Kwiluka chuma chikuhanayi muntu neyi chawaana himudimu wakala chikupu. Hela chochu, muntu wunatambwili chawana diyi wunateli kuchimona kulema hela nehi. Chuma chinateli kulemeshayi muntu wumu, muntu mukwawu wukuchilemesha wanyi.

Chakutalilahu, kampululu nateli kumona nindi chozelu chakesi kawuneñu chakataka hichawaana chabadika chikupu. Kwambukaku, mukulumpi nateli kutiya kuwaha neyi yatambwila chawaana chikashimbula muchisaka chindi. Mumatuña amakwawu, akulumpi niatwansi akeñaña kuyinka yawaana yidi neyi mali kulonda ayizatishi kuyuma yejima yinakukeñawu.

Akwakuhana amavulu atwalekañahu kuhana neyi asambila kutoñojokahu henohu kanda ahani, hela chakwila chakala. Kuhana chawaana munjila yamuchidiwu chakala, ilaña neyi mwiluka yuma yikwawu yakeñekaña chikuyikwasha kuhana chawaana chachiwahi. Tushishikenu yuma yiwana yinateli kumukwasha muntu wunatambwili.

Yuma yafwilañayi muntu wunatambwili. Iyala wakuNorthern Belfast, wahosheli nindi nkinga yiyamwinkeliwu henohu wudi nayaaka 10 hela 11 hichawaana chamba kabula kavulamenayi. Muloñadi? Walumbulwili nindi “nayikeñeli chikupu iyi nkinga.” Awa mazu anakumwekesha nawu muntu nateli kulemesha chawaana neyi nachikeñi chikupu. Dichi toñojokenu hadi muntu imunakufwila kwinka chawaana. Toñojokenu neyi chakwila nateli kuchikeña hela nehi. Chakutalilahu, ankaaka jawantu atiyaña kuwaha kuya nakuhanjeka kumatala awanyanawu niejikulwawu. Afwilaña chikupu kuya nakuhempula anyanawu niejikulwawu mpinji yejima. Neyi anyanawu niejikulwawu ayisenda aya nakunooka, chumichi chayizañaleshaña chikupu.

Hakwila mwiluki chiwahi yuma yinakukeñayi muntu, mwatela kutiyililaña nakanañachima. Bayibolu yatukoleshaña nawu ‘nyakalenu kutiya, labenu kuhosha.’ (Yakoba 1:19) Hampinji yimukuhanjekaña nawamabwambu jenu hela nawantaña jenu, tiyililenuña chikupu nakanañachima yuma yakeñañawu niyabula kukeñawu. Chumichi chinateli kuyikwasha kuyinka chawaana chinakukeñawu.

 Yuma yinakaankiliyi muntu. Muntu nateli kusakilila hachawaana chinatambwiliyi neyi chakwila chikumukwasha. Munateli kwiluka ñahi chuma chinakukeñayi muntu?

Njila yayiwahi yakuhaninamu chawaana hikumwihula muntu yuma yinakaankiliyi hela chuma chinakukeñayi. Hela chochu, akwakuhana amavulu, azañalalaña wanyi neyi ela mwenimu, ilaña atiyaña kuwaha neyi amwinka muntu chawaana chabula kukuhwelelayi. Kubombelahu, amakwawu anateli kukasunuka kuhosha hayuma yakeñawu niyabula kukeñawu, ilaña hiyinateli kuyileja yuma yinakaankiliwuku.

Dichi, twatela kwikala asoñama kulonda twiluki chidi chihandilu chamuntu. Mwatela kwiluka neyi hikansi, mukulumpi, mujiki, wudi muwulu, adiseña, wafwisha, wazataña hela nehi. Dichi toñojokenu hachawaana chimunakukeña kuhana chichinateli kumukwasha muntu imunakwinka.

Hakwila mwiluki chawaana chikumukwasha muntu imunakwinka, ihulenuku antu eluka chihandilu chindi. Akuyileja yuma yinakukeñeka chikupu yabula kwilukawu antu amakwawu. Chumichi chikuyikwasha kuhana chawaana chinateli kumukwasha muntu, hela chakwila amakwawu hiyachikuhwelelaku.

Mpinji yatelela. Bayibolu yahosha nawu: “Izu dakuhoshela hadu hidinateleli, o chidawaha!” (Yishimu 15:23) Iyi nsona yinakumwekesha nawu kuhosha mazu hampinji yatelela, kukumukwasha muntu. Chochimu nayuma yitwelaña. Neyi chochazañalalañayi muntu namazu akuhoshela hampinji yatelela, chawaana nichena chakuhana hampinji yatelela chikumuzañalesha muntu wunachitambwili.

Ibwambu denu nakusumbula hela nakusumbuka. Mukwenzi wudi kwakwihi nakumanisha shikola. Adisumbula anakutalila mwana wukuvwalika. Haniyi mpinji dihu havula antu kuhanawu yawaana. Amakwawu chayipelelaña neyi asoneka mafuku hakekala oyu yuma chaaka chinakwinza. Chumichi chayikwashaña kwiluka chawaana chinateli kahanawu hanidi ifuku. *

Dichi, bayi neyi mwatela kuleka kuhana hanawa mafukuku. Mukwikala namuzañalu wafumaña mukuhana mpinji yejima. Hela chochu, mwatela kwiluka mwakukumina. Chakutalilahu, neyi iyala nakumwinka wamumbanda chawaana henohu anvwali jindi hosi, mumbanda nateli kutachika kutoñojoka nindi anakumukeña. Chiña neyi dichi chinakukeñayi weyala niyena, ilaña neyi nehi ichi chawaana chinateli kuleta kukala. Chumichi chikutuleñela tuhanjeki hachuma chaleñelaña muntu yahani.

Chuma chinamuleñeli muntu yahani. Kwesekeja nayakutalilahu yitunahanjekihu, henohu kanda muhani chawaana toñojokenu hadi muntu imunakwinka nichinateli kutoñojokayi. Munjila yikwawu, mukwakuhana watela kudishinshika yomweni. Hela chakwila amakwawu atoñojokaña nawu neyi ahana akuyilemesha, akwakuhana amavulu ahoshaña nawu ahaninaña hohu muloña wakutiya nsonyi. Ilaña amakwawu niwena akuhwelelaña nawu muntu wunatambwili wukuyilemesha chikupu hela kuyinkahu niwena chuma.

Munateli kwila ñahi hakwila muhani chawaana chenu namuchima wawuwahi? Bayibolu yahosha nawu: “Yuma yejima yimwelaña, yilenuña nakukeña.” (1 Akorinda 16:14) Neyi muhana namuchima wakukeña nawa munamwakameni muntu imunakwinka, chawaana chenu wukuchitambwila namuzañalu nawa mukuzañalala chikupu. Neyi muhana chakufuma hamuchima, Tata yetu wamwiwulu wukuzañalala. Kapostolu Pawulu wayihamekeli akwaKristu akushankulu  amuKorinda chakwashiliwu akwawu akwaKristu amuYudeya akabakeni. Pawulu wayilejeli nindi: “Nzambi wakeña muntu wahanaña namuzañalu.”—2 Akorinda 9:7.

Kutoñojoka hansañu yitunahanjekihu kukutukwasha kwikala namuzañalu wafumaña mukukwasha amakwawu. Yuma yitunashimuni kushilahu niyikwawu, yinazati mudimu weneni munkeñelu yaNzambi yakwila nawu muchidi wamuntu watela kutambwila chawaana chabadika. Tunayikoleshi kutaña chibaaba chinalondelihu kulonda mwiluki ichi chawaana chabadika.