Komana Yesu Wamwekeneña Ñahi?
Kwosi wekala namwevulu waYesu. Hakwatilihu mwevulu wudi wejima washiliyiku. Hela chochu, hadi yaaka yayivulu wamwekanaña hanyevulu yawakwakuleña amavulu.
Ilaña ana akwakuleña hiyamwilukili Yesu chamwekeneñayiku. Muloña wachisemwa, yuma yakuhwelela nsakililu niyitoñojoka yawantu ayilejeleña akwakusoneka, diyaleñeleli antu atachiki kumuleña Yesu. Dichi, nyevulu yawu yaleñeleñawu yaletesheli antu kutachika kumufwikija Yesu nintañishilu yindi.
Akwakuleña amakwawu amuleñeli Yesu neyi muntu wazeya nawa wukweti nsuki jajilehi niwevu hela waneña chikupu. Hanyevulu yikwawu, Yesu amumwekesha neyi himuntu wakubula kumona namesu, abutawu muchejeji, hela kumusha hahaleli nawantu adiyi nawu. Komana nyevulu yamuchidiwu chalala yamwekeshaña Yesu chekalayi? Tunateli kwiluka ñahi? Kushinshika nsañu yasonekawu muBayibolu, diyi njila yinateli kutukwasha kwiluka chamwekeneñayi Yesu. Diyi njila yinateli kutukwasha chikupu.
“WANLOÑESHELELI MUJIMBA”
Awa diwu mazu ahosheliyi Yesu mukulomba hampinji yamupapatishileñawu. (Aheberu 10:5; Matewu 3:13-17) Indi iwu mujimba wamwekeneña ñahi? Kufuma hamulejeliwu Mariya kudi kañelu Gabireli nindi: “Wakabaaba ivumu nawa wakavwala mwana weyala, . . . Mwana kaNzambi,” hahitili yaaka 30 henohu Yesu kanda yahoshi awa mazu. (Luka 1:31, 35) Dichi, Yesu wadiña muntu wawanina neyi chochadiña Adama hamuleñeliwu. (Luka 3:38; 1 Akorinda 15:45) Yesu amuleñeli neyi chochekala antu ejima nawa watela wadiña wadifwana namama yindi kaYudeya, Mariya.
Yesu wahembeleña wevu kwesekeja nachisemwa chawaYudeya kwambukaku nawaRoma. Iwu wevu wadiña hichinjikijilu chakalemesha; hiwadiña wawulehi nawa wakubula kulelaku. Chakadi nikujina Yesu wadiña nakulela wevu ninsuki yindi chachiwahi chikupu. Chiña hohu antu adiña aNazareta diwu abulileña kutewula nsuki yawu, chidi neyi Samisoni.—Kuchinda 6:5; Ansompeshi 13:5.
Hadi yaaka 30 yejimiyi, Yesu wadiña mukwakusoña, wazatishileña yitwa yayikulu yakusoña nachu bayi iyi yidiku katatakaku. (Maku 6:3) Dikwila nawu wadiña nañovu chikupu. Kumatachikilu amudimu windi wakushimwina, “wahañili antu ejima adiña nanyikoku niañombi mutembeli, nawa wamwañili mawayawaya awakwakuhimpa mali nikuhinuna jimesa jawu,” chakadi wakumukwashaku. (Yowanu 2:14-17) Chakeñekeleña kwikala wakola hakwila yazati iwu mudimu. Yesu wazatishili mujimba wuyamuloñesheleliwu kudi Nzambi hakwila yazati mudimu wuyamwinkeliwu kudi Nzambi, wahosheli nindi: “Natela cheñi kushimwina nsañu yayiwahi yaWanta waNzambi kunyisumba yikwawu, muloña ichi dichantemesheleliwu.” (Luka 4:43) Wazatili nañovu chikupu hakwila yendi heseki nakushimwina mwahita mukala waPalestine wejima.
“TWAYENU KUDI AMI, . . . NUKUYIHIZUMWISHA”
Nhoshelu niyuma yelileñayi Yesu yaleñeleli iwu mutambi wikali wakukokola antu adiña ‘nakukabakana nawa asendeli yiteli yalema.’ (Matewu 11:28-30) Muzañalu niluwi lwaleñeleli antu akeñeleña kuyidizisha kudi yena kukuhwelela muchikaninu chindi chakuyinookesha kuyihuñu. Niatwansi akeñeleña kwinza kudi Yesu, Bayibolu yahosha nawu: “Wakumbatili owu anyana anyanya.”—Maku 10:13-16.
