Anateleli Kulombolewa Kutuseloki twaMenji aWumi
Anateleli Kulombolewa Kutuseloki twaMenji aWumi
‘Mwana kamukoku . . . wakekala kabiña kawu, wakayilombola kutuseloki twamenji awumi.’—CHIMWEKESHU 7:17.
1. Indi Izu daNzambi dayilumbulula ñahi eniKristu awayishewa, nawa mudimwinyi wayinkeliyi Yesu?
IZU DANZAMBI dayilumbulula eniKristu awayishewa anakwakamena nyidimu yaKristu hamaseki nawu ‘nduñu wamaana nikashinshi.’ Chenjiliyi Kristu nakuhempula “nduñu” mu 1918, waweni awayishewa hamaseki nindi ashinshika hakuloñesha “yakudya” yakuspiritu “hampinji yatelela.” Dichi Yesu, Nkuluñaña, watiyili kuwaha kufumahu wayinkeli mudimu wakuhemba “yuma yindi yahetayi yejima.” (Tañenu Matewu 24:45-47.) Muniyi njila, henohu kanda atambwili wuswana wawu wamwiwulu, awayishewa akalakelaña akwawu akwakudifukula aYehova hamaseki.
2. Lumbululenu maheta aYesu.
2 Nkuluñaña wukweti wuswa hayuma yindi hela hamahetindi ejima nawa nateli kuyizatisha mwejima mwanafuukwiliyi. Mumaheta aYesu Kristu, Mwanta waswanyikawu kudi Yehova, mwabombela yuma yejima yakundama kuWanta niayilolu aWanta ahamaseki. Nawa munabombeli “izaza deneni” damwenuwu muchimwenu kudi kapostolu Yowanu. Yowanu hakulumbulula izaza deneni nindi: “Hinukumona izaza deneni dakadi kutwesha kudichinda kudi muntu, dawantu akunyuza yejima, akunyichidi yejima, akumatuña ejima, akumadimi ejima, anemani kumesu etanda dawanta, nikumesu aKana kamukoku, anavwali mahina akuluka atooka, anakwati nyitayi yanyikoma kumakasawu.”—Chimwekeshu 7:9.
3, 4 Kukoolekanyi kweneni kukwetuwu ezaza deneni?
3 Antu amunidi izaza deneni ekala hakachi kawantu atenenuwu kudi Yesu nindi ‘anyikoku indi acheñi.’ (Yowanu 10:16) Achiñejaña kushakama haya nyaka muparadisa hamaseki. Akuhwelela chikupu nawu Yesu “wakayilombolaña kutuseloki twamenji awumi” nawa “Nzambi wakakombola madilu ejima kumesu awu.” Hamuloña wakwikala naniku kuchiñeja, “anakosi dehi mahinawu, anayitookeshi namashi aKana kamukoku to-o.” (Chimwekeshi 7:14, 17) Akuhwelela mwifutu damuloña daYesu, dikwila nawu akweti ‘mahina atooka’ kumesu aNzambi. Ayitena kwikala aloña nawa amabwambu jaNzambi neyi chamutenenuwu Abarahama.
4 Kubombelahu, chineli Nzambi wamonaña izaza deneni dinakutohelaku dawanyikoku acheñi nindi daloña, izaza deneni dinateli kukuhwelela kupuluka hakajilumunawu dinu ituña damakonu kuyihuñu yeneni. (Yakoba 2:23-26) Anateli kuswila kwakwihi naYehova, nawa hamu neyi izaza, akweti chikuhwelelu chakupuluka njita yaAmagedoni. (Yakoba 4:8; Chimwekeshu 7:15) Hiyekala adimenaku, ilaña adikeñelaña kukalakela muwunlomboli waMwanta wamwiwulu niwawamana kwindi awayishewa hamaseki.
5. Indi amwizaza deneni akwashaña ñahi amana kwaKristu awayishewa?
5 EniKristu awayishewa anatalañani nawa anakutwelekahu kutalañana nekañesha dasweja dafumaña mukaayi kaSatana. Hela chochu, ashindamenaña hawukwashu wawalundanawu amwizaza deneni. Hela chakwila eniKristu awayishewa anakeheluku, ilaña izaza deneni chaaka nichaaka dinakutohelaku chikupu. Awayishewa hiyatweshaña kutala chipompelu chidi chejima hakachi kayipompelu 100,000 yawiniKristu yidi mukaayi kejimaku. Dichi, njila yimu mwayikwashilañawu awayishewa kudi anyikoku acheñi, yidi yakwila nawu amayala ashikahu chikupu amwizaza deneni akalakalaña hamu neyi aeluda amuchipompelu. Akamenaña yihita yaweniKristu ekala mumakasa ‘anduñu wamaana nikashinshi.’
