Kufuma tuku haleñeliwu antu, Nleñi yetu wahanjekaña nawu kuzatisha añelu niatuprofwetu. Kubombelahu, wafukwilihu nindi mazwindi niyuma yashiikayi antu ayisoneki. Nzambi washiika nindi tunateli kwikala namuzañalu kumbidi. Kudihi kumunateli kuwana yuma yashiikayi Nzambi makonu?

MuNyikanda Yajila dimwekala nsañu yatulejañayi Nzambi. (2 Timotewu 3:16) Nzambi wazatishili ñahi atuprofwetu kusoneka mazu indi? (2 Petulu 1:21) Nzambi washili yitoñojoka yindi mudi atuprofwetu, hakwila wena dinu ayisoneki. Dichamwekanaña nimakonu. Neyi mukwakulanda nakulandulula yamuleja nsoneki yindi kumusonekelaku mukanda, iwu mukanda twawumonaña netu anawusoneki kudi mukwakulanda nakulandulula. Munjila yoyimu, hela chakwila Nzambi wazatishili amayala kulonda asoneki mazwindi, ilaña yena diyi Nsoneki yaNsona Jajila.

Izu daNzambi dalema nawa wakeñaña antu ejima aditañeña nikuditiyishisha. Makonu ‘nsañu yindi yayiwahi yahaya nyaaka’ yinatandi kwejima kudi ‘akwanyuza yejima, akwanyichidi yejima, niakwamadimi ejima.’ (Chimwekeshu 14:6) Nawukwashu waNzambi, Nyikanda Yajila yanyikuma hela yayibalu yidi mumadimi kubadika ha 3,000, kwosi mukanda wukwawu watanda hanu heseki kubadika wena.