A Don niMargaret * adiluñishili chiyayendeleliwu kudi mwanawu wamumbanda nichisaka chindi. Haloñesheleñayi yakuda yakukumishaku, Margaret wadiña mukwakuteleka, waloñesheli makaloni nichizi, yakuda yakeñeshawu ejikulwindi.

Chashakaminiwu kumesa, Margaret waleteli yakuda yatelekeliyi. Chajikwiliyi chifwiku, wahayamini muloña mwadiña hohu supu yachizi yitaata. Margaret wavulameneniku kushamu makaloni muchizi! *

Hela chakwila tunashakami yaaka yayivulu nawa tweluka yuma yayivulu, wejima wetu twakoñaña yiluwa. Tunateli kuhosha mazu amukunkulu, kwila yuma hampinji yabula kutelela hela kubula kushaku muchima. Muloñadi chitwakoñelaña yiluwa? Tunateli kwila ñahi naniyi yiluwa? Komana tunateli kuleya yiluwa yetu? Kumona yiluwa munjila yayiwahi kukutukwasha kwakula awa malwihu.

Neyi twila yuma yayiwahi, twatiyaña kuwaha kutuhameka nawa twazañalalaña. Neyi tukoña chiluwa, hela chakwila tunachililimu hohu wanyi nawa antu anachiluki wanyi, komana twetejaña netu tunakoñi chiluwa? Hakwila twiteji chiña tudizoza.

Neyi tusweja kudikuhwelela, tukutachika kuleya yiluwa yetu nikutwika akwetu nyiloña hela kukaana netu yetu wanyi. Yilwilu yamuchidiwu yaleñelaña muntu kumona kukala. Kukala kukumana wanyi nawa antu amakwawu akutaminamu. Hela chakwila tukutwikaña akwetu nyiloña yetu chayinu mpinji, twatela kwiluka netu kumbidi, “wonsu wetu twakadilumbulwila kudi Nzambi mutwelaña hamuntu-hamuntu.”—Aroma 14:12.

Nzambi wamonaña yiluwa munjila yayiwahi. MuMasamu, Nzambi amulumbulula nawu “wenzala wushona, waseha” nawa “hakahosholaña hosholee-ku, hela kuhila hakahilaña hilee-ku.” Weluka nindi twawanina wanyi nawa weluka kuzeyazeya kwetu, watumonaña nindi ‘tudi lunkuñu hohu.’—Masamu 103:8, 9, 14.

Kubombelahu, hamu neyi nvwali wukweti luwi, Nzambi wakeñaña etu anyanindi kumona yiluwa neyi chayimonañayi. (Masamu 130:3) Mwizu dindi mwenzala kufumba ninshimbi yatukwashaña neyi tukoña yiluwa hela neyi akwetu akoña yiluwa.

Kakavulu, neyi muntu yakoña chiluwa, waleyaña nakutwambila muntu wacheñi hela kukaana mwahoshayi nimwelayi. Neyi mazu enu ananeñeshi muntu, danakenenu kulonda mushakami mukuwunda. Mwakoñahu dehi chuma chatama chayineñesheli hela kuneñesha mukwenu? Chatela  mudineñeña hela kutwambila akwenu, kwila muzata nañovu kulonda mumanishi kukala nehi? Kutwambila akwenu kukuleñela hohu kukala kutwalekahu nikutohelaku. Mwatela kudizilaku nikumanisha kukala kumudi naku.

Neyi mukwetu yatuluwañesha, chaswayi kwila yuma yikumwekesha nawu natuluwañeshi. Chachiwahi kulondela kufumba kwaYesu Kristu kwakwila nawu: “Yejima yimunakeñi antu kuyililenu, ninenu nawa yililenu mwomumu.” (Matewu 7:12) Neyi mukoña chiluwa chimukumona enu nenu chamunkukulu, chakadi nikujina mukukeña akwenu ayanakeni hela avulameniku chikupu. Kwila mwanakena akwenu ninenu nehi?—Aefwesesa 4:32.

Dikishonali yimu yalumbulwili nawu yiluwa yenzaña muloña “wakukunkulula mwaluwa, kubula wunsahu walala hela kubula kuwundisha muchima.” Twatela kwiteja netu muntu wejima wamwekeshahu dehi iyi yuma yitunashimuni. Hela chochu, tukukeheshaku yiluwa neyi tulondela yishina yamuBayibolu.

Chishina chimu chidi haYishimu 18:13, chahosha nawu: “Muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.” Eña, kusambila kutiya nsañu yejima nikwiluka chakwakula kukutukwasha kubula kukunkulula swayi hela kwila chuma chatama. Neyi twiluka nsañu yejima chikutukwasha kubula kukunkulula mwaluwa hela kukoña chiluwa.

Chishina chikwawu chamuBayibolu chahosha nawu: “Neyi chikutwesheka, shakamenu chachiwahi nawantu ejima, mwejima mumukutweshela enu aweni.” (Aroma 12:18) Zatenu nañovu kulonda muleti kuwunda nikunuñañana. Neyi munakuzata nawakwenu, yitoñojokelenuñaku nikuyilemesha nawa yisakililenu nikuyikolesha. Chitwela mwenimu, tukudanakenaña neyi twila hela tuhosha mazu atama nawa tunateli kumanisha yiluwa yamaneni nikuyivulamena chikupu.

Dizilenu kuchiluwa chenu chimunakoñi. Chatela mukeñakeñeña njila yakuleyelamu yuma yimwahosha hela yimwela, mwatela kwiluka nenu diyi mpinji yakuhimpa yilwilu yenu. Komana mwakeñaña kumwekesha muchima wakudiwunjika, luwi nikudiyuula? Indi kwovwaha, kuwunda nikukeña? (Añalija 5:22, 23) Kuyuma yejimiyi, dizilenuku yuma yimwakabula kwila cheñi. Bayi mwikala akalishaku, nawa bayi musweja kushindamena hayuma yimunakukeñaku. Kudiyuula kukutukwasha kwiluka mwakukumina.

Kumona yiluwa munjila yayiwahi kukutukwasha kuumika kukala neyi kunamwekani. Tukwikala mukuwunda nawakwetu ninetu aweni. Neyi tudizilaña kuyiluwa yetu, tukwikala namaana nawa akatukeña chikupu. Hitwakaneñaña hela kuditwika nyiloñaku. Kwiluka netu akwetu niwena anakuzatila hayiluwa yawu, kukutukwasha kudikunda nawu. Nawa tukuhetelamu chikupu neyi twimbujolaña kukeña kwaNzambi nichanakenañayi chakufuma hamuchima.—Akolosi 3:13.

Komana chiluwa chaMargaret itwatena hakusambila chaleñeleli chisaka kubula kudiluñisha? Inehi mwani. Ejima wawu amweni yuma yabulilimu, sweje-e Margaret yomweni, ilaña adiili yakuda chakubula makaloni! Chimwahitili yaaka, ana ejikulwindi ayedi atachikili kuleja anyanawu yuma yamwekeni hampinji yayiliwu nakuhempula ankaka yawu, anukili chiyadiluñishiliwu hanidi ifuku. Hela chakwila chadiña hohu chiluwa!