Antu “Afuukwilawu Dehi” Anakwitiya

‘Wejima wawu afuukwilawu dehi kumona wumi wahaya nyaka hiyakwitiya.’ —YILILU 13:48.

1, 2. Indi eniKristu akusambila elili ñahi chiyatiyiliwu wuprofwetu waYesu wakwila nawu nsañu yayiwahi akayishimwaneña mwahita matuña ejima mwashakamawu antu?

 MUMUKANDA wamuBayibolu waYililu mwekala nsañu yayiwahi yashimunaña cheliluwu eniKristu akusambila hakutiya wuprofwetu waYesu wahosha nawu nsañu yayiwahi yaWanta akayishimwañena mwahita matuña ejima mwashakamawu antu. (Matewu 24:14) Akwakushimwina adikita, emikili chakutalilahu kudi antu adi kuyilondela. Hamuloña wakuzata nañovu kwawatumbanji twaYesu mumudimu wakushimwina muYerusalema, antu amavulu kubombelahu “mukanka wawatupristu waweni” adibombeli kuchipompelu chaweniKristu chamuyaaka nkulakaji yakusambila.—Yililu 2:41; 4:4; 6:7.

² Amishonali amuyaaka nkulakaji yatachi akwashili antu amavulu kwiteja winiKristu. Chakutalilahu, Fwilipu, wayili kuSamariya, nawa mazaza awantu atiyilili mwahosheliyi. (Yililu 8:5-8) Pawulu wahitili kumaluña amavulu nawalundanindi amboka-mboka, nakushimwina nsañu yawiniKristu kuKipirosi, mumaluña amuAsia Minor, Masidoniya, Greece, niItaly. Mazaza awaYudeya niaGriki ekalili eniKristu munyisumba mwashimwinineñayi. (Yililu 14:1; 16:5; 17:4) Titusa watwalekelihu namudimu wakushimwina muKereta. (Titusa 1:5) Petulu wadiña nakukalakala muBabiloni, nawa mpinji yasonekeliyi mukanda windi watachi, hakachi ka 62-64 C.E., mudimu wawiniKristu wakushimwina adiña awiluka dehi muPontu, nimuŊalija, nimuKapadosiya nimuAsiya, nimuBitiniya. (1 Petulu 1:1; 5:13) Iyi yadiña mpinji yakuzañalesha chikupu! EniKristu akwakushimwina amuyaaka nkulakaji yatachi adiña adikita chikupu chakwila ayilumbu jawu ahosheli nawu “anavunduli mpata yamunu mwishina.”—Yililu 17:6; 28:22.

3. Yumanyi yinakufuma munyidimu yawakwakushimwina aWanta makonu, nawa ichi chinakuyitiyisha ñahi?

³ Makonu, chipompelu chawiniKristu nichena chinakutohelaku chikupu. Komana chayikoleshaña wanyi neyi mutaña chileji chahachaaka chawaYinsahu jaYehova nikumona yuma yinakufuma mumudimu wakushimwina mukaayi kejima? Chatela chayizañaleshaña hakwiluka nenu akwakushimwina aWanta alombweli atudizi aBayibolu 6,286,618 muchaaka chamudimu cha 2007. Hela chochu, kuvula kwawantu awanikili kuChanukishu chakufwa kwaYesu Kristu mwaka wadi kunakumwekesha nawu antu akushika kuyihita ikumi abula kwikala aYinsahu jaYehova amwekeshili mpwila chikupu kunsañu yayiwahi hakuwanika kunichi chawija chalema. Ichi chinakumwekesha nawu kuchidi mudimu weneni wakuzata.

4. Antu amuchidinyi anakwiteja nsañu yaWanta?

⁴ Makonu, “wejima wawu afuukwilawu dehi kumona wumi wahaya nyaka” anakwiteja nsañu yalala neyi chochichadiña muyaaka nkulakaji yatachi. (Yililu 13:48) Yehova nakuleta antu amuchidiwu  mukuloñesha kwindi. (Tañenu Hagayi 2:7.) Yitoñojoka yamuchidinyi yitwatela kwikala nayu kutalisha hamudimu wawiniKristu hakwila tuzateña chikupu muniwu mudimu wakupompesha?