6. Indi wukwashu watambwilaña eniKristu awayishewa kudi anyikoku acheñi awuprofweteli ñahi?
6 Wukwashu wakudikeñela wuyenkaña eniKristu awayishewa wafumaña kudi alundanawu anyikoku acheñi, awishimwineñahu dehi kudi kaprofwetu Isaya. Wasonekeli nindi: “Yehova nindi, Yuma yakalakalañawu aEjipitu, niyuma yalandujolañawu aEtiyopiya, yakenza kudeyi, yakekala yeyeyi, niaSheba amayala ataluka akenza kudeyi, akekala eyeyi; akakulondelaña munyima.” (Isaya 45:14) Muchifwikija, makonu eniKristu akweti chikuhwelelu chakushakama hamaseki anakulondela munyima yanduñu wawayishewa hamu Nizaza dawu Dalombolaña, dikwila nawu anakulondela munakuyilejawu. Hamu neyi ‘akwakukalakala akadi kufweta,’ anyikoku acheñi mukudikeñela namuchima wejima azatishaña ñovu jawu nimahetawu kulonda kukwasha mudimu wakushimwina wamukaayi kejima wenkeliyi Kristu atumbanji twindi awayishewa hamaseki.—Yililu 1:8; Chimwekeshu 12:17.
7. Indi antu amwizaza deneni ayidizishaña chumanyi?
7 Hampinji yinakukwashawu amana kwawu awayishewa, antu amwizaza deneni ayidizishaña kwikala chikuku chamuza wawuha wawantu akatwalekahu kuhanda hanyima yaAmagedoni. Chikuku chenichi chatela kwikala chakola, nawa antu amwizaza denidi atela kudikeñela nikulondela wunlomboli waNkuluñaña. MwiniKristu wejima amwinka kukooleka kwakumwekesha nawu anateli kumuzatisha kudi Mwanta, Kristu Yesu. Neyi muntu yekala nachikuhwelelu nikwovwahila makonu, dikwila nawu nakumwekesha nawu wakwovwahilaña hampinji yakamulombolañawu kudi Mwanta mwituña dadiha.
Izaza Deneni Damwekeshaña Chikuhwelelu Chawu
8, 9. Indi antu amwizaza deneni anakumwekesha ñahi chikuhwelelu chawu?
8 Anyikoku acheñi amabwambu jachipompelu chaweniKristu awayishewa amwekeshaña chikuhwelelu chawu mujila jashiyashana. Chatachi, akwashaña awayishewa hakushimwina nsañu yayiwahi yaWanta waNzambi. (Matewu 24:14; 28:19, 20) Chamuchiyedi, ovwahilaña wunlomboli wafumaña Kwizaza Dalombolaña mukudikeñela.—Aheberu 13:17; tañenu Zekariya 8:23.
9 Chamuchisatu, antu amwizaza deneni akwashaña amana kwawu awayishewa kuhitila mukuzatisha nshimbi jaYehova jaloña muchihandilu chawu. Afwilaña kwikala nayililu yidi neyi, “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.” (Aŋalija 5:22, 23) Makonu, antu amavulu hiyamwekeshaña iyi yililu mukuhanda kwawuku, ilaña amwekeshaña hohu “nyidimu yachisemwa.” Hela chochu, antu amwizaza deneni afwilaña kutondolwela “wuvumbi, wuzondu wamumuchima, kufwila yatama, kupesha, kupanda, kuhelañana, kuzuña, ichima, madombu, kukokwela kwenu, kudambola, kwitiya nsañu yaheña, lwisu, kusheta, yisela, niyuma yidi neyi iyi.”—Aŋalija 5:19-21.
10. Indi antu amwizaza deneni anakufwila kwila chumanyi?
10 Chineli hitwamanininaku, chinateli kwikala chakala kusoña nyikabu yakuspiritu, kutondolwela nyidimu yachisemwa nikukaana ikakeja dafumaña mukaayi kaSatana. Hela chochu, hitunakukeña kwiteja kudimbulula kwafumaña mukuzeya kwetu kwakumujimba, niyuma yatufuntishaña hanyima hakumwimbujola Yesu hela kukankila kwakumujimba kunateli kuluwañesha chikuhwelelu chetu nikubula kumukeña Yehovaku. Tuneluki netu Yehova wakakoña mwejima neyi chochakanayi, kupulwisha izaza deneni muyihuñu yeneni.