Hela chakwila Yesu wayandili henohu kanda yafwi, ilaña hadiña wadineñaku. Chakutalilahu, wakwashili eyala namumbanda adisumbwileña muKana kuhitila mukubalumuna menji kwikala vinyu yayiwahi. (Yowanu 2:1-11) Hakupompa kukwawu wayilejeli antu kwanukaña yuma yadizileñawu.—Matewu 9:9-13; Yowanu 12:1-8.
Sweje-e dinu, ntañishilu yaYesu yakwashili antu kwikala nakuchiñeja kwawumi wahaya nyaaka. (Yowanu 11:25, 26; 17:3) Chelili atumbanji twindi 70 enzi nakumuleja yuma yamweniwu kwayiliwu nakushimwina, Yesu ‘wazañaleli nankashi’ nawa wahosheli nindi: “Zañalalenu muloña wakwila majina enu anayisoneki mwiwulu.”—Luka 10:20, 21.
“ILAÑA ENU, BAYI MWIKALA NEYI WENAKU”
Akulumpi jansakililu amumafuku aYesu akeñeleña jinjila jakuyilemeshelamu kudi antu nikulemesha nshimbi jawu. (Kuchinda 15:38-40; Matewu 23:5-7) Kwambukaku nawena, Yesu wayidizishili atumbanji twindi kubula kwikala “nawuswa hadi,” akwawu. (Luka 22:25, 26) Kafwampi, Yesu wayisoñamishili nindi: “Babalenu nawansoneki akeñaña kwendujola iku anavwali nyinkukumba nawa akeñaña nawu ayimusheña muyisankanu.”—Maku 12:38.
Yesu wadibombeleña mwizaza dawantu nawa mpinji yikwawu amwilukileña wanyi. (Yowanu 7:10, 11) Ninawatumbanji twindi 11 ashinshika, hadambwileña nawuku. Nfukeji Yudasi wamufufwili, “chinjikijilu,” chakumwilukilaku Yesu kudi akwakumujaha.—Maku 14:44, 45.
Hela chakwila nsañu yikwawu twayiluka wanyi, ilaña tuneluki chikupu netu Yesu hamwekeneña neyi chiyamuleñañawu kakavuluku. Chuma chalema nankashi kubadika chamwekeneñayi, hikwiluka chitwamumonaña chayinu mpinji.
“KUNASHALI HOHU KAPINJI KANTESHA, KAAYI HIKAKAMMONA CHEÑIKU”
Hadodina ifuku dahosheliyi awa mazu, Yesu wafwili nawa amujiikili. (Yowanu 14:19) Wahanini wumi windi “kwikala ifutu danyiloña dakukuula nachu antu amavulu.” (Matewu 20:28) Hefuku damuchisatu, Nzambi wamusañwili ‘namujimba wakuspiritu’ nawa “wamwitejeli kulonda amumoni” kudi atumbanji twindi amakwawu. (1 Petulu 3:18; Yilwilu 10:40) Yesu wamwekeneña ñahi hampinji yadimwekesheliyi kudi atumbanji twindi? Wamwekeni kwambukaku chikupu nachamwekeneñayi hakusambila, niatumbanji twindi adikundiliyi nawu chikupu hiyashikeneni kumwilukaku. Mariya Mandaleni wamumweni neyi himukwakuzata mwitempa niatumbanji twindi ayedi hayileñawu kuEmawusi, amumweni neyi himwenyi.—Luka 24:13-18; Yowanu 20:1, 14, 15.
Tunateli kumufwikija ñahi Yesu makonu? Kubadika hadi yaaka 60 kufuma hafwiliyi Yesu, kapostolu Yowanu wamweni chimwenu chaYesu. Yowanu hamweni muntu wafwa dehi hamutondu wakuyandishilaku. Ilaña wamweni “Mwanta wawanyanta nawa Nkaaka yawankaaka,” Mwanta waWanta waNzambi, wukujilumuna katataka ichi ayilumbu jaNzambi ejima, andemoni niantu atama kulonda yaleti nkisu jahaya nyaaka kumuchidi wumuntu.—Chimwekeshu 19:16; 21:3, 4.