Shimwinenu Chakadi Chaambu

5. Antu amuchidinyi adi nawuselewa waYehova?

⁵ EniKristu amuyaaka nkulakaji yakusambila elukili nawu “Nzambi haakaminaña antu kumesuku; hakwila munyuza yejima, muntu wamwakamaña yena, welaña mwaloña, amutiyaña kudi Nzambi kuwaha.” (Yililu 10:34, 35) Muntu wunakukeña kwikala nawubwambu wawuwahi naYehova watela kusha chikuhwelelu mumulambu waKristu wefutu damuloña. (Yowanu 3:16, 36) Nawa Yehova wakeñaña nindi ‘antu ejima ahandi, eluki nsañu yalala chikupu.’—1 Timotewu 2:3, 4.

6. Chumanyi chiyatela kubula kwilawu akwakushimwina aWanta, nawa muloñadi?

⁶ Chikwikala chaheña kudi akwakushimwina ansañu yayiwahi kusompesha antu kushindamena hamuza, yifulu yakwetiwu, mmwekenu, nsakililu muyakulilawu, hela hayililu yikwawu yayileñelaña kwambukaku nawantu amakwawu. Toñojokenu hakapinji kantesha: Komana himwasakililaña hakwila nawu muntu wasambilili kuyishimwina chalala chamuNsona hamwekesheli chaambu kudenuku? Hanu dinu mukulekeladi kushimuna nsañu yatela kupulwisha wumi wamuntu watela kuyitiyilila?—Tañenu Matewu 7:12.

7. Muloñadi wutwatela kutondolwela kusompesha antu yitwashimwinaña?

⁷ Yehova watonda Yesu kwikala Nsompeshi; dichi, hitukweti ñovu yakusompesha antuku. Chumichi chinateleli, muloña kwambukaku naYesu, etu twatela kusompesha hohu “chakumona kwanamesu [etu]” hela “chakutiya kwanamatu [etuku],” ilaña Yesu weluka yitoñojoka yamukachi nimwafuukulaña muchima.—Isaya 11:1-5; 2 Timotewu 4:1.

8, 9. (a) Sawulu wadiña muntu wamuchidinyi henohu kanda yekali mwiniKristu? (b) Indi chuma chamumwekeneni kapostolu Pawulu chinakutudizishadi?

⁸ Antu anyichidi yejima anekali ambuña aYehova. Tukweti chakutalilahu chimu chachiwahi chaSawulu wakuTarusa, wekalili kapostolu Pawulu. Sawulu, kafwarisi, wadiña chilumbu mukwakudimbulula eniKristu. Muloña wakwiluka chikupu nindi hiyadiña akwakudifukula alala aYehovaku, chamuleñeleli kukabisha chipompelu chaweniKristu. (Aŋalija 1:13) Kwesekeja nammwenu yawuntu, wamwekeni neyi himuntu wakumininamu hakachi kawantu atela kwikala eniKristu. Ilaña, Yesu wamweni chuma chachiwahi mumuchima waSawulu nawa wamutondeli kulonda kukoña mudimu walema. Chafuminimu, Sawulu wekalili muntu wakola hakachi kawantu adiña adikita chikupu amuchipompelu chawiniKristu chamuyaaka nkulakaji yatachi.

⁹ Indi chuma chamumwekeneni kapostolu Pawulu chinakutudizisha chumanyi? Mwiluña detu, hadaha mudi mazanvu awantu amwekanaña neyi ayilumbu ansañu yetu. Hela chinakumwekana neyi hakachi kawu kwosi watela kwikala mwiniKristu walala, hitwatela kuleka kweseka kuhanjeka nawuku. Mpinji yikwawu niantu yimwatoñojokaña nenu hiyanateli kutiyilila kunsañu yetuku atiyililaña. Mudimu wetu wudi wakutwalekahu kushimwina kudi antu ejima ‘chakadi kuleka.’—Tañenu Yililu 5:42.

