“Yawaana yayiwahi yejima niyawaana yabadika kuwaha yejima, yafumaña mwiwulu, yenzaña hamaseki kufuma kudi Tata yetu wayejeji yamwiwulu.” (Yakoba 1:17) Hela chochu, iyi nsona yahosha hakuhana kwaTata yetu wamwiwulu, Yehova Nzambi. Dichi hayawaana yejima yahanayi Nzambi kudi antu, hadi chawaana chimu chabadika yawaana yejima. Hichawaananyi? Mazu aYesu ekala haYowanu 3:16, atulejaña nawu: “Nzambi wakeñeli nankashi kaayi chakwila watemesheli Mwanindi wumu hohu, kulonda muntu wejima wukumukuhwelela yakabuli kujilumuka, ilaña yakekali nawumi wahaya nyaaka.”

Chawaana chaMwana kaNzambi wumu hohu, dichu chawaana chabadika chikupu chitwatambwila wejima wetu kulonda tusubuki kuwunduñu wanshidi, wushinakaji nikufwa. (Masamu 51:5; Yowanu 8:34) Hela chakwila tukuzata nañovu, tukutwesha wanyi kudifumisha kuniwu wunduñu. Hela chochu, muloña wakukeña kwindi kwabadika, Nzambi watwinkeli chuma chakeñekeleña hakwila tufumi kuniwu wunduñu. Yehova Nzambi wayinka antu adizoza kukooleka kwakushakama haya nyaaka kuhitila mukuhana Mwanindi wumu hohu, Yesu Kristu. Hanu dinu, ifutu danyiloña hichumanyi? Muloñadi chidalemena? Nawa dinateli kutukwasha ñahi?

Ifutu danyiloña hiwuseya wakulanda nachu chuma chajimbeli hela kukuula nachu chuma kufuma muwunduñu. Bayibolu yalumbululaña nawu anvwali jetu atachi, Adama naEva, ayileñeli akadi nshidi, chakwila adi kushakama haya nyaaka nakudiluñisha wumi muparadisa hamaseki kushilahu nianyanawu adi kuvwalawu. (Kutachika 1:26-28) Chawushona, ajimbesheli kukooleka kwawu kwejima kuhitila mukudikaña naNzambi nawa ekalili akwanshidi. Chumanyi chafuminimu? Bayibolu yakulaña nawu: “Neyi chocheñilili nshidi mukaayi kuhitila mudi muntu wumu, nikufwa nikwena kwenjili kuhitila munshidi, dichi kufwa kwataandili kudi antu ejima muloña wejima wawu avulumwini.” (Aroma 5:12) Chatela Adama yayinki anyanindi wumi wawanina, ilaña wayinkeli nshidi nawa mwafumini kufwa.

Kutalisha hefutu danyiloña, chuma chiyafweteliwu chesakana nachuma chajimbeli. Chelili Adama yadikañi naNzambi mumushikila, wavulumwini nawa wajimbesheli kukooleka kwindi kwakwikala nawumi wawanina, wumi windi. Kwesekeja nachahosha Bayibolu, chumichi chaleñeleli anyana kaAdama kwikala muwuduñu wanshidi nikufwa. Dichi, kwakeñekeleña wumi wamuntu mukwawu wawanina, wumi waYesu, awuhanini neyi hichawaana kulonda wutufumishi muwuduñu wanshidi. (Aroma 5:19; Aefwesesa 1:7) Awuhanini muloña Nzambi wamwekesheli kukeña hakuhana ifutu danyiloña kulonda antu ekali cheñi nakukooleka kwajimbesheliwu Adama naEva, kwakushama haya nyaaka muparadisa hamaseki.—Chimwekeshu 21:3-5.

Kwesekeja namudimu wazata ifutu danyiloña, tuneluki chikupu netu chawaana chaNzambi chefutu danyiloña dichaleñela kwikali wumi wahaya nyaaka, chawaana chabadika yawaana yejima. Hakwila twiluki kulema kwanichi ‘chawaana chabadika kuwaha,’ tushishikenu chachihaniniwu nimunjila muyachihaniniwu, muloña chatwikwashaña kulemesha yawaana neyi chitwahanjeka muchibaaba chinafumihu.

