikwawu yayiwahi yitunateli kutoñojokañahu?

¹⁰ Yumanyi yikwawu yitwatela kutoñojokahu? Neyi mwasonekaña yikuma hakupompa, kupompa kwanyanya nikweneni, wanenuku mpinji yakuhitulukamu. Chimukuhitulukañamu, dihulenu nenu, ‘Nadizidi Mwizu daNzambi nimukuloñesha kwindi?’ Munateli kutoñojoka cheñi hansañu yekalaña muKaposhi Kakutalila, Awake! ninyikanda yinedishuwu katataka hakupompa kweneni. Neyi munakutaña Yearbook, hudikilenu hanyima yakutaña yuma yamwekeni, toñojokenuhu kulonda chiyishiki hamuchima. Chimunakutaña nyikanda yetu, fundenu yikuma yamaneni hela sonekenu kunsa. Iyi yikuma yikayikwasha hakuloñesha kufuntilaku, mpanji hela hakuya nakubiña. Nsañu yimunakutaña yikuyishika hamuchima neyi muhudikila nakutoñojoka yuma yimunatañi nawa mukwikala nampinji yakumusakilila Yehova hansañu yayiwahi yimunakudiza.

11. Mukandanyi walema wutwatela kutoñojokañahu, nawa kukatukwasha ñahi? (Talenu tumazu twaheshina.)

¹¹ Bayibolu himukanda walema wutwatela kutoñojokañahu. Hanu dinu mukela ñahi neyi ayikanisha kwikala naBayibolu? * (Talenu tumazu twaheshina.) Kwosi muntu wunateli kuyikañesha kutoñojoka hansañu yimwahembela kumutu, chidi neyi nsona yimwakeñesha hela tumina twaWanta. (Yililu 16:25) Spiritu yaNzambi yikayikwasha kwanuka yuma yimwadizili nawa yumiyi yikayikwasha kutwalekahu kwikala ashinshika.—Yowanu 14:26.

12. Munateli kutanjika ñahi kutaña Bayibolu mafuku ejima?

 ¹² Munateli kutanjika ñahi kutaña Bayibolu mafuku ejima? Mafuku amakwawu mumulungu munateli kutaña nikutoñojoka hakutaña Bayibolu kwamulungu nimulungu muShikola Yawakwakushimwina. Mafuku amakwawu munateli kutaña nikutoñojoka hanyikanda yahosha hachihandilu chaYesu, yaMatewu, Maku, Luka niYowanu kulonda mwiluki nsañu yahosheliyi Yesu niyuma yeliliyi. (Aroma 10:17; Aheberu 12:2; 1 Petulu 2:21) Tukweti mukanda walumbululaña mundonda yuma yamwekeni muchihandilu chaYesu. Iwu mukanda wukuyikwasha nankashi chimunakutaña nyikanda yahosha hachihandilu chaYesu.—Yowanu 14:6.

13, 14. Muloñadi wutwatela kutwalekelahu kutoñojoka hadi Yehova niYesu, nawa chumichi chikutuleñela kwila ñahi?

¹³ Kutoñojoka hadi Yehova niYesu kunateli kukwasha muntu kwikala mukwaKristu wapama nikwikala nachikuhwelelu chakola. (Aheberu 5:14; 6:1) Muntu wabulaña kutoñojoka chikupu hadi Nzambi wajimbeshaña wubwambu windi naYehova chovu chovu hadaha nateli nikukaana Nzambi. (Aheberu 2:1; 3:12) Yesu wasoñamishili nindi neyi tubula kutiya hela kutambwila Izu daNzambi “namuchima wawuwahi walumbuluka,” ‘twakadikwata’ wanyi nañovu. Ilaña ‘kwakama, nimaheta, nikutiya kuwaha nayuma yawumi wunu, kukutujika.’—Luka 8:14, 15.

