Chuma Chimwatela Kudifuukwila Enu Aweni: Kutalisha haYuma Yayiwahi niYatama
Nshimbi jitwafuukulañahu kwovwahila muchihandilu chetu jakatukwasha kwikala namuzañalu hela nehi. Yehova Nzambi weluka chumichi. Dimuloña waweni wakeñelañayi nindi twovwahileña nshimbi jindi.
Yehova wakeñaña nindi twikaleña mukuwunda ninamuzañalu muchihandilu chetu.
“Ami Yehova, yami Nzambi yeyi, Yami inakukudizisha yuma yatela kukukwasha, Yami inakukulombola munjila yiwatela kwenda. Neyi chakwila wusha maana kunshimbi jami! Kuwunda kweyi kukwikala neyi kaloña nawa kuloña kweyi kukwikala neyi mankanda ahakaluñalwiji.”—Isaya 48:17, 18.
Hamu neyi Nleñi yetu, Nzambi weluka yuma yinateli kutuletesha kwikala nachihandilu chachiwahi. Watulejaña nindi tulondeleña wunlomboli windi muloña neyi twila mwenimu yuma yikutuwahila. Neyi twovwahilaña nshimbi jaNzambi, tukujinoka wanyi neyi muyuma yitunafuukuli mukufuma yuma yayiwahi. Mpinji yejima tukufuukulaña yuma yayiwahi, yikutuleteshaña kwikala mukuwunda ninamuzañalu.
Yehova hatulejaña kwila yuma yitukubula kutweshaku.
“Ilu lushimbi lwinnakuyileja dalelu lukuyikalila wanyi kulondela nawa hiludi kwakulehi nanenuku.”—Kuhituluka 30:11.
Hakwila tuhandeña kwesekeja nanshimbi jaNzambi, twatela kuhimpa chitwatoñojokaña nichitwelaña yuma. Hela chochu, Yehova hanakukeña nindi twili yuma yitukubula kutweshaku. Kafwampi, hamu neyi Nleñi yetu, weluka yuma yitukutwesha kwila. Nawa chitwamwiluka Yehova, tukwiluka netu “nshimbi jindi hijakalaku.”—1 Yowanu 5:3.
![AYinsahu jaYehova ayedi anakudiza Bayibolu namumbanda wumu, kuzatisha mukanda “[wa]Munateli Kwikala naMuzañalu Haya Nyaaka!”](https://assetsnffrgf-a.akamaihd.net/assets/m/2024007/univ/wpub/2024007_univ_cnt_2_xs.jpg)
Yehova wakana kukwasha antu ahandaña kwesekeja nanshimbi jindi.
“Ami, Yehova Nzambi yeyi, nakukwati kuchikasa cheyi chachidiilu, Yami inakukuleja nami, ‘Bayi wutiya womaku. Nakakukwasha.’”—Isaya 41:13.
Tunateli kuhanda kwesekeja nachakeñañayi Nzambi muloña wukutukwashaña. Nateli kutukwasha kuhitila Mwizu dindi, Bayibolu, datukoleshaña nikutukwasha kwikala nakuchiñeja.
Antu amavulu mwahita kaayi aneluki nawu kuhanda kwesekeja nanshimbi jamuBayibolu kunahimpi yihandilu yawu. Kwila mukeña kwilukilahu nsañu yikwawu hakufumba kwakuwahi kwekala muBayibolu nehi? Munateli kwila mwenimu neyi mutachika kutaña broshuwa yashindamena haBayibolu yaMunateli Kwikala naMuzañalu Haya Nyaaka! yidi ha jw.org nawa yawaana. Muniyi broshuwa mudi iyi nyitu:
-
Bayibolu Yinateli Kuyikwasha Ñahi?
-
Bayibolu Yatukwashaña Kuchiñeja
-
Munateli Kukuhwelela Yuma Yahosha Bayibolu?
Chimukusandujolaña Mwizu daNzambi, Bayibolu, mukwiluka nenu daleka kuzatika wanyi; “mpinji yejima [yashindamenewa], chayinu mpinji nihaya nyaaka.” (Isamu 111:8) Kwovwahila nshimbi jajiwahi jekala muBayibolu dichuma chinateli kutukwasha kwikala nachihandilu chamuzañalu. Hela chochu, Nzambi hakutukanjikija kwila chumichiku. (Kuhituluka 30:19, 20; Yoshuwa 24:15) Hichuma chitwatela kudifuukwila etu aweni muntu-himuntu.
