Chakumwekesha Kukeña Kudi Wumu Namukwawu
Chineli wejima wetu twafuma kudi iyala watachi, Adama, tudi chisaka chimu. Hela chakwila antu amuchisaka atela kudikeña nikudilemesha wumu namukwawu, munanu mafuku chinakumwekana wanyi. Dichakeñañayi Nzambi wanyi.
CHAHOSHA NYIKANDA YAJILA HAKUKEÑA
“Chiña wakakeñaña mukwenu neyi chiwadikeñaña eyi aweni.”—ALEVI 19:18.
“Twalekenuhu kukeña ayilumbu jenu.”—MATEWU 5:44.
MWATALISHA KUKEÑA AKWETU
Talenu Nzambi chalumbululayi chekala kukeña Mwizu dindi ha 1 Akorinda 13:4-7:
“Kukeña kwadiwunjikaña nawa kwatiyilaña luwi.”
Chakutalilahu: Mwatiyaña ñahi neyi akwenu adiwunjika nanenu, ayitiyila luwi nawa abula kuyihilila nachiluwa chimunakoñi?
“Kukeña hikwatiyilaña ichimaku.”
Chakutalilahu: Mwatiyaña ñahi neyi akwenu ayitiyila ichima?
Kukeña “hikwakeñaña hohu kuditiyisha kwakweni kuwahaku.”
Chakutalilahu: Mwatiyaña ñahi neyi akwenu etejaña yitoñojoka yenu nawa mpinji yejima hiyakakelaña hohu kuyitoñojoka yawuku?
Kukeña “hikwahembaña nkunyiku.”
Chakutalilahu: Nzambi wanakenaña antu akoñeli nshidi anabalumuki. “Hakahosholaña hosholee-ku, hela kuhila hakahilaña hilee-ku.” (Masamu 103:9) Twatiyaña kuwaha neyi muntu itunaneñeshi yatwanakena. Dichi mpinji yejima twatela kwanakenaña akwetu neyi anatuneñeshi.—Masamu 86:5.
Kukeña “hikwazañalalaña nayuma yabula kuloñaku.”
Chakutalilahu: Neyi yuma yatama yitumwekena, hitwatiyaña kuwaha neyi akwetu anakuzañalala nakukala kutunakumonaku. Hitwazañalalaña neyi akwetu anakumona kukala, hela chakwila atwilili chatamaku.
Hakwila tudiluñisheña nkisu yaYehova, twatela kukeña akwetu muniyi njila hichikweti muloña nachidiwuku. Tunateli kwila mwenimu kuhitila mukukwasha akwetu anakaankili.
