Nzambi wamushikili kaprofwetu Abarahama nindi mwanindi wumu wakaleta nkisu kudi “nyuza yejima yahamaseki.” (Kutachika 22:18) Indi iwu mwana hinyi?

Hadi yaaka kwakwihi na 2,000 yinahitihu, Nzambi wamwinkeli Yesu wadiña mwana kaAbarahama ñovu yakukoña yihayamisha yamaneni. Iyi yihayamisha yamwekesheleña nawu nyunza yikatambwila yuma yayiwahi yamushiikiliwu Abarahama kuhitila mudi Yesu.—Añalija 3:14.

Yihayamisha yakoñeliyi Yesu yakwashili antu kwiluka nawu diyi atondeliwu kudi Nzambi kukiswila antu nawa yamwekesheleña chakamuzatishawu kudi Nzambi kukiswila antu haya nyaaka. Talenu yihayamisha yakoñeliyi Yesu chiyamwekeshaña yilwilu yindi yayiwahi.

Kwovwaha—Yesu wokili akata.

Mpinji yimu, mukwambumba wamulembeleli Yesu nindi amuuki. Yesu wamukwatili nawa wamulejeli nindi “Nakeñi!” Hohenohu mbumba yamufumini.—Maku 1:40-42.

Kuhana—Yesu wadiishili antu adiña nanzala.

Yesu hakeñeleña antu kuya nanzalaku. Kakavulu wadiishileña antu amavulu muchihayamisha kuhitila mukuvulisha mankendi ninshi janyanya. (Matewu 14:17-21; 15:32-38) Neyi anadi dehi, ejima wawu ekutileña nawa hashalileña yakuda yayivulu.

Wushona—Yesu wasañwili afu.

Yesu wasañwili mwana weyala wumu hohu wamumbanda nfwila wabulili muntu mukwawu wakumwakamena muloña “wamutiyilili wushona.—Luka 7:12-15.