Antu amakwawu atoñojokaña nawu Izu daNzambi anadihimpi. Kaprofwetu Isaya washimwini nindi Izu daNzambi “saña dakolela haya nyaka.” (Isaya 40:8) Yumanyi yinateli kutukwasha kwiluka netu yuma yashiikayi Nzambi ayihimpa wanyi?

Nzambi wukweti ñovu yakukiña Izu dindi nikukañesha kudihimpa. Kunyima, hampinji yasonekeleñawu, antu atuntulwileña nakusoneka munyivuñilu yikwawu adiña nakushinshika hezu-hezu munyikanda yajila kulonda amoni chikupu nawu kwosi chuma chiyanabombeliku, chiyanahimpiwu hela kufumishaku. Hela chochu, niwena ashileñamu tuyiluwa muloña antu ejima awanina wanyi.

Kudi mamanyusikiliputi amavulu aNyikanda Yajila yakushankulu. Neyi yimu yinambukiku chantesha, munateli kuyesekeja nayikwawu kulonda mumoni neyi chakwila mudi chiluwa.—Neyi munakukeña kwilukilahu nsañu yikwawu, talenu chibaaba chinakwila nawu “Has the Bible Been Changed or Tampered With?” ha jw.org.

Chakutalilahu, talenu nyikanda yakushankulu yatenañawu nawu Nyivuñilu yakuKaluñalwiji Kafwa, yawaniniwu kudi bedouins mwiyeñu kwakwihi naKaluñalwiji Kafwa mu 1947. Muniyi nyikanda yakushankulu mwadiña yibalu yaNyikanda Yajila yinashakami yaaka kubadika ha 2,000. Ankuluñaña esekejeli iyi nyivuñilu yakushankulu naNyikanda Yajila yitukweti makonu. Yumanyi yawaniniwu?

Antu adiza chikupu awanini nawu Izu daNzambi ditukweti makonu desekana nanyikanda yajila yakushankulu. * Chashinshikiliwu chikupu mumamanyusikiliputi akunyima elukili nawu yuma yitwatañaña muNyikanda Yajila makonu ayihimpa wanyi. Chumichi chinateli kutukwasha kwiluka netu Nzambi hetejeli Nyikanda yindi Yajila kuyihimpaku.

Iyi yuma yejimiyi yinateli kutukwasha kukuhwelela Izu daNzambi neyi tunakuditaña nikwiluka chikupu netu adihimpa wanyi. Ichi dinu tushinshikenu yuma yeliliyi Nzambi kudi atuprofwetu chiyinateli kutudizisha.