Yuma Yahosha Bayibolu Yinateli Kutukwasha Nankashi: Kutalisha haYuma Yayiwahi niYatama
Talenu Bayibolu chiyinakwashi antu amavulu nankashi muniyi yuma yiwana.
1. Wulu
Antu akweti yitoñojoka yashiyashana kutalisha hawulu niyuma yakeñekaña hakwila muwulu mwiikali muzañalu.
BAYIBOLU YAHOSHA NAWU: “Muntu-himuntu watela kukeña ñodindi neyi chadikeñayi yomweni; mumbanda niyena watela kwikala nakalemesha chikupu kudi nfumwindi.”—AEfwesesa 5:33.
MUCHATALISHA: Nzambi diyi watachikili wulu, dichi weluka yuma yakeñekaña hakwila adi muwulu ekali namuzañalu. (Maku 10:6-9) Neyi muntu-himuntu akamenaña yuma yinakukeñayi mwinikwindi chatela akameneña yuma yinakukeñayi yomweni, muwulu wawu mukwikala muzañalu. Iyala wakeña ñodindi wukumwekesha chumichi kuhitila mukumuhemba chiwahi nikumwakamena. Nawa mumbanda walemesha nfumwindi wukumwekesha chumichi kuhitila munhoshelu yindi nichelañayi.
BAYIBOLU CHIYAKWASHAÑA: AQuang nawaThi, akuVietnam, adiña namuzañalu wanyi muwulu wawu. Kakavulu aQuang amukabishileña mumbanda. Ahosheli nawu: “Nakameneneña wanyi chatiyileñayi Thi nawa kakavulu namusawileña.” AThi akeñeleña nawu adiseñi. Ahosheli nawu: “Natoñojokeli nami kwila nitwalekahu kumukuhwelela hela kumulemesha nfumwami nehi.”
Mukuhita kwampinji, aQuang nawaThi elukili chadizishaña Bayibolu nichakuzatisha AEfwesesa 5:33 muwulu wawu. AQuang ahosheli nawu: “Iyi vasi yankwashili kwiluka chinatela kwikala namuchima wakwakamena nikuletesha ñodami kumona nindi namukeña nawa namwakamenaña kumujimba nimuyitoñojoka. Chinatachikili kwila yuma muniyi njila, ñodami wankeñeli nawa wanlemesheleña.” Nawa aThi ahosheli nawu, “Muloña wakuzatisha nankashi mazu ekala haAEfwesesa 5:33 nikumulemesha nfumwami, chumichi chaleteshaña nfumwami kwila yuma yaleteshaña nitiyeña nami wankeña, wankiñaña nawa tudi mukuwunda.”
Neyi munakukeña kwilukilahu nsañu yikwawu yahosha hawulu, tañenu Awake! Na. 2 2018, yidi namutu nawu “12 Secrets of Successful Families” ha jw.org.
2. Chitwatela Kumonaña Antu Amakwawu
Kakavulu antu akabishaña akwawu antu muloña wachaambu chekowa, ituña, mmwekenu, kwitiya, indi kwiji hansañu jawuvumbi.
BAYIBOLU YAHOSHA NAWU: “Lemeshenuña antu ejima.”—1 Petulu 2:17.
MUCHATALISHA: Bayibolu yatudizishaña wanyi nawu tuheli antu ekowa dacheñi, akumatuña acheñi hela elaña wutumwa. Ilaña, yatukoleshaña nawu tulemesheña antu ejima, hichikweti muloña nachaambu chekowa, ituña hela yuma yikwetiwuku. (Yilwilu 10:34) Hela chakwila hitwakuhwelela muyuma yakuhwelelawu antu acheñi hela chelañawu yumaku, tunateli kuyimwekeshela luwi nikalemesha.—Matewu 7:12.
BAYIBOLU CHIYAKWASHAÑA: Daniel amudizishili nawu amoneña antu akuAsia nawu hiyayilumbu jetuña dawu. Waheleli antu ejima akuAsia nawa wavulileña kuyihosha kasawuntu hamesu awantu. Daniel wahosheli nindi, “Natoñojokeleña nami nakwashileña ‘ituña detu.’ Hinamweneña nami chuma chinatoñojokeleña hela chinelileña chadiña chatamaku.”
Mukuhita kwampinji, Daniel welukili chuma chadizishaña Bayibolu. Daniel wahosheli nindi: “Nahimpili yitoñojoka yami chikupu. Natachikili kumona antu neyi chayimonañayi Nzambi, dikwila nawu, wejima wetu twekala wowamu hichikweti muloña nakutwafumaku.” Daniel walumbulwili chatiyañayi chayinu mpinji neyi adiwana nawantu akwacheñi. Wahosheli nindi: “Hinashañaku maana nami niluki kunafuminiwuku. Ichi nakeña antu ejima nawa nikweti amabwambu akumatuña ashiyashana.”
Neyi munakukeña kwilukilahu nsañu yikwawu, tañenu Awake! Na. 3, 2020, yidi namutu nawu “Is There a Cure for Prejudice?” ha jw.org.