Nkisu Yikatambwila Anakushimwina ‘Chakadi Kuleka’

10. Muloñadi wutwatela kushimwina kudi antu atiyishaña woma? Shimunenu yakuhumañana yamwiluña denu.

¹⁰ Mmwekenu yamuntu yinateli kutwileñela kutoñojoka mwaluwa. Chakutalilahu, Ignacio, * watachikili kudiza Bayibolu nawaYinsahu jaYehova  henohu wudi mukaleya mwituña daSouth America. Antu adiña nakumutiya woma muloña wamadombu. Hamuloña wamadombu, akwawu atuñileña nikulandisha yuma kudi akwawu akwakaleya adiña nakutemesha Ignacio kulonda yatambuleña nyikudi kudi abulileña kuhana swañu. Hela chochu, Ignacio chatachikiliyi kuyilaku hambidi mukudiza Bayibolu nikuzatisha yuma yadizileñayi, iwu muntu wadiña wamadombu nawa wachinishileña akwawu wekalili muntu wamuwahi. Ichi kwosi wamutumaña nakutambula nyikudi, ilaña Ignacio wudi namuzañalu hakwiluka nindi chalala chaBayibolu nispiritu yaNzambi yinahimpi yililu yindi. Cheñi nawa wahamekaña akwakushimwina aWanta hakumudizisha chakubula chaambu.

11. Muloñadi wutwafuntilaña nakuhempula antu?

¹¹ Chuma chimu hakachi kayuma yatwileñelaña kutwalekahu kufuntila kudi antu yitwashimwinini nsañu yayiwahi, chidi chakwila nawu nshakaminu yawu niyililu yinateli kuhimpa nawa mwalala yahimpaña. Kufuma mpinji yitwayihempwili kakukumishaku, amakwawu atela kukata yikatu yamaneni, kuyihaña hamudimu, hela kufwisha muntu yakeñawu. (Tañenu Mukwakutaŋisha 9:11.) Kukala kudi mukaayi kunateli kuleñela antu kutoñojoka chikupu hampinji yawu yakumbidi. Yuma yamuchidiwu yinateli kuleñela muntu wadiña nakadiwu hela wakaanineña kwiteja munjila yayiwahi. Dichi dinu, bayi tuleka kushimwina amakwawu nsañu yayiwahi hampinji yidi yejima yatelelaku.

12. Twatela kuyimona ñahi antu yitwashimwina, nawa muloñadi?

¹² Antu ekala nachaaku chakwambula nikusompesha akwawu antu. Ilaña, Yehova wayimonaña antu hamuntu hamuntu. Wamonaña yililu yayiwahi yamuntu nimuntu. (Tañenu 1 Samweli 16:7.) Twatela kwilaña chochimu mumudimu wetu. Yakuhumañana yayivulu yamwekeshaña yuma yayiwahi yafumañamu neyi twikala nammwenu yayiwahi hadi antu ejima yitwashimwinaña.

13, 14. (a) Muloñadi payiniya wumu chabuliliyi kumusha maana mumbanda wawaniniyi mumudimu wamwiha? (b) Chumanyi chitwatela kudizilaku kunichi chuma chamwekeni?

¹³ Sandra, muhela nawa payiniya, wadiña mumudimu wakwitala nikwitala hachitutu chaCaribbean hampinji yawaniniyi Ruth, wadiña nakwanakana chikupu yawija yakwimba nakuhañana. Mapampa kayedi Ruth amuvwikili chibañula chawumwadi wachawija chakwimba nakuhañana hachina chitutu. Wamwekesheli mpwila chikupu mumazu amulejeluwu kudi Sandra, dichi atiyañeni kutachika kudiza Bayibolu. Sandra wanukaña nindi: “Chineñilili mukapeka kindi kakuhanjikila, namweni mwevulu weneni waRuth iku navwali nimahina ahachawija, niyikumba yatambwililiyi. Nakunkulwili nami muntu wamuchidiwu waya mpuhu nawa wasweja kudiñija muyawija yakwimba nakuhañana hatela kutwalekahu kukeña chalalaku. Dichi nalekeli kumuhempula.”

