Yuma Yeliliyi Nzambi Kudi Atuprofwetu Chiyinateli Kutudizisha
Kunyima, Nzambi wayilejeli atuprofwetu indi mazu alema akundamini antu ejima. Komana awa mazu anateli kutukwasha kwiluka chitunateli kutambwila yuma yayiwahi yatushikayi Nzambi? Eña, anateli. Tushinshikenu yuma yitunateli kudizila kudi atuprofwetu ashinshika asatu.
ABARAHAMA
Nzambi hakweti chaambuku nawa wakeñaña kukiswila antu ejima.
Nzambi wamushikili kaprofwetu Abarahama nindi “yisaka yaheseki yejima yakakoolekela kudeyi.”—Kutachika 12:3.
Yumanyi yitukudizilaku? Nzambi watukeña nankashi nawa wakeñaña kukiswila yisaka yejima, amayala, ambanda nianyana, ejima amwovwahilaña.
MOSI
Nzambi wukweti wushona nawa wakiswilaña antu akeñaña kumwiluka.
Chinaweji wamwinkeli kaprofwetu Mosi ñovu yakukoña yihayamisha yamaneni. Hela chochu Mosi walombeli nindi: “Anleji dinu njila yeyi, kulonda nikwiluki, kulonda wuntoñi.” (Kwidika 33:13) Nzambi watiyili kuwaha yuma yalombeliyi Mosi nawa wamwinkeli maana akwiluka njila niyilwilu Yindi. Chakutalilahu, wadizili nindi Nleñi hiNzambi “wenzala nawushona, watoñaña antu.”—Kwidika 34:6, 7.
Yumanyi yitukudizilaku? Nzambi wakeñaña kutukiswila wejima wetu, amayala ambanda nianyana, neyi tuzata nañovu tumwilukisha chiwahi. Watuleja muNyikanda Yajila chitunateli kudifukula kudi yena nichatwakamenañayi.
YESU
Yesu wokileña yikatu yidi yejima
Neyi tumwiluka Yesu niyuma yelileñayi niyatañishileñayi, Nzambi wakatukiswila.
Mwizu daNzambi mwekala yuma yayivulu yahosha hachihandilu chaYesu niyuma yatañishileñayi. Nzambi wamwinkeli Yesu ñovu yakukoña yihayamisha yamaneni, yidi neyi kuuka amputa mesu, anjika matu, niayifwayi. Wasañwileña niafu. Yesu wamwekesheli yuma yakakoñelayi Nzambi antu kumbidi. Washimwini yuma yitunateli kwila hamuntu-hamuntu hakwila twakadiluñishi yuma yatushikayi Nzambi nindi: “Iwu diwumi wahaya nyaaka, wakukwiluka eyi Nzambi walala wumu hohu, ninowu iwatemesheli Yesu Kristu.”—Yowanu 17:3.
Yesu wadiña nawushona, niluwi. Amayala ambanda, atwansi niakulumpi, ahwilileña kudi yena, etejeleña iwu mutambi windi: “Dizilenu kudi ami, muloña ami nadikehesha nikudizoza mumuchima nawa mukuhizumuka.” (Matewu 11:29) Kwambukaku nawantu amakwawu adiñaku hayina mpinji abulili kulemesha ambanda, Yesu wayitiyilileña ambanda luwi, nawa wayilemesheli.
Yumanyi yitukudizilaku? Yesu wamwekesheli nindi wakeña antu nawa watudizishili chitunateli kudikeña wumu namukwawu.
YESU HINZAMBI WANYI
Nyikanda Yajila yahosha nawu “kudi etu kudi Nzambi wumu hohu” nawa Yesu Kristu wadiña hohu ntemesha waNzambi. (1 Akorinda 8:6) Yesu washimwini hatooka nindi Nzambi wamubadika yena nawa diyi wamutemesheli heseki.—Yowanu 11:41, 42; 14:28. *
^ para. 17 Neyi munakukeña kwiluka nsañu yayivulu kutalisha hadi Yesu Kristu, talenu chibalu 8 ni 9 mubuloshuwa yaReal Faith—Your Key to a Happy Life yidi ha www.pr418.com.