3. Mali
Antu amavulu afwilaña maheta kulonda akekali namuzañalu nichihandilu chachiwahi kumbidi.
BAYIBOLU YAHOSHA NAWU: “Maana akiñaña neyi chakiñaña mali, ilaña kuwaha kwakwiluka dikweniku: Maana ahembaña wumi wamuntu wayiheta.”—Mukwakutañisha 7:12.
MUCHATALISHA: Twakeñaña mali, ilaña hitunateli kukuhwelela netu anateli kutwinka muzañalu hela mbidi yayiwahiku. (Yishimu 18:11; 23:4, 5) Ilaña muzañalu walala nimbidi yayiwahi, jashindamena hakuzatisha maana afumaña kudi Nzambi ekala muBayibolu.—1 Timotewu 6:17-19.
BAYIBOLU CHIYAKWASHAÑA: Iyala wumu wejina daCardo, wakuIndonesia, washili muchima hakudilumbikila maheta. Wahosheli nindi: “Nadiña nayuma yejima yafwilañawu antu amavulu. Nayileña kumatuña acheñi nakulanda yuma yawuseya, nyotoka nimatala.” Ilaña iyi yuma yejima yadiñayi nayu yashimbwili wanyi. Cardo wahosheli nindi: “Añiyilili, nawa mali ejima inazatilili hadi yina yaaka yayivulu, ajimañeni hohu neyi mukulabula kwadisu. Nazatili nañovu hadi yaaka yayivulu hakwila niikali namaheta, ilaña haniyi mpinji naneñeli nankashi muloña nashalili hohu makasakasa nawa nadimweni kwikala wamukunkulwayi.”
Cardo watachikili kuzatisha kufumba kwamuBayibolu kwahosha hamali. Ichi hamanishaña ñovu jindi hakudilumbikila mahetaku, ilaña wafuukulahu kushakama chihandilu chapela. Wahosheli nindi: “Iheta dalala nawa dahaya nyaaka hikwikala nawubwambu wakola naNzambi. Ichi nawufuku nakaamaña tulu nawa nidi namuzañalu chikupu.”
Neyi munakukeña kwilukilahu nsañu yikwawu kutalisha hachahosha Bayibolu hamali, tañenu chibaaba chinakwila nawu “Komana Kutaña Shikola niKwikala naMali Kunateli Kuyikwasha Kukiña Mbidi Yenu?” muKaposhi Kakutalila Na. 3 2021, ha jw.org.
4. Kubulakana Kweyala naMumbanda
Antu akweti yitoñojoka yashiyashana kutalisha hadi antu atela kubulakana.
BAYIBOLU YAHOSHA NAWU: “Mwatela . . . [kuleka] wuvumbi. Muntu-himuntu hakachi kenu watela kwiluka chakuyuula mujimba windi yomweni mukujila nimukalemesha, bayi nalwisu nimpwila yawuvumbi yakubula kudiyuula neyi chelaña nyuza yabula kumwiluka Nzambiku.”—1 ATesalonika 4:3-5.
MUCHATALISHA: Bayibolu yashimuna muntu itwatela kutiyila mpwila yawuvumbi. Izu dakwila nawu “wuvumbi” munabombeli wujila, muntu wasumbula hela wasumbuka wunakukaama namuntu wabula kwikala mwinikwindi, wutumwa nikukaama nakanyama. (1 AKorinda 6:9, 10) Kubulakana kweyala namumbanda hichawaana chafuma kudi Nzambi, chakeñañayi hohu nindi eyala namumbanda adisumbula diwu atela kwila chumichi.—Yishimu 5:18, 19.
BAYIBOLU CHIYAKWASHAÑA: Mumbanda wumu wakuAustralia wejina daKylie wahosheli nindi: “Hamu neyi mujiki, natoñojokeleña nami neyi nikaama naweyala, akunkeña nawa nikwikala walema. Ilaña dichichamwekeni wanyi. Naditiyili kwikala wamukunkulwayi nawa chankatili nankashi kumuchima.”
Mukuhita kwampinji, Kylie wadizili nawa wazatishili yuma yadizishaña Bayibolu kutalisha hakubulakana kweyala namumbanda. Wahosheli nindi: “Ichi neluki nami nshimbi jaNzambi jekalilaku kulonda jitukiñeña kuyuma yinateli kutuletesha kutiya kuyeña nikuneña. Chayinu mpinji inakuditiya kwikala walema nawa wakeñewa, muloña inakwila yuma munjila yakeñañayi Yehova nindi twileña. Kuzatisha yuma yadizishaña Bayibolu kunañamwini kuyuma yatama nankashi!”
Neyi munakukeña kwilukilahu nsañu yikwawu, tañenu chibaaba chidi namutu nawu “What Does the Bible Say About Living Together Without Marriage?” ha jw.org.
Nleñi yetu watukwashaña kwiluka yuma yayiwahi niyatama. Hela chakwila mpinji yejima chapela wanyi kwovwahila nshimbi jaYehova jajiwahi, ilaña mukujovwahila mwafumaña yuma yayiwahi. Twatela kukuhwelela chikupu netu kujovwahila, kwakatukwashaña kwikala namuzañalu mpinji yejima.