MALWIHU EHULAÑAWU ANTAÑI. . .
Komana akwaKristu atela kwanakana Kirisimasi?
Antu amavulu mukaayi kejima akuhwelela nawu Kirisimasi hikwanakana ifuku dasemukiliyi Yesu Kristu. Hanu dinu, mwadihulahu dehi nenu akwaKristu amuyaaka nkulakaji yakusambila, adikundili chikupu naYesu, anakeneña Kirisimasi? Nawa mweluka chahosha Bayibolu kutalisha hamafuku akusemuka? Kuwana ñakwilu yanawa malwihu chikutukwasha kwiluka neyi chakwila akwaKristu atela kwanakana Kirisimasi hela nehi.
Chatachi, Bayibolu hiyashimunahu kwanakana ifuku dakusemuka kwaYesu hela kwawakudifukula ashinshika aNzambiku. Bayibolu yashimuna hohu antu ayedi anakeni mafuku awu akusemuka. Wejima wawu hiyadifukwileña kudi Yehova, Nzambi mwini Bayiboluku, nawa hampinji yanakeneñawu kwamwekeni yuma yatama. (Kutachika 40:20; Maku 6:21) Kwesekeja naEncyclopedia Britannica, akwaKristu akusambila akaanini “yidika yawusenji yakwanakana mafuku akusemuka.”
Bayibolu hiyashimuna jiika mpinji yasemukiliyi Yesuku. McClintock and Strong’s Cyclopedia yahosheli nawu “Ifuku dasemukiliyi Kristu hitunateli kudiwana muChitiyañenu Chachiha hela munyikanda yikwawuku.” Neyi Yesu wakeñeleña nindi atumbanji twindi anakaneña ifuku dasemukiliyi, kachi wayilejeli ifuku dasemukiliyi.
Chamuchiyedi, Bayibolu hiyashimunahu nawu Yesu hela atumbanji twindi anakeneña Kirisimasiku. Kwesekeja naNew Catholic Encyclopedia, kwanakana Kirisimasi kwatachi akushimuna “muChronograph of Philocalus, mukanda wawaRoma mwadiña nsañu yamuyaaka yamuma 336 [C.E.].” Mwamweni, iyi nsañu yadiñaku henohu Bayibolu ayisoneka dehi nawa mwahitili yaaka kufuma hafuntiliyi Yesu mwiwulu. McClintock and Strong wahosheli nindi “kwanakana kusemuka kwaYesu hilushimbi lwaNzambiku nawa hiyakwishimunahu muChitiyañenu Chachihaku.” *
Chidikanyi chayilejeliyi Yesu atumbanji twindi kwanakana
Hamu neyi Ntañishi Muneni, Yesu wayileja atumbanji twindi yuma yatela kulondelawu nawa iyi yuma ayisoneka muBayibolu. Hela chochu, hiyashimunamu kwanakana Kirisimasiku. Neyi chochabulaña kukeñayi ntañishi nindi akashikola abadikeña mushimbi, Yesu niyena hakeñaña nindi atumbanji twindi “abadikeña hayuma yasonekawu” muNsona Yajilaku.—1 Akorinda 4:6.
Kwambukaku, kwekala chidika chalema chanakeneñawu akwaKristu akusambila, kwanakana hela Chanukishu, chakufwa kwaYesu. Yesu yomweni wayilejeli atumbanji twindi mpinji yatela kwanakanawu nichiyatela kwanakanawu. Iji nshimbi kushilahu nikalenda yefuku dafwiliyi Yesu, ayisoneka muBayibolu.—Luka 22:19; 1 Akorinda 11:25.
Neyi chitunamoni, Kirisimasi hikwanakana ifuku dakusemuka nawa akwaKristu akusambila hiyanakeneña ichi chidika chawusenjiku. Kubombelahu, Bayibolu hiyashimuna nawu Yesu hela atumbanji twindi anakeneña Kirisimasiku. Kwesekeja nansañu yitunashimuni, akwaKristu amavulu mukaayi kejima eluka nawu Kirisimasi hichidika chawakwaKristuku.
^ para. 6 Neyi munakukeña kwilukilahu nsañu yayivulu kutalisha kwafuma Kirisimasi, talenu chibaaba chinakuhosha nawu “Malwihu Kufuma Kudi Antañi . . . Nsañwinyi Yalala Kutalisha haKirisimasi?” muKaposhi Kakutalila kaDecember 1, 2014-CW, kadi cheñi ha www.pr418.com.
Ifukwinyi dasemukiliyi Yesu?