11. Tufutanyi twazatishañayi Satana kulonda yazeyeshi chikuhwelelu chaweniKristu?
11 Hela chochu, twekala asoñama muloña tweluka netu mukwankunyi netu diyi Diyabolu, nawa halekaña swayuku. (Tañenu 1 Petulu 5:8.) Neseki kuzatisha akwakusekesha niantu amakwawu kulonda tukuhweleli netu yuma yitwadizaña yakutwamba. Ilaña kafuta kenaka hikazatikañaku. Hela chakwila mpinji yikwawu makabisha afuntishili mudimu wakushimwina hanyima, kakavulu akolesheleña chikuhwelelu chawantu akabishileñawu. Dichi, Satana watwalekañahu kuzatisha njila yelukayi nindi yinateli kuzeyesha chikupu chikuhwelelu chetu. Wazatishaña njila yakutiyishilamu kutama. EniKristu akusambila ayibabesheli kutalisha hawubanji weniwu hampinji yayilejeluwu nawu: “Toñojokenu yeniwu [Kristu] wetejeli ntadi jawakwanshidi jasweja jadikañiluwu nindi.” Muloñadi? “Kulonda mubuli kuzeya nakuyekela munyichima yenu.”—Aheberu 12:3.
12. Indi kufumba kwekala muBayibolu kwakwashaña ñahi antu atalañanaña nakudimbulula?
12 Komana mwatoñojokahu dehi kuleka kumuzatila Yehova? Komana mpinji jikwawu mwatoñojokaña nenu munakañanyi? Neyi dichimwatoñojokaña, bayi mwiteja Satana kuzatisha yitoñojoka yeniyi kulonda yoyikañeshi kumukalakela Yehovaku. Kutaña Bayibolu chikupu, kulomba nankashi nikuwanikaña mpinji yejima kukupompa nikudikunda nawakwetu akakwitiya, kukakolesha chikuhwelelu chenu nikuyihemba kulonda mubuli “kuzeya nakuyekela munyichima yenu.” Yehova nakani kukwasha antu anakumuzatila kulonda ekali nañovu cheñi, nawa tunateli kukuhwelela muyikaninu yindi. (Tañenu Isaya 40:30, 31.) Shenu kanshinshi kunyidimu yawiniKristu. Tondolwelenu yuma yamanishaña mpinji nawa shindamenenu hakukwasha antu. Neyi mwila mwenimu mukuumika hela chakwila munakutalañana nakudimbulula.—Aŋalija 6:1, 2.
Kupuluka Kwihuñu naKwiñila Mwituña Dadiha
13. Indi antu akapuluka haAmagedoni akekala namudimwinyi?
13 Hanyima yaAmagedoni, mazaza awantu abula kuloña akasañuka akayidizisha nkeñelu yaYehova. (Yililu 24:15) Akadiza hefutu danyiloña daYesu; cheñi nawa akayidizisha chatela kukuhwelelawu mulambu weniwu kulonda akahetelumu. Akakeñeka kukaana yuma yakunyima yansakililu yakutwamba nikushiya nshakaminu yawu yakunyima. Akadiza chakuvwala wuntu wawiha welukishaña eniKristu alala. (Aefwesesa 4:22-24; Akolose 3:9, 10) Anyikoku acheñi akapuluka haAmagedoni akekala namudimu weneni. Wenowu muzañalu wukatiyawu hakumukalakela Yehova mudimu wamuchidiwu, chakubula ikakeja niyuma yahuwañeshaña yamukaayi kamakonu katama!
14, 15. Lumbululenu mpanji yikahanjekañawu antu akapuluka yihuñu yeneni nawantu aloña akasuñuka.
14 Ambuña aYehova ashinshika afwili henohu Yesu kanda yenzi nakukalakala hanu hamaseki niwena akekala nayuma yayivulu yakudiza. Akamwiluka Mesiya wakaninuwu, wadiñi nakuchiñejawu ilaña hiyamumwenuku. Henohu achidi amomi, amwekesheli mpwila yakuyidizisha kudi Yehova. Toñojokenu hamuzañalu nikukooleka kutwakatiya hakuyikwasha antu wenawa, sweje-e hakumulumbulwila Danyeli kushikijewa kwawuprofwetu wasonekeliyi ilaña helukili muwatalishiluku!—Danyeli 12:8, 9.