¹⁴ Chimwahitili mafuku, Ruth wenjili Kwitala daWanta, nawa kupompa chikwamanini, wamwihwili Sandra nindi, “Muloñadi chiwalekela kwinza nakundizisha?” Sandra wadanakeneni nawa atiyañeni kutwalekahu kudiza. Ruth wayililiku hambidi, nawa wafumishili nyevulu yindi yahachawija chakwimba nakuhañana, watachikili kuzata nyidimu yejima yachipompelu, nawa wadihanini kudi Yehova. Ilaña, Sandra wanukili nindi kukunkulula kwindi kwatachi kwadiña kwaheña.

15, 16. (a) Mukwakushimwina wumu chashimwininiyi ntaña yindi chumanyi chafuminimu? (b) Muloñadi nkulilu yantaña yetu chiyikubulila kutukañesha kumushimwina?

¹⁵ Antu amavulu ashimwinahu dehi antaña jawu abula kwikala aYinsahu niwena amona yuma yayiwahi yafumañamu, hela chakwila amwekanaña neyi hiyatela kutiyililaku. Talenu chakutalilahu, chaJoyce, muhela wawiniKristu wakuUnited States. Ishaku dindi weyala kufuma tuhu hawukwenzi windi akuminaña dakumukasa mukaleya. Joyce hakushimuna nindi, “antu ahosheleña nawu chihandilu chindi chamukunkulwayi, muloña walandishileña yitumbu yashetana, wadiña ikombi, nawa wakoñeleña yuma yikwawu yatama yayivulu. Hela chakwila, chamwekeneña neyi chadiña chakala, natwalekeluhu kumuleja nsañu yalala yamuBayibolu hadi yaaka 37.” Hamuloña wakutwalekahu kumukwasha ntaña yindi, amukiswilili chelili ishaku dindi yatachiki kudiza Bayibolu nawaYinsahu jaYehova nawa wahimpili chikupu chihandilu  chindi. Katataka, ishaku daJoyce amupapatishili hakupompa kwankambi muCalifornia, U.S.A. henohu wudi yaaka 50. Joyce wahosheli nindi: “Nadilili madilu amuzañalu. Natiyi kuwaha chikupu muloña hinalekeli kumushimwinaku!”

¹⁶ Hadaha munateli kujinooka kulejaku antaña amakwawu nsañu yalala yamuBayibolu muloña asweja kukakela munsakililu yawu. Ilaña Joyce hajinookeleña kumushimwinina ishaku dinduku. Hanu dinu, muntu nateli kwiluka ñahi jidi mumuchima muntu wacheñi? Hadaha owu muntu nakukeñakeña chikupu chalala chansakililu. Dichi dinu, bayi muleka kuleja muntu kukooleka kwakwiluka chalalaku.—Tañenu Yishimu 3:27.

Mukanda Wawuwahi Wakukwasha Kudiza Bayibolu

17, 18. (a) Indi yileji yinakufuma mukaayi kejima yinakumwekesha ñahi kulema kwamukanda waChumanyi Chacheni Chatañishaña Bayibolu? (b) Yakuhumañananyi yayiwahi yimwawana hakuzatisha iwu mukanda?