¹⁴ Dichi tutwalekenuhu kutoñojoka haBayibolu kulonda tumwiluka chiwahi Yehova. Neyi tumwiluka chiwahi chikutukwasha kwimbujola chikupu yililu yindi nichekalayi. (2 Akorinda 3:18) Tunateli kutwalekahu kudiza hadi Tata yetu wamwiwulu nikumwimbujola haya nyaka. Chumichi chatuzañaleshaña hama!—Mukwakutaŋisha3 3:11.

15, 16. (a) Mwahetelañamu ñahi hakutoñojoka hadi Yehova niYesu? (b) Muloñadi chichakalilaña mpinji yikwawu kutoñojoka, nawa muloñadi wutwatela kutwalekahu kweseka?

¹⁵ Neyi mutoñojokaña hadi Yehova niYesu mukwikala neyena dakukeña chalala. Iyena dimukweti dikukolesha amanakwenu niantu imwawanaña mumudimu wakushimwina. Chimwatoñojoka cheliliyi Yehova hakuyinka ifutu damuloña daYesu, mukulemeshaña wubwambu wenu naNzambi. (Aroma 3:24; Yakoba 4:8) Manakwetu Mark waku South Africa washakamini yaaka yisatu mukaleya muloña wachikuhwelelu chindi, wahosheli nindi: “Tunateli kwesekeja kutoñojoka nakwenda maluña amawahi. Neyi tutoñojokaña hayuma yakuspiritu tukwiluka yuma yayivulu hadi Nzambi yetu, Yehova. Mpinji yikwawu neyi naneñi hela inakwakamena yuma yakumbidi, nanonaña Bayibolu nikutachika kutoñojoka nsañu yekala muNsona. Yankwashaña kwikala namuzañalu.”

 ¹⁶ Mukanu kaayi mudi yuma yayivulu yinateli kutuluwañesha chakwila tukukañanya kuwana mpinji yakutoñojoka haBayibolu. Manakwetu Patrick wamuAfrica, wahosheli nindi: “Nekalaña nayitoñojoka yayivulu mumutu, yayiwahi niyatama, yinatela kwambulaña mafuku ejima. Chineli natoñojokaña niyatama nalombaña kudi Yehova henohu kanda nitachiki kutoñojoka hezu daNzambi. Hela chakwila chinateli kunsendela mpinji henohu kanda nitachiki kutoñojoka hayuma yakuspiritu, natiyaña nami inakukundama kwakwihi naYehova. Kwila mwenimu kwankwashaña kutiyisha chiwahi chalala.” (Masamu 94:19) Twahetelañamu nankashi neyi tutañaña nikutoñojoka hansañu yekala muBayibolu mafuku ejima.—Yililu 17:11.

17. Munateli kuwana ñahi mpinji yakutoñojoka Hezu daNzambi?

¹⁷ Antu amakwawu atañaña, kutoñojoka nikulomba nantetemena, amakwawu hachayili. Hadaha enu mpinji yayiwahi kutaña Bayibolu himelela hela henohu kanda muyi nakukama. Amakwawu niwena atañaña Bayibolu nantetemena nihakukama. (Yoshuwa 1:8) Chuma chalema ‘hikuzatisha mpinji yenu chiwahi,’ dikwila nawu kuzatisha mpinji yenu kutoñojoka Hezu daNzambi mafuku ejima bayi yuma yamukunkulwayiku.—Aefwesesa 5:15, 16.

18. Bayibolu yakanadi antu atoñojokaña Hezu daNzambi mafuku ejima nawa elaña mwadizañawu?

¹⁸ Bayibolu yakana nawu Yehova wakakiswila antu ejima atoñojokaña Hezu dindi nawa elaña mwadizañawu. (Tañenu Masamu 1:1-3.) Yesu wahosheli nindi: ‘Antu akutiya mazu aNzambi hiyakwilamu anakooleki.’ (Luka 11:28) Dichi kutoñojoka Hezu daYehova mafuku ejima kukutukwasha kwila yuma yikuleta kalemesha kudi Nzambi. Neyi twila mwenimu, Yehova wukutukiswila chayinu mpinji nawa twakatambwila wumi wahaya nyaka mwituña dadiha.—Yakoba 1:25; Chimwekeshu 1:3.