Twatela Kukuhwelela Chahosha Bayibolu: Kutalisha haYuma Yayiwahi niYatama
Tunateli kukuhwelela wanyi chikupu netu muyuma yitunakufuukula munateli kufuma yuma yayiwahi neyi yishindamena hachitunakutiya hela chinakutiyawu antu amakwawu. Bayibolu yashimuna muloña waweni yuma chiyekalila muniyi njila, nawa yatukwashaña nankashi. Yatukwashaña kwiluka yuma yayiwahi niyatama, chuma chatukwashaña kwikala namuzañalu muchihandilu.
TWAKEÑAÑA KUTULOMBOLA KUDI NZAMBI
Yehova a Nzambi walumbulula muBayibolu nindi wayileñeli antu munjila yakwila ayilomboleña kudi yena, bayi kudilombola awenawuku. (Yeremiya 10:23) Dimuloña waweni wahaninayi nshimbi jajiwahi jekala muBayibolu. Wayikeña nankashi antu nawa hakeñaña nindi tufuukuleña yuma yinateli kutuneñesha hela kutuletela kukala muchihandilu chetuku. (Kuhituluka 5:29; 1 Yowanu 4:8) Chasweja kubadika, hamu neyi Nleñi yetu, wukweti maana nikwiluka kwamukwashaña kutufumba munjila yayiwahi. (Masamu 100:3; 104:24) Hela chochu, Nzambi hakanjikijaña antu nindi alondeleña nshimbi jindiku.
Yehova wayinkeli eyala namumbanda atachi, aAdama naEva, yuma yejima yakeñeleñawu hakwila ekali namuzañalu chikupu. (Kutachika 1:28, 29; 2:8, 15) Wayinkeli cheñi nshimbi japela jakeñeleñayi nindi ovwahileña. Ilaña, wayinkeli wuswa wakutondahu kwovwahila iji nshimbi hela nehi. (Kutachika 2:9, 16, 17) Chawushona, aAdama naEva atondelihu kulondela nshimbi jawu aweni chatela alondeli nshimbi jaNzambi. (Kutachika 3:6) Yumanyi yinafumimu? Komana antu chinakudifuukwilawu awenawu kutalisha hayuma yayiwahi niyatama, munakufuma yuma yayiwahi? Inehi. Kufuma tuhu kunyima, wunsahu wunakumwekesha nawu kudiwula nshimbi jaNzambi mwafumaña kuwunda nimuzañalu wahaya nyaaka wanyi.—Mukwakutañisha 8:9.
Bayibolu yashimuna wunlomboli wunateli kutukwasha kufuukula chiwahi, hichikweti muloña nankulilu yetuku. (2 Timotewu 3:16, 17; talenu chikasha chinakwila nawu “ Mukanda Wawantu Ejima.”) Talenu Bayibolu chiyelaña mwenimu.
Ilukilenuhu nsañu jikwawu chaletesha Bayibolu ayiteneña nawu “izu daNzambi.”—1 ATesalonika 2:13. Talenu vidiyo yaHinyi Nsoneki yaBayibolu? ha jw.org.
BAYIBOLU CHIYASHIMUNA CHEKALA WUNLOMBOLI WANZAMBI
MuBayibolu dimu mwekala nsañu yoloka yashimuna Yehova chelañayi nawantu. Mwekala nsañu yatukwashaña kwiluka yuma yamonañayi Nzambi nindi yayiwahi niyatama, yatukwashaña niyabulaña kutukwasha. (Isamu 19:7, 11) Twelukaña yishina yazatikaña mpinji yejima yatukwashaña kufuukula yuma yayiwahi hefuku-hefuku muchihandilu chetu.
Chakutalilahu, talenu kufumba kwekala haYishimu 13:20: “Muntu wunakwenda nawakamaana wakekala namaana, ilaña muntu wadikundaña nawayisupi wakamona kukala.” Ichi chishina chinakuzatika nimukaayi kamakonu neyi chichazatikileña kunyima. MuBayibolu mwenzala yishina yamuchidiwu yatukwashaña nawa yalema.—Talenu chikasha chinakwila nawu “ Maana amuBayibolu Anatwalekihu Kuzatika.”
Hela chochu, hadaha munateli kudihula nenu, ‘Nateli kukuhwelela ñahi chikupu nami wunlomboli wawuwahi wamuBayibolu wazatikaña makonu?’ Chibaaba chinalondelihu chakashimuna yuma yamwekeneni antu amakwawu.
a Yehova didu ijina daNzambi.—Isamu 83:18.
