Kwakwihi nawantu ejima, etejaña nawu yuma yikwawu yayiwahi nankashi hela yatama chikupu. Chakutalilahu, kujahañana, kukaama muntu chakumukanjikija nikukaama mwana wanyanya chakumukanjikija hiyilwilu yahelawu kudi antu amavulu mukaayi, ilaña kwila mwamuwahi, kumwekesha luwi nikutoñojokelaku hiyilwilu yahamekañawu nankashi antu mukaayi. Indi kutalisha hayuma yikwawu yamuchihandilu, chidi neyi iwatela kukaama nindi, kuhosha chalala hela chakukulisha anyana? Antu amavulu atoñojokaña nawu kwekala wanyi kufuukula mwamuwahi hela mwatama haniyi nsañu. Atoñojokaña nawu chuma chejima chinatondihu muntu kwila chetejewa. Kakavulu antu afuukulaña kwesekeja nachinakutiyawu wena niantu adiwu nawu kutalisha hanoyu nsañu. Komana kufuukula muniyi njila kudi hohu chiwahi?

Kakavulu twafuukulaña kwesekeja nachitunakutiya hela chinakutuleja chinleji chetu chamuchima kutalisha hayuma yayiwahi niyatama. (ARoma 2:​14, 15) Kufuma tuhu kuwansi, anyana elukaña neyi chuma chidi chiwahi hela chidi chiwahi wanyi, nawa adinkañamu nyiloña neyi akoña chuma chatama. Mukuhita kwampinji, chinleji chetu chamuchima chatachikaña kuzatikaña kwesekeja nayuma yitunadizi muchisaka chetu, kudi akwetu, kudi antañishi jetu, muchituñilu, mukudifukula nimuchisemwa. Neyi tunakufuukula, chinleji chetu chatulejaña neyi chakwila yuma yitunakufuukula yinesekani nayuma yitwalemesha hela nehi.

Kwiluka yuma yayiwahi niyatama kunateli kutukwasha kuyitoñojokelaku antu, kuyisakilila, kuyilila mwamuwahi nikuyimwekeshela wushona. Kunateli cheñi kutukwasha kubula kwila yuma yatama yikuneñesha antu itwakeña hela yinateli kutusawisha, kututiyisha nsonyi nikudinkamu nyiloña.

Komana kufuukula kwesekeja nachitunakutiya mwafumaña yuma yayiwahi mpinji yejima? Hachidiñayi mukwenzi, Garrick wafuukwilihu kuhanda chihandilu chateneniyi yomweni nindi, “Nelileña chuma chejima chinakeñeleña.” Hela chochu, nkumininaku welukili nindi kwila yuma yatoñojokeleñayi nindi yidi chiwahi mwafumineña yuma yatama. Watachikili kuhanda chihandilu chateneniyi mukuhita kwampinji nindi “chenzeli nayilwilu yatama, kuzatisha chatama yitumbu yashetana, kusheta nikwikala namadombu nankashi.”

Kubombela hachitunakutiya etu aweni, kakavulu twafuukulaña kwesekeja nachikumonawu antu amakwawu yuma yitukufuukula. Chumichi chinateli kutukwasha kudizila kuyuma yayimwekeneni nikumaana awu. Antu amuchisaka chetu, amabwambu niamuchituñilu atulemeshaña neyi twila yuma yamonañawu nawu yayiwahi.

Komana kufuukula kwesekeja nachinakutiyawu antu amakwawu mwafumaña yuma yayiwahi mpinji yejima? Hachidiñayi kansi, Priscila welili chuma chelileñawu nankashi akwawu atwansi nawa welili wuvumbi henohu kanda asumbuki. Hela chochu, welukili nindi kwila yuma yamweneña akwawu nawu yayiwahi hikwamuleteleleña muzañaluku. Wahosheli nindi: “Kwila yuma yelileñawu akwetu ejima kwantiyishileña kuwaha wanyi. Kwanletesheli kwila yuma yawusupi nawa kwashili wumi wami muwubanji.”

Neyi tunakufuukula kutalisha hayuma yayiwahi niyatama, chitunakutiya nichinakutiyawu antu amakwawu, chikutukwasha kufuukula chiwahi. Ilaña kuzatisha hohu iyi njila hampinji yitunakufuukula himwafumaña yuma yayiwahi mpinji yejimaku. Mpinji jikwawu tunateli kudiletela kukala etu aweni hela antu amakwawu muloña hitunakumona yuma yatama yakafuma muchuma chitunakufuukulaku. (Yishimu 14:12) Nawa kwosi wunsahu wamwekeshaña nawu yuma yitwalemesha hela yalemesha antu itudi nawu yayiwahi nankashi chakwila hitunateli kuyihimpaku. Hela chochu, yilwilu yikwawu yamweneñawu nawu yatama ichi antu amavulu anakuyimona nawu yayiwahi, nawa yilwilu yamweneñawu nawu yayiwahi ichi antu anakuyimona nawu yatama.

Kudihu chuma chinateli kutukwasha kufuukula chiwahi kutalisha hayuma yayiwahi niyatama? Kudihu lushimbi lwaluwahi lutunateli kulondela lwakabula kutuletesha kumona yuma yatama muyaaka yakumbidi?

Chakadi nikujina, kudi kutunateli kuwana nsañu yalema yabulaña kuhimpa nawa yashindamenewa yakwashaña muntu wejima kudi kwejima. Chibaaba chinalondelihu chikashimuna kutunateli kuwana nsañu yalema yinateli kutukwasha kwiluka yuma yayiwahi niyatama.