15 Hela chakwila akasañuka akadizila yuma yayivulu kudetu, ninetu twakayihulaña malwihu amavulu. Akatwileja nsañu yejima yekala muBayibolu ilaña yabula kushimunawu jiika. Toñojokenu hamuzañalu wutwakatiya hakudiza nsañu yakunama hadi Yesu kufuma kudi musonyindi Yowanu Mpapatishu! Yuma yitwakatiya kudawa ayinsahu ashinshika, chakubula nikujinooka chikatwileñela kwilukisha chikupu Izu daNzambi kubadika chitwadiluka makonu. Ambuña aYehova ashinshika afwa dehi—kubombelahu niantu ezaza deneni anakufwaña mumafuku akukuminina—akatambwila ‘kusañuka kwakuwahi.’ Atachikili kumukalakela Yehova mwituña dinakuyulewa naSatana. Wenowu muzañalu wakatiyawu hakutwalekahu mudimu wawu hampinji yayiwahi chikupu mwituña dadiha!—Aheberu 11:35; 1 Yowanu 5:19.
16. Kwesekeja nawuprofwetu, yuma yikekala ñahi Hefuku Dakusompesha?
16 Hampinji yimu Hefuku Dakusompesha, nyikanda akayenzununa. Kwesekeja nachahosha Bayibolu, akatuña chikuku chakusompeshela ejima amomi kulonda akamoni neyi anateleli kuheta wumi wahaya nyaka. (Tañenu Chimwekeshu 20:12, 13.) Hakumana Kwefuku Dakusompesha, muntu wudi wejima wukekala nampinji yeneni yakumwekesha ñimenu yindi kutalisha hansañu yawanta wakuleña kwejima. Komana wakwovwahila Wanta waNzambi nikwiteja Mwana kamukoku kukulombola ‘kutuseloki twamenji awumi’? Tahindi wukakaana kwovwahila Wanta waNzambi? (Chimwekeshu 7:17; Isaya 65:20) Haniyi mpinji, antu ejima hamaseki akekala nakukooleka kwakudifuukwila awenawu, chakadi nshidi yitwaswana kuyikañesha hela kaayi katama. Kwosi muntu wakajinooka wunsompeshi waloña waYehova wakukumishakuku. Chiña hohu antu atama diwu akajilumunawu haya nyaka.—Chimwekeshu 20:14, 15.
17, 18. Indi eniKristu awayishewa nianyikoku acheñi atalilaña Ifuku Dakusompesha namuzañalu wamuchidinyi?
17 EniKristu awayishewa makonu, chineli atelela kutambwila Wanta, atalilaña chikupu mpinji yakayulawu Hefuku Dakusompesha. Kwenoku kukooleka kwakekalawu naku! Kuchiñeja kweniku kwayisañumunaña kulondela kufumba kwaPetulu kwaheniyi kudi amana kwindi amunkulakaji yakusambila nindi: “Dikwatishenu nakukolesha kutambika kwayitambikiluwu, nikutonda kwayitondeluwu; muloña neyi mukwila yumiyi himwamba kadimbukaku. Neyi mukwila mwenimu akayenzulwila muwiñililu wakwiñila chachiwahi muwanta wahaya nyaka, waMwanta wetu yowu Chamwinu Yesu Kristu.”—2 Petulu 1:10, 11.
18 Anyikoku acheñi azañalelaña hamu nawamana kwawu awayishewa. Afwilaña kuyikwashaku. Hakwikala amabwambu jaNzambi makonu, asañumukaña kulonda kukalakala namuchima wejima mumudimu waNzambi. Hampinji Yefuku Dakusompesha, akekala namuzañalu wakukwasha kuloñesha kwaNzambi namuchima wejima hakayilombolañawu kudi Yesu kutuseloki twamenji awumi. Nkumininaku—dihu yakashikilamu kwikala ambuña aYehova ahamaseki haya nyaka.—Aroma 8:20, 21; Chimwekeshu 21:1-7.
Munakwanuka?
• Indi maheta aYesu abombelamu yumanyi?
• Munjilanyi antu amwizaza deneni muyakwashilañawu amana kwawu awayishewa?
• Kukoolekanyi nawa kuchiñejanyi kwadiluñishañawu amwizaza deneni?
• Mwatoñojokañahu hodi Hefuku Dakusompesha?
[Malwihu aKuzatisha haKudiza]
[Mwevulu wudi hefu 29]
Ezaza deneni anakosi mahinawu nawa anayitookesha namashi aKana kamukoku
[Mwevulu wudi hefu 31]
Yumanyi yimunakukeña nenu mwakeluki kudi antu ashinshika akasañuka?