¹⁷ Yileji yinakufuma mukaayi kejima yinakumwekesha nawu antu amavulu akweti nyichima yakashinshi anakutambwila mukanda wakukwasha kudiza Bayibolu waChumanyi Chacheni Chatañishaña Bayibolu? Penni, muhela nawa payiniya wakuUnited States, welishili atudizi amavulu kuzatisha iwu mukanda. Ayedi adiña akulumpi akuluka yitembi muyipompelu yawu. Penni welukili wanyi chiyatela kwila hakutiya nsañu yalala yamuNsona yekala mumukanda waChatañishaña Bayibolu. Hela chochu, Penni wasonekeli nindi, “Muloña wakwila nsañu ayisoneka munjila yatiyakana, yapela nawa mukwihihisha, chayipeleleli kwiteja nawu nsañu yadizileñawu dichalala, chakadi kutaadika hela kujinooka.”

¹⁸ Mukwakushimwina wejina daPat, wamuBritain, watachikili kudiza Bayibolu namumbanda wadiña itunduka kufuma kuAsia. Iwu mumbanda watemukili mwituña dawu chelili nfumwindi nianyanindi awamayala ayisendi kudi amashidika ayilumbu, nawa hayimwenuhu cheñuku. Wumi windi wadiña hakatoña, mukala wawu awocheli, nawa amukanjikijili kwila wuvumbi kudi amayala amavulu mukulondashana. Yuma yejimiyi yamuleñeleli kutoñojoka neyi hatelela kutwalekahu kuhandaku, nawa kakavulu wakeñeleña kudijaha. Ilaña, kudiza Bayibolu kwamuleñeleli kwikala nakuchiñeja. Muhela Pat wasonekeli nindi, kulumbulula kwapela niyakutalilahu yekala mumukanda waChatañisha Bayibolu yamukwashili iwu mumbanda chikupu.” Iwu kadizi wanyakeli kuyilaku hambidi, washikilihu kwikala mukwakushimwina wabula kupapatishewa, nawa wafuukwilihu kupapatishewa hakupompa kweneni kwalondeleluhu. Chachiwahi nankashi kukwasha antu ashinshika kutiyishisha nikwikala nakuchiñeja kwekala muNsona.

“Bayi Tuleka Kwila Mwamuwahuku”

19. Muloñadi mudimu wakushimwina chiwunakukeñekela kuwuzata mukunyakashana?

¹⁹ Ifuku dejima dikuhita, kunyakala kwamudimu wetu wakushimwina nikwilisha atumbanji kwaswejelañaku. Antu amavulu anakukeña kumwiluka Nzambi atiyililaña nsañu yitwashimwinaña chaaka nichaaka. Ilaña, “Ifuku daYehova deneni didi kwakwihi,” chinakulumbulula nawu antu adi mumwidima wakuspiritu ‘anakutadañila kukutapewa.’—Zefwaniya 1:14; Yishimu 24:11.

20. Chumanyi chitwatela kufwila kwila wejima wetu?

²⁰ Awa antu tunateli kuyikwasha. Hakwila twili mwenimu, twatela kwimbujola eniKristu amuyaaka nkulakaji yatachi, ‘atwalekeluhu chakadi kuleka kuleja nikushimuna nsañu yayiwahi nawu Yesu diyi Kristu.’ (Yililu 5:42) Londelenu chakutalilahu chawu kuhitila mukumika hela kudi makabi, nakusha kashinshi ‘kukwilukisha kutañisha,’ kwenu nikushimwina antu ejima chakadi chaambu. “Bayi tuzeyaña nakwila mwamuwahuku,” neyi tukubula kuzeya, twakekala nankisu yayivulu yakwitejewa naNzambi.—2 Timotewu 4:2; tañenu Aŋalija 6:9.

[Tumazu twaheshina]

Mukwakula Nenudi?

• Anyi anakwiteja nsañu yayiwahi?

• Muloñadi chitwatela kutondolwela kusompesha antu yitwashimwinaña?

• Yumanyi yinakufuma mukuzatisha mukanda waChumanyi Chacheni Chatañishaña Bayibolu?

[Malwihu aKuzatisha haKudiza]

[Nyevulu yidi hefu 17]

Antu amavulu ashinshika anakwiteja nsañu yayiwahi