Chantwinka yuma yitwakeñaña. Etu antu twekala  nampwila yakushakama haya nyaaka. (Mukwakutañisha 3:11) Hela chochu, halwetu hohu hitukutwesha kushakama haya nyaakaku, ilaña ifutu danyiloña datwinka kukooleka kwakushakama haya nyaaka. Bayibolu yahosha nawu: “Muloña wufwetu wanshidi, hikufwa, ilaña chawaana chahanañayi Nzambi, hiwumi wahaya nyaaka mudi Kristu Yesu Mwanta wetu.”—Aroma 6: 23.

Chatukwasha. Antu hiyadi kutwesha kuhana ifutu danyiloñaku. Bayibolu yalumbulula nawu: “Muloña wumi wawu kuwukuula wakala, chiña kuchileka chikupu haya nyaka.” (Masamu 49:8) Dichi, twakeñeleña wukwashu waNzambi hakwila nawu atukuuli kuwuduñu wanshidi nikukufwa. Ilaña “kuhitila mwifutu danyiloña dahaniniyi Kristu Yesu” Nzambi watwinka chuma chitwakeñeleña.—Aroma 3:23, 24.

Achihanini hampinji yatelela. Bayibolu yatulejaña nawu: “Muloña hampinji yitwadiña akwanshidi, Kristu watufwilili. (Aroma 5:8) Chineli achihanini “hampinji yitwadiña akwanshidi” ifutu danyiloña damwekeshaña Nzambi chatukeñayi chikupu hela chakwila twadiña akwanshidi. Hela chakwila twayandaña nayihuñu yafuma kunshidi, ichi chiwaana chatwinkaña kukooleka kwakwikala nawumi kumbidi.

Kumwekesha muchima wunahaninimu muntu. Bayibolu yashimuna chuma chaleñeleli Nzambi yahani Mwanindi neyi ifutu danyiloña nawu: “Muloña wachumichi, Nzambi wamwekesheli kukeña kwindi hadi etu hakutemesha mukaayi Mwanindi wumu hohu kulonda tukatweshi kwikala nawumi kuhitila mudi yena. Imu dimwatalisha iku kukeña, Nzambi diyi watukeñeli etu, bayi neyi yetu twamukeñeliku.”—1 Yowanu 4:9, 10.

Munateli kumwekesha ñahi nenu mwasakililaña hachawaana chabadika yawaana yejima? Anukenu mazu aYesu ekala haYowanu 3:16 ashimuna nawu chiña hohu antu ‘amukuhwelela’ diwu akabula kujilumuka. Kwesekeja nachahosha Bayibolu chikuhwelelu “hikwiluka chikupu netu yuma yitwachiñejaña yidi kwoku.” (Aheberu 11:1) Hakwila twikali nanichi chikuhwelelu, twatela kwiluka Izu daNzambi chikupu. Muloña wachumichi, tunayikoleshi netu ikalenu nampinji yakudiza hadi Yehova Nzambi, Mukwakuhana ichi ‘chawaana chabadika kuwaha.’ Ilukenu yuma yimwatela kwila hakwila mukadiluñishi wumi wahaya nyaaka wahaniniyi Yesu kuhitila mwifutu danyiloña daleñela mwikali niniku kukooleka.

Munateli kudiza nsañu yayivulu muBayibolu yidi hawebu sayiti ya www.pr418.com/lun. A Yinsahu jaYehova akutiyi kuwaha kuyikwasha. Tunakuhweleli chikupu netu chimukudizaña hanichi chawaana nihankisu jakaleta ichi chawaana chabadika, chikuleñela muhoshi nenu: “Namusakilili Nzambi kuhitila mudi Yesu Kristu Mwanta wetu!”—Aroma 7:25.